أنا صيدلي فاهم شغلي


✿ ❀ ✿ عاوز أقول كلمتين .. 

.

فيه معلومة بسيطة زى دى .. “ما ينفعش نفكّر فى الملينات مع مريض إمساك بيشرب كوباية مية يوميا .. الأهم من وصف الملينات منفردة , هو إننا ننصحه بالإكثار من شرب المية .. 3 لتر تقريبا” .. و دى مبنية على الـ Physiology ..

.

و فيه معلومة متوسطة التعقيد زى دى .. “أدوية زى الـ Beta Blockers ما ينفعش تتوقف مرة واحدة , عشان ده ممكن يسبب Cardiac tachyarrhythmias , بسبب إن الـ receptors حصل لها upregulation و تعرضت بشكل مفاجئ لكمية أعلى من الـ Adrenaline و اخواته ” .. و دى مبنية على الـ Pharmacology ..

.

و فيه معلومة معقدة شوية , زى دى .. “الـ Raloxifene بيشتغل على الـ Estrogen Receptors عند السيدات بشكل متضاد .. يعنى فى العظام , يعمل كـ agonist (زى الـ estrogen يعنى) , و فى الرحم و الثديين , يعمل كـ antagonist (يعنى عكس الـ estrogen) .. و ده ممكن يخليه يستخدم للسيدات اللى عندهم خلخلة فى العظام (أو هشاشة) , و ممكن كمان للحماية من سرطانات الرحم و الثدى .. و لكن فى 2007 , نزل عليه Black-Box warning إنه ممكن يسبب sudden death أو Deep Venous Thrombosis .. و لكن لحد دلوقتى لم يمنع تداوله من السوق , و ده لإن فيه حالات ممكن تكون محتاجاه .. و جرعته بتكون – فى أغلب الحالات 60 مجم يوميا .. 

.

اللى اقصده بقى من الـ 3 معلومات دول , هو الآتى : ..

.

فيه مريض ممكن ييجى لك فى الصيدلية , و هو فى أمس الحاجة للمعلومة الهايفة البسيطة اللى فى الأول , و مش حيهمه المعلومات المتوسطة أو المعقدة اللى ممكن تكون فرحان بيها لو كانت عندك بدون استخدام عملى على أرض الواقع .. بل إنك لما تقول له ع المعلومة الخاصة بشرب المية , ممكن تفيده أكتر من لو قلت له على كيفية عمل القولون فى جلسة شرح 20 دقيقة مثلا , عشان تشرح له طبيعة الـ Segmentation و الـ Peristalsis و الـ Pendular Movement ..

.

مش معنى تركيزنا على النوعين الأولانيين من المعلومات , يبقى ده معناه إننا حافظين لنا كلمتين و خلاص و قاعدين بنعيد و نزيد فيهم .. احنا بنركّز على معلومات تعتبر بدائية عند ناس كتير , و مع ذلك لما بنشوفهم على أرض الواقع , بنلاقى إنهم مش بيستخدموها مع مرضاهم , برغم أهميتها بالنسبة للمريض .. يعنى ببساطة احنا شغلنا Patient oriented مش Academic و خلاص .. و ده مش تسطيح للعلم الصيدلى ولا تفريغ له من الدرر اللى جواه ولا معناه إننا مش عارفين معلومة زى بتاعة الـ Raloxifene , .. و لكن ليس كل ما يعرف يقال .. 

.

معلومة الـ Raloxifene الأخيرة ممكن لو كانت اتكتبت بالعربى أو باسلوب أبسط من كده شوية , تتسبب فى ذعر و قلق و خوف عند اللى بيتابعونا و لهم أمهات بياخدوه مثلا , و ده ممكن يحصل فعليا بنسبة دلوقتى , و لكن ده للتدليل على إن مش معنى إنى معترض على صنف علاجى فى السوق إنى أتنبأ أو أطلب إعدامه فى ميدان عام , ليكون عبرة لباقى أنواع الأدوية الوحشة اللى ليها أعراض جانبية !! .. فيه ناس ممكن يكون الـ Raloxifene هو الحل الوحيد المناسب لها .. نمنعه ليه ؟؟ .. 

.

أنا لا أدعى الوصول إلى ذروة سنام العلم الصيدلى على الإطلاق , و اللى تلاقيه بيدعى ده , ابدأ شك فيه .. العلم فى رأيى مالوش أى قيمة بدون تطبيق .. و لو معايا قلم جاف قيمته المادية جنيه , ممكن بمعلومة صغيرة يكون سبب فى إنقاذ روح مصاب بالاختناق أو الحساسية , فى حين إنى لو حافظ كتاب الـ BNF بآخر إصداراته من الجلدة للجلدة , بدون تطبيق عملى على كده , فده لن يفيدنى فى شىء حقيقى تجاه مريضى , و ده حيسبب إحساسى بالتعالى عليه , و إحساسه بإنى متعجرف و قاعد فى برج عاجى و مش حاسس بآلامه أو ظروفه !! .. 

.

ما ينفعش أتلكك لطبيب على معلومة ممكن نكون مختلفين عليها , لمجرد إثبات وجهة نظرى .. و نفس الـ reference ممكن يؤيد وجهتى النظر فى سطرين ورا بعض .. يعنى ممكن أنا أقول لمريضتى إنها تاخد الـ raloxifene بعد وجبة فيها دهون كتير , لإن ده بيحسن من الامتصاص .. و الطبيب ممكن يقول إن ده مش ضرورى لإنه مش حيؤثر فى الفعالية .. ليه نختلف طيب ؟؟!! .. شيل من جواك الحتة بتاعة المريسة و التنطيط على خلق الله .. و دى المفروض تحصل لما تتعلم أكتر .. و لكن فيه ناس اتزرعت جواهم الحتة دى و مش بتطلع ولا بالطبل البلدى !! ..

المرجع هنا >> (Administration of raloxifene with a high-fat meal increases Cmax and AUC by 28% and 16%, respectively, although the effects are clinically insignificant. Therefore, raloxifene may be administered without regard to meals.

.

رابط البوست الأصلي : https://goo.gl/GyyDhL

انا صيدلي فاهم شغلي.jpg

ღϠ₡ღ دايما بنقول إن الصيدلى مش علم أكاديمى و كتب يتم حفظها من الجلدة للجلدة و خلاص .. و إنما #‏التطبيق على أرض الواقع لا يقل أهمية , بل ربما يزيد , لما نحب نفيد مرضانا بمعلومة خطيرة و محورية ممكن تنقذ حياته بإذن الله ..

.

و عشان كده جمعنا لكم الجزء الثاني من أهم المواقف اللي مرينا بيها بشكل واقعى داخل صيدليتنا العزيزة (بعد صدور و تجميع الجزء الأول منها داخل كتابنا حوارات صيدلانية😉 ), مع أنواع مختلفة من المرضى , .. و قدمنا أغلبهم لحضراتكم على شكل حوارات ممتعة , نرويها كما جرت بالفعل , و نخرج منها بمعلومة و ابتسامة فى نفس الوقت بإذن الله ..

.

و لازم أفكرك بإنك حتلاقى فى نهاية كل موقف#‏رابط_البوست_الأصلى له على صفحتنا على الفيسبوك , و اللى تقدر من خلالها تـ Share الموقف اللى يعجبك على حدة عندك , عشان تفيد بيه أصدقاءك .. المهم فى النهاية , ما تنساناش بدعوة حلوة🙂 .. اتفقنا ؟؟

أهم المواقف اللي مرت بينا في الصيدلية مؤخرا في 2015 :) 

✿ ❀ ✿ – لو فيها رذالة منى يا بيه , خد البت “تجعد” جنبك , زى اختك برضه ..

= تقعد فين يا حاج ؟ o.O .. الكرسى مفرِد , و هى – ما شاء الله – شكلها فى اعدادى ولا حاجة .. ربنا يبارك لك فيها .. بس معلش , مش حينفع ..

– هيهيهيهيهيهي .. دى فى رابعة ابتدائى يا بيه .. يعنى مش آنسة ولا حاجة ..😉 ..

= يا حاج مش على إنها آنسة أو مدام .. هى وزنها زيادة .. و انا كمان .. مش حينفع حتى تقعد على إيد الكرسى .. و بعد القطر مليان ناس رفيعين .. اعرض عليهم أحسن منى ..

– ما هو عشان “تبجى” جنبنا انا و امها بس , ما تتوهش فى الجطر ..

= o.O .. يا عم خدوها على حجركوا , مش حجرى انا >_< .. يا سبحان الله ..

– معلش , انا “متجّل” عليك , انا عارف .. بس والله احنا رايحين نكشفوا على امّها عند ضكتور العظام , بعد ما لفّت ع العيادات و سألت الحبايب فى البلد .. ادعى لها ..

= ربنا يشفيها و يقومها بالسلامة .. هى عندها إيه ؟؟

– رجليها بتوجعها , و “بتجول” إنها بتنجح عليها كدٍه ..

= قصدك بتنقح عليها .. 

– أيوة .. اسم الله عليك .. خد البت بجى , الله يرضى عليك ..

= يا عم سيبك من البت شوية .. أهى واقفة و ماشتكتش .. لو حبّت تيجى تقعد مكانى و اقف انا , مش مشكلة .. بس انا عاوز أعرف .. هى بتشتكى من أى حاجة تانية .. 

– زى إيه يعنى ؟؟ .. هو انت ضكتور عظام ؟؟

= لا يا سيدى .. انا صيدلى .. بس انا شايف إنها سمينة يعنى .. ممكن يكون فيه ضغط .. سكر .. أى حاجة تانية ..

– اه .. هى عندها الضغط عالى و بتاخد له علاج , .. و البتاع التانى ده اسمه يا عواطف ؟!! .. كورستول .. آه .. هو الكورستون ده ..

= الكوليسترول كمان عالى ؟؟!! ..

– أيوة .. بقى لها سنة بتتعالج منه , بس هى مهمّلة و مش بتحلل أول باوّل , مع إنها مواظبة ع العلاج يوماتى على الله ..

= و بتاخد له إيه ؟؟ .. يا رب تكون فاكر ..

– لا بصراحة .. احنا نسينا كيس العلاج فى البيت مع تذاكر الجطر كمان ..

= (على جثتى لو دفعت لكم كمان >_< ) .. طب ينفع لو فيها رذالة , تخليها تشاور لى و هى قاعدة كده , على مكان الوجع اللى ف رجليها ؟؟!! ..

– هنا فى الجطر يا ضكتور ؟؟ :p .. هيهيهيهيهيهيهيهي … =D

= آه .. هى عيبة ولا حاجة ؟؟!! ..

– لا أبدا .. انت زى اخوها … ارفعى الجلابية يا وليّة و ورّى الضكتور الحتـ………

=😮 .. ترفع إيه يا بنى آدم ؟؟!! .. من فوق الهدوم , الله يسترك .. .. .. .. طيب تمام .. هى الست عواطف عندها مشاكل فى الكلام ولا حاجة ؟؟!! .. هى مش بتنطق ليه ؟؟

– عيب يا ضكتور .. صورت المرأة عورة برضه ! ..

= (😮 !!!!!!!!!!!!!! o.O .. إيه الكائن الغريب ده ؟؟!! ) .. احم .. هو عورة لو اتكلمت بقلة أدب يا حاج .. و بعدين دى شكلها عندها 50 سنة ع الأقل .. من القواعد يعنى ..

– قواعد ؟؟!! .. يعنى إيه ؟؟ o.O ..

= احم .. اعتبر إنى ما قلتش حاجة:/ .. انطقى يا حاجة >_< .. الوجع بيروح و ييجى , ولا علطول ؟؟ .. و لون البول عندك إيه ؟؟ .. و الوجع جه من امتى ؟؟ .. و الدكاترة قالوا لك إيه بالنسبة له ؟؟ .. 

– أبدا يا اخويا .. بجى له مدة .. ست شهور كدى .. و بيزيد لما بامشى شوية أو حتى أجف حبتين ..:/ .. و الدكتور عندنا فى المستوصف عطانى مسكنات زى ما جال .. و فى الصيدلية ما عطانيش مسكنات , لكن عطانى كيس الفوار الاصفر ابو اتنين جنيه .. ده بقى مشيت عليه شهر كده يوماتى .. 

= شهر ماشية على كتافاتست ؟؟😮 .. و معدتك مستحملة كل ده ؟؟!! ..

– ما هو لما كنت باحس بشوية حموضة , كنت باكل خرطة جاتوه , بتريّحنى علطول ..

= o.O .. ده و انتى عندك كوليسترول ؟؟ (مرارتى >_< .. محتاج واحدة بلاستيك ضرورى !!) طيب برضه ما قلتيش .. لون البول عامل إزاى ؟؟

– عادى يا اخويا .. 

= (حاتشل >_< ) … عادى اللى هو إيه ؟؟ .. أصفر يعنى ؟؟ …

– لا .. أصفر إيه ؟؟ .. هو عامل زى .. زى .. زى .. زى اللون ده كده ..

=😮 .. و هو اللون ده العادى بتاعك ؟؟ .. العادى بتاعك #بنّى ؟؟ .. 

– آه و النعمة:/ .. 

= ما تحلفيش بالنعمة .. أهو ده اللى كنت خايف منه😦 .. 

– آه و العشرة دول:/ ..

= ما تحلفيش خالص >_< .. صادقة صادقة .. بس انتى كده مش محتاجة تروحى لدكتور العظام إن شاء الله ..

– (الزوج) .. إزاى يا ضكتور ؟ .. هو انت عالجتها ؟؟ .. ما هى لسه بتتوجع أهى .. 

= اسمع الكلام اللى حاقولهولك ده كويس .. دلوقتى مراتك بتاخد علاج للكوليسترول , هو اللى واجع لها رجليها كده , و مغيّر لها لون البول .. و بدل ما تروحوا لدكتور عظام , انتوا المفروض تروحوا لنفس دكتور القلب او الباطنة اللى رحتوا له زمان , عشان يغيّر لها العلاج , و يديها حاجة ما تعملش الكلام ده .. 

– يعنى المشكلة طلعت فى العلاج ؟؟ .. هو كان مغشوش ؟!!

= (صبرنى يا رب >_< ) .. لا مش مغشوش .. و لكن فيه ناس بتظهر عندهم الأعراض الجانبية دى , و بيحتاجوا يغيّروا الدوا بعد فترة من استخدامه .. 

– طب ما تجول لنا بالمرة ع العلاج الجديد و نبقى وفّرنا الكشف خالص , و ادخّل العيال بتمنه فيلم Avengers? , و نقلب اليوم فسحة ؟!! ..

= Avengers ؟؟ o.O .. لا يا حاج .. روح للدكتور يغيرهولك بمعرفته , انا حدودى لحد كده , و ما ينفعش أعدّيها ..

– ليه يا ضكتور ؟؟ .. ما انت عرفت اللى فيها أهو .. ييجى الضكتور اللى عندنا فى الأجزخانة , عشان يشوف الصيادلة اللى على حق ..

= الله يحفظك .. بس ما تستفزنيش أكتر من كده , عشان انا ممكن أعقّدك و انت قاعد دلوقتى , و اطلّعك م القطر انت و مراتك و بنتك , عندكوا أمراض الدنيا بحالها .. >_< .. 

– طب لو حبينا نسألك على أى حاجة فى الصحة و كده , ممكن تدينا رقمك , و مش حنزعجك كتير يعنى 3:) 

= ما هو واضح .. اتفضل .. زيرو مية .. تمانية تسعة .. ستاشر .. (سامحنى يا رب😥 ) .. اتنين اتنين واحد .. 

.

#حدث_بالفعل

#بتصرف_بسيط

#من_حوالى_سنة

رابط البوست الأصلي : https://goo.gl/IlVtVz

Ator

♪♫•*¨*•.¸¸¸¸.•*¨*•♫♪

✿ ❀ ✿ #عاجل_من_الإنبوكس (رسالتين فى بوست واحد) :) ..
.
سألتنى بحسرة : هو احنا ليه بقالين ؟؟ ..
.
فأجبت بسرعة : احنا مش بقالين .. و لكن فيه صيادلة (أيا كان عددهم) ارتضوا على نفسهم إنهم يكونوا بقالين .. و يتحججوا بظروف المعيشة و غلاء الأسعار و مصاريف البيت .. تلاقى الصيدلية فيها كروت شحن أكتر من الدوا , و ماكينة فورى شغالة أكتر من السنترال اللى فى آخر الشارع , و الصيدلى مش بييجى إلا ساعتين فى اليوم بالكتير , و لو جه يقف بالشبشب مع الزباااااين , و السيجارة فى بقه , و لا أجدعها صبى سمكرى فى ورشة !! ..
.
لكن احنا مش كده .. احنا صيادلة .. المريض عندنا له الأولوية , بيدخل الصيدلية , يلاقينا مهتمين بيه , و مظهرنا يدل على كده , و ابتسامتنا الحقيقية المتعاطفة , هى أول شىء بيشوفه مننا .. الدوا هو شغلتنا الرئيسية , و مستحضرات التجميل و الأكسسوارات , لا تقل عنه فى الأهمية , لإنها ممكن تشتغل على صحة المريض الخارجية .. صحة جلد و شعر و بشرة , و خلافه .. شىء ما نستعرّش منه ولا يخجلنا على الإطلاق .. و لكن غير كده هو اللى يخجل !! …
.
البقال ما يفرقش معاه صحة أو مرض الزبون .. المهم القرش ييجى و خلاص .. الأولوية عنده للفلوس , و إيراد آخر اليوم .. لكن احنا مش كده .. احنا صيادلة .. مهنتنا علم و تجارة فى نفس الوقت .. لكن الأولوية فيها لمصلحة المريض , ما أحملهوش علاج مش محتاجه , و لا أبيع له العلاج اللى مكسبى فيه أعلى و خلاص .. و لكن لما يثق فيا , حييجى لى من آخر الدنيا , عشان يسألنى بخصوص مرضه , أو يصرف روشتة محتاجها ..
.
لو الدنيا كلها اتتريقت ع الكلام ده , انا حافضل مصرّ عليه بإذن الله .. من 7 أو 8 سنين , والدى كان أول الناس اللى مش مصدقة إن اللى بنقوله ممكن يتحقق , و يبقى فيه عدد كبير من الصيادلة فاهمين رسالتهم , و كان بيقول لى #ريّح_نفسك , الصيدلى المصرى مش حيتغير .. و المواطن المصرى ما ينفعهوش غير كده .. و دلوقتى , بقى هو أول واحد مصدّق , لما بيشوف بعينيه الناس اللى بتيجى الصيدلية – بفضل الله – عشان تصرف روشتة من عند دكتور فى بلد تانية , أو مريض ييجى يسألنى على حالته , و يحكى لى تفاصيلها بالكامل , عشان أقدم له الـ Patient Counseling السليم المفصل تجاهها , و أدى له العلاج , أو أوجّهه ع الدكتور المناسب !! ..
.
اللى فى الـ Screen shot دى , رسالة من اليمن , لصديق عزيز , تكرم بمشاهدة إنتاجنا المصور مجانا على YouTube , بعنوان #رسائل_صيدلانية_يومية , و اللى بنفخر بإنها كانت سبب بسيط فى إن ألم والده يتوقف بسبب تناوله للـ Simvastatin , و اللى ممكن يسبب آلام فى العضلات , أوRhabdomyolysis , نتيجة كونه من الـ Statins , اللى ممكن يعملوا كده بالفعل فى عدد من الحالات .. لا أتوقع إنك لو قدّمت معلومة مشابهة لدى لمريضك داخل الصيدلية , إنه يدين بالولاء و الامتنان لصيدلى غيرك , إلا لو قدّم له معلومة على نفس مستوى الأهمية أو أعلى منها .. و دى رسالتى البسيطة : عاوز تكسب داخل الصيدلية , طوّر نفسك , لحد ما يبقى معاك النوع ده من المعلومات , فيد بيها مريضك , حتكسب ثقته , و من هنا تكسب ماديا بالحلال .. و برقىّ كمان ..
.
فى نهاية كلامى , عاوز أقول زى المؤلفة روندا بايرن , مؤلفة كتاب السر , و اللى باع ملايين – برغم عدم اتفاقى بالكامل مع محتواه – إلا إن المؤلفة قالت فى بدايته : إن فيه ناس كتير عرفت السر , و لكنها أخفته عن الآخرين , عشان تتميز بيه و تتفرد , و يموت السر معاها .. و لكن اللى احنا بنعمله هنا تجاه المهنة , هو إننا بنحاول نكشف السر للجميع , لإنه فعال و بيجيب نتيجة سريعة , بشرط تطبيقه باحترافية و ثقة و علم حقيقى .. و قبل كل شىء , نكون متوكلين على

الله , لما نيجى نقوم بكل خطواتنا داخل الصيدلية ..
رابط البوست الأصلي : https://goo.gl/E1p7O9
1

♪♫•*¨*•.¸¸¸¸.•*¨*•♫♪

 ✿ ❀ ✿ – الدوا ده موجود ؟؟

= دوفالاك ؟؟ .. لا .. الله يرحمه .. , هو و كل مثايله

– يووووووه .. فى دمنهور , قالوا لى “اسأل فى صيدلية أرياف حتلاقيه” .. و أدينى جيت و مش لاقيه !! ..

= معلش .. احمد ربنا .. فيه ملينات تانية لو الموضوع كان إمساك و كده .. أما لو كان “كبد” , فلازم نرجع للطبيب , عشان يكتب الحل الأنسب ..

– لا مش كبد ولا حاجة .. دى بنتى حامل بس و عندها إمساك و بواسير , و الدكتور كاتبهولها عشان يسهّل الولادة و كده ..

= لا يا حاج … هى كده المفروض تولد قيصرى أريح لو ده مناسب لها .. الولادة الطبيعية حتزود البواسير (انظر أول تعليق)

– طب و إيه البديل اللى ممكن تاخده ؟؟

= نقط بيكولاكس بـ 2 جنيه .. حاجة رخيصة و محترمة فى نفس الوقت .. بس انا عارف .. هى مش حتاخدها , و حتقول لك “مش عاوزة البديل” .. أنا عارف الحوامل بيفكروا إزاى:/ ..

– لا ما تقلقش .. انا حاقول لها إنى دخت ع التانى .. و الدكتور غيّره للنقط دى .. مش انت دكتور برضه ؟؟😀 .. انا عمرى ما اكدب و انا فى رمضان ..

= (إيه الصياعة دى يا حاج ؟؟😛 ) .. طب كويس قوى .. اتفضل يا سيدى .. هى فى الشهر الكام ؟؟ ..

– السابع ..

= طيب .. ربنا ييسّر لها على خير .. ابقى قول لها تشرب مية كتير بس , عشان ده مهم للتليين و للجنين برضه ..

– :O ..:/ .. احم احم ..

= :O .. >_< .. إوعى تكون صايمة يا حاج ؟؟!!! …

– اه والله كانت صايمة .. بس انا حاروح أفطّرها دلوقت .. ماعرفش كانت غايبة عنى فين حكاية المية دى ؟؟!! .. صحيح .. كل ما المية تزيد , الإمساك يقل ..

= قُلتِش انا حاجة ؟؟!! .. أديك جبتها لوحدك😉 .. الله يفتح عليك ..

– دى كانت راسها و ألف سيف إنها تصوم , و أنا اقول لها “يا بت معاكى رخصة .. افطرى” , تقول لى “أبدا” .. لكن دلوقتى عرفت حاقنعها إزاى إن شاء الله ..

= الله يفتح عليك و يهديها يا حاج .. و يتمّ لها على خير ..

.

#أنا_صيدلى_فاهم_شغلى

#الصيام_للقادرين_عليه

رابط البوست الأصلي : https://goo.gl/MxAyTX

♪♫•*¨*•.¸¸¸¸.•*¨*•♫♪

✿ ❀ ✿ #بوست_لإنقاذ_الحياة_من_اليوم

#بوست_للّى_مش_بيقولوا (هو انا لسه حاقرا كل ده ؟:/ ) ..

.

– السلام عليكم يا دكتور

.

= و عليكم السلام و رحمة الله و بركاته .. إزيك يا حاج جمعة ؟🙂

.

– الحمد لله .. كل سنة و انت طيب .. معلش حنقوّمك من ع الفطار .. عاوزين نحلل سكر بس ..

.

= من عينيا🙂 .. منظّم سكّرك كويس و مواظب فى الأكل و العلاج تمام ؟؟

.

– والله , مش قد كده يا دكتور .. النِفس لما بتروح لحاجة , ما بتقدرش تمنعها ..

.

= يظهر إنك مش حترتاح إلا لما تتغزغز بإبر الإنسولين😉 .. انت ما بقالكش كتير عندك سكر ..

.

– تف من بقك يا دكتور .. إنسولين إيه ؟؟ :O .. دول همّا 8 شهور بس !! .. و بعدين , ما انا كنت جاى عشان أعرف منك أصوم إزاى و كده

.

= تصوم ليه يا حاج جمعة ؟؟!!🙂 .. انت ليك رخصة إنك تفطر , و تطعم بداله زى ما الدين بيقول ..

.

– أفطر ؟؟ o.O :O .. ده انا أموت و ما افطرش .. هو أيام رمضان تتعوض ؟؟😦

.

= (آها .. دى خناقة كل سنة .. استعننّا ع الشقا بالله) .. آه تتعوّض يا حاج جمعة .. ربنا يفرح بيك لو فطرت , أكتر مما يفرح لو صمت فى رمضان و انت مريض و عندك السكر ..🙂

– بس انا حاسس إنى أقدر أصوم و أبقى كويس ..😦

.

= دى مش بالإحساس يا حاج😀 .. فيه حاجة اسمها جهاز تحليل سكّر .. و القراية اللى طالعة قدّامى 236 مجم / دل .. يعنى السكر عالى .. و انت بتاخد أماريل 4 مجم أصلا .. و دى فى حد ذاتها مصيبة ..:/

.

– ليه بس كفى الله الشر ؟؟!! :O

.

= مصيبة لإن صيامك السنة دى لمدة 16 ساعة يوميا من غير أكل و مية , معناه إنك ممكن تدوخ خلال دقايق فى وسط النهار , بسبب نقص مستوى السكر فى دمّك , و طبعا سعادتك مش حترضى تفطر , فممكن تروح فيها والعياذ بالله >_< .. و لو فضلت عايش , حتيجى ع الفطار و انت مفجوع ع السكريات😉 , و مش حتحرم نفسك منها , فتلاقى سكّرك بقى فى السما , و ممكن تدخل فى غيبوبة سكر ما تخرجش منها إلا بعد العيد ولا حاجة .. ساعتها تبقى حلو و جميل و بترضى ربّنا ؟؟ .. ربنا رايد ده منك ؟؟!! .. >_<

.

– بصراحة كلام مقنع يا د. أحمد .. طب لو كان سكّرى متظبط ؟؟😛

.

= اللى سكّره متظبط , هرموناته متظبطة من غير أدوية , و إنسولينه بيطلع من البنكرياس إلهى كده , بشكل تلقائى زى ما الكتاب بيقول , من غير ما سكّره يقل على مدار الصيام , أو يرتفع بعد الفطار !! .. انت مصاب بحاجة تمنع ده يا حاج جمعة:/ .. بجانب إن ربنا ما أمرناش إننا ننام طول اليوم أثناء الصيام , بالعكس , انت لو قررت تاخد أجازة و تنام فى بيتكم , عشان تصوم و انت عندك سكّر , تبقى عصيت ربنا مرتين >_< .. المرة الأولى عشان مش حتحقق مبدأ الخلافة فى الأرض و التعمير فيها , و المرة التانية , عشان ما سمعتش الكلام و صمت و انت تعبان .. و ما تنساش إنك بتشتغل فى الشمس كل يوم .. يعنى محتاج مية ..

.

– طب ما هو اللى ما عندهوش سكّر بيصوم و بيعطش , اشمعنى انا ؟؟!!

.

= (صبّرنى يا رب >_< ) .. اللى ما عندهوش سكّر , بيقدر يحتفظ بالمية فى جسمه أكتر منك يا حاج جمعة , لكن عشان انت عندك السكر , فالسكّر بياخد المية اللى بتشربها , و ينزل بيها فى البول بكميات كبيرة .. , عشان همّا الاتنين بيحبّوا يمسكوا فى بعض , فتلاقى نفسك عطشت جامد , و ممكن تخش فى جفاف أثناء الصيام لا قدر الله .. و انا كده أرضيت ضميرى معاك و نصحتك لوجه الله , و لو عاوز تسمع كلامى كان بها .. و لو مش مقتنع , اسأل شيخ بيفهم فى الصحة شوية (يعنى مش الشيخ مسعود حبيبك , لإنه خارج من تالتة ابتدائى زى ما انت عارف) .. لكن لو مشيت على هواك , ماليش دعوة باللى ممكن يحصل لك بقى .. 3:)

.

– لا خلاص .. انا مش حاصوم رمضان .. بس لو ربنا غضب عليا , حاقول له إنك انت اللى قلت لى .. 3:)

.

= ههههههههههههههههه .. كده يا حاج جمعة ؟؟ .. حتبيعنى يوم القيامة ؟؟ .. طب ثانية واحدة , عشان ما تبقاش شاكك .. دوس ع اللينك ده طالما لسه مش مصدقنى ..

.

http://www.saaid.net/mktarat/ramadan/231.htm

.

و بعد ده كله , لو عاوز تصوم , صوم براحتك , بس تبقى فهمت الدنيا فيها إيه .. و لو عاوز تفهم جامد بقى , ابعت لى محمد ابنك بالموبايل بتاعه , عشان أبعت له حاجة كده , حتفهمك يعنى إيه يبقى عندك سكر ..😉 ..

.

– حتبعت له إيه يعنى ؟؟ .. حلقة برنامج طبى من اللى بييجوا على قناة المحور عن السكر ؟؟ .. دول مش بنفهم منهم حاجة ..😀

.

= هههههههههههههههه لا يا حاج .. دى محاضرة أنا اللى قدّمتها فى ساعتين , و قيمتها 14 ألف جنيه , بس ما تغلاش عليك ببلاش ..

.

– 14 ألف جنيه ؟؟ :O .. و حتديها لنا ببلاش ؟؟!!

.

= آه والله .. عشان انت غالى علينا بس ..

.

– ده انا أكون مديون لك بحياتى العمر كله ..

.

= انا مش عاوز منك غير إنك تدعى لى بس ..

.

– روح يا شيخ , ربنا يوقف لك ولاد الحلال ..

.

= آمين يا رب .. ما تنساش تبعت لى محمد بقى .. فى أمان الله ..

.

#رابط_المحاضرة >> Understanding Diabetes

رابط البوست الأصلي : https://goo.gl/w371r8

♪♫•*¨*•.¸¸¸¸.•*¨*•♫♪

✿ ❀ ✿  – السلام عليكم يا دكتور ..

= و عليكم السلام و رحمة الله و بركاته ..

– كنت عاوزة علبة الحبوب اللى فوق دى

= نيت لوك ؟؟!! .. انتى وصلتى لده ؟؟!! .. للدرجة دى حب الشباب حالته ساءت عندك ؟؟

– اه بصراحة غلبت .. و الدكتور قال لى على كل محاذيره ، و انا طلعت امان معاها ان شاء الله .. هاته بقى ..

= انتى حرة .. بس هو حيبقى موجود ع المغرب ان شاء الله .. بس هى فين نضارتك ؟؟ اتكسرت ولا غيرتيها ؟؟!!

– مش تبارك لى ؟؟!! ^_^ .. انا عملت عملية #الليزك من ٣ أسابيع أهو ..

= الف مبروك .. بس يهمنى أعرف … انتى قلتى لدكتور الجلدية ع الكلام ده قبل ما يوصف لك النيت لوك ؟؟!!

– لا .. هو ما سألنيش .. أقول له ليه ؟؟!!:/

= يا فرحتى بيكى ..:/ .. عشان النيت لوك بيتعارض مع العملية ..

– معقولة ؟؟ :O .. إزاى علاج جلدية يتعارض مع عملية فى العين ؟؟

= عشان من الأعراض الجانبية الشايعة ليهم هما الاتنين إنهم بيعملوا #جفاف فى العين ، و عشان كده لازم الفرق بينهم ع الاقل ، يكون ٦ شهور .. و الا ممكن يحصل تأثير ع النظر أو العين بالحرقان اللى بيحصل فيها ..

– يا لهوى :O .. أنا فعلا عينيا بتحرقنى على بسيط من يوم العملية و باحط قطرة دموع صناعية زى ما الدكتور كتب بالظبط ..

= صدقتينى ؟؟ ..

– طب اعمل ايه فى حب الشباب ده ؟؟!! .. أنا غلبت مع بشرتى الدهنية دى .. كل ما اخف ، الحبوب ترجع تانى ..

= تيحى ندوب الدهون دى بدل ما ننشفها بالعلاج ؟؟

– إزاى ؟؟ ..

= تشطفيها بكوباية مية دافية قبل النوم ، يكون عليها معلقة خل ، او عصير نص لمونة .. و الاحماض المخففة دى بتدوب الدهون ان شاء الله .. و ما تقلقيش .. نفعت مع ناس كتير قبل ما اقول لك عليها دلوقتى ، بفضل الله ..

– يعنى حاعرف أتجوز بعد 3 شهور من غير حبوب ؟؟

= ههههههه ان شاء الله .. انا عارف انك عملتى الليزك مخصوص عشان ما تقعديش فى الكوشة بالنضارة .. مش كده ؟؟

– يوه بقى .. هو انا مفقوسة للدرجة دى ؟؟!! :O ..

= اه .. المهم تبقى تدعى لى لما صاحباتك يسألوكى فى الفرح ع المنتج أبو ٢٠٠ أو ٣٠٠ جنيه ، اللى ضيع من عندك الحبوب .. أوك ؟؟

.

#أنا_صيدلى_فاهم_شغلى

#و_يرجعوا_يقولوا_بقالرابط البوست الأصلي : https://goo.gl/DLjur4

♪♫•*¨*•.¸¸¸¸.•*¨*•♫♪

✿ ❀ ✿ #حدث_بالفعل

.

– بعتنا لك مرتين يا دكتور بخصوص تذكرتين الأعشاب بتاعة الطفل المولود , و انت مش عاوز تدّينا

= تمام يا غالى .. بقية العلبة مش حتخسّر عندك , لكن حتخسّر عندى , عشان العلبة عندى بتطلع على بعضها

– يا د. أحمد , انتوا ليه مش زى الصيدليات التانية اللى بتطلع فرط و تدّى المضاد الحيوى بالكبسولة ولا الكبسولتين ؟؟ .. انا يوم ما انت ما رضيتش تدينى الكبسولتين رحت الصيدلية فى دمنهور , قصّ لى كبسولتين من شريط جديد نوفى .. لسه طالع م العلبة , عشان ودنى كانت بتوجعنى من جوه .. و ما قالش حاجة ولا محتاجة !! .. انت ليه بقى بتحبكها كده ؟؟!!

.

هنا أدركت محاولة استفزازى على يد العميل اللى مش باشوفه إلا كل سنة مرة , نتيجة إنه بيشتغل فى السعودية , و ده ميعاد أجازته السنوية .. فقررت أمشى معاه للآخر ..

.

= طيب .. بص كده ؟؟؟ .. اللى انا حاعمله دلوقتى , مش باعمله إلا مع العزيز الغالى .. اتفرج كده ..

.

و فتحت له الفيديو ده ع اللاب قدّام عينيه ..

.

https://www.youtube.com/watch?v=0BsXch4fB0A

.

و بعد ما انتهى , قلت له : ..

.

= زى ما فهمت دلوقتى , باقى الفيديو بقى , إنك لما تاخد مضاد بالحبايتين , فانت كده بتربّى البكتيريا عليه و تخليها تاخد مقاومة ناحيته .. مناعة يعنى .. و المشكلة ترجع لك تانى , و ساعتها حتحتاج مضاد حيوى أقوى ..

– و ده حصل معايا فعلا ..

= شفت بقى احنا بنرخّم عليكوا ليه و نبيع لكم المضاد الحيوى بالشريط مش الكبسولة ؟!! ..

– شفت ..

= الله يفتح عليك .. و هو كده .. اللى ما يعرفش يقول عدس ..

– عدس ..

= اتفضل بقى علبة الأعشاب .. و بعد كده لما تحتاج مضاد حيوى , تعالى لى عشان تاخده صح ..

– حاضر يا دكتور .. و ما تزعلش منى الله يكرمك ..

= لا أبدا .. ربنا ما يجيب زعل ..

.

#أنا_صيدلى_فاهم_شغلى

رابط البوست الأصلي : https://goo.gl/KsfWZJ

♪♫•*¨*•.¸¸¸¸.•*¨*•♫♪

 

1

✿ ❀ ✿ عن مفعول ‫#‏الحلبة‬ نتحدث .. معلومة بسيطة عندك ، ممكن يكون لها عظيم الأثر عند غيرك .. و الدواء الموسع للحالب كان Tamsulin ..

.

رابط البوست الأصلي : https://goo.gl/rwf0o0

♪♫•*¨*•.¸¸¸¸.•*¨*•♫♪

✿ ❀ ✿ – دكتور .. سلام عليكم .. من فضلك ممكن تقرا لى التحليل ده ؟؟

= و عليكم السلام و رحمة الله و بركاته .. حاضر🙂 .. تحت امرك .. ورينى كده ..

– اتفضل .. دى سابع صيدلية أدخلها .. يا رب حضرتك تعرف اللى فيه ..

= و إيه اللى كان بيحصل فى الصيدليات اللى قبل كده ؟؟

– كانوا بيقولوا لى إنهم مش عارفين التحليل ده إيه .. و فى 4 منهم مالقيتش فيهم صيادلة:/

= طيب حضرتك بتحاولى إن يبقى فيه حمل .. صح ؟؟😉 ..

– :O .. صح .. عرفت منين ؟؟

= ما هو التحليل بخصوص كده .. ده تحليل جديد شوية اسمه AMH أو Anti–Müllerian Hormone , و بيقيس ببساطة مستوى الخصوبة عند حضرتك , و قابلية أو إمكانية حدوث حمل ..

– طيب و النتيجة إيه ؟؟

= الحمد لله🙂 , هو حضرتك سنك قد إيه ؟

– انا عندى 33 سنة .. و متجوزة من 12 سنة .. و بجد غلبت يا دكتور ..😥

= طيب تمام .. اتطمنى .. هو فى المستوى الطبيعى .. القراية عندك 2.2 , و الطبيعى من 1.5 لحد 4.0 .. يعنى مظبوط .. الحمد لله ..🙂

– الله يبشرك بالخير يا دكتور😀 .. يعنى ممكن عملية الحقن المجهرى تنفع ؟؟

= تنفع إن شاء الله O:) .. و لكن هى المشكلة اللى أدت للجوء للعملية كانت إيه ؟؟

– جوزى مفيش عنده حيوانات منوية ..

= طيب جرب أدوية و عرف سبب الكلام ده ؟؟

– آخر 2 دكاترة , قالوا إن السبب هو انسداد فى القنوات الناقلة للحيوانات نفسها .. و لازم عملية ..😦

= مظبوط يا افندم .. ألف سلامة ليه .. هو فعلا الحقن المجهرى هنا بيكون الحل , خاصة لو مفيش إمكانية إننا نعمل عملية تمرير للحيوانات المنوية بعيد عن الانسداد ..

– طيب فيه أى نصايح تقول لى عليها عشان أنفذها من خبرتك يعنى ؟؟ ..

= ابدئى من دلوقتى تاخدى حمض فوليك🙂 , عشان نحافظ على البيبى من حدوث تشوهات فى الجهاز العصبى لا قدر الله .. و تتابعى الحمل بشكل منتظم بعد أول 3 أو 4 أسابيع عند دكتور كويس , عشان نحافظ عليه لحد ما ينتهى على خير بإذن الله ..

– طيب هات لى علبة من فضلك .. و تسمح لى أبقى آجى بعد كل كشف , عشان أبقى أصرف الروشتة من عند حضرتك هنا ؟؟ , لإنى بصراحة استفدت فى الدقايق دى أكتر من أى صيدلية تانية دخلتها قبل كده ..

= تحت أمر حضرتك يا افندم .. و ده رقمى .. 01008916220 .. ابحثى عنه ع الفيس , حتلاقى الأكونت بتاعى .. و أتشرف بإننا نتواصل من خلاله مع حضرتك و مع زوج حضرتك , عشان أقول له على شوية نصايح برضه بخصوص الموضوع ده .. و ربنا يتمّ لكم على خير ..

.

رابط البوست الأصلي : https://goo.gl/PPD37f

♪♫•*¨*•.¸¸¸¸.•*¨*•♫♪

✿ ❀ ✿ هرانى طلب لمنشطات و مقويات عشان يرجع زى زمان ، و لما لقيته بيشرب #حلبة كل ما أعدى عليه ، عرضت عليه يشرب بدالها #زنجبيل ، .. و لما قابلنى من يومين كان عاوز ياخدنى بالحضن ، عشان معلومة بسيطة زى دى ، رجع بيها #أسد زمانه😉 .. و قرر يبقى ييجى لى الصيدلية ، من آخر الدنيا عشان يشترى دواه و دوا عيلته ..

.
#أنا_صيدلى_فاهم_شغلى
#أحبكم_فى_االله
#المعلومة_كنز
رابط البوست الأصلي : https://goo.gl/Zlkues

♪♫•*¨*•.¸¸¸¸.•*¨*•♫♪

✿ ❀ ✿ – بجد فرحت لك يا عروسة .. عقبال ما نفرح بعيال

= تسلمى يا طنط .. عقبال سوسن و محسن ولاد حضرتك

– فى حياتك يا روحى .. مش حتفرجينا الشقة بقى ولا إيه ؟؟

= لا يا طنط والله … مش حينفع

– :O o.O .. ليه يا ضنايا ؟؟!! .. هى فيها حاجة تتعيّب ؟؟

= هو كده .. و ده اللى عندى .. أصلى مش مستعدة إن حضرتك تشوفى السيراميك فى الحمام كام بلاطة , ولا فكّرت إذا كانت تقفيلة المطبخ ممكن تعجبك ولا لأ ! .. بجانب إنى مش مستعدة أضحّى بالنيش بتاعى لو عين حضرتك رشقت فى طقم الصينى , بجانب إنى ما جبتش نيش من أساسه , و قررنا أنا و جوزى إننا ناخد بتمنه دورة ICDL و Photoshop و OTC ينفعونا فى الأيام الجاية , بدل ما احنا بنتفشخر بعدد الفوط اللى ممكن تشوفيها حضرتك فى الدواليب , و فى الآخر ممكن العتة تاكلها قبل ما نلحق نستخدمها !!! .. و آه صحيح .. يا ريت حضرتك ما تسأليش على مفرش السرير .. احنا مش بنجيب حاجة تتفرش فى المناسبات و بس !! .. احنا عندنا ملايات .. و عددهم مش 196 ملاية ولا حاجة .. جبنا اللى يكفينا , و لما يدوبوا نبقى نجيب غيرهم إن شاء الله .. , و مش حنورّيكى ستاير الأوضة اللى جوه , عشان عارفين إنك حتقولى لنا إن الراجل ضحك علينا فى تمنهم , و إنك تعرفى واحد بيعملهم بنص السعر ده !! .. باقول لك إيه يا طنط ؟؟!! .. مش عاوزة تتفرجى على طقم الشوك و السكاكين اللى جبناهم ؟؟! .. دى الحاجة الوحيدة اللى ممكن أسمح لك بيها , بشرط إنك تجربيهم فى تقطيع شرايينك كده و انتى قاعدة , عشان تبطلى تتحشرى فى اللى مالكيش فيه

– o.O …………….. احم ..

= فيه حاجة يا طنط ؟؟!!

– لا أبدا يا بنتى .. طيب حتاخدى كورس الـ OTC بكام ؟؟ , و عند مين ؟؟

= ثانية واحدة يا طنط أجيب لك طقم السكاكين ..

.

– لا يا بنتى .. تعالى اقعدى هنا .. انتى أخدتى الكلام على صدرك كده ليه ؟؟!! .. ده انا كنت عاوزة أوعّيكى بس ! ..

= شكرا يا طنط .. عارفة حتوعّينى بإيه .. حضرتك سابع حد ينورنا النهاردة و يقول نفس الكلام

– o.O .. للدرجة دى يا بنتى ؟؟ .. طب انا كنت حاقول لك إيه ؟؟!!

= بصى يا ستى .. أول حاجة حتقوليها لى , إن البنت مالهاش غير بيتها , و عشان كده لازم دايما تبقى مقصقصة ريش جوزها بالطلبات اللى زى قلتها دى .. و يا مآمنة للرجال , يا مآمنة للمية فى الغربال , و ابنك على ما تربيه و جوزك على ما تعوّديه .. و كل البلاوى المتلتلة اللى المفروض إنها فى البيوت كده متكربسة , بتخلّى الواحدة عزيزة على جوزها , عشان لو حب يخلى بيها , يفتكر القايمة اللى مضى عليها , .. مش كده ؟؟!! ..

– o.O .. إيه ده ؟؟!! .. ده بجد !! ..

= مش كده و بس !! .. حضرتك حتقولى لى إن العلام ما لوش لزوم , طالما انا مش ناوية أنزل الصيدلية بعد الجواز .. و حتى لو نزلت , فالصيدلية إيه غير شوية بياعة و كلام فاضى .. حبة بامبرز على كيسين جيل و الأدوية كلها مكتوب عليها سعرها و استخدامها كمان .. يبقى على إيه تضييع الوقت فى الكورسات و الكلام اللى مش جايب همه .. مظبوط يا طنط ؟؟!! ..

– بسم الله الرحمن الرحيم .. انتى مخاوية يا بت انتى ؟؟!! :O ..

= مش مخاوية و لا حاجة .. أصل الدماغ واحدة يا طنط .. ربنا يخليها لك

– هى إيه ؟؟ o.O ..

= دماغ حضرتك .. , اللى لو أخدتى بالك من رقبتك اللى تحتها , حتلاقى بقع التينيا مغرقاها , و مستعدة أبصم بالعشرة إنها مغرقة بقية صدرك و ضهرك .. و تلاقيكى دختى ع الدكاترة عشان تعالجيها , و فى الآخر بتزهقى من العلاج اللى مش بيجيب فايدة , و لما عمو جوز حضرتك يقول لك كلمتين يوجعوكى , بترجعى تروحى للدكتور اللى بعدهم .. مش كده ؟؟ .. أهو انا بقى كصيدلانية قبل ما اكون قريبة حضرتك , ممكن أكون عارفة علاج حضرتك , من غير ما أتعلم ده فى الكلية ولا فى الصيدليات اللى اشتغلت فيها قبل ما اتجوز , .. و ده غير كعب حضرتك اللى مش طايقة تحطيه ع الأرض , و تلاقيكى رحتى بيه لـ 7 أو 8 دكاترة أفاضل , و كلهم طلبوا منك تحاليل , و لقوا فيه أملاح , و قالوا لك إنه نقرس , فى حين إن النقرس مش بييجى فى الكعب أبدا يا طنط , و اللى عندك ممكن يكون شوكة عظمية سببها جزمة حضرتك اللى شكلها ماتغيّرش من 4 سنين لحد دلوقتى , .. ما تبصّيش عليها يا طنط .. أنا أخدت بالى و انتى داخلة .. أهى مرمية جنب الباب ..

– ……………………… طب عاوزة حاجة يا بنتى , .. لما أقوم بقى ..

= آخر حاجة عاوز أقول لك عليها قبل ما تمشى يا طنط , إنك لازم تروحى لدكتور غدد صماء ضرورى , عشان شعرك ناشف قوى و خفيف , بجانب إن وزنك زاد فى الفترة اللى فاتت بشكل واضح , و لما سلّمت عليكى لقيت إيدك ساقعة متلجة , و كل دى أعراض إن ممكن يكون فيه كسل فى الغدة الدرقية اللى فى رقبة حضرتك , اللى عاوزة قطعها .. .. .. و ألف سلامة لحضرتك .. نورتينا ..

.

#تحذير | هذه السيدة تتواجد فى كل عائلة مصرية .. برجاء الانتباه !!! ..

رابط البوست الأصلي :
الجزء الأول : https://goo.gl/TLcqEd
الجزء الثاني : https://goo.gl/ygn7jn

卝 ❀ ✿¸¸¸.•*´¯`✿ ❀ ✿ ❀ ✿ ❀ ✿¸¸¸.•* ´¯`✿ ❀ . ◊

#أنا_صيدلى_فاهم_شغلى

#أحبكم_فى_الله ..

.

أحمد الجويلى