كيف تختار قدوتك ؟؟ بقلم / د. أحمد الجويلى


اقتدى فى قدوتك , بصفاتها , .. مش بشخصيتها كلها على بعضها .. و ما تتصدمش لو لقيت قدوتك بيغلط .. لإن ده شىء طبيعى .. اللى مش طبيعى إنك لما تشوفه بيغلط , تقوم تغلط انت كمان زيه , أو ييجى لك اكتئاب مثلا !! .. و تبقى مصيبة سودا لو قلدته فى غلطه اللى عمله .. لازم يكون عندك عقل تفكّر بيه .. و تعرف الصح من الغلط !! ..

اختار فى كل مجال قدامك , قدوة معينة .. فى التدين واحد , .. و العلم و المعرفة واحد .. و فى الحماس و الإقدام واحد .. و الناحية الرياضية و اللياقة البدنية واحد .. و هكذا .. و خلّى عندك بدايل , يعنى ممكن ما تكتفيش بقدوة واحدة فى كل مجال .. عشان لو واحد وقع , يبقى فيه اللى يحلّ محله ..

لكن عند الاختيار , يفضّل إن القدوة يكون متميز فى عدة مجالات : دينى و أخلاقى و اجتماعى و مهنى و أسرى .. إلخ. و ده طبعا من إنه يكون متميز فى مجال واحد (رياضى مثلا) , لكن تلاقى لسانه زفر , و ما بيصلّيش , و مقاطع أبوه و أمه .. و خلّص دراسته فى تانية اعدادى !! ..

father_son_reading_485595729

الأقضل إن قدوتك تكون على قيد الحياة , عشان تكون عارف تفاصيل أكتر من حياتها .. , و لكن فيه شذوذ للقاعدة دى , يعنى لو انت عارف بالفعل تفاصيل كتييييرة عن قدوتك , حتى لو كان متوفى , .. فهنا ممكن تقتدى بيه بكل ثقة .. و أكبر مثال على الحالة دى , هو سيدنا النبى عليه الصلاة و السلام ..

من الطبيعى جدا إن قدوتك تتغير خلال مراحل حياتك .. يعنى لو لقيتها فى البداية هى السيد الوالد , و بعد كده مدرس اللغة العربية فى المدرسة , و بعد كده الدكتور فى الكلية , و بعد كده تكتشف إن قدوتك حاليا واحد تانى خالص , .. ساعتها ما تستغربش خااااااالص ..

لما تختار قدوتك , اختارها زى هدفك .. خليه معقول , لكن فى نفس الوقت , مش زى أى حد عادى .. يعنى لو انت صيدلى مثلا , ما تخلّيش قدوتك هو الصيدلى اللى على أول الشارع (مع احترامنا ليه طبعا ^_^ ) , لكن خليها مثلا أشهر صيدلى فى مصر (باسمه) , أو أنجح صيدلى فى مصر (باسمه برضه) , أو صيدلى حائز على جايزة نوبل (باسمه برضه طبعا !!) .. و فى نفس الوقت , ما يكونش صيدلى خيالى لسه ما اتولدش مثلا !! ..

كيف تكون قدوةً لأبنائك؟

و بعد اختيار قدوتك , ما تفضلش قاعد كده و خلاص .. لا .. بالعكس .. أبسليوتلى .. اتحرك بقى .. ادرس قصة حياته بكل تفاصيلها .. بالذات , من الناحية اللى حتقلده فيها .. يعنى لو عاوز تنجح زى د إبراهيم الفقى , الله يرحمه , ساعتها اتعلم من الدروس اللى حكاها فى قصة حياته عن النجاح و طبقها على نفسك .. و أكيد حتوصل لأكتر من اللى وصل له ..

مش معنى كلامى فى النقطة اللى فاتت إنك تمشى فى نفس السكة بتقليد أعمى .. لإنك لو عملت كده , فمش حتفرق عن د. إبراهيم الفقى فى شىء , و مش حتتميز عنه خالص .. , لكن حتكون نسخة ممسوخة مكررة منه و بس .. لكن لازم تبدع بطريقتك الخاصة , و يكون ليك طريقك المتفرد … لكن تتعلم من الدروس اللى مر بيها الشخص اللى اعتبرته قدوتك !! ..

و فى النهاية , مهما كانت شخصيتك , و مهما كنت صغير على أى مستوى , افتكر إن أكيد فيه حد متخذك انت كقدوة .. حتى لو من غير ما تحس .. حسّن نفسك و جواك نية إنك تكون قدوة حسنة لكل اللى ناويين يتخذوك قدوة فى مشوارهم ..

اتفقنا ؟؟

  dad-son

إذا أعجبك الموضوع , فلا تتردد فى نشره عن طريق الفيسبوك , أو التويتر .. فى السطر القادم ..

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s