مشكلة بندوّر لها على حل


Image

جاءتنى هذه الرسالة على بريدى الخاص .. و عرضت على صاحبها أن أنشرها بدون ذكر اسمه و وافق , لنأخذ رأيكم جميعا .. فبم تشيرون علينا ؟؟

السلام عليكم ورحمة الله وبركاته
دكتورنا العزيز ايه اخبار حضرتك يارب تكون بخير ويكون كل شئ على مايرام
اعرف حضرتك بنفسى أنا طالب بالفرقة الثانية كلية صيدلة جامعة …………
وعندى مشكلة ومتاكد ان شاء الرحمن ان حضرتك انسب واحد ممكن يساعدنى فى حل مشكلتى ده طبعا بعد ربنا سبحانه وتعالى ومنه وفضله وتوفيقه
مشكلتى تبدأ من وانا فى اولى ثانوى والمشكلة انى كنت حابب مهنة الطب اوى اوى اوى وكان حلمى انى ادخل كلية الطب ومش خلمى انا بس ده حلم الاسرة كلها امى وابويا وكل اللى يعرفنى كانوا بيقولوا ان دماغى دى مش عادية وانى زكى فوق العادة وانى هطلع من اوائل الجمهورية فى الثانوية العامة وانى هكون حاجة كبيرة اوى اوى هيفتخروا بيها فى المستقبل
وانا ماكنتش شايف نفسى حاجة غير انى هكون جراح كبيييييييييير اوى اوى اوى وراسم فى خيالى شكلى وانا جراح (( حلم ومن حقى احلم )) وكنت مصمم على الحلم ده من وانا فى اولى ثانوى وكنت مالى الاوضة عندى بصور للدكتور مجدى يعقوب وشوية عبارات تحفيزية انى اكون جراح وهكذا
المهم وانا فى تانية ثانوى جبت 97.5 فى المية ففرحت اوى وحمدت ربنا لانى قربت جدا من تحقيق حلمى شوية مجهود زيادة وهوصل ان شاء الله
دخلت تالتة وزاكرت ودخلت الامتحان فى الامتحان كانت بتحصل معايا حاجات غريبة يعنى فى اول مادة اللى هى اللة العربية ضاغ من 3 درجات ونص
نص درجة تعبير , ودرجة علشان قطعة البلاغة (( المدرس بتاعى الله يسامحه كان بيقول ان قطعة البلاغة على طول فيها وحده عضوية ومحفظنا اجابة معينة للسؤال ده فانا كنت حافظها صم وللاسف دى كانت اول مرة فى امتحان اللغة العربية من 25 سنة بالظبط يجيب قطعة مافيهاش وحدة عضوية وطار منى درجة على السؤال ده .. وده ماكنش بايدى انا عملت اللى عليا وزاكرت البلاغة زى المدرس ماقال …مع العلم المدرس ده افضل مدرس فى المدرسة و فى المنطقة كلها بلا منازع ))
فى النحو طار من درجتين على خطأين اهيف من بعض
سؤال كان الكشف فى المعجم عن كلمة ((استقبل )) معرفش انا قراتها ازاى استقل وواحدة تانية زيها
وهكذا فى بقية المواد الدرجات بقت تطير منى مش اخطأ عدم مزاكرة لا دى اخطاء عدم تركيز مع انى كنت والله مركز على الاخر بس معرفش ايه اللى حصل (( عدم توفيق ))
المهم النتيجة طلعت توتال 97 فى المية
فطبعا انا زعلت ووالدى زعل اوى وقالى انى مش هلحق اى حاجة وانى خلاص ضعت ومستقبلى اتدمر وهكذا
استنيت التنسيق : التنسيق جابلى صيدلة ………
والله ساعتها معرفتش افرح ولا ازعل
افرح علشان دخلت كلية حلوة لحقت حاجة من كليات القمة وهبقى دكتور ولا ازعل على حلمى اللى راح وانى فشلت فى انى احقق حلمى وحلم ابويا
المهم رضيت بالامر الواقع ودخلت الكلية اللى جاتلى وعلمت نفسى مبسوط بيها لانى ماكنتش مبسوط بيها وحاببها علشان خاطر ابويا مايزعلش ومايضايقش لانه اكيد هيضايق لو انا مضايق وكل اللى يهمه راحتى
وقولت بردو انا هبقى دكتور وهدرس مواد كلها طبية وادوية وكلام من هذا القبيل فمش هتفرق كتير واحاول اتالم مع الوضع الجديد وربنا موجود والحمد لله على كل شئ
دلوقتى انا دخلت الكلية اتفاجأت ان المواد كلها كميا فى كميا وانا بكره الكميا ومش بحبها وكنت بتخنق وانا داخل المعمل ومش بحب اشتغل التجارب لانى مش شايف نفسى فى جو المعمل والكلام ده حاولت كذا مرة احب الشغل فى معامل الكميا بس للاسف ماكنتش بقدر
كنت بحاول على قد مااقدر انى اتعامل مع الامر الواقع اهو على الاقل انجح واتخرج من الكلية لو بتقدير مقبول بس اخلص من الجو ده
واشتغل فى الصيدلية واهو بردو مجال طبى على مانشوف ربنا مقدر ايه
وقولت بجانب الجو الكئيب ده اللى مش بحبه انزل اتدرب فى صيدلية واهو اتعلم واكتسب خبره علشان لما اتخرج يبقى عندى خبرة فى المجال مش لسه هبدا من الاول طالما انا مش حابب شغل المعمل والجو ده
وبردو بقيت احضر محاضرات فارما مع بتوع سنة تالتة وانا فى سنة اولى علشان افهم الادوية وهكذا
قولت اعمل حاجة حاببها بدل الجو الكئيب ده
نزلت الصيدلية فى اول ترم فى سنة اولى وحفظت الادوية كلها واستخدامتها واعراضها الجانبية وموانع الاستخدام من النشرات الداخلية للدوا كل ده فى اقل من شهر
فى اقل من شهر كنت حافظ كل حاجة خاصة بالدوا اللى عندنا فى الصيدلية بداية من الحركة الدوائية بتاعته مرورا بالمواد الفعالة والاستخدام وموانع الاستخدام والتداخلات الدوائية والبدايل وكل حاجة
تقريبا كنت المرج بتاع الدكتور صاحب الصيدلية بدل مايدور فى الاندكس يسالنى انا على طول
بعد شهر من تدريبى الدكتور صاحب الصيدلية بقى يمسكنى شفت كامل من 6 ل 12 مساءا لواحدى
وقت الشغل وكنت بسد فيه وكنت الى حد ما راضى……
مش راضى بالمهنة لا كنت راضى انى راجل شغال وبصرف على نفسى وانى سابق كل اللى معايا فى الكلية وانى وانا عندى 18 سنة شايل صيدلية لواحدى (( متميز عن اللى حواليا فى الكلية ))
وبردو للاسف ماكنتش شايف نفسى فيها خاااااااااالص مع انى بشهادة الدكاترة الصيادلة اللى فى البلد عندنا ان الصيدلية اللى انا شغال فيها حصل فيها طفرة وبقت من افضل الصيدليات اللى فى البلد ان لم تكن الاولى والاعلى فى تحقيق الايرادات
((طبعا مش بنتاجر فى الممونوعات ((
((انا بدأت اتمرن فيها وهى لسه بتفتح ))((جديدة ))
وان المرضى كلهم بيشكروا فيها وبالاخص فى العبد لله
الدكاترة شايفين انى نجت علشان حققت ايرادات عالية
(( للاسف المادة والفلوس بالنسبة ليا مش هدف ومش نجاح خالص لان رزقى هيجيلى لغاية عندى وعمرى ماجريت ورا رزقى وبرضى بالقليل فى موضوع الفوس ده ))
الناس بيحبونى علشان كنت على قد مااقدر اعاملهم كويس وانا كنت شايف
(( من واجبى انى اعامل الناس كويس فى الصيدلية او بره وده مش تميز ولا نجاح ده واجب عليا ))
فماكنتش شايف اى نجاح يرضينى ويرضى نفسى من جوا
اشتغلت سنة اولى كلها وعديت منها بمديتين دخلت سنة تانية للاسف دبلرت
فكرهت نفسى وكرهت الكلية وكرهت المهنة وكرهت الدنيا كلها
بعد ماكنت الاول على الادارة والمحافظة كل سنة دلوقتى بقيت ساقط فى الكلية
((بقيت فاشل زى ماابويا قالهالى يوم النتيجة ))
دلوقتى انا بعيد سنة تانية صيدلية …… واتخنقت من الكلية علشان اساسا هى خنيقة وبعدت الى حد ما عن اصحابى اللى بحبهم واتخنقت خلاص من الشغل فى الصيدلية والمعاناة اللى بشوفها فى الصيدلية لانى مش شايف نفسى فيها شايف نفسى فى حلمى القديم (( طبيب جراح )) وبتخنق اكتر لما اعلق على اى روشتة ويجيلى واحد يقولى هو انت هتعرف اكتر من الدكتور اللى كاتب الروشتة .
وبتضايق اوى لما اى حد يجى يتكلم قدامى على عملية جراحية
او لما يتصل بيا دكتور طبيب علشان يملينى حاجة لمريض هو باعته ليا
بحس ساعتها انى مضايق قوى …. مش بحس انى دكتور
دلوقتى انا ببص لمستقبلى المهنى مش شايف له اى ملامح خالص
شايف انى بعد ماهخلص الكلية . هيبقى قدامى المجالات التالية
الاول : الشغل فى مجال الدعايا الطبية وده اساسا انا بكرهه وبحس انه مجال كله زل ازاى انزل لطبيب واتحيل عليه علشان يكتبلى الصنف بتاعى اهانة ومافيش فيه ابداع خالص
الثانى : مجال تصنيع الادوية وده انا كارهه لانى كاره الكميا كلها ومش بحب جو المعمل خالص ولا الكميا والعك بتاعها
الثالث : كلينيكال وده طبعا افضلهم بس انا مش ناقص حرقة دم وانى اقعد مع طبيب المفروض انى كنت بتمنى اكون مكانه
(( لما حد بيتكلم عن اى طبيب دمى بيتحرق لانى ماحققتش حلمى
كمان لما اى حد فى البيت بيتعب وانزل اجيبله ادوية من الصيدلية والدى يقولى لأ هما الصيادلة دول بيعرفوا حاجة لازم نكشف عند الدكتور وبعد كده نروح نجيب الدوا من الصيدلى وطبعا الكلام ده بيجرحنى اكتر واكتر وبيكرهنى فى المهنة اكتر واكتر
الرابع والاخير :
انى اشتغل صيدلى حكومة وافتح صيدلية وطبعا بعد اللى انا شوفته فى الصيدليات مش هقدر اقف فى الصيدلية بتاعتى وهجيب اى حد يقف فيها ويمشى الدنيا وهديرها من بعيد لانى مش حابب المجال ده
بس ده اللى قدامى
وهفضل طول اليوم فراااااااااااااااااااااغ زى الصيادلة اللى عندنا فى البلد اللى مش بيخش الصيدلية الا الساعة 10 يلم الايراد ويروح
(( عاطل برتبة صيدلى ))
#انا من النوعية الحماسية … شخص طموح جدا وبحب يكون ليا احلام واجرى وراها واحاول بكل قوة انى احققها … وبكره الفراغ جدا … ومش بحب المادة وبحب وقتى كلها يكون منظم بين الحاجات اللى بحبها … ومش بحب وقتى يضيع كدا وخلاص …. بحب اقضى وقتى كله فى حاجات مش سهله … بحب انى احس دايما انى بعمل طفرة بحب احس بالتميز
وللاسف فى صيدلية مش لاقى تميز …….
ولا بحس باى ابداع ولا بحس اساسا انى بعمل حاجة كل اللى بعمله انى بصرف روشتات واوصف علاج otc وده مش بيرضينى ولو فيه اى كومنت على الروشته او حاجة غلط برن على الطبيب
واعرفه وطبعا بسمع كل ما لذ وطاب من الاهانات ده غير انى اساسا بيكون دمى محروق من المهنة قبل مااتصل بيه
فانا مش عارف اعمل ايه ؟؟!!
الدكتور الصيدلى اللى انا شغال معاه لما اتكلمت معاه
قالى احمد ربنا ده غيرك بيدفع فى السنة 40 الف جنيه علشان يكون مكانك وانت مش راضى
بكره لما تفتح صيدلية وتلاقى وقتك ملكك وانك مش مشغول ومش مضغوط فى الوقت والحالة المادية ميسورة هتلاقيك حبيت المهنة
قولته غيرى بيدفع علشان يحقق حلمه لانه شايف انه هيبدع فى المجال ده
والله انا مش معترض على قضاء ربنا وراضى بكل اللى كاتبهولى…. بس انا مش شايف نفسى فى المجال ده ومش عارف احبه ومش عارف ابدع فيه كله روتين ممل مافيش اى سبيل فى المجال ده انى اتميز بيه لانى كارهه بس دخلته لانه اخر حاجة فى كليات القمة
وماينفعش ادخل كلية اقل من كده
ثانيا : والله انا الفلوس والفراغ عمرها مافرقت معايا …..
وانا فى ثانوى كنت ممكن اقعد اسبوع كامل مش باكل الا حاجت خفيفة على السريع كده ومش بخرج مع اصحابى ولا العب كرة (( انا حريف كورة على فكرة بشهادة اصدقائى )) ولا اتفرج على كورة وعلى تليفيزيون ولا اى وسيلة ترفيه ومش بنام غير 3 او 4 ساعات يوميا فى الاسبوع ده وطول الاسبوع مكفى على الكتاب بزاكر يجى 15 ساعة يوميا بدون ملل لما مدرس يقولى هديكوا امتحان واللى هيقفله يجيب الدرجة النهائية هيتكرم فى الطابور وهياخد مبلغ كذا (( كانت 50 جنيه )) وكان بيتحدانا انى مافيش طالب هيجيب الدرجة النهائية
كنت بتحداه وبزاكر وكنت بجيبها وكنت ساعتها ببقى فرحان اوى مش فرحان علشان طلعت الاول او انى اتكرمت
لا بكون فرحان علشان اتفوقت واتميزت عن كل اللى حواليا
بكون فرحان علشان اتحديت نفسى وهزمتها
بكون فرحان علشان اتفوقت فى حاجة بحبها
بكون فرحان علشان حاسس بالفخر من جوايا وبقول لنفسى الحمد لله انا عملت حاجة غيرى ماعرفش يعملها
(( غيرى ماعرفش يعملها ))
ولما طار الطب ودخلت صيدلة … ضاع التفوق … وضاع التميز … وضاع النجاح وضاعت كل احلامى …. وضاعت كل حاجة بحبها …… وضاعت كل حاجة بتخلينى فرحان ومبسوط
#وبدأت طرق الفشل زى ما ابويا قال …..
كان نفسى ابقى حاجة قدام نفسى اولا
وقدام ابويا وقدام المجتمع بس للاسف مش عارف
ومش لاقى الحاجة دى
ومش عارف اعمل ايه ؟؟
فقولت الجأ لاكتر واحد خبير بالمهنة وهو يقولى اعمل ايه
ياريت حضرتك تساعدنى
وجزاكم الله خيرا

=====================

تقدر تكتب ردّك هنا , أو راسلنا على الفيسبوك , و ساعد زميلنا برأى جاد , يفيده فى مستقبله

https://www.facebook.com/ahmed.elgewaily

مع تحياتى ..

أحمد الجويلى

13 responses to “مشكلة بندوّر لها على حل

  1. عارف .. انا كنت زيك كدة بالظبط .. و يمكن اكتر بكتير .. من صغرى و انا كل اللى حواليا بيقولولى دكتورة .. و كان الطب دة اكتر حاجة مهووسة بيها لدرجة ان قبل ما النتيجة تطلع انا روحت كلية طب و لفيتها و دخلت المدرجات و المشرحة .. خﻻص مكانى بقى و ﻻزم اعرفه و حلم السنين🙂
    و هووووووب النتيجة طلعت و لقيتنى لبست ف صيدلة .. اليوم دة افتكر انه اكتر يوم “بلمت فيه ” مبقتش عارفة ليه و ازاى و مين و مش قادرة اتكلم لدرجة انى نزلت من البيت عشان افك شوية ووانا بوقف تاكسى لقيتنى بقوله كلية طب🙂
    ساعتها الراجل قالى ايييييه ؟ تﻻقيه قال كلية ايه المجنونة دى الساعة 8 بليل😀
    و دخلت صيدلة و انا مش بطيق الكيميا و ﻻ بعرف افهمها و كنت بحفظها و انا قرفانة و استغرب من اى حد يقولى انه بيحبها .. و كنت اقولهم بتحبوها من اى اتجاه دة انا بكتئب لو صابح عليا امتحان فيها و بعيط لانى مش ببقى عارفة هكتب فيه ايه دة🙂
    هييييح ما علينا🙂
    و اتخرجت السنة اللى فاتت .. و خد دى بقى🙂
    انت ف اولى حفظت الصيدلية .. انا من كتر عقدتى من صيدلية مكنتش اعرف حتى ادوية البرد ايه غير لما اتخرجت🙂
    و دلوقت لو يرجع بيا الزمن و اجيب مجموع طب فى الثانوية العامة ..بدون تفكير هدخل : صيدلة🙂
    عارف ليه .. اقولك انا ..
    عشان انا ربنا رسملى الطريق دة عشان عايو يستخدمنى فى السكة دى .. ربنا مبيحطش حد فى مجال كدة و خﻻص .. ﻻ .. دة فى حكمة هوا يعلمها ..
    يمكن كنت تبقى جراح .. و تعمل لواحد عملية غلط تجيب اجله😀 او تكتب روشتات بخط وحش و الصيدلى يطلع الاصناف غلط و يقعدوا يدعو عليك😀 .. او يبقى كشفك بمبلغ و قدره و الغﻻبة ميقدروش يوصلولك ..او او او🙂
    لكن شوف حكمة ربنا و اعرف ايه مميزاتك اللى اتحطيت بسببها فالمكان دة .. منها ان اسلوبك كويس فهتقدر تجذب الناس و يسمعوا كﻻمك و يثقوا فيك و دة هيرمى على كتفك مسؤولية كبيرة ﻻزم تكون ادها ..
    كل يوم فى حد جديد انت بتخفف وجعه .. بتشيل عنه الالم .. و ربما بتنقذه من الموت ..
    كل يوم فى دعوة حلوة بتاخدها .. فى حد جديد هيجى يسألك عن مرضه و تساعده لو ف ايدك او تبعته على دكتور كويس
    انت اول اختيار بيجى ف بال اى مريض لانك على اد ايده .. بيجرى عليك قبل ما يروح لدكتور بشرى عشان تدله و تساعده و تسمعه ..
    انت ” البوصلة ” بتاعته اللى هتوجهه ..
    انت مش محتاج المريض لحجز وﻻ كشف و ﻻ معاد عشان يجيلك فتساعده ..
    انت البشرى من غيرك مينفعش عشان ايه فايدة الروشتة لو مفيش صيدلى بينتج الدوا اللى فيها و لو مفيش صيدلى يصرف الدوا اللى فيها و يعرف الناس ياخدوه امتى و ازاى ..
    انت مش مجزء🙂 يعنى مبيحيلكش اللى تعبانين من مجال عيون بس او باطنة بس او عظام بس .. انت كل الناس بتجيلك تسألك و تستشيرك ..
    و كل ما تبقى اشطر كل ما هتحس انك واثق ف نفسك و مبسوط اوووووووووووووووى و خصوصا لما تتخرج هتحس بفرق كبير ..
    ربنا حاطط على كتفك مسؤولية كبيرة اوعى تهرب منها .. و ربما يكون اكتئابك دة نوع من انواع الهروب و انت مش واخد بالك ..
    و مفيش حاجة اسمها انك خﻻص كدة لميت كل علم الصيدلية و مبقاش فى جديد تعمله ..
    كل يوم ف المهنة دى ﻻخر يوم ف عمرنا هيبقى فى جديد ..
    و كل يوم تخفف فيه وجع حد و ترحمه من قول أاااااااااه .. دة افضل جديد ممكن تعمله🙂
    ربنا حطك هنا لحكمة .. دور عليها🙂
    لكن انت

  2. سلام عليكم ورحمة الله وبركاته
    لو تسمح لي أسميك أحمد وانا بجاوب

    شوف يا صديقي أحمد
    أنا طالب أصغر منك في الكلية
    ويمكن موضوع ثانوية ده مأثر علينا كلنا
    فعلاً اللي كان نفسه في كلية طب وجات له صيدلة

    يعني صيدلة كأنها بديل المحطمين نفسياً
    بس صدقني مهنتنا احسن بكتير من كدا
    انا محطم نفسياً زيك والله وبحاول أجمع شتات نفسي وحطامها
    وبتحدى العالم كله عشان أثبت نفسي

    بس بشخصيتك دي انا حاسس انك انسان يقدر يتجاوز العقبات اللي انت قاعد بتقول عليها دي
    انت بتحب توري العالم كله أدي ايه هما غلطانين وانت صح

    وغير كدا المهنة عمرها ما كانت وحشة او حلوة عشان كلام الناس

    الناس هتفضل تتكلم وتتكلم وترغي
    وتشتم في فولان وتزكي في فولان ومفيش فايدة

    وكون والدك قال هما الصيادلة بيفهموا حاجة
    دي غلطتك لأنك المفروض تفهمه ان صيدلي اساساً معناها drugist
    يعني دي شغلتي اساساً انه الدواء يوصلك سليم صحيح وبصورة علاجية صحيحة

    كل المهن في مصر مظلومة دي حقيقة
    واكتر مهنة يمكن هيا مهنة الصيادلة
    بس بما انك بتحب تقرا
    وبما انك مؤمن طبعاً بقضاء الله وقدره
    ليه مفكرتش تمسك كتاب كدا
    يقولك هيا ايه صيدلة اساساً
    ايه مجالات الشغل ؟
    وهوا ايه المطلوب مني في المهنة دي

    صدقني سعادة أهلك او سعادة اللي حواليك يكمنوا في انك تكون انسان ناجح

    ليه متحاولش تبقا صيدلي ناجح

    بما انك مش بتحب الكيمياء
    وبما انك بتحب القراية ليه متمسكش كتب تساعد نفسك وتعلم نفسك بنفسك
    في مختلف التخصصات التانية
    فارما مايكرو بايو سيوتكس وغيره كتير

    ليه متطمحش انك تكون عالم فعلاً وتحضر ماجستير ودكتوراه

    ده بالعكس كلامك انه انت مش بيهمك الماديات مفرح جداً

    ليه متغيرش حلمك
    مع احترامي لمجدي يعقوب في الطب

    طب احنا عايزينك في مجال تاني
    هيا الدنيا كلها هتموت لو مبقتش مجدي يعقوب ؟
    ليه متبقاش انت اللي تقود منظومة التطور الصيدلي في البلد

    انا نفسي تخش اليوتيوب وتشوف a day in a job واكتب جنبها pharmacist
    هتلاقي مهنتنا فعلاً مهمة وحيوية وحساسة

    مهنتنا لو ملهاش لزمة = مكانتش اتوجدت

    وكونها كليات قمة وقاع

    ارجوك سيبك من كلام الناس
    اللي يمشي ورا كلام الناس يتعب
    انا اتمنى واحد بعقليتك دي يكون عالم يغير في العقول

    بس ده مش هيجي الا بتقدير محترم عشان يسهل موضوع الدراسات العليا لاحقاً

    كلية الطب مش نهاية الدنيا ولو فضلت كدا هتختم حياتك بنهاية سيئة للغاية

    انت تقدر تثبت لنفسك ولأهلك كلهم انهم غلطانين
    وانك تقدر تنجح وتتفوق في مجالك

    يا ريت تطلع على الكتاب ده

    ده دليل عاملاه اكبر مصنع ادوية في االعالم ( فايزر )
    جايب اكتر من 29 تخصص مختلف للصيدلي
    عايزك تقراهم وشوف
    1- Full Preparation: The Pfizer Guide to Careers in Pharmacy
    http://www.mediafire.com/download/anp7b521rsip02c/Full_Preparation_The_Pfizer_Guide_to_Careers_in_Pharmacy.pdf

    اللي عايز اوصله ايه

    يمكن ربنا منولكش اللي تتمناه
    لكن استقبل ده وقول الحمدلله
    وابدأ فكر بايجابية ازاي استفيد من الهبة اللي ربنا عطاها لي
    انما لو فضلت اعيط واتضايق واضيع الدنيا وازعل واكتئب
    يمكن اضيع الفرصة اللي ربنا مديهالي

  3. لوحاسس فعلا انك مش هتبقى سعيد ف حياتك الا لما تبقى طبيب تقدر تعيد ثانوية عامة وتدخل طب وتحقق حلمك وفعلا الواحد عمره مابيبقى راضي عن نفسه مهما كان شاطر ف مهنته او الناس شايفاه حاجة كبيرة لو هو كاره المهنة دي ومش حاسس انو لاقى نفسه فيها بس لازم تفكر كويس قبل ماتاخد الخطوة دي لانها خطوة كبييرة وهتاخد سنين من عمرك تاكد اولا انك مستعد وان الموضوع يستاهل

  4. بسم الله الرحمن الرحيم
    اولا اهلا بيك فى مهنه الصيدله الجميله اللى هيا تعتبر من اسمى المهن
    ثانيا انا مش هكرر كلام زمايلى ان ما دام ربنا كتبلك شىء يبقى تؤمن ان ده احسن شىء مناسب ليك عشان ربنا مش بيعمل حاجه تضرنا لازم تؤمن بده من كل قلبك
    ثالثا بعد ايمانك فى قبول النصيب حاول تطلع حلمك فى طب وحاول تحلم بمهنه الصيدله حاول تحبها تعرف هى ايه هى جزء مهم من المنظومه الصحيه وهى مهنه ساميه تحاول مساعده المرضى لتخطى الالمهم فالصيدلى هو الخبير الاول بالدواء وهو بالمناسبه مش بياع فى محل فحياه المرضى تقع على عاتقه
    وبالنسبه لطموحك اللى عايز تحققه وانك تحس انك متميز متوفر لك بكثره فى كل مجالات العمل الصيدلى الاكاديمى والعملى مثل الكلينكال والرقابه على الادويه
    ان شاء الله اسمعك قريب تقول هى دى المهنه اللى شايف نفسى فيها لانك انسان متميز وبالقطع مش انسان فاشل بالتوفبق

  5. بص يادكتور كل واحد ممكن يبقى متميز جدا ف مهنته لو عاوز كدة بس طةل مانت بتفكر كدة يبقى مش هاتتقدم خطوة واحدة ومش معنى انت انت دخلت كليه غير اللى بتحبها يبقى نهاية الدنيا حتى لو فشلت مرة واتنين النجاح ف الكلية لايرتبط بكونك هتبقى ناجح ف حياتك ولا لا بالعكس خد الكليه طريق يوصلك الى بداية الطريق الاكبر ولكن ليس نهاية الطريق طرق التميز ف مجال الصيدلة كتير كون انك متميز ف بلدك او مدينتك عن الاخرين ده تميزكويس جدا وغيرو وغيرو ممكن تحضر ماجستير او تبقى متميز زى دكتور احمد جويلى وتختار نفس المجال ومين بقا اللى قال انك لو دخلت طب كنت هتبقى جراح وشاطر كمان ياعزيزى لن نتقدم خطوة الا مثلما كتبها الله لنا ليس كل دكتور متميز وليس كل صيدلى غير متميز الحياة لكى تريد ان تعيشها ببهجة لازم ان ترضى بما قسمه الله لنا ولو كنا نعلم الغيب لاخترنا الواقع وياسبحان الله مش كان ممكن تبقى دكتور وجراح ويتوفى تحت يدك مريض بالخطأ او غيرة وبكون بكدة ربنا عافاك فكر صح الكلية مش عاوز دح وحفظ الكلية غير الثانوية الكلية تفهم تذاكر ازاى عشان تنجح وياريت بلاش تتكتأب وتقرب من الله كم من البشر يتمنى ربع ماانت فيه فلا تقنط من نعمة ربنا عليك …..

  6. وَعَسَى أَن تَكْرَهُواْ شَيْئاً وَهُوَ خَيْرٌ لَّكُمْ وَعَسَى أَن تُحِبُّواْ شَيْئاً وَهُوَ شَرٌّ لَّكُمْ وَاللّهُ يَعْلَمُ وَأَنتُمْ لاَ تَعْلَمُونَ
    ده اللى قلته لنفسى بعد ماتخرجت من الكلية واشتغلت ونجحت وحسيت بالتميز
    تقريبا نفس السيناريو حصل معايا لأنى كنت طول عمرى الاولى ومتفوقة ولظروف معينة فى تالتة ثانوى مجموعى قل واضطريت ادخل صيدلة وعيطت ساعتها وكنت بكره كل حاجة فى الكلية
    وكنت بحس دايما ان حلمى كده راح ومبقتش دكتورة
    بس لما مسكت صيدلية لوحدى بعد ماخلصت دراسة ولقيت انى قادرة افيد المريض ده بمعلومة تهمه
    واوفر للمريض ده علاج دايخ عليه ومش لاقيه
    وأوصف لغيره دوا يخففه بعد ماراح لكذا دكتور من غير فايدة
    وافهم غيره وغيره تفاصيل كتير عن مرضه الدكتور معندوش وقت يشرحهاله
    ولما لقيت ناس بتجيلى مخصوص تشكرنى وتدعيلى
    ولما بقت تجيلى الروشتات مطلوب منى اراجعها ورا الدكتور ويتقالى طيب الدوا اللى الدكتور كاتبه كده صح يا دكتورة
    حسيت ساعتها انى بجد دكتورة وقلت فعلا ربنا له حكمة فى كل شئ
    ولو رجع بيا الزمن كنت هادخل صيدلة بكامل ارادتى

  7. بس يا دكتور انا حصل معايا نفس السيناريو .. انا والدي جراح كبير وهو اللي زرع في حب الطب وأني اطلع جراحه كبيره … بس قدر الله وما شاء فعل
    و دخلت صيدلة مع (ان وانا في ثانوي كنت بقعد أقول انا وله دخل تجاره مش هيدخل صيدلة. انا مش هشتغل بياعة )
    وقضيت سنه أولى ناقمه وغاضبه من القدر ( ليه يا رب دخلت الكليه دي وكلام زي ده )
    وعديت سنه أولى بتقدير عام مقبول وربنا ستراه معايا. وفجأة بدأت أحب الكليه وأحب الدراسه بتاعتي وكان عندي نفس المشكله بتاعت الكيميا بس ركزت آوي في الدراسه وبدأت اقرأ كتير واحضر المحاضرات كلها واسأل الدكاتره وتحولت من مقبول الى امتياز في سنه تانيه وباقي السنين وتخرجت بتقدير عام امتياز وبترتيب على الدفعة.
    بص يا دكتور أنتا لازم تكون راضي بقضاء الله من كل قلبك وبتصرفاتك و حاول تحط هدف جديد لان أكيد أكيد أكيد ربنا مش كاتب لك الخير في الطب صدقني واسأل مجرب انا ربنا عمره ما منع عني حاجه الا وبعد فتره من الزمن ساعات سنين وساعات شهور بشوف السبب في منعها عني
    أستعين بالله وحط هدف جديد
    بلاش تقول انا كنت عايز أبقى طبيب ودلوقتي الطبيب بيتامر عليا خليك واثق ميه بالميه ان ربنا سبحانه وتعالى أكيد كاتب ليك الخير في الكليه دي
    خليك متفائل كده
    صدقني ان أياما عدى عليا في خبرتي القصير بالحياه
    أبدا هدفك الجديد انك لازم تعدي الكليه بتقدير عالي وموضوع الكيميا ده لو ركزت فيها هتحبها. مفيش حاجه مستحيل على الانسان لو حاول فيها
    خلاصة كلامي … حاول تبقى متفائل وتطرد الأفكار المتشائمة دي وأرضى بقضاء الله قلبا وقالبا وحط هدف جديد لنفسك وأبدع فيه وصدقني هتنجح لان ده حصل معايا
    وربنا يوفقك ويهديك

  8. اولا :الرضا هو اكثر حاجة مفقودة ..ثانيا:دايما بيحاول يعلق اخطائه على شماعة تانية لازم يشوف انه بشر وارد يغلط ,يقصر لكن الفيصل انه ميستسلمش لده..يعني مدرس العربي قال البلاغة ازاي و….ثالثا:طبيعي انه يبقى عاوز يتميز دي حاجة صحية لكن ينزع من قلبه اي حقد على طبيب او …رابعا:التسرع هو في اولى بيحضر فارما وبيذاكرو..لكن بعد ما خلصنا الكلية -عن نفسي اكتشفت ان ترتيب المواد وتوزيعها على السنين مش حاجة عفوية ,ممكن الواحد ميتوفقش في دكتور ياخد بايده ويوريه ده لكن اكييييد كان اولى انه يذاكر اللي عليه في نفس السنه بدل مايعمل خارق وفي الاخر( ابو بالين كداب)…خامسا: القاعدة حب ما تعمل حتى تعمل ما تحب يعني اللي ببيكره الكيميا يتلكك بيها واللي يكره الفيزياء هيتلكك بيها ,لكن طيب ما حتى طب فيها كيمياء ,الشاهد ان مفيش حاجة هتيجي متفصلة للواحد زي ما بيحلم تيبكال ,احنا مش في الجنة , وبعدين تخصصات كتيرة بتتفتح كل يوم قدام الصيدلي ..يعني يحاول ينجح ويتفوق في دراسته علشان ميرجعش يندم ويبقى مش عارف يطلع بره الدايرة اللي دخل نفسه فيها

  9. الخيره فى ماختاره الله تاكدانك لودخلت الطب فده اختيارك لكن انت دخلت صيدله يعنى اختيار ربنا

  10. انا لسه داخله ا1 ثانوى بعشق حاجه اسمها صيدله بحبها جدا انا بقول انى فى الاجازه اشتغل فى صيدليه بدل ما اقضى وقتى فراغ على الفاضى قلت اشتغل بدل نانا قاعده فى البيت بس المشكله انى ضيعه فى الرياضه مابحبهاش خالص ودى مشكلتى فى الحسابات كنت دايما استعلم عن الادويه واحبب نفسى اكتر فى الصيدله انا باخد رايكم ؟؟؟؟؟؟

  11. انا ف 2 ثانوي وكمان علمي مشكلتي اني مش بعرف اذاكر خاالص وكل مااجي اذاكر ازهق واقوم او انام انا عايزه حد يحببني ف اي كليه انا مش عارفه ايه اللي جرالي مبقتش عارفه انا عايزه ايه انا نفسي افرح بابا وماما وادخل كليه قمه ممكن حد يساعدني وجزاكم الله كل خير

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s