بص العصفورة ^_^


1069192_10151465943381207_9313388_n

أمى و خدعة “بص العصفورة” ! ..

فى الوقت اللى كان فيه أقرانى و زمايلى , ممكن ياكلوا ع الغدا بالضرب أو الزعيق , أو حتى الخصام , كانت أمى بتتبع طريقة مبتكرة , عشان تخلينى آكل , من غير استخدام أى حاجة من دول ! ..

و انا عندى تلات اربع سنين , كانت تخلينا نقعد تحت شباك المنور , و تمسك السندوتش فى الإيد القريبة منّى , و تبدأ معايا اللعبة .. “دلوقتى انا حامسك السندوتش , و آخد بالى كويس , و مش حاخلّى العصفورة تيجى تاخد قطمة زى كل مرة” .. و ألاقيها بتدوّر وشها , و كإنها بتجيب حاجة من جنبها , فأقوم أنا منتهز الفرصة , و واخد قطمة من السندوتش , و هو فى إيدها ! .. و لما ترجع لى , أبتسم و الأكل فى بقى , و أحاول أبيّن إن العصفورة هى اللى أكلت القطمة , و هى تضحك , و تقول : لو العصفورة ضحكت عليا فى أول قطمة , فمش حتقدر تعمل كده فى القطمة الجاية ! ..

و نستمر على كده , لحد ما الساندوتش يخلص , أيا كانت محتوياته !! .. 

أمى كان بالها رايق أيامها , مش زى دلوقتى يا عينى .. و لكن الشاهد , إنها خلتنى أحب الأكل من إيديها , مش زى عدد كبير من زمايلى , اللى ممكن يكونوا بيكرهوا أنواع كتير من الأكل لحد دلوقتى , لإنه ارتبط معاهم بذكرى مش ولا بد .. علقة بعصاية المقشة , .. أو خصام لأكتر من 5 أيام , .. أو حتى “قرصة” فى مكان معين و محدد بدقة !! ..

الشاهد من كل ده , إن حتى الآن , فيه صيادلة و طلبة فى كلية الصيدلة , بيكرهوا العلم لنفس السبب .. حاسّين إنهم مرغمين عليه .. “شربة طعمها وحش جدا” و لازم تتشرب .. و بمجرد الانتهاء منها بآخر امتحان فى الكلية , بتبقى الدنيا مش سايعاهم , و بيحلفوا إنهم بعد كده مش حيقربوا من كتاب , إلا للشديد القوى !! ..

أنا بقى باحاول أستخدم طريقة أمى .. من غير ما أقول “بص العصفورة” .. و لكن باحاول تقديم العلم نفسه , بشكل مبسط .. ممتع .. سهل الوصول للمتلقى .. بشكل يساعده على حب التعلم , حتى لو من خلال ناس تانيين … بس المهم نكسر العقدة !! .. ماعنديش أى غضاضة , إن أحد طلابى , يتعلم فيما بعد , و يكون أفضل منى فى أى مجال .. لإن دى سنة الحياة , و أنا لا أدّعى إنى أملك كل مفاتيح العلم .. و لكنى أتمنى إنى أكون على قدر المسئولية ..

دى كانت خاطرة سريعة , عن الفرق بيننا و بين غيرنا .. و لما تقروها , ما تنسوش تدعوا لأمى بظهر الغيب , باللى يخطر على بالكم ..

باحبكم ..

أحمد الجويلي  ..

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s