طريقة رائعة تجعلك تكره التدريب الصيدلى بالإجازة


training

الإجازة جات .. و الفرصة بقت ذهبية لكل طالب نفسه يتقدم خطوات كتير فى مجاله , و يسبق غيره , بإنه يتدرب فى الصيدلية , خلال الشهرين أو التلاتة دول .. و عشان كده , قررنا نساعدك , عشان تخوض التجربة المرة دى , بسلاسة و سهولة شديدة .. من غير كلكعة .. 

و لكن إوعى تستجيب للى يقول لك هات كشكول و اكتب كل الأدوية .. أو قدّامك الرفوف , لف عليها عليها و طلع كل الروشتات اللى فى العلب بالترتيب .. الطريقة دى هى أعقم طريقة للتدريب الصيدلى , و الأفضل و الأسرع لو حابب تكره المهنة و تقرر تغيير المجال فى أقرب وقت !! ..

التدريب الصيدلى له شروط و أساسيات , اسمح لى أقول لك عليها ..

اقرا بس , و ادعى لنا🙂

أولا .. حرام علينا لو أظهرنا قدام الطلبة حاليا المشاكل اللى ممكن تكون بتواجه عدد مننا فى صيدلياتهم ، على إنها فى كل الصيدليات .. ده مش بيبقى له إلا رد فعل “اكتئابى” عند اللى بيسأل و عاوز يتدرب !! .. 

مشاكل الصيدلة , مصيرك كطالب تشوفها .. و لكن مش حتشوفها كلها .. حتشوف جزء يناسبك منها , لإن مفيش صيدلى بيشوف كل المشاكل .. و مصيرك برضه تعرف إزاى تتعامل معاها .. فما تسمعش كلام صيدلى عن مشاكل الصيدلة المزمنة اللى بيعانى منها , لإنها لو كانت مسببة له أزمة فعلا , كان زمانه ساب الصيدلة و سنينها من زمان .. فما تقلقش , و خلّيك حسن الظن بالله دايما ..

********************

ثانيا .. التدريب فى الصيدلية له طرق كتير .. على حسب المطلوب منه ، و على حسب نظام الصيدلية اللى بنبقى فيها .. و على حسب احنا أخدنا فارما ولا لسه .. و دى أشياء مهمة جدا ..

المطلوب من التدريب ممكن يكون (بس) إنك تتعرف على أسماء الأدوية (المشهووووووورة فقط) فى كل مجال .. الحاجات اللى بتعالج الإسهال .. الحاجات اللى بتعالج المغص .. و هكذا .. , عشان ما تكركبش دماغك بحاجات المفروض تعرفها فى مراحل متقدمة .. , فتكره الدنيا باللى فيها ..

و خليك لمّاح .. لاحظ الأدوية اللى بتتصرف كتير .. و اعرف ليه بيحصل كده ! .. و الأهم إنك تقسم الأدوية فى دماغك لمجموعات على بعضها .. يعنى مثلا , المسكنات اللى شبه بعضها .. و هكذا .. و تعرف منها الشواذ عنها , زى المسكن الآمن على المعدة (باراسيتامول) , أو الآمن على الكبد (هيبامول) .. و هكذا ..

و ممكن برضه يكون الهدف منه هو إنك تطبق اللى درسته فى الفارما مثلا , فى الترم اللى فات .. و فى الحالة دى , أنصحك , تاخد كتابك أو ورقك اللى كنت بتذاكر منه , و تدوّر ع الأسماء اللى درستها فى الأوتونوميك , و الأوتاكويدز , و تشوف أسماءها التجارية ممكن تكون إيه .. و تنزل على روشتاتها اللى جوه العلب “حتتك بتتك” , لحد ما تستوعب عنهم أهم المعلومات .. عشان ده حتعيده تانى بالتفصيل فى الكارديو فى الترم التانى إن شاء الله ..

أما نظام الصيدلية , فبيختلف من مكان لمكان .. فى واحدة ممكن تتعلم إزاى تقرا الروشتة .. و فى واحدة تانية , تتعلم إزاى تصرف OTC , .. و فى واحدة تالتة , حتعرف إزاى تطلب طلبية .. و هكذا .. و عشان كده , نصيحتى الدائمة : ما تقضيش كل فترة تدريبك فى صيدلية واحدة .. دايما خلى عندك تنوّع , عشان تشوف مرضى مختلفين , و حالات أكتر .. و اختار دايما إنك تتواجد فى فترات الشغل (لو بقت خبرتك تمام) , أو فترات الراحة فى الشغل (لو خبرتك لسه مش ولا بد , عشان تتعرف على أدوية أكتر) .. 

************************

ثالثا .. إحساس التوهان و اللخبطة طبيييييعى جدا عند أى حد فى المرحلة دى .. و يقل بتكرار الممارسة تدريجيا ..

كلنا لما وقفنا فى الصيدليات فى التدريب , كنا “موهومين” و قلقانين و خايفين نغلط .. كل ده طبيعى , و تغلبك عليه هو اللى ممكن يخليك تتعلم أسرع و أفضل .. و عشان كده , أنصحك بالوقوف جنب دكتور فاهم , مش أى مساعد أو حد بيشتغل بخبرته و خلاص .. عشان يكون مقدّر المرحلة اللى انت فيها حاليا , و “يطبطب” عليك معنويا , و ما يكمّلش عليك فى الخوف و القلق اللى انت فيه .. المهم إنك ما تفضلش قاعد فى البيت و رافض النزول , عشان ما تحسّش بالتوهان ..

و عشان تثبت لنفسك إنك أحسن من امبارح , دايما خلّى معاك “بلوك نوت” صغير تدوّن فيه أهم المعلومات اللى طلعت بيها فى يومك .. فى سطر أو اتنين بالكتير لكل معلومة .. و صدّقنى , خلال فترة قصيرة , حيبقى معاك كنز صغير فى البلوك نوت دى !!

************************

رابعا .. الكتب المساعدة (زى دليل الدواء المصرى) مهمة جدا عشان الدنيا تبقى واضحة قدام الطالب شوية ..

و إوعى تسمع كلام اللى يقول لك : يلا يا شاطر , حلّ عن دماغى بقى الساعتين الجايين , و روح اكتب الأدوية اللى فى حرف الـ C مثلا فى الإندكس 3 مرات , و احفظهم و تعالى , عشان حاسمّعهم لك ..

اسمح لى أقول لك إن دى طريقة عقيمة فى توصيل المعلومة الصيدلانية .. و سعادتك نزلت الصيدلية عشان تتعرف على الأدوية و المرضى وجها لوجه , مش عن طريق الإندكس , اللى ممكن تقراه و انت فى السرير .. , و عشان كده , تواجد الكتاب المساعد مهم .. و لكن فقط كعامل مساعد , مش كأداة للإلهاء , لإن كتير من مديرين الصيدليات , ممكن ما يكونوش طايقين اللى بيتمرنوا معاهم , لأسلتهم الكتير مثلا , أو مواقفهم المحرجة قدام العملاء .. و لكن ما يبقاش الحل هو عملية إلهاءهم بالشكل المفضوح ده ..

************************

خامسا .. تواجد الدكتور نفسه داخل الصيدلية ، غاية فى الأهمية ، بشرط إنه يكون فاهم و عنده الخبرة الكافية ، و كمان القدرة على توصيل المعلومة ..

عشان أنا أعرف صيادلة كتير , المعلومة أساسا مش عندهم (للأسف) .. وصيادلة تانيين , المعلومات عندهم , و لكن ما عندهمش القدرة على توصيلها , .. و صيادلة تالتين , المعلومات عندهم و يقدروا يوصلوها .. و لكن يبخلوا بيها على أساس إنها سر المهنة و كده !! ..

و ده لو تواجد الصيدلى أساسا فى الصيدلية .. !!!

************************

سادسا .. دورة الأوتى سى الخاصة بينا ممكن تساعد جدا خلال فترة التدريب لإنها بتشتغل بطريقة الدومينو .. كل معلومة تترتب على فهم اللى قبلها ..فمش بنحتاج نحفظ كتير .. لكن بنفهم أكتر .. و بنربط المعلومة بالناحية العملية بشكل ممتع ..

و بتبقى مفيدة جدا بالذات فى حالة عدم توفر أو تعاون الصيدلى المرافق , زى ما ناس كتير جربتها خلال السنة و نص اللى فاتوا , و فرقت معاهم جدا بفضل الله على المستوى العلمى و العملى كمان .. و اختصرت عليهم وقت كتييييير كان ممكن يضيعوه فى كتابة الإندكس , أو الحيرة فى النظر قدام الرفوف اللى مليانة دوا , بلا أى هدف .. 

تقدر تحجز مقعدك معنا في دوراتنا الحية على مستوى الجمهورية من خلال هذا الرابط😉

http://wp.me/P2YNXX-xN

********************

سابعا .. ادخلوا على موقعنا ..

http://wp.me/P2YNXX-4A

حتشوفوا معلومات أكتر عن الباقة كلها و محاضرات كاملة مجانية ممكن تفيدنا كتير فى مرحلة التدريب كمان إن شاء الله ..

و خليك دايما معانا على جروبات الصيادلة العلمية .. و أهمها جروبنا 

First pharmacology course online

ده رابط الجروب : https://www.facebook.com/groups/1stpharmacouse/

و ثق إن فيه صيادلة , حيشوفوا سؤالك اللى حتطرحه , و يجاوبوا عليك فى أسرع وقت إن شاء الله .. عشان نفسهم بس إنهم يفيدوك 

و شاهد كل إنتاجنا المجانى المصور , على الرابط ده ..

http://wp.me/p2YNXX-V

************************

صديقى العزيز , د. أحمد الديب , كان فى رابعة صيدلة الأسكندرية , و قدّم محاضرة متميزة فى نقابة صيادلة البحيرة , فى صيف 2012 , و كان لينا الشرف إننا نسجلها و نرفعها مجانا لكم على اليوتيوب .. يا ريت كلنا نشوفها , و نعرف رأيكم فيها إن شاء الله .. حتلاقوا أولها فى الرابط ده , و باقى الأجزاء حتلاقوها فى فى 8 حلقات متصلة ضمن #قائمة_تشغيل واحدة , على الرابط ده 

************************

و لو حابب تكون OTC Practitioner محترف , إيه أهم القواعد اللى المفروض تكون ملتزم بيها ؟؟!! .. و إيه هى حدود الـ OTC فى مصر ؟؟ .. و مين اللى يقدر يحددها ؟؟!! .. و هل فعلا فيه تعارض بين فرع الـ OTC فى الصيدلية , و فكرة الطب بصفة عامة , على أساس إن الـ OTC , ممكن يسحب البساط من تحت الطبيب فى تخصص معين , لو كان الصيدلى شاطر فيه ؟؟ .. و إزاى أقدر أوفّق بين العلم و التجارة داخل الصيدلية , من غير ما الناس تقول عليا إنى مادى ؟!! . . لو حابب تعرف الإجابة على كل الأسئلة اللى فاتت دى , ممكن تشاهد الجزء الأول من محاضرتنا دلوقتى , لمدة ساعتين (مباشرة على اليوتيوب) , فى 7 حلقات متصلة ضمن #قائمة_تشغيل واحدة , على الرابط ده .

https://www.youtube.com/playlist?list=PL8zo46jGXvHlO3pg2vj-xGRrDqkdZceLI

. و بعد ما الجزء الأول ما يخلص , حتلاقى الجزء التانى , اللى بنناقش فيه Selected OTC Cases , و حنعرف من خلاله , .. . 1. هل من حقى إنى أتعامل مع حالة مريض #الصدفية داخل الصيدلية ؟؟ , و إزاى أقدر أتعامل معاها فعليا ؟؟ 2. إزاى أقدر أفرق بمجرد طرح بعض الأسئلة , بين مرض خشونة المفاصل , و الروماتويد , قبل ما أطلب تحليل Rheumatoid Factor ؟؟ .. و كل مريض فيهم ممكن يتعالج إزاى , و عند أنهى تخصص من الأطباء ؟؟ 3. إيه السبب فى إن دكتارين جيل للفم , ولا أوراكيور جيل برضه , مش بينفعوا لعلاج قرحة الفم اللى اسمها mouth ulcer و المشهورة باسم الفسفوسة ؟؟!! 4. إزاى تقدر تعالج الأرق و التوتر , داخل الصيدلية , بدون أدوية ؟؟, و لو حكمت , إيه الأدوية الآمنة اللى ممكن تستخدمها , و ما تكونش ضمن جدول المخدرات ؟؟!! . . و أسئلة تانية كتيييييييييير قوى , ممكن تشوف إجاباتها داخل نفس المحاضرة .. . أحبكم فى الله .. و احرصوا على اقتناص المفاجأة اللى فى آخر المحاضرة , عشان حتعجبكم إن شاء الله ..  :)

==================================

و أخيرا …

#متابعتك لنا شرف لينا .. و حنحاول من خلالها إننا نحببك أكتر فى مهنتك و كليتك .. و ده أحد أهم أجزاء رسالتنا .. .

أحمد الجويلى

Follow & Get Notifications بقى😉

بالنسبة للأصدقاء …

get

وبالنسبة للمتابعين ..

get 2

مع تحياتى ..

أحبكم كثيرا..🙂

3 responses to “طريقة رائعة تجعلك تكره التدريب الصيدلى بالإجازة

  1. حضرتك اللى بتحبنا….لا احب القلك اننا احنا اللى بنحبك حدا جدا اللى بنلاقى معاك أجابات على أسألتنا من اول ما تخطر فى دماغنا….اقول ايه غير يجازيك الله عنا خيرا…ونفسى جدا اكون من الفرند بتوع حضرتك على الفيس……بس حضرتك قافل طلبات الصداقه😦

  2. السلام عليكم
    شاكرين حضرتك جدا على الموضوع الرائع دة استفدت جدا والله
    لكن
    اطمع فى اكتر
    ممكن نطلب من حضرتك تضيفنى فى جروب على الفيس مثلا او اكتر مكان بتنزل فيه مواضيع زى دى اقدر اناقشك فيها واتعلم واستفسر منك ؟
    ولك جزيل الشكر

    • و عليكم السلام و رحمة الله و بركاته .. اهلا بيك د عمرو .. فقط ابحث عن الاكونت الشخصى بتاعنا ع الفيس بالرقم ده 01008916220 , و نتواصل هناك برسالة , و أضيفك على أى جروب تحبه إن شاء الله

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s