يوميات صيدلي مفروس مع الدايت


obesity

‫#‏يوميات_صيدلى_مفروس_مع_الدايت‬ (الحلقة الأولى) ..

باختصار .. دوافع رغبتى ورا إنى أخس كانت كتير .. أولها إنه بقى بيؤثر على شغلى .. و بقيت مش باعرف أقف لفترة متوسطة , بسبب ألم ركبى غير المحتمل و إجهادى اللى بقى بيحصل بسرعة على هيئة إرهاق من المجهود المتوسط .. بجانب إن منظرى بقى واضح عليه إن وزنى زيادة قوى .. بجانب إن‫#‏دورة_الـOTC_بمستواها_الثانى‬ فيها ساعة تقريبا عن السمنة و كيفية التحكم فيها , و تبقى مصيبة سودا , لو مش عارف أطبّق كلامها على نفسى ..

أنا قررت من 5 أيام بالظبط .. و طالما حنفضفض هنا , يبقى لازم أقول لكوا , أنا بادئ بميزان قدّ إيه (و ده كان أحد الألغاز اللى عرضتها فى كل الكورسات اللى اشتغلناها) .. أنا وزنى 110 كيلو جرام يا سادة .. أييييييييوة .. ما تتخضّوش .. كنت دايما باحاول اقنع نفسى إن السبب فى كده ‫#‏كثافة_العضم‬ الزايدة عندى شوية .. , لكن الإنكار مش حيفيد أكتر من كده .. أكيد فيه دهون كمان .. و دى لاااااااازم أتخلص منها إن شاء الله ..

معروف عنى إنى ضعيف قدّام الأكل .. و قبل كده , كنت باؤجل الكلام فى موضوع التخسيس , عشان كان عندى أهداف أهم باحاول احققها .. و لكن دلوقتى حان الوقت بإذن الله .. و أحد الأسباب اللى مخليانى أنشر اليوميات – على الملأ – المرة دى , هو إنكم تشجعونى بإذن الله , و عشان ده يكون حافز ليا , إنى ماطلعش قدّامكم عيّل , لو التجربة فشلت , لا قدر الله .. و عشان كده , انا عاوزكم تشجعونى .. تشجعونى جامد .. شجعونى بقى  .. ‫#‏أنا_باجى_بالتشجيع_على_فكرة‬ ..

من الحاجات اللى حفزتنى لمشاركتكم كمان , إن ناس ممكن تتشجع زينا و تبدأ تخس بإرادة و استمتاع بالتجربة هى كمان .. و دى واحدة من نوايايا بصراحة .. و هى إنى أكسب ثواب ‫#‏سن_سنّة_حسنة‬ معاكم ان شاء الله ..

…………………………………………………………………………………………..

#‏يوميات_صيدلى_مفروس_مع_الدايت‬ (الحلقة الثانية) ..

قررت إنى أبدأ بشكل جاد و حاسم .. و نويت إنى أبدأ بالقاعدة الأشهر .. ‫#‏قلل_أكلك‬ و ‫#‏العب_رياضة‬ .. و فعلا , من بداية النظام , قررت إنى أخلّى بالى من الحاجات اللى باكلها .. أبدأ بطبق السلطة , و آكل منه 4 أو 5 معالق كبيرة , قبل ما أدوس فى الصنف الرئيسى اللى ع الغدا .. كنت بافطر زمان بـ 3 سندوتشات ميكس (فول/فلافل/بدنجان) , و ساعات كانوا بيبقوا 4 , مش 3 .. و لكن – و الحمد لله – بقى لى 5 أيام , باضرب سندوتشين بس منهم ع الفطار (بس باقول للراجل يتوصّى بصراحة  ) .. المهم إنى بقيت أتعمد أشرب مية كتير كمان خلال اليوم .. قدر الإمكان برضه ..

الجديد فى الموضوع بقى – من النهاردة – هو إنى قررت أمشى بنيّة ممارسة ‫#‏رياضة_المشى‬ .. أنا معروف عنى إنى باحب المشى , و لكن لمسافات قصيرة .. و ما حدّش يطلب منى إنى ‫#‏أجرى‬ اليومين دول .. أنا الجرى بالنسبة لى مسخرة , حابقى أقول لكم ليه بعدين إن شاء الله ..

و فعلا .. النهاردة , بعد ما وصّلت مراتى لزيارة أهلها , كان ممكن أقضى ساعة و نص أنتخة فى أى حتة , إلا إنى قررت إنى أمشى .. ‫#‏عباس_الضو_قال_لأ‬ ! .. و حطّيت سماعات الموبايل فى ودانى .. و شمّرت كُمام السويتر اللى كنت لابسه , و انطلقت فى المسير , على أنغام أغانى حماسية كنت محتفظ بيها (جيل المستقبل – لؤى) – (أنا المصرى – حمزة نمرة) – .. إلخ .. و افتكرت فى اللحظة دى , المشهد بتاع أحمد زكى , فى فيلم النمر الأسود , لما كان بيتمرن , على نغمات الأغنية الشهيرة “اتقدم تا تا تا .. اتقدم تا تا تا .. اتقدم اتقدم” .. و مش فاكر بقية الأغنية بصراحة .. بس كنت باحاول أتقمص الشخصية الجادة , و نظرات أحمد زكى الثاقبة ..

…………………………………………………………………………………………..

‫#‏يوميات_صيدلى_مفروس_مع_الدايت‬ (الحلقة الثالثة) ..

معروف عنّى إنى رياضى قديم .. رياضى فحت يعنى .. أنا باهزر طبعا .. أنا كل خبرتى فى صالات الجيم , كانت فى 34 يوم بالتمام و الكمال , و كانوا فى إجازة أولى ثانوى على ما أتذكر .. و الاستفادة منهم كانت مش و لا بد .. لسه فاكر أيام ما كنت بالعب كورة , و ألاقى نفسى شحّرت بعد أول 5 دقايق بالكتير من بداية أى ماتش .. فكنت أطلب من الفريق اللى بالعب معاه , إنى أقف جون .. بصراحة كنت باقوم بواجبى كحارس مرمى , زى الفل .. غير كده , انا ما انفعش فى الكورة بنكلة ..

و عشان كده , كان التعويض إنى أطوّر الرياضات العقلية بالقراية فى معظم المجالات تقريبا .. و من أحد العقد النفسية اللى أفتكرها برضه , لما كسبت جايزة فى مرة من المرات , اللى جاوبت فيها على سؤال , فى طابور الصبح فى المدرسة , و كان المفروض إنى أتحرك من مكانى فى الحوش , عشان أوصل بسرعة عند مقر الإذاعة المدرسية , لاستلام الهدية .. و لما جريت , أذكر إن المدرسة كلها (طلبة و مدرسين و مدير المدرسة كمان) ضحكوا على طريقة جريى , اللى ما كانش فيها ريحة اللياقة البدنية !! ..

امبارح أخدتها مشى جد , لمدة ساعة بحالها تقريبا .. و فعلا جيت فى آخرها و شحّرت شوية , لكن ساعتها افتكرت كلمة ‫#‏أرنولد_بيه_شوارزينجر‬ , لما قال إن فى أى تمرين للعضلات , اللى بيسبب نمو شكل العضلة , و يفرقها عن آخر تمرين سابق , هو شوية العدّات الزيادة , اللى بيكون فيهم ألم نتيجة الإجهاد اللى بنحس بيه .. و الأمر بسيط .. لو استحملت الألم , حتنجح , .. أما لو غلبك الألم , حتفضل زى ما انت .. (هو طبعا قال الكلام ده بالانجليزى  ;) ) ..

أنا ناوى إنى أجرى قريبا فى تراك النادى , أو حتى فى ساحة الحرية اللى جنب البيت عندنا .. و لكن ده بعد ما أعوّد جسمى ع المشى , يوميا إن شاء الله .. يعنى بعد أسبوع كده ولا حاجة .. و ربنا ييسر الأحوال .. و بعد كده , ناوى أشترك فى صالة ألعاب رياضية .. و اللى يحصل يحصل بقى إن شاء الله .. عشان بجد , أنا نفسى أحسّن لياقتى البدنية , حتى لو على كبر .. و بعون الله , حتتحسن 

…………………………………………………………………………………………..

‫#‏يوميات_صيدلى_مفروس_مع_الدايت‬ (الحلقة الرابعة) ..

عن يوم التبويظ أتحدث .. أسعد أيام اللى عاملين دايت , .. بيتخيلوا إنهم حيخربوا الدنيا من كتر الأكل فى اليوم ده , .. و ده شىء مفيد على فكرة , .. عشان نلخبط معدّل الحرق فى الجسم , فما يفهمش الحيلة اللى احنا بندبّرها عليه عشان نخسّ ..

و لكن لازم نقول من الاول , إنها بتبقى وجبة واحدة اللى نبوّظ السيستم فيها , مش اليوم كله بجميع وجباته ..‫#‏كده_نبقى_بنستهبل‬ !! ..

الفكرة إن ‫#‏معدل_الحرق‬ (أو الـ Basal Metabolic Rate يعنى) بيتناسب مع كمية الأكل اللى احنا بناكلها .. للتبسيط مثلا , جسمنا مبرمج على إننا لو أكلنا 10 وحدات من حاجة معينة , فجسمنا يحرق 8 وحدات , عشان يستفيد بيها و يدينا طاقة نتحرك بيها , و يخزن وحدتين , و هما دول اللى مع تكرارهم على المدى الطويل بيزودوا الوزن ..

أما لو عوّدنا الجسم على إنه ياكل 5 وحدات بس , بتلاقيه فى البداية , يحرق 8 وحدات برضه , لكن بعد فترة , بيبدأ يفهم الفولة , و يعيد برمجة نفسه , على إنه يحرق 3 أو 4 وحدات بس .. برضه , عشان يخزّن وحدة أو اتنين .. و هنا معدل فقدان الوزن بيبدأ يقل , أو يتوقف خالص .. و عشان كده ‫#‏يوم_التبويظ_الأسبوعى‬ ده مهم جدا , فى أى دايت , عشان نحسس الجسم إن مفيش تجويع ولا حاجة , و نطمنه من ناحيتنا , فيفضل يحرق بالمعدل الطبيعى , فنخس احنا بقى و نخلص ان شاء الله  ..

و ده من الإعجاز العلمى فى صيام شهر رمضان الكريم .. اللى المفروض إنه مش بيؤثر على وزن الجسم بشكل كبير , على مدار الشهر .. و الدليل إنك المفروض تلاحظ إن الناس بتبدأ وزنها يقل شوية فى أول 10 أيام من الشهر .. و بعد كده وزنها بيبدأ يثبت .. بل إنك ممكن تلاقيهم بيرجعوا لوزنهم الأول , فى آخر الشهر , نتيجة إن الصيام مستمر , بدون ما يكون فيه يوم للتبويظ .. و ده من حكمة ربنا و إثباته لينا على إنه هو اللى برمج أجسامنا على كده , و ادّانا الكتالوج الربانى اللى لو مشينا عليه , حنرتاح ..

أما بقى السنّة – لمن يرغب – فكانت صيام الاثنين و الخميس , عشان الجسم ما يخزنش وحدات إضافية , فييجى الصيام فى اليومين دول , عشان يستهلك الوحدات المخزنة , و نفضل محافظين ع الوزن المثالى للجسم .. و ده اللى نويت بالفعل إنى أبدأ فى تطبيقه بعد ما ربنا هدانى من فترة لفهم فكرته .. مع إن المفروض إن تطبيق السنّة النبوية , يكون مجرد و مطلق , بغضّ النظر عن السعى ورا فهم الحكمة , و ده لثقتنا فى الدين نفسه .. يعنى ما نؤجلش تنفيذنا للسنّة , لحد ما نكتشف الحكمة من وراها .. و إلا فحنكون فى الحالة دى , احنا الخسرانين .. ‫#‏مش_باقول_لك_إنه_كتالوج_ربانى‬ ؟!!! ..

الشاهد بقى , إنى بقى لى 6 أيام عامل دايت بفضل الله , و يوم التبويظ بكرة إن شاء الله .. و بصراحة , انا ناوى أجيب آخرى فى الأكل , لحد ما يطلع من ودانى .. مش حارحم نفسى , و احتمال بعد الوجبة إياها , أقول : ‫#‏مين_طفّى_النور‬ ؟!! .. و كل ده مش عشان أنا محروم من الأكل طول الأسبوع اللى فات ولا حاجة .. و لكن كل الفكرة إنى عاوز أجنن ‫#‏معدّل_الحرق‬ بتاعى , و أعبط اللى خلّفوه إن شاء الله .. و ده أهم أهدافى بكرة … و ربنا يقوينا ع الشر 

…………………………………………………………………………………………..

‫#‏يوميات_صيدلى_مفروس_مع_الدايت‬ (الحلقة الخامسة) ..

أولا أحب أبشركم بإنى يوم الخميس اللى فات , كنت فقدت من وزنى 2.5 كيلو بحالهم بفضل الله .. و ده حصل خلال 5 أيام تقريبا .. و بصراحة , مش شاغل بالى بإذا كان اللى النتيجة كبيرة أو قليلة , خلال الأسبوع اللى فات , و لكن اللى يهمّنى أن الدنيا ماشية و خلاص .. ‫#‏أنا_باخسّ_يا_بشر‬ !! ..

المشكلة الفظيعة اللى كانت مانعانى من إنى أبدأ أى دايت قبل كده و أستمر عليه أكتر من ساعتين زمن , هى إنى كنت فاكر إنى لازم أتعرض للجوع و الحرمان بشكل شاق .. و أبدأ أعضّ فى الموكيت بقى و انا باتألم من كتر الجوع , (مع ملاحظة أنى من المصابين بالارتجاع المريئى , و الجوع بالنسبة لى أحد أقوى وسائل التعذيب) ويكأنى يحيى الفخرانى فى فيلم الكيف , بعد ما خلّوه يدمن ! .. و دى بالمناسبة , مصيبة كتييييييييييييييير من أطباء التخسيس (النص كم , مش كلهم) , و اللى بيكون كل هدفهم إن صاحبتنا تخسّ فى أقصر فترة زمنية (بغضّ النظر عن باقى المشاكل الجسمانية و النفسية اللى ممكن تتعرض لها) , لمجرد إن لما أناتيمها يشوفوها بعد فترة قليلة , و قد تحوّلت إلى ‫#‏مانيكان‬ , يتهبلوا كلهم , و يسألوها على اسم الدكتور اللى نجح فى عمل المعجزة دى , و يروحوا يتابعوا معاه , همّا كمان !! .. و لكن للأسف , النتائج السيئة بتكون منيلة فيما بعد ..

و بالمناسبة , اللى بيخسّ بالطريقة السادية دى , ممكن يوصل لهدفه بشكل سريع , و يبقى وزنه سمباتيك خالص , فى أقصر فترة ممكنة , و لكن بعد ما يوقّف الدايت , بيتفجعععععععع ع الأكل , و يبقى أقرب إلى نسل يأجوج و مأجوج .. فوزنه يرجع يزيد أكتررررررر م الأول .. و يبقى كإنك يا ابو زيد ما غزيت !! ..

لكن انا المرة دى , اكتشفت إن التخسيس ممكن يحصل بدون جوع , ولا حرمان .. و ده لما انتبهت إلى إن‫#‏تغيير_نوعية_الأكل‬ نفسها , أهم من تقليل الكميات .. يعنى المعدة كده كده حنملاها , لكن المهم نملاها بإييييييييه ؟؟ .. فبمجرد ما بتحط الموضوع فى دماغك , بتبدأ تركّز على طبق السلطة , و تخليه فى بداية وجبتك تقريبا .. تاخد 4 أو 5 معالق , يملوا معدتك , و يعالجوا الإمساك بالمرة  .. (ألياف بقى و كده) .. و بعد كده , تنقل ع البروتينات اللى موجودة قدّامك , و فى الآخر , شوية رز أو عيش , مش حتلاقى لهم مكان أصلا إلا فى أحد زخانيق المعدة ..

التحدى الكبير بقى – كما أبلغنى المتخصصين فى ليلة التخسيس – بتبقى بعد ما الجسم يبدأ يحس بإن كمية السعرات الحرارية (اللى مش شاغل دماغى حتى الآن بحسابها فى الأكل) بدأت تقل , فيبدأ جوعك يكون أسرع و أقوى , فى الأسبوع الثانى أو الثالث من الدايت , عشان الجسم شعر بالخطر .. فلازم يكفى نفسه .. (ما هو الجسم بيفكّر برضه , زى ما اتفقنا قبل كده) .. , و لهذا السبب , لازم نضحك عليه برضه .. فنحسسه بالشبع , و لكن بحاجات أى كلام , و مفيدة برضه .. منها إننا نشرب كوبايتين مية كبار , و نبدأ نشوف حنشبع ولا لأ ! .. أو إننا نضرب خياراية كبيرة كده تملا العين ! .. أو إننا نفتح 4 كبسولات Bran , على كوباية زبادى , و نقلبهم على بعض , و نلتهمهم حتتك بتتك .. و كل الحاجات دى بتملا المعدة , فتحسس بالشبع , لحد ما ييجى ميعاد الوجبة الجاية ..

دور الإرادة بقى فى المرحلة دى , هو إنك لما تشوف حاجة حلوة , و عينك حتطلع عليها , تاخد منها بالعقل , .. يعنى لو اتعزمت عند الست الوالدة مثلا , و كان عندها ‫#‏جلاش‬ من اللى بتحبّه , فيبقى آخرك صوباعين بس , و تمسك نفسك عن باقى الصينية .. و تغضّ بصرك ساعتها , و تقول ‫#‏قوينا_يا_رب‬ .. (إوعى تعمل زيّى و تضعف , و تضرب صوباعين تانيين) !! ..

ملحوظة / الأم هى أحد الأسباب الرئيسية فى هدم أركان أى دايت فى الدنيا .. و ذلك بدعوى إنك هفتان و خاسس  ..

…………………………………………………………………………………………..

‫#‏يوميات_صيدلى_مفروس_مع_الدايت‬ (الحلقة السادسة) ..

نتكلم النهاردة كمان إن شاء الله , فى يومية جديدة , عن ‫#‏أدوية_التخسيس‬ .. و اللى مش حنقدر نخلصها فى مرة واحدة .. و لكن حنحاول نقسمها بشكل مختصر و مفيد و ممتع فى نفس الوقت .. لعل الناس تستفيد إن شاء الله ..

و لكن قبل ما نبدأ .. ممكن تفكر شوية معايا بالعقل ؟؟!! .. ‫#‏سؤال_لولبى_يعنى‬ .. هو كان ممكن يحصل إيه , لو كان تم اكتشاف علاج (أو حتى وصفة) , يخلوا الناس تخس بسرعة و أمان فى نفس الوقت ؟؟!! .. متهيأ لى أكيد كانت الدنيا قامت و ما قعدتش من ساعتها .. و كان حيبقى المنتج ده (أيا كان) , معمول عليه ألاباندا فى الإعلام , و الناس تتكلم عنه , و الطلب عليه يزيد بقى , و هيصة يعنى !! .. مش كده ؟!! …

أيوة , عاوز توصل لإيه ؟؟!! ..

عاوز أقول لك إنك طالما ما شفتش الألاباندا اللى قصدنا عليه دى , بتحصل مع أى منتج , يبقى تعرف إنه منتج ضعيف فى تأثيره , أو له أعراض جانبية خطيرة , و إلا كنت حتلاقى كل الناس بتستخدمه , مهما كان ثمنه .. بجانت إن المشكلة إن أى علاج للتخسيس , لازم معاه شوية عقل فى الأكل , و شوية رياضة أو مجهود زيادة حبتين , عشان يجيب نتيجة , و إلا يبقى كإننا حناخد مية ساقعة و خلاص .. (و بمناسبة‫#‏المية_الساقعة_و_الساخنة‬ , ابقوا فكرونا نتكلم فى يوميات جاية , عن وصفات ‫#‏هرى_السنين‬ فى التخسيس  ) ..

المهم إننا حنتكلم النهاردة عن الموضوع بصفة عامة شوية .. و ربنا يقوينا على إننا نجمّع الدنيا , عشان الناس اللى مش بتحب تقرا كتير ..

أول حاجة المفروض تعرفها لما تختار دوا التخسيس الخاص بيك , هو إنك المفروض ما تختارش على مزاجك , و لا على مزاج واحد صاحبك , حتى لو كان جرّب المنتج ده و جاب معاه نتيجة .. و لكن لازم يكون بناء على نصيحة صيدلى أو طبيب , فاهم فى الليلة دى كويس , و يكون عنده ضمير كمان , مش أى حد يعنى ..

أول ‫#‏بلاوى_التخسيس‬ , هى ‫#‏شاى_التخسيس‬ (و اللى حنكتفى بالكلام عنه لوحده النهاردة ان شاء الله) .. شايات التخسيس (المعتادة) , بتشتغل عن طريق إنها تسبب ‫#‏إسهاااااااااااااال‬ للى بيتناولها , فيدخل الحمام كتير , عشان يتخلص من الأكل اللى لسه واكله من شوية .. فيبدأ يحرق من مخزون الدهون اللى فى جسمه , فيخس .. فعاليتها مؤكدة طبعا .. و لكن أعراضها الجانبية بنت ستين ^$#$%&#$@^$ .. و السبب فى كده , إن شوية بشوية , الأمعاء بتتعود عليها , و تبدأ ما تشتغلش كويس إلا بيها .. و صاحبتنا تزود الجرعة كل فترة بالتدريج , لحد لما تيجى توقفها بعد كده مرة واحدة , فييجى لها ‫#‏إمسااااااااااااك_مزمن‬ (بالعكس يعنى) , ممكن يؤدى إلى بواسير , أو شرخ شرجى , لا قدر الله ..

و ده طبعا بجانب حاجة بالمنطق خالص , و هى إنها بتحرم الجسم من فايدة الأكل اللى بيتم تناوله .. و تلاقى الواحدة من دول فرحااااااااانة إن عندها إسهال , و تقنع نفسها إن ده الطريق الوحيد للتخسيس ..

و تبقى مصيبة سودا و منيّلة , لو الشاى كان متهرب , أو غير معروف المكونات , زى اللى بيتم تسويقه فى التليفزيون , أو المراكز المشبوهة للأعشاب , و هنا ممكن يتغشّ بحبوب تلعب فى الهرمونات (غالبا هرمونات الغدة الدرقية) عشان تزوّد الحرق , كده نبقى دخلنا فى مشكلة أسوأ و أضل سبيلا !! ..‫#‏اللعب_فى_الهرمونات_أخطر_من_اللعب_بالنار‬ !! ..

و على كلٍ , فالإسهال لوحده بيسبب مشاكل تالية له , منها آلام العضلات و كمان سرعة نبض القلب مثلا , نتيجة نقص مستوى البوتاسيوم فى الدم , , فالشاهد إن الطريقة دى منيّلة .. و اللى بيستخدمها , بيكون شاف نتيجتها (الكويسة من حيث فقدان الوزن بمعدل سريع) ..

…………………………………………………………………………………………..

‫#‏يوميات_صيدلى_مفروس_مع_الدايت‬ (الحلقة السابعة) ..

من أقوى التحديات اللى كانت بتقابلنى قبل كده , لما آجى ألتزم بنظام غذائى , بنيّة تقليل وزنى شوية , هو‫#‏السفريات_المتكررة‬ .. (و ده طبعا يأتى فى المرتبة الثانية أو الثالثة , بعد ‫#‏عزومات_الست_الوالدة‬  ..

و ده لإنى فى السفريات , بابذل مجهود غير معتاد بصراحة .. يعنى مجهود السفر نفسه فى المواصلات المتتالية , لعدد ساعات كبير , و شيل شنطة تهد الحيل , و بعد كل ده , باقف من 5 لـ 6 ساعات يوميا على رجلى , بشكل شبه متواصل , مع بح الزور بشدة (مش باحب أستخدم المايك) , على مدار الـ 5 ساعات دول , و ممكن كمان النوم يكون مش بشكل كافى , .. و كل ده عشان – زى ما انتوا عارفين – انا بادّى دورات فى علم الـ OTC و الصيدلة للطلبة و الصيادلة بفضل الله ..

كل ده كان بيبرمج مخى – لا إراديا – على إنى المفروض أعوّض المجهود ده كله , بإنى أتغذى كويس .. و الغذا ده طبعا , كان بيبقى فى وجبة الغداء .. اللى كنت بافترى فيها بصراحة ..

لكن انا قررت أعقل المرة دى إن شاء الله .. من الليلة دى , حاسافر بعون الله لـ ‫#‏مدينة_بدر‬ , عشان أبدأ‫#‏دورة_OTC_الجامعة_الروسية‬ , بكرة بإذن الله .. و من الليلة دى , حاتعشّى بالعقل .. , و حاكون قدّ المسئولية إن شاء الله ..

الحاجة اللى كل يوم باؤكد عليها فى عقلى , إنى مش ماشى على نظام مؤقت , و المفروض إنى أخلصه , و بعد كده أرجع أخربها تانى .. لكن أنا ناوى إنى أستمر على النظام الجديد فى الدايت , مدى حياتى بإذن الله .. مش يومين و يعدّوا و خلاص .. أنا حاسس إنى كنت مسئول عن زيادة وزنى طول عمرى اللى فات .. و أوعد نفسى , و أوعدكم إنى حابذل كل ما فى وسعى , و حاجيب آخر إرادتى , عشان زى ما وزنى زاد بسببى قبل كده , حاخليه ينقص بسببى برضه , بمشيئة الله , فى الفترة الجاية ..

ادعوا لنا ..

…………………………………………………………………………………………..

‫#‏يوميات_صيدلى_مفروس_مع_الدايت‬ (الحلقة الثامنة) ..

رجعت من ‫#‏دورة_OTC_الجامعة_الروسية‬ , و ربنا وفقنا فى توصيل رسالتنا لعدد كبير .. (اللهم ارزقنا الإخلاص و القبول) .. و كنت قاعد فى الـ 3 أيام , فى مدينة بدر , .. مدينة سكنية جديدة نوعا ما , جنب القاهرة , و مافيهاش فنادق , فتمت استضافتى عند أجدع شباب اتعاملت معاهم فى حياتى , و حنبقى نتكلم عنهم بشكل مفصل فى بوستات قادمة إن شاء الله .. و لكن الشاهد إنهم كانوا فى غاية الكرم (اتنين أو تلاتة منهم كانوا من الشرقية  ) .. و كان منهم Eslam Fathi (أبو أيدين تتلفّ فى حرير  ) .. الطبخ عنده مزاج !! .. و دى كلها كانت أسباب فى إن ‫#‏الدايت_يبوظ‬ .. شىء متوقع طبعا ! .. و لكن خلينا النهاردة نشرح استراتيجية التفكير اللى بدأنا بيها , و حنستمر عليها إن شاء الله ..

ماذا تفعل إذا باظ الدايت بتاعك ؟؟ .. ولا حاجة .. كمّل زى ما كنت , و ما تفقدش الأمل , و ده ببساطة , لإننا متفقين من الأول , على إننا مش بنعمل مجرد دايت , و لكن ناويين نكمّل حياتنا بأسلوب غذائى مختلف .. يعنى مش فترة معينة , و بعدين نرجع زى الأول ..

يعنى ببساطة ما تيأسش .. ارجع زى ما كنت بالظبط .. طبق السلطة قبل ما تبدأ فى الأكل , و شرب المية الكتير زى ما اتفقنا .. و هكذا .. و ده لإن فقدان الوزن السريع ‫#‏كله_مشاكل‬ ..

يعنى ما تفرحش لما تلاقى نفسك بتنزل فى الأسبوع 10 كيلو ! .. انت كده بتهد نفسك بشكل سريع .. و لما توصل للوزن المطلوب , حتلاقى نفسك مفجوع ع الأكل بشراسة , طالما حتبطّل الدايت بقى , فتوصل لوزنك الزايد تانى بسرعة الصاروخ !! .. ما هو أصله الممنوع مرغوب !! ..

و مش كده و بس .. الدايت الانتقامى ده , بيكون أسرع طريقة للحصول على ما يسمى ترهلات الجلد .. جلدك مش بيلحق يتكيف على وزنك المتقلب بسرعة ده .. و دى تقريبا مالهاش علاج إلا بعمليات التجميل .. !!!

و المصيبة اللى كتير مش بينتبهوا لها بقى هى احتمالية إصابة حضرتك بحصوات فى المرارة .. و ده ببساطة , لإن العصارة المرارية بتقعد فترة طويلة فى الحوصلة المرارية , من غير شغلة و لا مشغلة … (حضرتك مش بتاكل دهون تقريبا , و هى وظيفتها هضم الدهون) .. فتبدأ تتركّز , لحد ما تتحول لحصوات كتير , ممكن تكون سبب فى إنك تشيل المرارة !! .. (لا قدر الله طبعا) ..

و عشان كده , انا مش مستعجل على إنى أفقد وزنى بسرعة .. فيه قاعدة بريطانية بتقول : Slowly But Surely .. (ببطء و لكن متأكدين من النتيجة) .. و انا – زى ما قلت لكم – متأكد من النتيجة إن شاء الله ..

…………………………………………………………………………………………..

‫#‏يوميات_صيدلى_مفروس_مع_الدايت‬ (الحلقة التاسعة) ..

احنا فى اليوم الـ 15 بفضل الله .. و احنا ع الدرب مكملين .. (نزلنا من أول ما ابتدينا من 5 إلى 6 كيلو تقريبا , بفضل الله) .. و أحد أهم الحاجات اللى مخليانا مش بننفض للموضوع , هو تشجعيكم المستمر لينا … بجانب رؤيتى للناس اللى بتكتب فى تعليقاتها , إن اللى بنقدمه , أفادها للدرجة اللى حفزتها على عمل دايت هى كمان !! .. و ده فى حد ذاته إنجاز بالنسبة لى ..

النهاردة كلامنا عن ‫#‏هرى_السنين‬ فى نصايح الدايت .. يعنى تلاقى أى حد يعمل دايت , يقوم يفتكس كلام مع نفسه , ما أنزل الله به من سلطان , و يبدأ يقوله لحبايبه , على أساس إنها وصفات مجربة .. و هى كلها فى الآخر كلام لا يسمن و لا يغنى من جوع !! ..

أولهم , حكاية المية السخنة !! .. يا لهوى !! .. يقول لك : اشرب مية سخنة , فالدهون حتسيح (!!!!!!!!!!) .. لا يا شيخ !! .. هى إيه اللى تسيح ؟؟!! .. الدهون ؟؟!! .. هى الدهون واقفة فى المرىء , و الميّة السخنة لما تنزل عليها حتسيّحها ؟؟!! .. ولا المية حتجرى فى الجسم (بنفس درجة حرارتها) , و توصل للدهون اللى فى الكرش مثلا , و تقوم مدوباها ؟؟!!! .. انتوا مصدقين اللى بتقولوه ده ؟؟!! .. Tell Me ..

المشكلة الأنقح إن المية السخنة دى – لو جينا نتكلم بالورقة و القلم بقى – بتكون ضد الدايت , مش معاه .. و ده ببساطة حنفهمه لو عكسنا الآية .. تخيل معايا لو شربت مية ساقعة .. إيه اللى حيحصل ؟!! .. جسمك – كما يقول أحد كبار أساتذة السمنة و النحافة فى مصر – حيحاول يعوّض البرودة دى بإنه يحرق شوية سعرات حرارية و دهون .. أما بقى لو حضرتك بتشرب مية سخنة , فانت كده بتدّى الجسم طاقة من بره .. و تساعده , على إنه يحتفظ بدهونه  ..

بجانب – ياااا سيد العاقلين – إن الدهون بتحتاج درجة حرارة عالية جدا , عشان تسيح بالمية السخنة .. و المواعين اللى بتتغسل فى المطبخ كل يوم تشهد !! .. طبعا مش أنا اللى باغسلها  , و لكن من المعروف إن المية السخنة بتسهل إزالتها من الأطباق و كده !! ..

دى كانت افتكاسة غير صحيحة كده ع السريع النهاردة .. و تابعونا ان شاء الله , مع ‫#‏هرى_آخر‬ فى الحلقات القادمة

…………………………………………………………………………………………..

#يوميات_صيدلى_مفروس_مع_الدايت (الحلقة_العاشرة)

الجانب النفسى فى عمل الدايت مهم جدااااااا .. حنحاول نلخّص فيه أهم النقط اللى وصلت لها على شكل كبسولات سريعة .. أتمنى إنها تعجبكم ..

الإرادة مهمة جدا فى البداية .. و لكن التعود فيما بعد على نظامك الغذائى السليم , بيخلى الموضوع أشبه بروتين بسيط , بعد ما جسمك بيقبل الوضع الجديد .. يعنى #الطلعة_الأولانيةهى أهم ما فى الموضوع .. و الاستمرار عليها شوية مهم برضه ..

و لكن لازم تطبق مقولة “انتبه لما تأكله” دايما .. يعنى إوعى تاكل و انت مش واخد بالك .. إوعى تاكل قدّام التليفزيون .. استطعم باللى بتاكله على قد ما تقدر , عشان عقلك ما ينكرش إنك أكلت بعد فترة بسيطة و يحسسك بإنك جعان ..

لو جعت , كل .. إوعى تحرم نفسك بشكل يخليك جعان .. لكن – زى ما اتفقنا – شوف انت حتاكل إيه عشان تسد بيه جوعك .. و لازم تفرق بين الجوع الحقيقى و الجوع الوهمى (اللى العقل فيه بيشتغلك و بس) .. الجوع الوهمى , تقدر تقضى عليه لو شربت كوبايتين مية ورا بعض .. كده عقلك “حيتبطّ” و مش حيطالبك بإنك تاكل لفترة معقولة .. أما لو كنت جعان بجد , فحتفضل جعان حتى بعد ما تشرب المية .. و كده كده المية مفيدة , فمش حتخسر حاجة لو جربت الفكرة دى لو جعت بين الوجبات .. المهم إنك لما تسد جوعك بـ snacks , ما تعملش فيها عبده العبيط , و تقضيها شيبسى و بيبسى و جلاكسى (كعادة الشعب المصرى) , لكن اختار الحاجات اللى فيها سعرات حرارية قليلة .. و تكون ألياف , عشان تملى البطن لحد ميعاد الوجبة الجاية .. يعنى خياراية مثلا , أو كوباية زبادى و عليها معلقة ردة .. و وراها كوبايتين مية برضه ..

المهم إنك ما تجوعش , عشان عقلك ما يكرهكش فى الدايت , بجانب إن الجوع من أقوى#معكرات_المزاج .. و ده من أهم الحاجات اللى الصيام بيروضها فينا فى رمضان .. و هى إننا نتغلب على عصبيتنا حتى و احنا جعانين .. و إوعى تاكل سكريات (كربوهيدرات يعنى) كتير .. كل كربوهيدرات و كل حاجة , لكن بالعقل .. و على فكرة , من خدع العقل إنه بيفرح قوى لما انت تاكل كربوهيدرات .. أثبتت الأبحاث إنك لما تاكل سكريات , مستوى الـ Serotonin بيبدأ يزيد .. و ده يعتبر أبو السعادة اللى ممكن تحسّ بيها لما تاكل حاجة فيها سكر .. أو حتى كربوهيدرات عادية , مش لازم تكون مسكّرة قوى يعنى ..

من الحاجات المهمة برضه فى الجانب النفسى لما نخسّ , هو إننا نتخيل الوزن المثالى اللى حابّين نوصل له , و نفكّر نفسنا بيه كل ليلة قبل ما ننام .. و ده بيشجعك على الاستمرار يوم بعد يوم .. بس المهم إنك ما تقيسش وزنك كل يوم عشان ما تحسش إن النزول فى الوزن بطىء .. قيسه كل أسبوع أو 10 أيام .. عشان لما تحس بالفرق عن آخر مرة , تحس بالإنجاز .. و ده برضه من أهم مقويات الإرادة فى التخسيس ..

و آخر حاجة , حابّين نقولها النهاردة , هى إنك ما تربطش الأحداث اللى بتحصل حواليك بالدايت اللى ماشى عليه .. يعنى مش لو حصل موقف يضايقك , تروح تاكل عشان تنسى .. و مش لو حصل موقف يفرحك , تروح تاكل عشان تحتفل بالموقف .. (بلاش استهبال , الله يكرمك) .. كل على قدّك , و ما تربطش الدنيا بالأكل قوى كده .. و لو اشتهيت حاجة من الاكل , اكتبها فى ورقة , أو احفظها فى ذاكرتك كويس , و ابقى قول إنك حتاكلها فى يوم التبويظ اللى اتفقنا عليه قبل كده (اللى هو وجبة واحدة , مش يوم بحاله يعنى) .. و ده حيصبّر عقلك ع الشهوة القوية اللى ربنا غرسها فينا تجاه الأكل ..

و بس كده النهاردة .. #الحلقة_الجاية , حاقول لكم نظامى الغذائى الخاص بالدايت بيبقى عامل إزاى بكل تفاصيله اليومية إن شاء الله .. #انتظرونا ..

…………………………………………………………………………………………..

لو بتستفيد حاجة من متابعة حلقات يومياتنا الجديدة , ما تبخلش على أصحابك بـ ‪#‎Share‬ لها , عشان يستفيدوا هما كمان ..

اضغط Follow و Get Notifications عشان تعلم بباقى الحلقات لما تنزل فى أول وقتها إن شاء الله .. —————— > أحمد الجويلى .. و لو مش عارف تعمل الكلام ده ازاى , شوف الصورة دى :http://goo.gl/8m71uT

و ربنا يقوينا ..

‫#‏استعننا_ع_الدايت_بالله‬

كما يمكنك أن تشاهد معنا تلك المجموعة من الرسائل المصورة عن السمنة و الادوية الخاصة بها …….

رسائل صيدلانية يومية .. الرسالة رقم 012

http://www.youtube.com/watch?v=_6pO7Ffm6HE

رسائل صيدلانية يومية .. الرسالة رقم 013 (Bran)

http://www.youtube.com/watch?v=tEwXWpRehkA

رسائل صيدلانية يومية .. الرسالة رقم 015 (الأورليستات)

http://www.youtube.com/watch?v=wmYnWo00S9M&feature=relmfu

رسائل صيدلانية يومية .. الرسالة رقم 016

(نهاية حديثنا عن التخسيس و أخطائه القاتلة)

http://www.youtube.com/watch?v=yJwxfW_0aIE

….

محاضرة أخرى موجهة للجمهور عن السمنة

أحمد الجويلى

One response to “يوميات صيدلي مفروس مع الدايت

  1. جزاكم الله خيرعلى المعلومات القيمة وربنا يقدركم ع فعل الخير بس كنت عايزة اسال سوال ف موضوع االسوائل اللى بتعمل اسهال وتساعد ع التخسيس…. فى دكاترة كتير بتكتب ع الشاى الاخضر للتخسيس يعنى الواحد ميشربهوش والمشروبات اللى بتعمل ع التخسيس ينفع نشربها ايه شكرا

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s