#قواعد_الـOTC_الأربعون


لو قسّمنا مجالات الصيدلة , إلى Community Pharmacy و Clinical Pharmacy و Lab و Forensic .. و هكذا , حنلاقى إن الـ Community Pharmacy , بيتميز بإنه الأكثر حرية ما بينهم كلهم تقريبا , و فيه بتكون رئيس نفسك , بمجرد ما تفتح صيدليتك الخاصة , و المسئولية بتكون عندك تجاه مرؤوسيك اللى أدنى منك فى السلم الوظيفى فى الحالة دى , و دى فى حد ذاتها ميزة كبيرة ..
.
و لو قسّمنا التخصصات اللى ممكن نمارسها داخل الصيدلية , حنلاقى منها الـ OTC و الـ Herbal Products و الـ Pharmaceutical compounding و الـ Cosmetics , و خلافه .. و لو دققنا , حنلاقى إن الـ OTC هو التخصص الوحيد اللى فيهم , اللى يجمع المميزات الآتية : ..
.
1. بتفيد فيه المريض إفادة مباشرة فى صحته ..
2. من أسرع الوسائل لكسب ثقة المريض ..
3. خاضع لقدراتك العلمية و مهارتك فى الإقناع ..
4. مش بياخد مجهود فى التحضير أو التركيب ..
5. فعاليته شبه مضمونة , بسبب ضمان الشركات اللى بتتعامل معاها ..
6. يتم تفصيله على حسب احتياج المريض و قدرته المادية ..
7. ما يقدرش يمارسه بحق , إلا الصيدلى الدارس و الفاهم لشغله ..
8. من أهم مفاتيح المكسب الحلال و الوافر داخل أغلب أنواع الصيدليات ..
9. الطريق الأسرع لإثبات كفاءتك كصيدلى فى عيون صاحب الصيدلية أو مديرها ..
10. دايما متجدد و مش بيقدم أبدا , و نقدر نعتبره Evergreen فعلا ..
.
ها .. بعد كل ده , لسه مش مدرك أهمّية الـ OTC داخل الصيدلية ؟؟!! ..
.
‫#‏الكنز_المهدر‬
‫#‏أوتيسيهجى_و_أفتخر‬

40 rules of otc

#قواعد_الـOTC_الأربعون (على وزن #قواعد_العشق_الأربعون كده) …

.

1. مش كل حالة تدخل لك الصيدلية , لازم تطلع بكيس دوا

2. دورك إنك تقيّم الحالة , مش إنك تشخصها .. الطبيب مهمته الأصلية : التشخيص

3. إوعى تفتى بغير علم .. سمعتك حتتدمر شوية بشوية , و أرواح بنى آدميين , حتبقى فى رقبتك:/

4. طوّر نفسك صح , عشان تكون قد المسئولية دى .. حياة الناس مش لعبة

5. دورك ممكن يكون مهم جدا , لو حوّلت الحالة على التخصص السليم من الأطباء

6. حط نفسك دايما مكان المريض , و اسأل نفسك : يا ترى موقفى إيه من اللى بيتقال ده ؟

7. دايما حاول تدوّر على سبب المرض و تنصح المريض بتجنبه , و ده أفضل من علاج الأعراض

8. النصيحة الطبية اللى بتخرج من بقك , أهم 1000 مرة من عشرومية علبة دوا تطلع للمريض

9. أسهل شىء هو إنك تلف و تدور فى الكلام , لكن ببساطة هو الطريق المختصر للسقوط برضه

10. الصيدلية مش درج فلوس .. و المرضى مش جيوب متحركة و خلاص

11. لو وثقت فى نفسك , المريض حيثق فيك بسرعة

12. ثقة المريض , هى المفتاح السحرى عشان تبقى ناجح فى الصيدلية .. المريض المصرى شكاك بطبعه أصلا😉

13. اسمع من المريض كل شكوته , بلاش تقاطعه أو تبين إنك مخنوق أو مستعجل😦

14. ابتسم .. بس بدون تصنع .. خلّى ابتسامتك بصدق🙂

15. إوعى تعمل فيها طبيب و تكشف .. دى ممكن يكون فيها رقبتك

16. حاول تفتكر أسماء المرضى .. دى حاجة بتسعدهم جدا ..

17. البالطو الأبيض هو زيك الرسمى , لو تخليت عنه , يبقى ما تزعلش لما حد يقول لك : يا كابتن , أو يا برنس😉

18. ما تقفش ورا الكاونتر , كإنك لسه طالع من الحمام , أو قايم من النوم .. و انت أكيد فاهم قصدى😉

19. مش باقول لك “حطى ميك أب” , لكن باقول لك خلى اللى يدخل ياخد باله إنك صيدلانية , مش عبلة كامل و هى واقفة على عربية الكشرى , فى لن أعيش فى جلباب أبى

20. خليك لمّاح , و اقرا شكوى المريض من بين السطور (بنسمى ده : الحسّ الصيدلانى)

21. اسأل المريض ع الأدوية اللى أخدها قبل ما ييجى لك , أو اللى بياخده باستمرار

22. ما تكتفيش عند أى سؤال بالإجابات دى (عادى / من فترة / من زمان / مش فاكر)

23. خلّى أسئلتك مفتوحة (أخبار عينك إيه ؟؟) , مش مقفولة (فيه زغللة ولا لأ ؟؟)

24. اطلب من المريض يعدّى عليك بعد فترة مناسبة , عشان تتطمن عليه

25. إوعى تعمل خصم

26. إوعى تعمل خصم

27. بالله عليك يا شيخ .. إوعى تعمل خصم

28. ادى أمل دايما للمريض , مهما كانت حالته منيلة

29. ما تشتمش زميل ليك , سواء طبيب أو صيدلى ..

30. اسأل دايما عن طبيعة عمل المريض .. ساعات بتكون هى السبب فى المشكلة

31. الشكك الكتير , خراب بيت للصيدلية😥

32. اسأل المريض عن الأدوية اللى ممكن يكون محتاجها تانى

33. سلّم عليه بالإيد قبل ما يمشى .. و قول له : نوّرت و آنست🙂

34. حسن خطّك ع العلب لو حتكتب طريقة الاستعمال

35. ما تصرفش الأغلى و خلاص , أو اللى مكسبك فيه أعلى  .. المريض مش هفيّة , و حيفقسك

36. تواجد فى مملكتك أطول فترة ممكنة

37. اعذر المريض لو اتعصب أو اتنرفز .. ربنا ما يكتب عليك الألم اللى هو فيه😦

38. لو الصيدلية زحمة , هدّى المنتظرين بكلمتين كل شوية .. بتفرق معاهم على فكرة

39. ما تطوّلش فى تليفونات قدّام المرضى , مهما كانت مهمة .. أجّلها لبعد شوية

40. إوعى تكون نسيت😮 .. ما تعملش خصم .. اللى بيعمل خصم , بيرخّص نفسه قدّام المريض

.

#لو_عجبتك_شيرها

.

بقلمى..  أحمد الجويلى

و الآن استمع إلى هذا الملف الصوتى و غير حياتك كصيدلى

.

One response to “#قواعد_الـOTC_الأربعون

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s