د. أحمد .. أنا عاوز أبقى محاضر زى حضرتك كده , و أدّى كورسات OTC , و أبقى مشهور .. أعمل إيه عشان أكون زى حضرتك ؟!!! ..


افتكر

د. أحمد .. أنا عاوز أبقى محاضر زى حضرتك كده , و أدّى كورسات OTC , و أبقى مشهور .. أعمل إيه عشان أكون زى حضرتك ؟!!! ..

.

.

.

الموضوع بسيط جدا .. مع إنى مش عارف هو جه إزاى أصلا , بس حاحاول معاكم بقمة السخرية إن شاء الله .. (معلش , أصلها طالبة معايا سخرية الليلة دى , مش عارف ليه ! ) ..

.

أول حاجة : لازم يكون عندك #رؤية و #إصرار .. يعنى تبقى عارف إنت عاوز تروح فين .. و تحاول تكون دقيق فى رؤيتك قدر الإمكان .. يعنى مهما يقولوا لك إنك أهبل و بتجرى ورا السراب , تقول لهم برضه إنك مصمم على هبلك , و ناوى توصل لحلمك إن شاء الله .. تروح تخطب و تفسخ , لمجرد إن أهلها يعرفوا إنك بتاع كورسات للطلبة , بس فاشل , الطلبة بتسيبه و بيروحوا للمعيدين , عشان بيراجعوا معاهم للامتحان أحسن .. و انت مايهمّكش .. مكمل برضه .. تروح تشتغل فى الصيدلية , و تحاول تطبق فيها اللى اتعلمته فى الكلية , فماتقصش المضاد الحيوى , فتسمع أحلى تريقة من الناس اللى بتيجى لك , و من أبوك كمان , لمجرد أنه يأس إنه يغيرهم , .. تقوم انت مكمّل برضه , لحد ما تعوّد البلد عندك كلها , على إن مفيش مضاد حيوى بيتقص , يعنى مفيش مضاد حيوى بيتقص .. #من_النهاردة_مفيش_مضاد_حيوى_أنا_المضاد_الحيوى😛 .. المهم إنك تفضل مصرّ على هبلك الأزلى , و مكمّل برضه !! ..

.

تانى حاجة : إنك لازم تكون #صبور و #جبلّة .. يعنى يتعرض عليك السفر بدل المرة مليون مرة .. و انت برضه تحس – دونا عن الباقيين – إنك ممكن تنجح فى مصر (عادى خالص .. سمعت إنها حصلت مرتين تلاتة خلال الـ 57 سنة اللى فاتوا .. انت مش أقل من اللى نجحوا دول فى حاجة) .. المهم إنك تصبر .. تفشل عشرومية مرة , و تصبر برضه .. و تقوم من النوم و انت بتحلم بنفسك واقف قدّام أكبر عدد من الحاضرين , ع الـ stage , و كلهم حاسين بقيمة اللى بتقدمه , و ترجع تنام بالليل و انت بتحلم بنفس الحلم ! .. مش باقول لك أهبل ؟!! .. بس الجدعنة بقى إنك من أول ما تقوم , لحد ما ترجع تنام تانى , بتكون بتشتغل على نفسك , و بتطورها , و بتتعلم صح , و تختار من اللى تم تدريسه ليك , أهم حاجة ممكن تنفعك , و تنفع كل اللى حتقابلهم عشان تدرس لهم بنفسك , و تنقل لهم العلم ده إن شاء الله ..

.

تالت حاجة : إنك لازم تكون #موقّر_للكبير .. يعنى #الكبير من دول ياخدك على قفاك رايح جاى (معنويا طبعا) , يعنى ينصب عليك فى كورس مثلا , أو يوعدك بإنه حيشغلك معاه فى نقابة ما أو فى جامعة , و هووووووب , يروح مزحلقك , عشان مش مقتنع بيك .. (آه فجأة كده !!) , تقوم انت تهد كل اللى كنت بتبنيه من آمال و أحلام – بشكل مؤقت – و ترجع تبنيها تانى (لإننا اتفقنا إنك أهبل من قبل كده) .. المهم بقى إن الهبل ده , يكون سبب – بعون الله – فى إن الكبار اللى زحلقوك زمان , يرجعوا يكلموك تانى عشان تقدم عندهم كورسات و محاضرات و ندوات .. ساعتها , تقول بصوت عالى : حكمتك ياااااااااا رب ! ..

.

رابع حاجة : إنك ما تكونش #مادى خالص .. حاول تشتغل ببلاش .. انت صاحب رسالة .. يعنى تقفل صيدليتك , و تتغرب عن أهلك , و تروح تتشحطط فى بلاد الله , و تقعد فى فنادق ممكن تكون مليانة براغيت , عشان تقدم للناس كورسات ببلاش تقريبا .. أما لو كنت مادى بقى و بتاع فلوس , فاستحمل اللى حيقولوه عليك , و هو إن انت عاوز تجيب الـ BMW قريبا , أو إن انت بنيت 17 عمارة حتى الأن من فلوس الكورسات المتلتلة , .. أصلهم ما يعرفوش اللى فيها !! .. بس الشاهد إنك يا تعيش شحات , يا تتشتم كل يوم فى الرايحة و الجاية .. و انت و اختيارك بقى !! ..

.

خامس حاجة : إنك تكون #مرن لأقصى درجة .. يعنى الكورس يبقى مقدّر له إن يحضر مثلا 100 فرد , تلاقيه صفصف على 20 فرد .. عادى خالص .. ربك حيكرمك فى اللى بعده .. أو اللى بعد بعده … المهم إنك ما تيأسش .. و ما تنساش إن وااااااااااحد بس من الـ 20 اللى حضروا دول , ممكن يكون سبب و فتحة خير عليك فى كورسات تانية .. بس ما تنساش تاخد معاك دوا الضغط و الجلطة و الذبحة فى أول محاضرة , لما تتصدم بالكراسى الفاضية قدّامك .. عشان الحرفنة بقى , إنك تجيب آخرك كمحاضر و و تدى كل اللى عندك برضه , كإن لو كان المدرج مليان قدّامك بالظبط !! ..

.

سادس حاجة : إنك تكون #طويييييييييل_البال , و مش عصبى .. يعنى ما ينفعش تتضايق لما تحصل مشاكل فى الشغل , من نوعية إن كورس يتلغى بالكامل مثلا على آخر لحظة .. ياما حصلت .. أو إنك تقعد فى اتفاق 7 ساعات , مع منظمين كورس معين , عشان كل هدفهم إنهم يقدموا الكورس بـ 5 جنيه للفرد , لمدة 18 يوم .. 25 ساعة يوميا .. احنا اتفقنا : الرسالة أهم !! .. و انت مش مادى !! ..

.

سابع حاجة : إوعى تفكّر تكون حد تانى .. ما تبقاش أحمد الجويلى أبدا .. إوعى تقلده , عشان ما تبقاش نسخة مكررة و باهتة منه .. ما تقلدش حد خالص , .. خليك نفسك , و دور على إيجابياتك و نميها و حسنها , و اعرف كويس إن المحاضر مش شغلانة مستقرة ولا بتؤكل عيش تقريبا .. و إن صيدليتك أو مجال شغلك الحالى ممكن يكون أفضل لك بكتير لو نجحت فيه و أثبتت ذاتك .. ما تتغرش بالشهرة أو تجرى وراها , لإنها زائلة و مش باقية لحد .. الشهرة مسئولية فظيعة , إلا – فى نظرى – عند تامر حسنى أو عمرو دياب , ممكن تكون مسئوليتها أهون شوية , عشان لو عملوا خطأ ما , حيبقى اسمه خطأ فنى , أما بعض الناس لو أخطأوا خطأ ما , بتتعلق لهم المشانق , لإنه خطأ فى صحة بنى آدم و حياته !! ..

.

دول كانوا الـ 7 حاجات (اللى بهزار شوية) , اللى المفروض يكونوا عندك , عشان تكون ناجح .. تقدر سعادتك تعتبر اللى فات ده كان الجزء الأول من الإجابة .. و لو عجبكم , حننزل الجزء التانى قريبا إن شاء الله .. أشكركم جميعا على حسن القراءة , و أعتذر عن الإطالة ( و الجرأة المبالغ فيها شوية , بس انا حاطقّ من شوية حاجات فعلا) .. , و نشوفكم على خير قريبا إن شاء الله .. ..

.

أحبكم فى الله ..

أحمد الجويلى

4 responses to “د. أحمد .. أنا عاوز أبقى محاضر زى حضرتك كده , و أدّى كورسات OTC , و أبقى مشهور .. أعمل إيه عشان أكون زى حضرتك ؟!!! ..

  1. السلام عليكم دكتور احمد كل اللي كتبته بالضبط هو اللي انا بعمله بقالي سنتين في نفس المجال لمجرد اني عايز أفيد الصيادلة ومساعديهم سواء الجدد او الخبرات وفكره كورسات للخريجين الجدد من نواحي مختلفه وعادي بدفع من جيبي صابر ومستحمل وكله بيقولي ده سراب ومن خلال تيم تسويق نزل للصيدليات لقيت المشكلة عندهم عباره عن كسل مبرر بأسباب كتير القصه مش ثمن كورس او مواعيده. مش عارف والله زعلان علي الماده العلميه المكتوبة ان ما حدش يستفيد بيها غيري انا واعداد قليله خساره. دكتورنا ارجوا التواصل ٠١٢٢٥٣٢٣٣٦٨

    • و عليكم السلام و رحمة الله و بركاته .. ما تيأسش يا د. أحمد .. انت ماشى صح بعون الله .. و لو فيه إمكانية للتواصل على فيسبوك , أكونت Abu Bassem , يبقى لنا الشرف , و نساعدك قدر الإمكان , بشوية أفكار تسويقية تنجح من خلالها بإذن الله ..

  2. والله يا دكتور ربناا يبارك لحضرتك بججد ويكتر من امثالك ويزيد من نجاحك .. انا نفسي اشتغل في المجال الاعلامي برامج صحية .. حضرتك تقدر تساعدني ؟

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s