الحياة بعد التخرج .. أفكر إزاى ؟؟ | 10 نقط محورية يتعرض لهم الخريج الجديد


438750574_640

مبروك يا بطل !😀 .. أخيرا خلصت كلية , و بقيت خريج من كلية الصيدلة , قد الدنيا !🙂 .. و كل الأبواب مفتوحة قدّامك , و كل اللى عليك إنك تختار حتمشى فى أى سكة ! .. و احنا النهاردة حنناقش 10 نقط مهمة , حتفيدك فى الموضوع ده , و كنت أتمنى إن حد يقول لى عليهم يوم ما اتخرجت أنا من 7 سنين .. و لكن أنا سعيد إنى بانقلهم لك بشكل ملخص و سريع , يخليك تقدر تختصر أيام كتير من الفشل و العذاب إن شاء الله , لحد ما توصل لهدفك اللى بتحلم بيه !! ..😀

الفلوس

هى أهم حاجة طبعا قدّام عينيك حاليا .. (إزاى أحصل على أكبر قدر من الفلوس بأقل قدر ممكن من المجهود , و فى أسرع وقت ؟؟!!) .. اطمئن .. أغلب البشر بيفكروا كده أصلا ! .. يعنى الإنسان بطبعه طماع و كسول و متعجل .. و ده شىء فى الطبيعة البشرية .. و مش عيب على فكرة .. لإنه – منطقيا – حيحفزك على ابتكار أفكار ممكن تكون جديدة و غير معتادة , للوصول لهدفك ده .. و لكن مش دى المشكلة .. المشكلة لما يبقى قدّامك أكتر من مجال ممكن تشتغل فيه , فتفكّر بطمع زاااااائد , و تختار المجال اللى سمعته معروفة إنه بيكسب كتير و خلاص , بغضّ النظر عن إن كنت بتحبه ولا لأ .. بالله عليك يا شيخ ما تعملش كده !! .. عشان من دلوقتى , لازم تعرف إن الفلوس مش كل حاجة .. و إنها جاية جاية إن شاء الله .. و لكن الحاجة اللى بتحبها هى اللى حتستمتع فيها بحياتك , و تجيب فلوس برضه .. أما المجال اللى دخلته عشان الفلوس (كأول أولوياتك) , حتتحول جواه لكائن بيكره نفسه , عشان حتحس إنك مجرد (تور فى ساقية) , و خلاص ! .. كل يوم تقوم من النوم , عشان تروح تجيب شوية فلوس و ترجع , بس بتكره اللى بتعمله .. مش طايقه .. و هنا نصيحتى ليك من الأول : اتجنن و اشتغل اللى بتحبه , حتى لو مش صيدلة خالص ولا له علاقة بيها .. المهم إنه يكون حاجة بتحبها .. و حلال طبعا ! .. , و هنا أنصحك بإنك تشوف الفيديو القصير ده , لواحد من اللى غيروا حياتى شخصيا , لما شفته .. من هنا

تحديد الأهداف

لو انت خريج جديد اليومين دول , و لسه ما حددتش هدفك , فاسمح لى أقول لك إنك متأخر شوية للأسف , لإن خطوة “تحديد الأهداف” دى كان المفروض تتم من زمان شوية .. و انت لسه طالب .. و لكن احنا لسه فيها , و تقدر تنفّذ الخطوة دى بسهولة , عن طريق إنك تتعرف (عن قرب) على معظم المجالات اللى ممكن تشتغل فيها بعد التخرج .. و على فكرة , المجالات كتير , مش صيدلية و دعاية و مصنع و حكومة و خلاص .. لا يا سيدى الفاضل .. عندك كمان التدريس و المعامل و الطب الشرعى و الأبحاث و السفر و غيره و غيره من المجالات .. بس اللى يدوّر و يدعبس على حلمه بيلاقيه .. التعرف عن قرب ده , بييجى عن طريق إنك تبحث ع النت , من أول ما تكتب اسم المجال اللى انت عاوزه على جوجل , و تضغط إنتر , لحاااااااااااااد ما تلاقى 4 أو 5 أشخاص بيشتغلوا فى المجال اللى انت بتحبه , و تبدأ “تلزق” لهم بالمعنى الحرفى للكلمة , و تتعرف من خلالهم على خبايا الشغلانة و مزاياها و عيوبها و طريقة الاستمتاع بيها كمان .. و همّا مش حيبخلوا عليك .. و لو واحد فيهم قال لك كلام يطفشك منها , أكيد الباقيين مش حيعملوا كده , و حيطلع عندهم ضمير ! ..

exploring-your-options-after-graduation-20130426

جدولة الخطوات

حددت هدفك يا معلم ؟ .. طب الحمد لله .. قرر بقى إنك توصل له فى توقيت معين إن شاء الله .. يعنى لو كنت ناوى ع السفر للخارج مثلا .. قول لنفسك كده , إن فى سنة 2017 , أنا حاكون صيدلى فى أمريكا .. و تحديدا فى ولاية ميامى .. و مرتبى ممكن يكون قد كده .. و عدد ساعاتى قد كده .. و هكذا .. حدد فى خيالك تفاصيل و مواعيد وصولك للهدف .. طب و بعدين ؟؟!! .. خلاص كده ؟؟!! .. أروّح أنام بقى ؟؟!! .. لا طبعا .. اشتغل بقى على حلمك ده , و طوّر نفسك – زى ما حنقول كمان شوية – بحيث إنك توصل لحلمك .. يعنى عشان تسافر أمريكا مثلا , اتعلم انجليزى صح – و حنقول إزاى برضه إن شاء الله – و ادرس المعادلة الأمريكية كويس , و شوف باقى المتطلبات اللى تخليك تكون فى أمريكا فى الوقت اللى حددته , و ابدأ جدولها .. يعنى الخطوة الأولى , عاوزة سنة عشان تتم .. الخطوة التانية 6 شهور بس و تخلص إن شاء الله .. و هكذا .. و اكتب ده بدقة على ورق , عشان ما يبقاش مجرد أحلام خيالية و خلاص !! .. تمام يا ريس ؟؟!! .. ماشى معايا لحد دلوقتى ؟؟!! ..

الوصول للهدف

من دلوقتى باقول لك : ماتأنتخش لما توصل لهدفك , و تقول “بااااااااااااااس .. أنا وصلت .. مش عاوز حاجة من الدنيا بقى” .. لا يا كبير ! .. يا ريتها كانت كده .. انت لما توصل لهدفك , حتحس كإن فيه هدف تانى ظهر لك , و حتحتاج تمشى له برضه , عشان تحققه .. و هى دى الدنيا , فما تفتكرش إنك بكده تبقى فاشل لا قدر الله .. و لكن حياتنا كده , كل ما نوصل لهدف معين , نكتشف إن وراه هدف تانى .. برّاق برضه و بيلمع كده , و بينادينا عشان نوصل له .. مفيش مشكلة .. بس المهم إنك تبقى عارف ده كويس , و مش ماشى و خلاص بلا وعى أو إدراك  لخريطتك اللى انت ماشى جواها .. و على فكرة , فيه ناس تانية مش بيكونوا حددوا هدفهم من الأول , فتلاقيهم كل يوم فى مجال .. مش لاقيين نفسهم ! .. و دول حالهم يصعب ع الكافر , لإنهم زى اللى بيلفّ فى دايرة مفرغة , أو بيتحرك خطوة واحدة فى كل اتجاه , و يرجع تانى لمكانه بعدها , عشان يروح فى اتجاه جديد , فمش بيوصل لأى حاجة !! .. عشان خاطرى ما تكونش واحد من دول على قد ما تقدر .. بالرغم من إنك ممكن تلاقى واحد منهم يقول لك إنه فرحان باللى بيعمله , عشان بيكتسب خبرات و كده .. و ممكن يكون معاه حق .. و لكن صدّقنى , عمره كده بيضيع منه بدون ما يحقق حاجة تذكر !! ..

الضمير

أزمة شعبنا كلها فى الضمير .. دى كلمة قالها لى أبويا , و ما زال بيرددها , لما يشوف أى مشكلة بتقع فيها البلد .. و عشان كده , خلينى أقول لك : خلى عندك ضمير .. و خليه صاحى قدر الإمكان .. ما تديهوش منومات ولا مهدئات .. لإنه حيبقى البوصلة بتاعتك تجاه الحلال خلال طريقك المهنى فيما بعد .. حيتعرض عليك حاجات حرام كتير , ممكن تكسبك فلوس بالهبل !! .. لكن الشطارة إن بوصلتك تكون شغالة كويس , و تقدر ترفض بيها الفرص الحرام دى .. زى إنك تاخد رشوة .. أو تعرض رشوة .. أو تصهين فى مراقبة انت مسئول عنها , .. أو تبيع الغالى بدل الرخيص .. أو إنك حتى تبيع مخدرات .. و حاجات تانية كتير معروفة .. بس المصيبة السودا إن فيه ناس كتير بتحلل الحرام لنفسها !! .. (الرشوة : إكرامية .. و بيع الغالى : شطارة .. و غض البصر فى المراقبة : بنشيل بعض فى الشغل .. و حتى بيع المخدرات : أمّال حنؤكل عيالنا منين ؟!! ) .. اسمح لى أقول لك إنك غير كل دول .. و اعرف إن الحرام ممكن يكون طعمه حلو .. لكن مرارته فى الآخر , و مش بيشبع .. لكن الحلال عكسه .. بيشبع حتى لو قليل , و طعمه أحلى من العسل ! .. اعرف كويس إن أى حرام حترفضه النهاردة , ربنا حيعوّضك عنه .. مش انا اللى باقول على فكرة .. دى معروفة .. من ترك شيئا لله , عوّضه الله خيرا منه ..

العقبات و العراقيل

و دى مفيش أكتر منها .. أنا عارف كويس .. من أول ظروف البلد اللى مش عاوزة تتعدل , مرورا بظروف كل شغلانة ممكن نشتغلها بعد التخرج , لحد الظروف الشخصية اللى ممكن تصيب كل واحد فينا على حد , من مرض أو يأس أو انشغال أو سدة نفس .. أو أى حاجة تانية .. بس انا عاوز أقول لك كلمتين فى الصميم , إوعى تفتكرهم فض مجالس أو كلام “تنمية بشرية” و خلاص , .. بص يا بوب .. اللى عاوز ينجح بينجح .. و اللى عاوز يتحجج بأى حجة (كبيرة أو صغيرة) بيتحجج برضه .. ظروف البلد طول عمرها موجودة , و مع ذلك , بنلاقى ناس بتنجح .. و فى نفس المكتب , بيكون فيه اتنين شغالين , واحد ناجح و التانى فاشل و يائس دايما .. و حتى ظروف المرض أو الانشغال .. كل ده تقدر تتغلب عليه بنفسك .. بس المهم إنك تتوكل على الله , و تاخد بالأسباب صح , و تتيقّن جواك بإن ربنا رايد لك الخير , بس انت اتحرك و حاول تتغلب على المطبات اللى فى طريقك , لإن الدنيا مش وردى علطول .. و إلا كان بقى اسمها جنة ! .. لكن دى برضه دنيا .. و لو انتظرت إنها تبقى جنة عشان تبدأ تشتغل و تحقق حلمك , ابقى قابلنى .. عمرك ما حتتحرك !! ..

أنصحك تشوف الفيديو ده عن فن من فنون الفشل🙂

طور نفسك صح

الموضوع ده أنا ناقشته قبل كده بما فيه الكفاية (تقدر تقراه بالكامل من اللينك ده : http://wp.me/p2YNXX-fQ  ) .. و لكن خلينا نلخص بسرعة برضه , عشان المقال يبقى متكامل .. بص يا غالى : مفيش حد حيشغلك بشهادتك اليومين دول .. ولا واسطتك ممكن تخليك تكمّل فى مجال معين لو مش بتفهم فيه , أسبوعين على بعض .. لكن كفاءتك بس هى اللى ممكن تضمن كده بإذن الله .. يعنى ما تاخدش كورسات بالهبل و خلاص , عشان “تستّف” شهادات فى الـ CV بتاعة حضرتك , سواء كان لها لازمة أو مالهاش , على أساس إنك ممكن تحتاجها فى يوم من الأيام .. كل ده بقوا فاقسينه فى الشركات , و اللى زى كده , مش بيعمر فى شغلانة (لو اتقبل فيها) 10 أيام من أساسه !! .. لو عاوز تاخد كورس , خد كورس سمعته كويسة , و ممكن يفيدك فى المجال اللى ناوى تشتغل فيه (و حددته من قبل كده) .. الشهادة اللى حتاخدها فى آخر الكورس , زى قلتها , لو ماحصلش جنبها استفادة قوية .. و حاجة تانية لازم تعرفها : الخبرة العملية دلوقتى بقت أغلى من مليون شهادة .. و اللى يديهالك , يبقى فعلا بيحبك .. و اللى يبخل عليك بيها , يبقى مش طايقك .. و اللى يقول لك إنها مش مهمة , يبقى بيضحك عليك !! .. طوّر نفسك صح , عشان تعرف تشتغل صح .. ما تاخدش كورسات عشان يبقى اسمك أخدت كورسات .. لكن خد كورسات عشان تستفيد بيها ..

و لو عايز تعرف ايه أحسن مكان تاخد فيه كورسات تنفعك في مجالك تقدر تشوف المقال ده : http://wp.me/p2YNXX-j9

كلام الناس

ده المفروض من أحد العقبات و العراقيل اللى اتكلمنا عنها قبل كده .. و لكنى حبيت أفرد له مساحة لوحده , عشان هو مهم بصراحة .. بص يا كبير .. 99% من كلام الناس اللى حتقابلك , حيكون عكس الكلام اللى بنقول لك عليه من ساعتها .. حتلاقى اللى يقول لك : الفلوس أهم حاجة .. و أولهم الحاج و الحاجة فى البيت , .. و اللى حيكونوا صرفوا عليك دم قلبهم لحد ما اتخرجت , و نفسهم يشوفوك “كسّيب” و بتجيب لقمتك من عرق جبينك !! .. و ثانيهم طبعا شريك حياتك , اللى نفسه (أو نفسها) تبقوا مع بعض فى عش الزوجية الذهبى , فى أسرع وقت , و كل اللى بتتمنوه فيه تلاقوه و تحققوه (من خلال توفّر الفلوس طبعا !!) .. و حتلاقى اللى يقول لك : بكالوريوسك و سافر , دى بلد مافيهاش أمل !! .. و دول كتير قوى اليومين دول تحديدا .. و أولهم زمايلك اللى سافروا فعلا , أو الحاج و الحاجة برضه , اللى ما يرضيهمش إنهم يشوفوك قاعد ع القهوة طول النهار !! .. مش بنقول إن السفر وحش .. و لكن مش لازم يكونوا كل اللى سافروا ناجحين يا معلم .. شوف اللى اتغربوا بالسنين , و رجعوا إيد ورا و إيد قدّام .. ولا انت مش بتشوف إلا اللى رجعوا بالعمارات و العربيات بس ؟!! .. م الآخر : سيبك من كلام الناس , عشان لا بيقدم ولا يؤخر .. (جورج وسوف ستايل😛 ) .. و انت و شطارتك فى مقاومته !! ..

العلاقات كنزك الغالى

لما عملوا لقاءات مع عدد كبير من الناجحين , عشان يشوفوا أسرار نجاحهم , لقوا إنهم أجمعوا على إن “العلاقات الطيبة” تعتبر عامل مشترك بين كل إجاباتهم على سؤال “أسرار النجاح” ده !! .. و عشان كده , ابدأ من دلوقتى فى إنك تخلى ده أحد أولوياتك كل يوم .. و هى إنك تنشىء علاقة طيبة مع شخص جديد أو أكتر .. مش لازم تكون حتستفيد منه بشكل مباشر و سريع .. خلى علاقتك طيبة بالكل .. ابتسم للكل .. ما تخسرش حد قدر الإمكان .. و اللى يشتمك النهاردة , هو ما يعرفكش كويس , .. لكن لما يتابعك شوية , حيعرفك , و يعتذر لك بنفسه من غير ما تقول .. لما تبقى علاقتك كويسة بحد , حتبقى تيجى على باله بالخير .. و ممكن يرشحك لوظيفة أو مهنة تكون مناسبة ليك أكتر منه .. الفرص – بإذن الله – بتيجى كده .. و ده أحد أهم الأسرار للحصول عليها .. خلى علاقتك طيبة مع مديرك .. مع زمايلك فى الشغل .. مع عملائك .. ما تبقاش خنيق و رخم أو بتقلش كتير😛 .. خليك ظريف .. حبّوب و طيّوب كده😀  .. فهمت قصدى ؟؟!!

انت ناجح من دلوقتى

دى آخر نقطة كنت أحب إن حد يقولها لى يوم ما اتخرجت انا من الكلية .. و هى إنك لازم تعرف إن النجاح سكة مش غاية .. طريق مش نهاية .. يعنى مش هدف موجود بعيييييييييد خالص , و طول ما انت ماشى فى سكته , تبقى فاشل عشان لسه ما وصلتش !! .. لا يا معلم .. انت ناجح لإنك ماشى بالفعل ع الطريق الصحيح .. يعنى لو قررت إنك تمشى طريق النجاح من دلوقتى , فلازم تفرح , لإنك ناجح بالفعل حاليا ! .. النجاح استراتيجية تفكير .. طريقة تشغيل دماغ يعنى .. يا إما تشغل دماغك بأمل و تفاؤل و إيجابية .. فتبقى ناجح بإذن الله , .. يا إما تشغلها بيأس و حزن و تشاؤم و رفض للواقع , .. فتبقى غير ناجح لا قدر الله .. و انت و دماغك بقى .. شوف حتشغلها إزاى .. و حابب أقول لك إن النجاح مش سهل .. لكن ممكن .. الفشل بس هو اللى سهل , عشان مش بيتطلب منك أى حاجة , غير إنك تقعد فى البيت و تعمل كل اللى على مزاجك أيا كان .. و ساعتها عمرك ما حتنجح !! .. لازم تصبر شوية .. و تكافح أهواءك شوية , عشان تتعلم خبرات جديدة .. و تعرق شوية .. و اطمئن .. على طريق نجاحك , زى ما حتقابل مطبات بايخة و حفر مليانة وحل , ممكن رجلك تغرز فيها كمان , .. برضه حتلاقى ساعات ثمار حلوة , و جناين , و جو جميل , و زرع و خضرة !! .. ساعتها ده حيديك دليل إنك ماشى صح , حتى لو العالم كله قال لك إنك ماشى غلط ! .. و حيديك دافع إنك تكمّل فى سكتك اللى ممكن تكون أول واحد يمشى فيها , فوصل لنجاح , ماحدش شافه قبل كده ! .. بإذن الله ..

دى رسالتى لحضرتك .. و اللى كل حرف فيها , طلع من قلبى , بناء على خبرة 7 سنين من حياتي , من بعد تخرجى , لحد النهاردة .. و اللى أتمنى تكون استفدت منها و لو بحرف واحد .. و لو حصل كده بجد , ما تنساش تدعى لى بظهر الغيب🙂  , إن ربنا يصلح لى حالى فى الدنيا و الآخرة🙂  , و يرزقنى الإخلاص و التوفيق و القبول , و إننا ننال الفردوس الأعلى , إحنا و كل أحبائنا , و إننا نجتمع كلنا فى ظل عرشه الكريم , يوم لا ظل إلا ظله ..🙂

و دلوقتى .. أرجو منك إنك تشوف الفيديو ده ضرورى .. و تقول لنا رأيك .. و لو حسيت بأى فايدة من كلامنا فى المقال ده , أتمنى إنك تنشره لزمايلك فى الدفعة علطول .. اتفقنا ؟؟😉

أحبكم فى الله

أحمد الجويلى

2 responses to “الحياة بعد التخرج .. أفكر إزاى ؟؟ | 10 نقط محورية يتعرض لهم الخريج الجديد

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s