ليييييه بتلحّ كتير قوى , فى تسويق الباقة التدريبية اللى بتقدمها ؟؟


samah

 بيسألونى كتير : ليييييه بتلحّ كتير قوى , فى تسويق الباقة التدريبية اللى بتقدمها ؟؟ .. لييييييه مش بتقلل من سعرها شوية , عشان خاطر تخفف ع الناس (أو عشان خاطر ماسر😀 ) ؟؟!! .. لييييييه داوشنا فى كل شوية , فى بوستاتك بكلام عن الباقة و محتوياتها , و كإنها السر السحرى , أو الحل الأكيد لكل مشاكلنا جوه الصيدلية ؟؟!!! .. إيه اللى يجبرك على إنك تتحمل نقد الناس اللى بتهاجمك ع الفيس , أو بتحاول تقلل من فايدة اللى بتقدمه ؟؟!! .. إيه اللى جابرك على كده يا اخى ؟؟!! .. معقولة بتطلب من الناس كده وشّ , إنهم يعرفوا أصدقائهم عليك كده (عينى عينك) , و مش بتخاف أحسن يقولوا إنك مادى , أو بتستغلهم لمصالح شخصية ؟؟!! .. معقولة الجبروت ده كله ؟؟!! .. إيه اللى مصبّرك على قعدتك فى الصيدلية , أو ع اللاب بتشتغل معظم وقتك , فى حين إنك ممكن ترفّه عن نفسك بأى شكل تانى .. تلعب كورة مثلا , أو حتى شطرنج , لو مش رياضى .. أو تنزل تتمشى مع صحابك اللى ماشفتهمش من زمان !! .. انزل يا عم فك عن نفسك , و سيب الشغل شوية .. صحتك يا عم , مش كده !! ..

كل دى أسئلة و جمل باسمعها حاليا بشكل يومى , ممكن يكون فيه منها اللى بدافع مخلص , و فيه منها أكيد اللى بدافع بواخة أو قرّ أو غيرة , أو ما شابه .. مش مهم .. و لكن المهم إنى قررت أجاوب – بالدليل و بالتفصيل – عليهم كلهم (ما عدا حتة “مادى” دى , عشان دى اتهرت منّى بصراحة😀 )  . و اللى جدع و عنده حيل يقرا كل ده  , .. يشرفنى 
ببساطة , أنا باعتبر نفسى شخص , ربنا أكرمه , بإنه يشتغل الشغلانة اللى هو بيحبها .. و بصراحة أنا مش باحبها بعقل .. أنا باحبها بجنون .. سواء تواجدى داخل الصيدلية و خدمة الناس من جواها .. أو لما بارجع أنقل خبرات علمية و مهنية , ربنا منّ عليا بيها من خلالها , ع الفيس فى بوستات أو رسايل أو ما شابه .. حتى شغل الجرافيك و الفوتوشوب و البريزى , اللى أحيانا باقوم بيه أثناء تحضيرى لكورس أو محاضرة , بيكون ممتع جدا بالنسبة لى .. و عشان كده , أنا متعتى الحقيقية فى الشغل نفسه .. هو هواياتى زى ما باقول دايما بفضل الله .. أما بخصوص الباقة و الأسئلة المطروحة عنها , فيكفينى بفضل الله , ردود فعل الناس اللى بتقتنيها , و بننشرها بعد إذنهم كل فترة , عشان نقدمها لحضراتكم كل فترة , بشكل يخلينا نفخر قدّام ربنا قبل أى حد تانى , بإننا بنوصّل رسالتنا بأسلوب يرضيه , بدون ما نبخس أى حد حقه , أو نظلم نفسنا .. و أنا كنت مدرك من البداية جدا فى شغلنا , إنه من الصعب – بل شبه المستحيل – إن الناس تقتنع بشخص على إنه صاحب رسالة مهنية أو علمية , فى حين إنه يكون بيسوّق لهم شىء بيمثل له مصدر دخل , حتى لو كان جانبى مش أساسى .. و لكن فيه ناس قبلى حققت المستحيل ده بفضل الله .. و منهم د. إبراهيم الفقى , و كل من تبعوه فى مجال التنمية البشرية .. و منهم كمان معظم الدعاة الجدد (زى ما بيقولوا عليهم , بدون ذكر أسماء عشان مش عاوزين مشاكل) , بل كمان الدعاة المعتادين , من الشيوخ المعممين مثلا , .. الناس بتبقى عارفة إنه بيطلع فى برنامج على قناة تليفزيونية , أو فى شريط كاسيت (أيام زمان) , و قبل البرنامج أو بعده , الشيخ بياخد حساب الحلقة أو الشريط اللى سجّله !! .. و لكن الناس دايما بتتناااااااسى اللقطة دى من المشهد الكلى , عشان ما تؤثرش على روحانية الصورة الذهنية الخاصة بالشيخ الكريم ! ..
.
أما عن تحمّل النقد , و استمرارية اللى باقوم بيه , برغم الشتيمة و الخوض فى النوايا اللى بيحصل بشكل شبه يومى حاليا , فى رسائل على الخاص , أو ع العام , أو حتى بتوصيل من صديق مشترك , فهو فضل من الله , من خلال الرسايل المشجعة اللى زى ممكن تقراها تحت الكلام ده دلوقتى , و اللى بتبيّن لنا إننا ماشيين صح بإذن الله , فده بيخلينا نتعامل بهدوء مع النقد , و ناخد منه اللى يفيدنا , و نسيب اللى ممكن يكون لأغراض تانية غير الإفادة ..
.
أما عن التواجد المكثف أو الطلبات المبالغ فيها بعمل mention مثلا , أو تعريف الناس علينا , فده ببساطة , لإيمانى بإن كلما زاد عدد الناس اللى بتتابعنا ع الفيس تحديدا , فده مش حيكون بفايدة ليا أنا بشكل محدد , و لكن بالعكس , حيكون فايدة لهم كمان بشكل كبير , و فايدة للى حيقوم بالتوصيل ده , لإنه حيكون فى ميزان حسناته , إنه ساهم فى زرع الأمل فى نفس زميل , كان ممكن ييأس قريب من حال المهنة , و يغيّر الكارير بتاعه , برغم حبه للصيدلة !! .. و أنا باقول كده بصراحة , لإن كل نسخة من نسخ الباقة اللى ساهمت فى تغيير حياة ناس كتير بفضل الله , بتاخد مجهود خرافى , بدأ مع تجهيز محتواها , و بيستمر مع إرسالها , و حتى بعد وصولها , لمتابعة كل مشترك معانا فيها , و قياس مدى استفادته منها على حدة .. و حل المشاكل اللى ممكن تنشأ من نقص خبرة فى التعامل مع الديفيديهات , أو مشاكل حصلت أثناء نقل أو توصيل الديفيديهات نفسها , أو ما شابه .. كل ده بيكون على كتافى شخصيا .. و مش باخلّى حد تانى يقوم بيه – زى ما قلت قبل كده – عشان أكون أنا المسئول الأول و الأخير عنه , و ما اتحمّلش أخطاء غيرى بدون ما أقصد !! .. فالموضوع مرهق جدا بالنسبة لى .. و ده الشاهد من الموضوع !! ..
.
كل ما ينتابنى الإرهاق الشديد و التعب البالغ , أقول فى نفسى : ارتاح يا واد شوية , و أجّل ميعاد فتح باب الحجز عشان يبقى كمان شهر ولا اتنين .. و ريّح دماغك من وجع القلب ده كله , و اهتم أكتر ببيتك و ابنك , ألاقى نفسى بانغمس أكتر و أكتر فى الشغل اللى باحبه , لما أشوف كلام زى اللى قالته د. Samah فى الرسالة اللى حضرتك شفتها دى , و أقول فى نفسى .. ربنا يجعلها #عاجل_بشرى_المؤمن, و اللى بتكون زى الوقود اللى بيساعدنا على الحركة بنفس أطول , و روح أعلى , و إيجابية أكتر بفضل الله ..
.
و دلوقتى , أنا سعيد إنك وصلت معايا لآخر الكلام ده , و أعتذر لك لو كنت عطّلتك , لكن معلش , كانوا كلمتين واقفين فى زورى , و كتبتهم , عشان بعد كده لو حد سألنى الأسئلة دى ع الفيس أو فى أى مكان , أروح باعت له لينك البوست ده و أريّح نفسى إن شاء الله
,
و بالمناسبة , لو حبيت تقتنى باقة Learn Pharmacy At Home اللى قاعدين نتكلم عليها من ساعتها , اعرف طريقة الحجز من هنا , و ابعت الرسالة , و احنا حنتصل بيك لما نفتح باب الحجز قريبامرة تانية إن شاء الله🙂  http://wp.me/P2YNXX-2V

 

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s