أكثر من 7 مفاهيم مهمة عند تحديد سعر ساعة الصيدلى


– دكتور .. سلام عليكم
– و عليكم السلام و رحمة الله و بركاته .. اؤمر ..
– العفو .. الأمر لله يا افندم .. أنا سمعت عن إمكانية الشغل هنا فى الصيدلية , و حابب أشتغل هنا بإذن الله ..
– طيب .. هايل جدا .. انت خريج من إمتى ؟؟ ..
– أنا خريج السنة دى إن شاء الله يا دكتور .. بس اشتغلت فى شوية صيدليات تانية قبل التخرج كده خلال السنة اللى فاتت ..
– تمام قوى .. قول لى بقى : تحب ساعتك تبقى بكام ؟؟

– لا يا دكتور .. أنا مش حابب أبيع الساعة بتاعتي  😛

– انت جاى تشتغل ولا جاى تقلش .. اطلع بره !! ..

🙂🙂🙂🙂🙂

.
حنتكلم يا جماعة عن #سعر_ساعة_الصيدلى .. و ده سؤال كونى غامض , كل خريج لازم يسأله لنفسه و لغيره , و فى الآخر مش بيوصل تقريبا لحاجة ترضيه , إلا إنه يسمع شوية أرقام و ما يعرفش يختار ما بينها , و لو اشتغل بأى قيمة فيها , يبقى حاسس إنه مظلوم و مضطهد و صاحب الصيدلية بيمص دمّه يوميا !! .. و كل ده عشان الموضوع مالوش قواعد واضحة .. و لكن ليه أسس بسيطة و عامة , حنحاول إننا نسلط عليها الضوء النهاردة إن شاء الله ..

.62354_330982827018302_513798493_n copy

من المفاهيم الخاطئة – فى وجهة نظرنا – إن سعر ساعة الصيدلى , بيتوقف على المنطقة اللى بيشتغل فيها و خلاص !! .. يعنى سعر الساعة فى اسكندرية كذا , و فى دمنهور لازم يكون أقل ! .. على أساس إيه حضرتك طيب ؟!! .. على أساس رقى المكان أو المحافظة مثلا ؟؟!! .. طب ما هو فيه أماكن فى دمنهور , أرقى بكتير من أماكن تانية فى اسكندرية !! .. يبقى الكلام ده مش مقياس أبدا .. و إن كان من المقاييس , فحيكون فى ذيييييل القائمة خالص !! ..

أمال نقيس الموضوع إزاى ؟؟!! .. أقول لك انا .. ببساطة , حط نفسك مكان صاحب الصيدلية اللى حتشتغل معاه .. و قول لى : إزاى حيقدر يدّيك أى مقابل , بدون ما يعرف مقوماتك و خبراتك و مدى قدرتك على “إفادته” ماديا بشكل يرضيه ؟!! .. مستحيل طبعا !! .. و عشان كده بتلاقى بعض الدكاترة الشطّار , من أصحاب الصيدليات , بيحطّوا الصيدلى الجديد معاهم , أول شهر , تحت التمرين , أو فى فترة اختبار غير معلنة , حتى بعد تحديد سعر مبدئى للساعة , و بعد مرور الشهر ده , يتم تغيير الاتفاق إلى قيمة أعلى , (أو أدنى , و هو اللى تقريبا بينتهى بإن الصيدلى يسيب الصيدلية , و يروح يدوّر على فرصة تانية , يكون فيها مقابل أعلى) !! .. شىء منطقى جدا !! ..

pharm_crop380w

و عشان كده , بيكون الشهر الأول من الشغل ليك داخل الصيدلية , هو المؤشر الأهم على استمراريتك و سعر ساعتك داخل المكان .. و لو جبت فيه آخرك , بشكل ينعكس – و لو بشكل بسيط – على حجم الشغل و المبيعات داخل الصيدلية , فيمكنك ساعتها إنك تضمن – إلى حد ما – إنك ممكن تعمّر فى المكان ده إن شاء الله , و إنك تزيد فى مرتبك كمان بين كل شهر و التانى , لو صاحب الصيدلية بيتقى ربنا , و حابب يحافظ عليك😀

.
حاجة كمان مهمة جدا , و هى إن فيه عوامل تانية بتحكم فكرة تحديد سعر الساعة , و هى الإنترفيو المبدئى اللى بيكون فى الأول خالص !! .. و ده المفروض إنه يكون بشكل ودّى , مش زى ما بيحصل فى الشركات بقى و كده .. و لكنه فى الأول و الآخر , اسمه إنترفيو برضه .. فلازم تتعلم إزاى تقدر تجتازه بنجاح , قدر الإمكان , و اللى بالمناسبة , أهم طرق اجتيازه , هو إنك تحاول فى إنترفيوهات كتيييييير , و تتمرن على كده فى أكتر من صيدلية , حتى لو مش ناوى تشتغل فيها .. بس المهم إنك تشوف , هل اتقبلت بشكل مبدئى فى الإنترفيو , ولا بتلاقى نفسك بتتلجلج و تعرق أثناء كلامك مع الراجل صاحب الصيدلية ! .. و ساعتها , تبقى لازم تشتغل على نفسك كمان شوية , عشان تكتسب مهارة الإنترفيو دى ! ..
.   Untitled-3 copy

و فيه نقطة مهمة , حابب إنى أشاور لك عليها , و هى إن كل يوم خبرة فى مكان ما , بيزوّد من سعرك لما تروح صيدلية تانية .. و كل ما تعمّر فى صيدلية معينة أكتر قبل ما تشتغل فى مكان جديد , ده بيكون دليل أمان عند صاحب الصيدلية لو حب إنه يعيّنك معاه .. يعنى الدكتور فى الإنترفيو , مش حيفرح بيك , لما تقول له إنك اشتغلت فى 10 صيدليات , على مدار السنة اللى فاتت بس !! .. و ده معناه إن حضرتك فيك مشكلة , تخليك زى فرقع لوز بالظبط😀  , و مش بتكمّل فترة مناسبة فى أى مكان !! …

.
الجميل بقى إن فيه حاجات مؤكدة , و لفتات مؤثرة , لو اتعلمتها , ساعتها حتكون الصيدلى المحبب عند صاحب الصيدلية , حتى لو كان فيها صيدلى قديم , أو أسيستانت معتّق من زمان !! .. من أهمها إنك تبيّن قدرتك على إفادته ماديا و معنويا زى ما قلنا , .. يعنى إنه يلاحظ زيادة مبيعاتك فى الشيفت اللى بقيت بتتواجد فيه .. يلاحظ شطارتك فى كتابة النواقص و ملاحظتها حتى لو ماكنتش انت اللى صرفتها , .. يلاحظ إنك بتيجى فى بداية الشيفت بتاعك بالظبط , أو حتى قبله بشوية , و بتمشى من الصيدلية , فى نهاية شيفتك , أو بعده بشوية .. يلاحظ معاملتك الكويسة للمرضى لما ييجوا الصيدلية , و بداية تعلقهم بيك مهنيا , و سؤالهم عليك لما ييجوا داخل الصيدلية .. و الأهم من كل ده , إنه يلاحظ قدراتك العلمية المتميزة , زى إنك تقول لمريض على معلومة مهمة جدا , تخليه يختار صيدليتك دايما , عشان يصرف منها علاجه بعد كده ! .. أو تحذّر مريض من تناول علاجين معينين فى نفس الوقت , عشان ممكن يحصل بينهم تعارض مثلا ! .. و فى الحالة دى , تأكد إن مرتبك ممكن يزيد فى فترة بسيطة جداااااا بعد ما تبدأ تشتغل بالروح دى و الاستراتيجيات دى , داخل الصيدلية !! .. من الآخر , اثبت ولاءك لصاحب المكان .. و ده مش عيب , طالما انتوا اللى الاتنين عندكم ضمير مهنى واعى و محترم ! ..

?????????????????????????????????????????????

السؤال بقى : هل ممكن أضحى فى يوم من الأيام بالمرتب الكبير , فى مقابل حاجة تانية غير الفلوس ؟؟!! .. الإجابة : ممكن جدااااا .. أعرف صيادلة , اختاروا إنهم يشتغلوا فى صيدليات كبيرة و شغّالة , و تقريبا كان مرتبهم مش بيكفّى أكلهم و شربهم , بس عملوا كده , عشان يتعلموا كويس , و يكونوا أكفاء فى مهنتهم , عشان لو حبوا يشتغلوا فى مكان أكبر , أو لو اتعرضت عليهم فكرة السفر , أو ما شابه , فيكونوا ساعتها قدّ المسئولية .. كل ما تكون صغير فى السن و الخبرة , حتحتاج إنك تشتغل فى صيدليات بمرتب قليل , لحد ما تكتسب الخبرة اللى تخليك تنتقل من مرحلة الانتشار , لمرحلة الاختيار , و تقدر ساعتها تختار الصيدلية الأنسب لك فى كمية الشغل و حجم المرتب ! .. يعنى لو عملناها كمعادلة رياضية , نقدر نقول : إن كلما زادت خبرتك , زاد مرتبك و زادت مسئوليتك , و قل حجم مجهودك , و العكس صحيح .. و دورك إنك تكون قادر على تقييم نفسك , و عدم الانخداع فيها , عشان فى أوقات كتييييير جدا , الصيدلى الجديد بيفتكر إنه وصل لمرحلة معينة من الكفاءة , و للأسف مش بيكون وصل لها على الإطلاق .. و هنا ممكن يصاب باليأس و الإحباط , لا قدر الله !! ..
.

و نصيحتى ليك – كالعادة – ما تخلّيش الفلوس و المرتب لهم الأولوية رقم واحد عندك فى حياتك المهنية .. ثق فى إنهم رزق جاى لك من عند ربنا , فما تقلقش بيهم كتير قوى , عشان ما تخسرش متعة حياتك و مهنتك اللى ممكن تكون بتحبها , لمجرد إنك مشغول بالجرى على هدف برّاق , كل ما حتقرب له , حتلاقيه بيبعد عنك أكتر !! .. #منهومان_لا_يشبعان .. خليك من النوع الأول .. #طالب_علم .. لإن متعته أبقى و ألذ .. لكن النوع الثانى #طالب_مال , متعته سريعة جدا , زى مية البحر , بتخليك تعطش أكتر بشكل فيه طمع و جشع لا قدر الله !! .. بالمناسبة , أنا عارف إن وراك مسئوليات و إنك عاوز تتجوز و تفتح بيت , و يبقى لك أسرة و عيال , و تصرف عليهم من غير ما تخاف فى يوم عليهم إنه يتفقروا , أو يشحتوا على باب الجامع بقى😀  , و الأفلام القديمة دى كلها !! .. أنا معاك فى حقك فى كل ده .. و لكن برضه , خليك ماشى بالعقل .. و مين عارف ؟!! .. ممكن تكون بتشتغل النهاردة فى صيدلية بمرتب قد كده , و بكرة الصبح , ييجى لك شغل تانى فى صيدلية تانية , فى وقت إضافى كان بيضيع منك فى التليفزيون أو ع الفيس , و تحس إن ربنا باعت لك الرزق ده لحد عندك ! .. عادى , بتحصل كتير , للى متوكلين على ربهم , و مش قلقانين طول ما همّا فى حماه و معيّته ! ..

.
و نصيحة أخيرة , و لكنها فى غاية الاهمية .. تحرّى الحلال .. و لو اتعرض عليك إنك تشتغل فى صيدلية من اتنين , الساعة فى الأولى سعرها نص سعر الثانية , فى حين إن الثانية مثلا بتبيع ترامادول , أو حتى توسيفان عميانى , و الأولى صاحبها بيتقى الله , و بيراعى ضميره فى مهنته , ساعتها اختار الأولى و انت مغمض , عشان هى دى اللى ربنا بيبارك فى رزقها أكتر من التانية , اللى ممكن تكون الدنيا مغمية عينيه , و فاكر إنه شاطر , و هو للأسف مش عارف نهايته ممكن تبقى إزاى و العياذ بالله ! ..
.
اتفقنا يا سادة يا كرام ؟؟
.

أشكركم على صبركم , على قراءة كل الكلام ده , و أتمنى إنه يكون أفادكم و لو بالقليل .. و إن شاء الله دايما نلتقى على خير فى موضوعات قادمة بعووون الله  🙂

.
أحبكم فى الله
.

أحمد الجويلى

3 responses to “أكثر من 7 مفاهيم مهمة عند تحديد سعر ساعة الصيدلى

  1. اشكرك على سعة صدرك ومعلوماتك الرائعة على فرض ان الساعة بمبلغ 100اقبض كام فى الشهر اذاتفاوتت عدد الساعات من 6الى 8 ساعات

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s