تعلم فن الإقناع و التفاوض فى 9 نقط سحرية


كلنا بنتحط فى نفس الموقف كل يوم .. نبقى عاوزين حاجة معيّنة , و فيه شخص تانى مش عاوز يديهالنا أو يسمح لنا بإننا نحصل عليها .. و الكلام ده بيتكرر أكتر – فى الغالب – بين الابن و الأب .. أو بين الزوجة و زوجها (و أحيانا العكس😉 ) .. و أحيانا كمان بين الدول و بعضها , على اللى بيسموها “طاولة المفاوضات” .. ! ..

و احنا النهاردة , حنفتح الباب .. حنشوف المدخل و بس .. و حيبقى مطلوب منك إنك تتعمق أكتر و أكتر , لو حبيت الدنيا دى , و قررت تهتم بيها أكتر .. و هى موضوع “مهارات الإقناع و التفاوض” .. و فى كلامنا الجاى , حنعرض شوية نقط سريعة , ممكن تساعدك للحصول ع اللى انت عاوزه فى أسرع وقت ممكن إن شاء الله ..

بس قبل ما نستعرض النقط دى , خلينا نتفق على حاجتين مهمين .. أولهم إننا مش جايين نعصّى الأبناء على آباءهم – لا قدر الله – أو نخلق مشاكل بين الأزواج و بعضهم – لا قدر الله برضه – و إنما جايين نعرض وسائل أفضل للتفاهم و تحقيق المنفعة المشتركة للجميع , مش أكتر من كده😉 ..

و الحاجة التانية إنك لما تقرا الكلام الجاى ممكن تلاقى نفسك بتطبق منه نقط كتير .. و لكن الفرق كبير بين إنك تمارس مهارة معيّنة بالفطرة كده , أو إنك تتعلمها و تتقنها و تمارسها على إنها لعبة محكمة , أو خطة مدروسة , و قواعدها معروفة .. و ده اللى حتتميز بيه بعد قراءتك للمقال المتواضع ده إن شاء الله  😀

و الحاجة التالتة , إنى باكلمك على أساس إنك مقتنع بالطلب اللى انت عاوز توصل له بشكل كامل , و إن كل العقبة اللى قدّامك هى رفض الناس اللى ممكن يكون لهم Upper Hand عليك و بس .. أما فيما عدا ذلك , فانا متمسك بطلبك و مقتنع بأهمّيته .. و إلا حتكون فيه مشكلة كبيرة , لو كنت انت أساسا مش مقتنع بفايدة أو جدوى فكرتك أو طلبك ..

379860_10150691262172166_1035025773_n

تعالوا بينا بقى نستعرض أهم نقط و مهارات التفاوض و الإقناع : ..

.

أولا : اختار الوقت المناسب ..

شىء بديهى جدا إنك المفروض ما تنقّيش الوقت اللى الحاج راجع فيه من الشغل هلكان , عشان تكلمه عن باقة تدريبية , سعرها أكتر من 1700 جنيه , لأول مرة .. فاللى حيحصل ببساطة , فى أغلب البيوت , هو الحوار القصير جدا ده : ..

–         حمد الله على سلامتك يا بابا .. هات أشيل عنك البطيخة دى .. .. .. إحم .. بابا ..

–         عاوز إيه يا أشرف ؟؟!!

–         عاوز أشترى باقة تدريبية لطلبة صيدلة , سعرها 1740 جنيه

–         (بعد نظرة حارقة) .. اختفى من قدّامى دلوقتى , بدل أدشّش البطيخة دى على نافوخك يا أشرف .. يلااااااااااااااااااا ..

   و فى الغالب , أشرف فقد فى الحالة دى بنط قوى , فى اللعبة , لمجرد إنه اختار الوقت اللى مش مناسب , عشان يكلم الحاج فى حاجة زى كده .. و لكن “أشرف” كان المفروض ينقّى الوقت اللى والده بيكون رايق فيه قدر الإمكان .. (و دى بتبقى حرفنة بصراحة😀 ) , .. زى بعد نهاية الماتشات اللى انتهت بفوز الفريق اللى بابا بيشجعه مثلا , .. أو لما يكون لسه راجع من القهوة , و مفتخر بإنه قطّّع صحابه فى الطاولة😀 .. أما بالنسبة لو ماما هى المسئولة عن الموضوع , فيفضل برضه إننا نختار الوقت اللى تكون لسه مخلصة فيه طبخة حلوة , عجبت كل اللى فى البيت😉 .. أو لما تكون مخلّصة اللى وراها , و قاعدة بتتفرج على حاجة بتحبها – بس مش مشدودة لها قوى – فى التليفزيون .. يعنى من الآخر , ما تبقاش رخم فى توقيتاتك , و لكن خليك ذكى , و أول ما تلاقى الفريسة جاهزة , انقض عليها فى الوقت المناسب😀

.

ثانيا : استعلم عن أسباب الرفض , و حاول التغلب عليها ..

.

و دى المهارة المباشرة , و اللى بتعتمد على تغليب العقل على العاطفة .. و بيها بتدخل فى وسط رقعة الشطرنج , و تبقى فى مواجهة أعنف الأسلحة , و عشان كده فيه ناس كتير مش بتفضلها لو كانت مش واقفة على أرض ثابتة , لإنها بتعرّضك لسياسة الدفاع بدلا من الهجوم ..

–         طب ممكن أعرف انتى مش موافقة ليه يا ماما ؟   ؟

–         انتى اتجننتى يا سعاد ؟؟ .. حد يجيب 3 سيديهات بـ 1700 جنيه يا بنتى ؟؟ .. و ممكن يطلعوا بايظين ولا معطوبين كمان .. و الأنقح إنكوا بتقولوا إن النت مليان بالعلم , ماجاتش ع الباقة اللى بتقولى عليها دى !! .. و بعدين تلاقيهم زى بيبيعوا الهوا زى القنوات إياها اللى فى التليفزيون .. و لما تيجى تحاسبيهم ما تلاقيهمش , فص ملح و داب .. هو انا داقّة عصافير يا بت ولّا راكنة الفيل بره ؟؟!! ..

–         طب ممكن أردّ على كل كلمة من اللى قلتيه ده يا حبيبتى , بس تسمعينى للآخر ؟؟

–         اتفضلى يا بنتى .. أدينا سامعين ..

–         أولا يا ست الكل , دول مش 3 سيديهات و خلاص .. لإن قيمتهم الحقيقية , باللى متخزن عليهم .. يعنى أكتر من خمسيييييين ساعة صوت و صورة , من علم مفيد جدا لينا فى حياتنا العملية بعد كده لما نتخرج , و من دلوقتى كمان فى التدريب , بجانب إن اللى بيقدمهم هو شخص واحد و معروف , و كلنا واثقين فيه و فى سمعته , مش شركة مجهولة , و لا رقم تليفون ما نعرفش مصدره , زى اللى بتقولى عليهم فى التليفزيون .. و عشان كده , لو طلع فيه أى مشكلة فى الديفيديهات , بتتحل فى أسرع وقت , لإنه لازم يحافظ على سمعته اللى بنقول عليها .. أما بقى فكرة النت اللى مليان ببلاش , فبصراحة يا ماما , فاللى انا شفته عليه لسه ما أقنعنيش بجودته , لإنه يا إما بالانجليزى , فحيكون صعب قوى , يا إما مستواه مش ولا بد , و اللى عاملينه هواة مش محترفين , لكن الباقة دى , كل اللى أخدها تقريبا , شكر فيها , و عشان كده هى مهمة بالنسبة لى ..

10012623_704268876262454_1525253579_n copy (Large)و بعد صد و رد على مدار نص ساعة مثلا (فى وقت الروقان , زى ما اتفقنا) , ممكن تلاقى الأم بدأت تقتنع شوية , و تروح قايلة : خلاص , لما أبوكى ييجى من الشغل , حابقى أكلمه ..  و ربنا يسهل ..

.

ثالثا : اشرك أصحاب القرار معاك داخل الصومعة بتاعتك ..

.

لو متوقع إن أصحاب القرار ممكن يرفضوا قرارك , خليك ذكى لدرجة كبيرة , و ابدأ اللعب بخطوة شطرنجية , تجس فيها النبض , و فى نفس الوقت , ما تخسرش فيها كتير .. و تبقى فى قمة الذكاء , لو أقنعت اللى حواليك بالفكرة , من قبل ما تطلبها انت أساسا ! ..

يعنى استغل فرصة إن ماما ممكن تكون سمينة شوية , و ركبتها بدأت توجعها من فرط التحميل عليها , و اعرض عليها فيديو له علاقة بالباقة اللى نفسك تشتريها , و لكن يكون الهدف الخفى منه , هو إنك تقنعها بالشخص اللى بيقدم الباقة فى الأساس .. (جرب الطريقة دى فى البيت , بتنفع كتير على فكرة😉  ) .. و الفيديو ممكن تتفرج هنا

و الحوار ممكن يمشى بالشكل ده

–         ماما .. تعالى كده من فضلك , عشان أوريكى حاجة سريعة ع اللاب ..

–         خير يا حبيبى .. فيه إيه ؟؟

–         بصى كده .. أنا لقيت الفيديو ده بيتكلم عن دوا عشان اللى وزنهم زيادة و عاوزين ينزلوه .. قلت ممكن يفيدك ..

–         شغّل يا حبيبى , ماشى .. (و بعد دقيقتين ) .. ده صيدلى ؟؟

–         آه يا ست الحبايب .. صيدلى و بيدى محاضرات للطلبة و الصيادلة , عشان يكونوا أفضل فى المجال و كده ..

–         امممممممم .. طب كويس .. هو بيقول كلام حلو .. ع العموم , ابقى دوّر لى ع العلاج اللى بيقول عليه ده , و لو لقيته بيتكلم فى حاجة تانية لها علاقة بالموضوع ده , ابقى قول لى برضه , عشان نتفرج عليها سوا إن شاء الله ..

–         (بابتسامة بريئة)  حاضر يا حبيبتى .. (و لما ماما تروح تكمّل طبيخ , تقدر تخلّى ابتسامتك شيطانية و شريرة براحتك😀 ) ..  “نياهاهاها .. نياهاهاهاهاها” .. بس بصوت واطى😉 …

.

رابعا : خلّى الطبخة تستوى على نار هادية ..

.

ما تبقاش متسرّع .. و ما تستعجلش على الوصول لهدفك فى أقرب وقت و خلاص .. و خلّى الضحية تكون عاوزة توصل للهدف اللى انت تقصده بشكل أسرع منك , و حاول إنك تبان على إنك برىء – قدر الإمكان – و إن هدفك هو المصلحة العامة , مش مصلحتك انت و بس ..

–         ماما .. أنا لقيت محاضرة كاملة , عن موضوع السمنة , للدكتور الجويلى اللى شفتيه امبارح (و انت أساسا كنت شفت المحاضرة دى امبارح أو من قبل كده) .. لو فاضية و نفسك تشوفيها , يا ريت تبقى تقولى لى (واخد بالك من البراءة ؟؟😀 ) ..

–         ماشى يا حبيبى .. حاخلّص اللى فى إيدى , و آجى نتفرج عليها سوا ..

و بعد ساعة تقريبا , تبدأوا تتفرجوا ع المحاضرة الكاملة مع بعض .. عادى خالص  🙂  ..

و بكده , بتكون ماشى فى سبيل إقناع اللى حواليك بجدوى اللى انت عاوز تحصل عليه , و بتؤكد للجميع إن الفايدة اللى حتيجى من وراه , حتكون عامة للكل , و مش خاصة بيك لوحدك ! ..

.

خامسا : قيس مدى تقدمك فى الخطة , على رقعة الشطرنج , بالأدلة ..

.

خليك مترقب لأى علامات تحصل , تقيس بيها إنك ماشى فى الاتجاه الصحيح فى خطتك , و إنها بتنجح .. مثلا إنك تسمع الست الوالدة , بتكلم الحاج عندكم , بخصوص الدكتور اللى شافته فى المحاضرة ع النت .. أو إنها تطلب منه الدوا اللى اتكلم عليه .. أو إن الحاج ذات نفسه , يطلب منك إنك تكلّم له الدكتور إياه , عشان يقول له يعمل إيه فى حرقان المعدة اللى بيشتكى منه من 3 شهور .. كل الحاجات دى المفروض تطمنك على إنك ماشى صح .. و غيابها المفروض يقلقك , و يدلّك على إنك المفروض تعزز الثقة أكتر و أكتر , لحد ما تحصل ع اللى انت عاوزه إن شاء الله ..

the_great_sphinx_and_the_pyramids_of_giza_ZZ067024

سادسا : اعرض بدايل أخطر , و استبدل بيها البديل المطلوب ..

.

و دى استراتيجيا – تقريبا – ما بتخيّبش , لإنها بتعتمد على نظرية “الحاخام و اليهودى” المشهورة .. و اللى بتلجأ إلى عرض الأصعب , ثم التنازل عنه , لعرض الأسهل , اللى هو الطلب الأساسى ..

–         عماد .. انت نمت ؟؟! ..

–         لا يا حبيبتى .. لسه مش جاى لى نوم ..

–         طب انا كنت عاوزة أكلمك فى موضوع كده , و محتاجة رأيك فيه ..

–         خير يا روحى .. ربنا يجعله خير ..

–         أنا حاسّة إن مستوايا فى الصيدلية محتاج يتطوّر شوية , عشان فيه ناس كتير بتيجى تسألنى فى حاجات و مش باكون عارفاها ..

–         امممممم .. طب شايفة الدنيا ممكن تتحسن إزاى يعنى ؟؟

–         فيه دبلومة بتتقدم فى الجامعة , لمدة سنة , بس بيقولوا مفيدة قوى فى الشغل و كده ..

–         إزاى بس يا حبيبتى ؟؟ .. ده انتى يادوب عارفة توفقى بين البيت و العيال و الصيدلية , اللى بتنزليها ساعتين تلاتة الصبح , و ترجعى لنا تانى ! .. حتروحى الدبلومة دى إمتى ؟؟

–         آه فعلا .. خاصة إنها لمدة سنة بحالها ! .. بجد يا خسارة ..

–         طب مفيش بديل مناسب عنها شوية .. دورة تكون قريبة مثلا .. أو مواعيدها مناسبة أكتر ؟؟

–         صحيح .. افتكرت .. فيه باقة بتتاخد أونلاين من البيت , بيعملها صيدلى ع النت , فيها أكتر من 50 ساعة .. , و زمايلى ع الفيس بيشكروا فيها برضه

–         موافق , بس بشرط إنها مواعيدها ما تكونش ساعة لما آجى من بره , و لا فى مواعيد مذاكرتك للعيال , و لا الصبح بدرى , ولا متأخر بالليل قوى , و ربنا يستر و الكهربا تكون مناسبة إنك تخلصيها أونلاين زى ما بتقولى ..

–         لاااااا , هو انا ما قلتلكش ؟؟ .. هى كلها 3 ديفيديهات , عليهم كووول حاجة .. و أشوفهم و أسمعهم , فى الوقت اللى يناسبنا كل يوم , من غير ما حد يقول لى تلت التلاتة كام .. آخد ساعة كل يوم بقى .. ساعتين .. حتى لو ربع ساعة .. أنا و مقدرتى ..

–         طب والله فكرة حلوة .. خلاص شوفى نظامها إيه , و على بركة الله ..

و بكده , عماد وافق ببساطة , لإنه اختار الباقة السهلة فى المتناول و الدراسة , أكتر من الدبلومة اللى فيها حضور و غياب و مواعيد و استمرارية صعبة .. و هى دى الحرفنة فى العرض ^_^ ..

.

سابعا : اوصل لهدفك على مراحل .. حتة حتة ..

.

و ده تكتيك مدروس , اسمه Nibbling Gambit , يعنى تاخد اللى انت عاوزه , بس واحدة واحدة .. عن طريق إنك تطلب حاجات صغيرة جنب بعضها .. , و لما تحصل عليها كلها , الضحية تكتشف إن انت وصلت للى انت كنت عاوزه من البداية .. , و بالتطبيق على حالتنا اللى بنتكلم عنها , فممكن لما تعرض الموضوع على السيد الوالد , تلاقيه بيقول لك كلمة موروثة و شائعة اليومين دول , و هى “أجيب لك منين يا ابنى ؟؟ .. هو انا قاعد على بنك ؟؟ انت بتقول إنك محتاج أكتر من 1700 جنيه .. أنا مش مش عاوز أديك .. أنا مش قادر أديك .. مفيش .. مفييييييش” .. و ساعتها ممكن يصيبك اليأس المؤقت , بسبب الرفض المسبب ده .. و هنا حنفترض إن الحل حيكون فى إنك تتغلب على “الحجة” دى , و لكن بشكل ممنهج و منطقى ..

كل اللى حتعمله , هو إنك حتبدأ تحط خطة زمنية , طويلة الأجل , إما عشان تقتطع من مصروفك الشخصى , و تحوّش منه – حتى لو كان أقل القليل – شهريا أو أسبوعيا , عشان فى الآخر توصل لهدفك , حتى لو كان “جزئيا” , كما فى المثال الجاى ده

–         بابا .. كنت عاوز أكلمك فى موضوع ..

–         خير يا حازم .. اتفضل قول , أنا سامعك ..

–         قبل كده انا قلت لك ع الباقة اللى بـ 1700 جنيه , و انت رفضت , عشان ….

–         أيوة فاكر فاكر .. طلبك مرفوض تانى لو حتلحّ عليا .. انت عارف إنى مش باجى بالإلحاح يا حازم .. قصّر بقى

–         ما هو أنا المرة دى باكلمك عشان أقول لك إنى حوّشت من مصروفى 840 جنيه , و مش فاضل على تمن الباقة إلا حوالى 900 جنيه .. و دول ممكن آخدهم من حضرتك على 3 أقساط , لو مش متوفّرين حاليا على مرة واحدة .. عشان بجد الباقة دى مهمة قوى بالنسبة لى .. لدرجة إنى بطّلت السجاير , و بطّلت أنزل خروجات مع صحابى , عشان أوفّر اللى حوشته ده ..

–         طيب يا حازم .. خلاص , اتطمن .. أول ما اقبض المرتب الجديد , حابقى أديك منه اللى اقدر عليه .. بس يا رب تطلع مهمة كده و مفيدة زى ما بتقول ..

–         ربنا يخليك ليا يا أحلى أب فى الدنيا .. امووووووووواه🙂 ..

.

حتخليني

 ثامنا : استعن بقوى خارجية مساعدة  .. بس بلاش إلحاح بنفس الطريقة 

.

مفيش مانع من إنك تطلب مساعدة حد من أصدقائك أو من المقربين , عشان توصل لهدفك بشكل محكم أكتر .. لو القوانين المنزلية عندكم تسمح بدخول أصدقاء كتير , و يكونوا قريبين من كبار العيلة , زى الأب أو الام , أو الجد أحيانا .. و ساعتها استغل النقطة دى , فى إنهم يعرضوا عوامل تعزيز الثقة بدالك , بأسلوب مختلف عن أسلوبك , و فى الحالة دى , حيظهر تأثير المثل اللى بيقول “الشيخ البعيد سره باتع” .. عشان ممكن الكبار يصدقوا كلام ناس من بره البيت , عن إنهم يصدقوا كلام ابنهم اللى من لحمهم و دمهم .. (بتحصل كتير  على فكرة) .. و لكن المهم إنك تكون وصلت للهدف المنشود🙂 ..

الجميل بقى إنك لو ما تعرفش حد من الناس اللى اقتنت الباقة قبل كده , تقدر تستعرض شهاداتهم الكاملة دى عنها و انطباعاتهم المفصلة , فى قعدة صفا , بينك و بين الحاج أو الحاجّة , و ده شىء ممكن يوصلك لاقتناء الباقة , لو كانت دى هدفك المنشود🙂 .. و حتلاقيها هنا إن شاء الله  🙂

https://www.facebook.com/media/set/?set=a.1428172537399744.1073741828.1423515111198820&type=3

و على صعيد آخر , نصيحة منى , بلاش تستخدم نفس الاستراتيجية لعرض نفس الطلب مرتين , حتى لو كانوا متباعدتين .. دايما نوّع من الطرق , عشان الأبهات بقى خلقهم أضيق من خرم الإبرة اليومين دول .. و محاولاتك الفاشلة للحصول على الهدف , ممكن تكون بتبعدك عنه أكتر و أكتر .. و لكن لازم تكون ذكى – زى ما قلنا – عشان تحصل عليه فى أقل عدد ممكن من الخطوات المدروسة على رقعة الشطرنج اللى بتلعب عليها ..

.

تاسعا : استعد لخطط الضحية المقابلة ..

.

خليك فاهم و واعى إن الطرف المقابل ليك , حيكون عنده خطط مواجهة , حتى لو كان مش دارسها , أو بيستخدمها بشكل فطرى .. و لازم تعرف إزاى تتصرف معاها أو تبطل مفعولها .. , و أشهر الخطط المواجهة اللى بيتم استخدامها فى المواقف المشابهة لكده , اسمها Set Aside Gambit  .. و معناها بالعربى “تأخير الطلب لأجل غير مسمى” .. زى الحوار ده كده يعنى ..

–         بابا .. فاكر الباقة اللى قلت لى من أسبوعين إنى أبقى أكلّم حضرتك بخصوصها لما يبقى مزاجك رايق ؟!!

–         آه .. مالها ؟؟

–         كنت عاوز أعرف من حضرتك , ممكن أجيبها إمتى ؟؟

–         ربنا يسهّل يا كريم .. الواحد ظروفه مش مساعداه اليومين دول .. ادعى لى ربنا يفتحها علينا ..

–         آمين يا رب .. بس قول لى يا حاج .. 3 أيام كويس يعنى ؟؟

–         ماشى يا رخم .. نتكلم بعد 3 أيام إن شاء الله ..

–         حاجى لك بعد ماتش الأهلى و المحلة علطول , عشان أنا عارف إنك حتبقى رايق لو المحلة كسب إن شاء الله ..

–         طبعا .. و ليك عليا لو المحلة كسب , نبقى نجيب الباقة اللى بتقول عليها إن شاء الله

–         ربنا يبارك فيك يا أحنّ أب زملكاوى فى الدنيا🙂  ..

–         ماشى يا لمض

و فى النقطة دى برضه , من أهم الحيل المواجهة ليك فى طلباتك , حيلة اسمه The Higher Authority Gambit , و دى معناها إن الطرف المقابل , يرمى بصلاحية الموافقة على طلبك , على شخص تانى أو كيان تانى , عشان يتبرأ من الدخول فى المواجهة معاك .. و فى الحالة دى , بيكون الحل , هو إنك تحسس صاحبنا ده بمدى أهميته فى الموضوع .. زى ما حنشوف ..

–         عملتى لنا إيه يا ماما فى الموضوع اللى قلت لك عليه ؟

–         اللى هو إيه يا حسين ؟؟

–         الباقة يا ماما .. الباقة ..

–         أهاااااا .. بص بقى يا حبيبى .. أنا فى الآخر ماليش دعوة .. الفلوس فلوس أبوك .. و هو اللى فى إيده الموضوع .. حل عن دماغى بقى ..

–         يا راجل !! .. اطلع من دول يا عم !! .. أنا عارف برضه إنك لو أقنعتيه أو فضلتى وراه , مش حيؤخر لك طلب , زى ما عملتى معاه قبل كده , لما جاب لنا الكيتشين ماشين .. أكيد زى ما جاب لنا دى , يقدر يجيب لنا الباقة .. و بعدين أنا كمان حابقى صيدلى شاطر تتباهى بيه فى المنطقة بحالها إن شاء الله , لما أتعلم كويس .. ولا انتى مش عاوزة تشوفينى صيدلى شاطر قد الدنيا ؟؟

–         خلاص يا لئيم .. لما ييجى من الشغل النهاردة , حابقى أكلمهولك , بس يا رب تبقى الغزالة رايقة ساعتها , عشان ما يزنجرش ..

–         تسلمى يا ست الحبايب

و على هذا الأساس , و مع تطبيق الاستراتيجيات البسيطة دى , تقدر بسهولة إنك تحصل على اللى انت عاوزه إن شاء الله , سواء باقة Learn Pharmacy At Home  , اللى بنتكلم عليها من ساعتها , أو أى حاجة تانية إن شاء الله ..

ملحوظة / تقدر تجيب من الآخر مع اللى حابب تقنعهم (بالذات لو بنتكلم عن الباقة نفسها) , لو قريت لهم البوست ده😉 …  : http://goo.gl/l7fOhl 

Untitled-3 copy

و قبل ما نخلّص , لازم نقول واحد من أهم المراجع اللى اعتمدنا عليها عشان نقدم الكلام ده بشكل مخلوط بالواقع العملى .. , و هو فيديو من فيديوهات الأستاذ محمد شوقى , ع اليوتيوب , بعنوان “البلكونة” , و كان بيتكلم فيهم عن نفس الفكرة , و لكن من منظور سياسى شوية ..

و فى نهاية كلامنا , أتمنى إننا نستخدم اللى قلناه فى الخيييييييير و بس إن شاء الله .. و أكون سعيد لو قلتوا لنا تعليقاتكم , و نشرتوا المقال بين أصدقائكم , بعمل شير .. , و ربنا يقدرنا على فعل الخير🙂  ..

أحبكم فى الله ..

أحمد الجويلى

7 responses to “تعلم فن الإقناع و التفاوض فى 9 نقط سحرية

  1. انا الحمد لله بابا جابلي الباقه من غير التعب دا كله بس كل الحكايه انه مكنش
    عارف ينام وسمعته استرخاء ع الشاطئ ونام ع طول
    فلما طلبت الباقه وافق ع طول ^_^

  2. انا أصبحت بفضل هذا المقال اقنع زوجي والوادي باي شي
    بناز نمير من دبي

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s