أقول لك حدود الأوتيسي في مصر و ما تزعلش !!


otc

لو حبينا نتكلم عن حدود الـ OTC فى مصر , لازم ناخد الموضوع من بدايته .. و بالمناسبة , الموضوع حيكون مبعزق شوية النهاردة .. و حنحاول نرتّبه فى النص كده , بشوية أسئلة و إجابات , عشان ما يبقاش مبعزق قوى يعنى🙂 ..

.

لازم نقول إن القانون المصرى اللى بيحكم مهنة الصيدلة فى مصر , مالوش حدود واضحة و جلية , عشان يتحكم فيها فى عملية ممارسة الـ OTC , أو ما يسمى بـ الـ Over-The-Counter drugs , أو الـ Non-prescription drugs , اللى ممكن تتصرف بدون روشتة .. يعنى تلاقى المريض داخل عليك فى الصيدلية , و بيطلب منك إنك تديه علاج لحالة يكون بيشتكى منها .. و أحيانا كمان , بيكون حد غيره هو اللى تعبان , و صاحبنا جاى ياخد له حاجة من الصيدلية و خلاص ..

.

و خلينا نتفق فى البداية , على إن المريض المصرى – فى أغلب الحالات – بيكون مش خايف على صحته قوى , أو مش قلقان من الحالة المرضية اللى بيشتكى منها , طالما كان واقف على رجليه , أو لو كانت القصة لسه فى بدايتها معاه .. فبيفتكر إن الدنيا ممكن تخلص على حبايتين للصداع , أو برشامة لوجع البطن , و كان الله بالسر عليما .. و لكن فى أحيان كتير , الموضوع بيبقى أكبر من كده .. و ده شىء ما يقدرش يحدده إلا الصيدلى المتميز , لما يسأل شوية أسئلة بسيطة , بهدف أخد الـ History المرضى للعميل بشكل مبدئى ..

.

و خلينا نتفق على حاجة كمان , و هى إن أطباء مصر – فى أغلب الحالات برضه – أمل حياتهم , هو إلغاء فكرة الـ OTC تماما فى مصر .. و منع صرف أى دواء فى الصيدلية , إلا بروشتة طبية !! .. و تلاقى عدد منهم , هدفه كده , عشان يزوّد من عدد الحالات اللى ممكن تدخل له العيادة يوميا .. , و عدد آخر منهم , هدفه الحفاظ بجد على صحة المريض , من جهل بعض الصيادلة اللى مش بيثق فى رأيهم الطبى أو حتى الصيدلانى ..

.

طب تعالى بقى نسأل نفسنا سؤالين : طالما مفيش قانون , تبقى إيه الحدود ؟؟ .. و إيه اللى يحددها ؟؟!! ..

.

قبل ما نعرف إيه هى الحدود , خلينا نجاوب ع السؤال التانى (إيه اللى يحددها ؟) .. و اسمح لى أقول لك – بمنتهى البساطة إن الموقف بيتحدد بناء على أكتر من معيار ..

.

أول مــعــيـار : مــدى خــطــورة الــحــالــة

.

و دى واضحة .. يعنى من الصعب إنى أتعامل فى الصيدلية مثلا , مع مريض سرطان فى الجلد .. و لكن ممكن ندوس مع حالة حب شباب مثلا ..

.

لا بصراحة .. هى مش واضحة قوى كده .. لإن أى نعم الحالتين اللى فاتوا , التباين فيهم واضح جدا .. و لكن على الجانب الآخر , حالة حب الشباب نفسها , ممكن تتفرع و تتعقد جدا , لدرجة يعجز عنها أمهر أطباء الجلدية .. يعنى مش كل حالات حب الشباب ينفع الصيدلى يجرب فيها أو يحاول يعالجها .. لازم يبعت على طبيب الجلدية , فى مرحلة معينة .. هى إيه ؟؟ .. اصبر و حاقول لك إن شاء الله  :) ..

.

حاجة كمان , و هى إن فيه حالات رمادية .. إذا دخلت صيدلية معيّنة , ممكن تطلع بكيس العلاج فى إيديها , و يجيب نتيجة معاها كمان لما تاخده .. و لو كانت دخلت صيدلية تانية , تلاقى الصيدلى يرفض التعامل معاها صيدلانيا على الإطلاق , و يحوّلها على الدكتور فورا .. زى حالة الارتجاع المريئى مثلا .. أو حالة الصدفية .. أو حالة خشونة المفاصل .. إلخ ..

.

الأنكى من كده , إنك ما تقدرش تقيّم الحالة من مجرد اسمها .. فـ “الإسهال” مثلا , ممكن يكون حالة OTC بسيطة جدا , لو كان سببه فيروسى مثلا , و ممكن يكون يستدعى الكشف و عمل منظار للقولون كمان , لو كان سببه Crohn’s disease  أو Ulcerative colitis .. يعنى الموضوع كبير يا سادة ..

.

تــانى مــعــيـار : مــدى كــفــاءة الــصــيـدلـى و ضــمــيــره و جــرأتــه ..

.

و ده معيار مهم جدا .. أو بصراحة 3 معايير فى بعض .. ممكن تلاقى صيدلى كفء جدا , و لكنه بيخاف يتعامل مع الحالات .. و واحد تانى بطيخة من الأساس , و لكن قلبه جامد و يفوت فى الحديد (و ده بتبقى نهايته محتومة على فكرة , و العياذ بالله) .. و ممكن تلاقى اللى ضميره ميّت , و بيستخدم أدوية خطيرة , لعلاج حالات ما تستدعيش استخدامها أصلا !! .. حتلاقى كل ده فى الصيدليات .. ما تقلقش ..

.

و لكن اللى حابّين نقوله , إن ده ممكن يكون عيب خطير .. و ممكن يكون ميزة عظيمة .. لإنها بتفرق بين الصيدلى الشاطر صاحب الكفاءة و الضمير الحى , و بين الصيدلى اللى اكتفى بـ 5 سنين فى الكلية , عمّال ينسى اللى أخده فيهم , و يركّز أكتر ع الأرباح و المبيعات و خلاص .. و بتبدأ تلاقى الصيدلى الأول , صيدليته تميزت فى الـ OTC , و الناس بقت بتقف قدامها بالطوابير .. و التانى شغله أصبح كله روشتات أو مستحضرات تجميل أو ديلفرى و خلاص !! ..

.

و على عكس ما ممكن تتخيّل , يهمنى إنك تعرف إن كل ما الصيدلى اتعلم أكتر , حيبدأ يكون حريص أكتر , و أقل جرأة فى التعامل مع الحالات , لإنه حيبقى عارف احتمالات أوسع للحالات اللى قدّامه , أكتر من الصيدلى اللى ما يعرفش عنها إلا احتمال واحد .. و ده سبب أدعى يخلينا نتعلم صح , عشان ما نغامرش بصحة المريض و أمانه ..

.

تــالــت مــعــيـار : مــدى أمــان و خــطــر الأدويــة الــمــســتــخــدمــة

.

برضه لو قسّمنا الأدوية , إلى ألوان , على حسب درجة خطورتها و أعراضها الجانبية , فحتلاقى إن عدد كبير منها لونه أسود و منيّل .. و ده اللى الطبيب لازم يكتبه فى روشتة , و ما ينفعش الصيدلى يصرفه من نفسه .. زى مثبطات المناعة مثلا , أو أدوية القلب , أو أدوية السكر , أو مضادات التجلط مثلا .. و غيرها طبعا .. و عدد قليل قوى .. بيكون لونه أبيض و ابن حلال , و بتكون الأعراض الجانبية بتاعته ضعيفة أو شبه معدومة , زى الـ bran مثلا , أو الشاى الأخضر , أو الـ Nystatin .. و بررررررضه بيكون فى النص عدد كبيييييييير جدا من الأدوية الرمادية .. اللى ممكن تتصرف فى بعض الصيدليات كـ OTC , و فى البعض الآخر , يتردد الصيدلى ألف مرة قبل ما يصرفها ..

.

للتدليل ع النقطتين اللى فاتوا , قابلت فى مرة أستاذة فى الصيدلة الإكلينيكية فى أحد الكليات المعروفة , و كانت معترضة جدا على أسلوبنا فى الشرح , على أساس إننا بنشرح للحاضرين فى دوراتنا , حالات متعمقة شوية داخل الصيدلية , و المفروض – فى وجهة نظرها – إنها مش OTC خالص .. فسألتها ببساطة : طيب , حالة الإسهال يا افندم .. ينفع تتعالج كـ OTC داخل الصيدلية ؟؟ .. فقالت بسرعة : آه طبعا .. فكان ردى بنفس البساطة : لا يا افندم .. مش كل حالات الإسهال ينفع تتعالج فى الصيدلية .. لو الإسهال فيه دم يا افندم , و بقى له فترة كبيرة , لازم يتم التحويل على طبيب الأمراض الباطنية .. فسكتت .. فكمّلت : طب البروفين يا افندم .. ينفع يكون علاج OTC ؟؟ .. ترددت شوية , و قالت : طبعا .. قلت لها : مش فى كل الحالات برضه يا دكتورة .. البروفين ممكن يقتل مريض قرحة بالمعدة , أو فشل كلوى , لو أخده من الصيدلية بدون وعى أو حذر كافى .. فسكتت تماما , و تأكدت من الهدف اللى حنقوله فى نهاية المقال (مجرد تشويق محمود  :)  ) ..

.

رابــع مــعــيـار : مــدى ثــقــة الــمــريــض و أهــلــه فـى الــصــيــدلـى

.

مرضى كتييييير بيدخلوا الصيدلية , و بعد ما يعرضوا حالتهم على الصيدلى باستفاضة , نلاقى الصيدلى بيهزّ راسه فى فهم و حكمة , و ياخد بعضه عشان يروح يجيب العلاج من على الرفوف .. و لكن نلاقى المريض نفسه فى حالات كتير , يروح قايل بتردد : ولّا أروح أكشف أحسن يا دكتور ؟!! .. هنا المريض ماوثقش فى خبرة الصيدلى بشكل كافى ..

.

و فى حالات تانية , تلاقى المريض داخل بروشتة للصيدلى , و يقول له : بص يا دكتور , انا بصراحة كشفت , بس مش مرتاح لكل الأدوية اللى مكتوبة كده , و حاسس إن الدكتور كتبها لى , عشان يكركب لى الدنيا و خلاص .. بص , انا باشتكى من كذا كذا كذا .. هات بقى المفيد من الروشتة دى , أو سيبك منها خالص , و هات لى العلاج اللى على كيفك ! .. و ده عكس الحالة الأولى زى ما احنا شايفين .. و الحالتين بيحصلوا داخل الصيدليات بشكل شبه يومى ..

.

خــامــس مــعــيـار : ســعــر الــدواء , و مناسبته للحالة المادية للمريض

.

طبعا فيه أدوية ما ينفعش تطلع OTC لمجرد إنها غالية , و الصيدلية متواجدة فى مكان شعبى شوية , و حالة أهل المنطقة فيه , على قدها … و فيه أدوية تانية , سر صرفها بشكل ثابت يوميا تقريبا , هو إنها رخيصة و فى متناول يد الجميع ..

.

يعنى من الآخر , الدنيا فى مصر , مش زى السعودية مثلا (حيث يمنعون الـ OTC تقريبا بالكامل) , ولا زى أمريكا , اللى تحوّلت فيها الصيدليات إلى drug store , و العميل بقى يدخلها زى كارفور , ينقّى منها اللى هو عاوزه , ويخرج يحاسب عند الكاشير , و لما يحتاج إنه ياخد معلومة صيدلانية على ما قسم , ساعتها يتوجه للصيدلى اللى بيبقى واقف , عشان يقدم الـ patient counseling , و خلاص ..

.

الدنيا الصيدلانية فى مصر (و الـ OTC بالتحديد) بيبقى خاضع لمعايير كتير زى ما شفنا , و عشان كده ما تسمعش لكلام حد يحجر عليك فى التعامل , أو يحدد لك عدد من الحالات , لمجرد إنها already diagnosed , زى ما بيقولوا ساعات , على أساس إن الصيدلى حدوده فى الـ OTC ضعيفة أو متناهية الضيق ! .. و ده للأسف , بينعكس ع الطلبة و الصيادلة , لما يسمعوه , بالسلب , لإنه بيضيّق آفاقهم و بيحسسهم إن علم الـ OTC كله عبارة عن كلمتين , أو أوضتين و صالة يعنى .. , و ده غير حقيقى على الإطلاق .. الـ OTC علم واسع جدا , و كل يوم فيه جديد .. و أنا نفسى باحاول أطوّر نفسى فيه بشكل يومى بفضل الله , عشان أكون دايما مواكب للجديد فيه أول بأول ..

.

يعنى من الآخر .. اعتبرها ميزة , أو اعتبرها عيب ..و لكن الـ OTC فى مصر , و على حد علمنا , و إلى لحظة كتابة هذه السطور , مالوش حدود واضحة المعالم , تقدر تقيسها بالمسطرة أو حتى بالمنقلة .. الصيدلية مملكتك , اوصل فيها لآخر حدودك , طالما بتراعى ضميرك , و ترضى ربك , و تحافظ على حياة مرضاك , و تسعى لتحسين الـ life style بتاعهم ..

.

لو حابب تكون OTC Practitioner محترف , إيه أهم القواعد اللى المفروض تكون ملتزم بيها ؟؟!! .. و إيه هى حدود الـ OTC فى مصر ؟؟ .. و مين اللى يقدر يحددها ؟؟!! .. و هل فعلا فيه تعارض بين فرع الـ OTC فى الصيدلية , و فكرة الطب بصفة عامة , على أساس إن الـ OTC , ممكن يسحب البساط من تحت الطبيب فى تخصص معين , لو كان الصيدلى شاطر فيه ؟؟ .. و إزاى أقدر أوفّق بين العلم و التجارة داخل الصيدلية , من غير ما الناس تقول عليا إنى مادى ؟!! .

.

لو حابب تعرف الإجابة على كل الأسئلة اللى فاتت دى , ممكن تشاهد الجزء الأول من محاضرتنا دلوقتى , لمدة ساعتين (مباشرة على اليوتيوب) , فى 7 حلقات متصلة ضمن #قائمة_تشغيل واحدة , على الرابط ده

https://www.youtube.com/playlist?list=PL8zo46jGXvHlO3pg2vj-xGRrDqkdZceLI
.
و بعد ما الجزء الأول ما يخلص , حتلاقى الجزء التانى , اللى بنناقش فيه Selected OTC Cases

تحياتى ..

.

أحمد الجويلى

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s