عن ‪#‎Devarol‬-S كمان و كمان !! ..


devarol

عن ‪#‎Devarol‬-S كمان و كمان !! ..
.
ملحوظة هامة / أى حد حضر معانا كورسات مطوّلة , يا ريت ما يقراش البوست ده , لإنه أكيد حافظه من قبل كده .. و احتمال يكرهنى من كتر ما حيكون فيه إعادة للى هو عارفه , لو قرا الكلام اللى جاى ده😀 ..
.
نقول القصة تاااااااااااانى لكل الناس اللى متابعانا حديثا😀 .. .. لو متابعنا من زمان , إوعى تقرا البوست برضه😀 ..
.

ملحوظة تانية / لو مشغول أو ناوى تنقر البوست بسرعة , إوعى تعمل كده .. البوست طويل فحت , و لكن لو قررت إنك ما تقراهوش , تأكد إن من دلوقتى , لحد ما تقرر تقراه , ممكن #حياة_طفل تنتهى بسبب حضرتك !!!! ..

.
كان ياما كان فى سالف العصر و الأوان , فى سنة 2005 , بعد صلاة العشاء فى مسجد مستشفى الشاطبى بالأسكندرية , قابلنا طبيب امتياز , لما كنا بنتمرن كلنا – قبل التخرج – فى عملى دورة الإسعافات الأولية , اللى حضرناها فى نقابة الصيادله البحيره , قبلها بحاجة بسيطة .. و لقينا الطبيب بيقول لنا : ‫#‏انتوا_صيادلة‬ ؟؟!! .. قلنا له : آه .. بس لسه طلبة .. فقال لنا بطريقة صادمة : أيوة .. يعنى من اللى بيقتلوا العيال الصغيرين .. أيوة أيوة !! .. اترسم على وشى فعليا الإيموشن ده  ( :O ) , ثم ده ( o.O ) , و انا باقول له : بنقتلوا العيال الصغيرين ؟!! .. إزاى يا عمنا ؟؟!! ..
.
فرد عليا ببساطة : انتوا فى الصيدلية عندكوا حقنة اسمه ‫#‏ديفارول_مائى‬ , بتتعطى للعيال الصغيرين اللى لسه ما مشيوش , أو لسه ما سننوش , و عدّى الوقت الطبيعى اللى المفروض يمشوا أو يسننوا فيه .. و الحقنة دى بتعمل ‫#‏فشل_كلوى‬لو اتعطت أكتر من مرتين أو تلاتة .. و لكن للأسف , الصيادلة و المساعدين , بيصرفوها و كإنها ‫#‏بنبونى‬ داخل الصيدليات , لأى حالة تيجى بتشتكى من الموضوع ده !! .. و فى الآخر عنبر الـ Nephrology عندنا , هو اللى يتملى بسببكم , بحالات أطفال على وشك الوفاة !! ..
.
تناسيت تماما إن كلامه كان فيه إهانة للصيادلة بشكل عام , أول ما اكتشفت إن الضحايا بتكون أطفال صغيره لسه ما وعيتش ع الدنيا , و سألته باهتمام : طب انا المطلوب منى أعمل إيه دلوقتى ؟؟؟!! .. قال لى : بلّغ كل اللى تعرفه من الصيادلة و المساعدين , و أى حد له علاقة بالصيدلة , بالكلام ده , عشان ما يموتش أطفال أكتر و أكتر بسبب الحقنة دى !! ..
.
سألته : طب كلامك ده عليه دليل ؟؟ .. رد فى سرعة : اطلع شوف الحالات بنفسك فوق , و اسأل الأمهات على الحقنة اللى عطوها لعيالهم بجهل و تسرع , عشان العيال تمشى أسرع !! ..
.
شكرته و مشيت , و انا حاسس إن الرسالة بقت ضخمة فى رقبتى , و بدأت أناقش فيها الصيادلة و الطلبة من زملائى .. و اتفوجئت مفاجأة السنين , لما فتحت الإندكس فى مرة , و لقيت إن جرعة الحقنة دى مكتوبة : مرة أسبوعيا (بدون تحديد لعدد المرات) , و اتفجعت أكتر , لما لقيت أطباء عظام , بيكتبوها لنفس الغرض , و لكن على مدار 3 أسابيع , و نوقف 3 أسابيع , و نرجع نستعملها 3 أسابيع تانيين ..
.
بحثت أكتر و أكتر – و كنت لسه مخلص مادة الفارماكولوجى فى الكلية طازة – و اتأكدت من خلال اللى حتقراه كمان شوية , إن المادة دى , هى عضم الصيدلية , زى ما بنقول دايما .. لإنى اكتشفت إن الحقنة دى – ببساطة كده – بتجيب نتيجة بعد فترة طويلة (أيام أو أسابيع) من تعاطيها لأول مرة , بجانب إنها (أثناء حدوث القصة) كانت تحتوى على تركيز من فيتامين د3 , أكثر 1500 مرة من الاحتياج اليومى من فيتامين د , اللى الجسم ممكن يقبله بدون أعراض جانبية ! .. (الحقنة أياميها كانت تحتوى على 600,000 وحدة دولية من فيتامين د 3 , فى حين إن الاحتياج اليومى منه هو 400 وحدة دولية فقط) !! ..
.
اللى فاجأنى أكتر و أكتر , إنى مالقيتش مرجع واضح , من الكتب أو المواقع , بيقول الكلام ده بوضوح , زى ما درسته فى الكلية , لما عرفنا إن فيتامين د3 لما بييجى يشتغل داخل الجسم , بيعمل على نوع مغمور من الـ receptors , اسمه الـ Nuclear Receptors , و اللى بتتميز بإنها بطييييييييييييييئة فى شغلها جداااااااا (لدرجة تعلّ يعنى) .. و عشان كده , فمن المتوقع إن الحقنة اللى ناخدها النهاردة , تكون قادرة على إنها تخلى الولد يمشى أو يسنن , خلال شهر مثلا , مش خلال يوم أو اتنين !! .. و ده اللى كان بيخلى الأم أو الأب ييجى الصيدلية تانى , و يطلبوا – خلال أسبوع مثلا – إنهم ياخدوا الحقنة لابنهم تانى , أو يشككوا فى قدرتها على العمل !! ..
.
و بالمناسبة , ده كان تقريبا , من أول المواقف اللى خلتنى أثق دايما فى إن العلم متجدد , و إن كلام الكتب مش قرآن غير قابل للمناقشة , و إنما ممكن اللى مكتوب دلوقتى تجاه علاج معين أو مرض معين , يتغير بسهولة – من خلال مزيد من الدراسات و الأبحاث – بعد شهر أو سنة .. و ده خلانى دايما ما آخدش العلم من الكتب (على علّته كده) , بل أحاول دايما إنى أربطه و أقرب بينه و بين الواقع العملى .. و ده فى رأيى , هو أحد أعمدة العمل داخل الصيدلية ..
.
المهم إنى انطلقت فى التوعية من الموضوع , من خلال الإيفنتات و المحاضرات المختلفة (ما كانش لسه الفيس انتشر فى مصر و كده) , لحد سنة 2009 , لما لقينا الديفارول نقص من السوق تماما , و أصبح تداول المخدرات أسهل من تداوله تقريبا !! .. و بعد حوالى ست أو سبع شهور , على ما أتذكر , رجع الديفارول للسوق مرة تانية , و لكن بعد ما تم تقسيم الحقنة الواحدة اللى كانت بتبقى موجودة فى العلبة , إلى 3 حقن .. كل واحدة تحتوى على 200,000 وحدة دولية من فيتامين د 3 ..


.
و بقيت باتسأل السؤال الشهير : فى الشكل الجديد من الحقن , نتصرف إزاى ؟؟ .. فكنت باقول – بالعقل خالص أهو – : زمان يا سادة , كانت الحقنة بتعتمد على ما يسمى الـ stoss therapy , يعنى إنى أدى الجسم كم كبير من العلاج و هو يخزنه و يستخدمه براحته على مدى طويل .. و كانت المفروض إنها تتاخد مرة واحدة فى الحياة .. أما بعد تقسيم الحقنة على 3 حقن , فى نفس العلبة , فده كان سببه إرضاء الأطباء اللى كانوا متعودين على الجرعة اللى قلنا عليها (أمبولة أسبوعيا لمدة 3 أسابيع) , عشان ما نلخبطهمش يعنى , برغم إن التركيز الأول كان بيجيب نتيجة عادى خالص .. و حتى بعدما بقت الحقنة فيها 200,000 وحدة دولية فـ – بالعقل برضه – حنكتشف إن احتياج 500 يوم من فيتامين د 3 حيكون كافى جداااااااااا للطفل , عشان يمشى أو يسنن إن شاء الله , طالما الموضوع عنده كان مجرد نقص فى فيتامين د3 !! .. بجانب إنه يتعرض للشمس طبعا بشكل كافى (30 دقيقة يوميا مثلا قبل الغروب) , مع تناول الأغذية الغنية بالكالسيوم (اللبن) و فيتامين د (صفار البيض) ..
.
و على هذا الأساس , فضلنا نقول إن الحقنة دى مفيدة و فعالة , و لكن تأثيرها على الكلى – فى حالة تكرارها بدون داعى – ممكن يكون خطر عليها , نتيجة ترسب كميات كبيرة من أملاح و حصوات الكالسيوم جواها , ممكن يمكن أن يؤدى إلى acute renal injury , لو تم استخدامها بشكل أهوج أو غير مسئول .. و بعد تقسيم الحقن , بنقول نفس الكلام , و لكن مع زيادة الحد المسموح إلى 3 حقن من التركيز الجديد , على أن يتم الاكتفاء بيهم لأطول فترة ممكنة (يعنى سنين مثلا , للتوضيح) ..
.
الجميل بقى , إن – بعد إيييييييييه – شركة ممفيس الغراء اللى بتنتج الحقنة العظيمة دى , أخيرا نزّلت على موقعها الرسمى توضيح حقيقى بخصوص الجرعات المناسبة من الحقنة دى , عى حسب استخداماتها المختلفة (أقلها كل 3 شهور , مع اعتراضى الشخصى على كده برضه) .. و تقدر تشوفها ع اللينك ده
.
http://memphis.com.eg/ar/products/injection/125.html
.
الشاهد إن حضرتك مطلوب منك دلوقتى إنك تبحث فى الموضوع بنفسك , لحد ما تتأكد منه و تبقى على يقين من كل كلمة قريتها معايا دلوقتى .. و لو اتأكدت – سواء بالمراجع أو بالعقل أو بالثقة فى شخصى الضعيف – فانا باحطّ الرسالة إياها – اللى حطها دكتور الامتياز فى رقبتى زمان – فى رقبتك انت كمان , بإنك توعّى الناس تجاه الحقنة دى , و تخليها ما تطلبهاش من الصيدليات , على إنها السحر الأعظم , لعلاج تأخر التسنين أو المشى , و حتى لو لقيت طبيب جنبك بيكتبها بجرعة أكتر من اللازم , مابقاش فيه أسهل من إنك تطبع الكلام اللى فى اللينك اللى فوق ده , و تدبسه – بكل احترام – فى الروشتة , و تبعته مع حد لحد العيادة , عشان الدكتور يبقى يكتبها – عند الحاجة , بحد أقصى 3 حقن , للأطفال اللى عندهم المشكلة دى ..
.
أتمنى إنك ما تكونش زهقت من كلامى النهاردة – لإنه كان طويل بصراحة – و أرجو إنك تعمل ‫#‏شير‬ زى ما اتفقنا .. و ان شاء الله دايما نتقابل على خير ..
.
‫#‏اتعلم_صح‬
‫#‏طبّق_صح‬
‫#‏الفارماكولوجى_عضم_الصيدلية‬
‫#‏أنا_صيدلى_فاهم_شغلى‬
.
‫#‏أحبكم_فى_الله‬
.
أحمد الجويلى

One response to “عن ‪#‎Devarol‬-S كمان و كمان !! ..

  1. لوسمحت انا عندي 21 سنة وكشفت عند دكتور وحللت والنتيجة كانت خمول ف الغدة الجاردرقية ونقص كالسيوم عن المعدل الطبيعي ف الجسم
    والدكتور وصفلي حقنة ديفارول مرة اسبوعيا لمدة خمس مرات
    حضرتك رأيك ايه ف الوصف دا صح ولا فيه خطورة برده ؟؟
    أرجو الرد

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s