صيدلي إنسان .. و صيدلي آلي


من فترة مش كبيرة , بدأت ألاحظ تكرار استشارتنا سواء على بريدى الخاص على الفيسبوك , أو من خلال جروبنا First Pharmacology Course Online فى حالات غير صيدلانية بالشكل الواضح .. مش بتسأل عن مرض أو دواء واضح .. و إنما الاستشارة بتكون حياتية بشكل أكبر .. زى مثلا الزوج اللى ييجى يسأل عن إمكانية استخدام المنوّم مع زوجته اللى مش بتحب تنام بدرى , و لكن عاوز يحطه لها فى العصير , عشان يرتاح منها شوية !! .. أو الأم اللى عاوزة تخلى ابنها يهدى عاطفيا شوية , و بتسأل عن “مثبط جنسى” , عشان تديهوله من غير ما ياخد باله !!!!!! .. و أسئلة محرجة من النوعية دى بشكل بيخلّى الصيدلى يحتار فى كيفية التعامل معاها !! .. و احنا جايين النهاردة عشان نقول لك على وجهة نظرنا فى الموضوع ده بشكل منطقى ..
.

robot
احنا اتفقنا قبل كده على إن الحل الرئيسى لتحديات مهنتنا , هو استعادة الثقة .. و أحد طرق تحقيق ده , هو إنك تـ engage مع الناس .. أو نقولها بالعربى .. “تنخرط” بينهم , عشان يثقوا فيك .. يعنى تحاول تهنى فى أفراحهم , و تعزّى فى مياتمهم .. عشان ما تظهرش بمظهر الصيدلى المنفصل عن كل شىء ما عدا صيدليته .. أو ما يسمى الصيدلى الآلي .. و ده ما يعجبش الشخصية المصرية على الإطلاق .. المصرى بيحب اللى ياخد و يدّى معاه فى الكلام .. و يفتح معاه مواضيع , و يحسسه بالمشاركة و التعاطف فى مشاكله .. المصرى يحب يحكى , و يحب اللى يسمع له .. و ده مش حييجى بإنك تقفل معاه فى الكلام , و تلخّص الحدوتة فى إنك تحوّله على تخصص معين , أو على مفتى يسأله , أو حتى بإنك تريّحه و تنفّذ له طلبه من الباب للطاق , من غير ما تشور عليه بوجهة نظرك ..
.
يعنى مثلا .. الزوج اللى عاوز يخلى زوجته تنام بدرى .. لازم تسأله بلطف عن سبب كده , و تحاول – بأدب – إنك تخليه يفضفض لك فى حدود المعقول , بخصوص أساس المشكلة بينه و بين مراته , و تجهد نفسك شوية فى إنك تلاقى حل غير المنوّم اللى ممكن يحطه لها فى العصير بدون علمها .. و مش الحل إنك تصرفه زى “الصيدلى الآلى” , و تقنع نفسك بإنك ما لكش دعوة , و إن الموضوع مايخصكش فى شىء , أو إنها مسئولية المريض اللى حياخد العلاج !! .. و نفس الكلام مع الأم اللى بتسأل على “مثبط جنسى” لابنها , اللى ممكن يكون بيشاهد محتويات إباحية على الإنترنت , و يكون حله الرئيسى فى محاولة هدايته لإنه يقرب أكتر من ربنا , و يفحت نفسه فى الرياضة و الجيم , عشان يستهلك طاقته اللى ضايعة فى الفراغ .. و هكذا ..
.
من أسبوع تقريبا , اتعرض سؤال محرج على الجروب , بخصوص شاب بيشتكى من perianal pain و dilatation of anal sphincter بسبب علاقة جنسية شاذة بيقوم بيها بشكل متكرر !! .. السؤال زاد عليه اللغط فى الجروب , و اتحذف بعد ما تحوّل إلى تراشق بالألفاظ بين المؤيدين و المعارضين لفكرة التدخل فى نصح المريض من عدمه ! .. جانب من الأعضاء شاف إن الصيدلى يصرف العلاج للمريض من سكات , بدون نصح أو اشمئزاز من حالته .. و جانب آخر شاف إن الحل فى نهر المريض و تعنيفه على المصيبة اللى بيعملها , على أساس إنها فعل يتهز له عرش الرحمن ..
.
و كان لى رأى حبيت إنى أعرضه هنا , برغم حساسية الموضوع المفرطة , و اللى حنحاول نتغلب عليها شوية إن شاء الله  .. الصيدلى إنسان .. و عشان كده , ما ينفعش يواجه حالة زى كده بأسلوب الإنسان الآلى , و يصرف لجنوكايين كريم مثلا , و مسكَن مناسب للحالة و خلاص .. و إلا حيبقى كده بيتخلى عن إنسانيته و دوره المجتمعى و الأخلاقى .. و بالقياس , لو حضرتك استخسرت إنك تنصح مريض بإنه يمتنع عن فعل محرم زى ده , فممكن تستخسر إنك تنصح الشاب اللى عاوز يربّى عضلاته من خلال حقن التستوستيرون , بإنها ممكن تسبب له عقم و إجهاد فظيع للكبد .. و ساعتها حتقول : أهو رزق و جاى لى !!! .. و ده ضد الإنسانية على طول الخط !! ..
.
الأنقح فى موضوع “المثلية الجنسية” ده , إننا لازم نفهم إن الموضوع ينقسم إلى نوعين .. نوع نفسى , و نوع هرمونى .. النوع النفسى , بيكون السبب فيه غالبا Sexual Abuse فى مرحلة من مراحل الحياة , بشكل يخليه يحصل على الـ Sexual Pleasure على المدى الطويل , فى غير العلاقة الجنسية الطبيعية بين الرجل و المرأة .. و ده بيكون علاجه عند طبيب الأمراض النفسية , اللى بيلجأ لحل العقدة النفسية بطرق مختلفة منها مثلا , الـ Timeline therapy ..
.
أما النوع الهرمونى , فبيكون ناتج من نقص هرمون التستوستيرون , و زيادة محتملة فى هرمون الإستروجين .. و ده بيكون واضح على الجسم من الخارج , نتيجة غياب الصفات الذكورية الثانوية , و ظهور الصفات الثانوية الأنثوية بشكل واضح … و ده بيكون علاجه عند دكتور الغدد الصماء , اللى بيظبط الخلل الهرمونى ده , حتى لو كان بـ Hormonal Replacement مدى الحياة !! ..
.
و لكن الغريب بقى , إنى قريت تعليقات ع الموضوع لصيادلة , فاكرين إن الموضوع عادى , و إنه مسموح بيه فى الدول الأجنبية , يبقى المفروض احنا كمان نتقبله .. و نسينا تماااااااااااما بإن ده كان من أفعال قوم لوط , و اللى ربنا عذبهم عذاب شديد بسببها !! .. و لو كان شىء طبيعى , لما كان ربنا توعدهم – و اللى يعمل كده من بعدهم – بالعذاب !! .. مش معنى وجود خلل , إننا نسلّم بيه و ما نحاولش نصلحه !! ..
.
انصح مريضك بشكل إنسانى مؤدب .. انت إنسان قبل ما تدخل كلية الصيدلة .. و الكلية مش المفروض تلغى إنسانيتك و دورك فى الهداية و تعديل سلوك الناس لو لقيت حاجة غلط .. و لكن خليك كيس فطن .. ما تودّيش نفسك فى داهية بدعوى إنك تصلح الكون من حواليك .. و ما تدخلش بشكل عميق فى المشاكل بين زوجين , بأسلوب ممكن يخسّرك وقتك ع الفاضى , أو يخسرهم بعض لا قدر الله .. و ما تفتنش على البنت (غير المتزوجة) عند أبوها , لما تلاقيها بتاخد منك شريط “ميكروسيبت” أو “جينيرا” أو غيره من حبوب منع الحمل , لإنها ممكن تكون بتاخده لتنظيم الدورة , مش عشان سلوكها سىء لا سمح الله !! .. و هكذا ..
.
هل الإنسانية لها عيوب ؟؟!!! ..
.
للأسف آه .. الإنسانية ممكن تخليك تفكر فى مشاكل الناس , و تنسى نفسك .. و ده limit من الإنسانية , مش المفروض إنك توصل له .. عشان لازم تفتكر إن الهدف من الـ Engagement اللى قلنا عليه , هو إنك تزرع الثقة فى قلوب مرضاك , مش إنك تتغلغل للآخر فى مشاكلهم , و تنشغل بيها عن مشاكلك الشخصية ..
.
و لكن لو قدرت تتحكم فى العيب ده و تحجمه , حتقدر توصل إلى إنك تكون “نجم جماهيرى” كصيدلى فى المنطقة اللى انت متواجد فيها .. و ده لإنك حتقدر تكسب ثقة عدد كبير من المرضى , و اللى حيتحولوا – شوية بشوية – لأبواق دعاية لشطارتك فى التعامل معاهم , و ده حيجذب لك عدد أكبر من العملاء فى زمن قياسى .. و لكن المهم إنك تقدم المشورة الإنسانية صح , بشكل لا يتعارض مع الضمير المهنى و الأخلاق الراقية ..
.
الزتونة : خليك صيدلي إنسان , تكسب ثقة المرضى على المدى الطويل .. خليك صيدلي آلي , تكسب فلوس المرضى على المدى القصير ..

لو عجبك الكلام ده , ما تنساش تعمل له Share على بروفايلك ع الفيس ^_^ ..

تابعونا على  Facebook بالضغط على Follow و Get Notifications , للحصول على معلومات صيدلانية شيقة يوميا ..

أحبكم في الله🙂

أحمد الجويلى

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s