للصيادلة و طلبة الصيدلة فقط | 6 طرق مؤكدة لزيادة دخلك الإضافى يوميا ..


increase

كلنا عاوزين نزوّد دخلنا .. ده شىء لا شك فيه .. و يا سلام لو قدرنا نعمل كده بأقل مجهود ممكن !! .. و تبقى حاجة رائعة , لو الكلام ده تمّ من البيت , من غير مشاوير ولا شحططة .. مش كده ؟؟!! .. أساسى طبعا ! .. و عشان كده , احنا حنساعدك فى المقال ده بالتفصيل , و ندّيك الزتونة , اللى تقدر تنطلق بعدها و تحقق نجاحك المالى بإذن الله , من خلال التزامك بالنصايح و القواعد اللى حنقول لك عليها .. اتفقنا ؟؟!! .

.

بس خلينا أولا نتفق على شوية قواعد فى غاية الأهمية : ..

.

  • مفيش مجهود .. مفيش فلوس

ناس كتير لما بتفكّّر فى زيادة الدخل , أو تشوف بوستات للعمل عن طريق المنزل , بيفتكروا إن الموضوع مفيهوش مجهود , و عقلهم الباطن بيتصور إننا حندلّهم على منجم حييجى لحد عندهم , و يفتح أبوابه , و يبدأ يشرررر جنيهات دهب و ألماظات , زى ما كان بيحصل مع عم دهب لما كنا بنتفرج عليه زمان أيام كرتون بطوط !! .. كل الكلام ده غير واقعى طبعا .. لازم تتأكد من إنك حتبذل مجهود , للحصول على مقابل .. و لو حد قابلك و دلّّك على حاجة غير كده , ابدأ شك فى كونها حلال أصلا , لإنها ممكن تكون فلوس حرام , و اللى زى كده بقوا أكتر م الهم ع القلب , و ربنا يبعدهم عننا و يحفظنا من شرهم !! .. الفكرة فى المجهود إن المفروض يكون مناسب ليك , مش أكتر من كده , زى ما حنشوف كمان شوية إن شاء الله ..

nopainnogain

  • ابحث عن الفجوة الاقتصادية و سدّها بنفسك

يعنى إيه فجوة اقتصادية ؟؟!! .. للتبسيط , لو فيه شارع يسكنه 100 أسرة , و كل أسرة تقريبا 4 أفراد .. بيكون احتياجهم من الجبنة (مثلا) 200 كيلو جبنة فى الشهر .. و كان فى الشارع ده سوبرماركت , بيقدر يوفّر لهم فى الشهر 150 كيلو جبنة , يبقى نقدر نقول إن الشارع ده فيه فجوة اقتصادية تجاه الجبنة , تقدر بـ 50 كيلو جبنة .. و لو جه واحد و قرر إنه يفتح سوبر ماركت جديد فى الشارع ده , عشان يبيع فيه الـ 50 كيلو جبنة دول , ممكن ينجح , أما لو حاول يبيع أكتر من كده , ممكن ما ينجحش .. و هكذا .. الفجوة الاقتصادية , هى تعبير عن احتياج العميل للمنتج أو الخدمة اللى حضرتك حتقدمها .. يعنى اسأل نفسك : هل المحتوى اللى حاقدمه للناس (سواء كمنتج أو خدمة) , ممكن يكون فيه حد محتاجه ؟؟ .. ولا عندهم اكتفاء منه ؟؟ .. ولا فيه حاجات طلعت أحدث منه ؟؟ .. و ده بغضّ النظر عن السعر , اللى حنتكلم فيه كمان شوية ان شاء الله .. و لكن الواضح هو إننا لو قدرنا نسد الفجوة الاقتصادية و الاحتياج اللى عند الناس تجاه حاجة معينة , يبقى ده حيسهل عملية نجاحنا إن شاء الله ..

  • خليك ورا الأحب لقلبك , مش الأكسب لجيبك

انت دخلت تقرا المقال ده , عشان تكسب أكتر .. مش كده ؟؟!! .. اسمح لى أقول لك إنك ماشى فى الاتجاه العكسى .. المفروض حضرتك تدوّر على أحب شىء ليك , و تتخصص فيه (طالما ممكن يسد فجوة اقتصادية زى ما قلنا) .. يعنى لو شفت مجال من اللى حنقول عليهم , و لقيت نفسك بتحبه أكتر من مجال تانى , قلنا إنه بيكسب أكتر أو أسرع , خليك مع اللى بتحبه , عشان ده اللى حتقدر تكمّل فيه بنجاح , و حتجنى من وراه دخل إضافى , من غير ما تحسّ بإرهاق الشغل , لإنك حتعمل شىء بتعشقه , مش شىء مفروض عليك .. و لو مش مصدقنى , اتفرج ع الـ talk ده , و انت حتقتنع أكتر

follow-your-passion6-e1340590885249

  • لو بتحب حاجة , حتتعلمها و تبرع فيها

ماتقولش “إنا مش حانجح , لإنى مش خبير بالمهارة اللى انا باحبها” !! .. طالما بتحبها , يبقى حتقدر تتعلمها فى وقت قياسى بإذن الله .. و بشوية ممارسة فى البداية , حتبقى خبير فيها .. و التعليم دلوقتى مابقاش صعب زى زمان .. كل المطلوب إنك تدخل ع النت , و تدوّر ع المجال اللى انت حابب تدخله , و تشوف أهم مقوماته , و اليوتيوب بقى عليه دروس لشرح أى حاجة و كل حاجة تقريبا .. لازم يكون عندك الإرادة للتعلم , و القدرة عليه .. مش أكتر ..

  • اتعلّم أولا , و اشتغل ثانيا , .. مش العكس

ما تفتكرش إن الفلوس حتيجى من غير ما يكون عندك خبرة فى اللى بتقدمه , و إلا حيبقى إيه اللى يفرقك عن أى شخص تانى ؟؟!! .. و بالتالى الناس تدفع فيه فلوس ؟؟!! .. اشتغل على نفسك أولا , و ممكن تحتاج إنك تدفع فلوس فى التعلم كمان .. و بعد كده حتشتغل كويس بإذن الله .. المهم , ما تفكرش بطريقة معكوسة !! ..

learn

  • اتعلم أكتر .. تكسب أكتر و أكتر

لو وصلت عند مرحلة معينة من الشغل , و توقفت عن التعلم , حيتوقف ربحك , لإن أى مجال حتشتغل فيه , حيبقى فيه جديد كل يوم .. و لازم تتعلم الجديد ده , عشان تستمر فى المكسب و تزوّد ربحك كمان و كمان .. يعنى مش عشان بقيت خبير فى مهارة معيّنة , يبقى خلاص و نوقّف دراسة فيها .. و لو كنت بالفعل مش لاقى حاجة تدرسها فى مجالك , ادرس فى مجالات مقاربة أو ممكن تستغلها فى شغلك , زى مهارات البيع و التسويق مثلا , أو احتراف الوصول للناس من خلال مواقع التواصل الاجتماعى .. كل دى حاجات ممكن تخليك أنجح فى شغلك الإضافى بإذن الله ..

  • لا تخاف المنافسة .. أكيد انت أفضل

أكيد من الأفضل إنك تنزل فى محيط مفيش فيه منافسين ليك , و تكون انت المنافس الوحيد لنفسك .. و لكن دلوقتى من الصعب إنك تلاقى مجال مفيش حد ارتاده قبلك .. لو مجال مشغولات الأركيت مثلا هى المجال اللى نفسك تشتغله , ما تخافش من إنك تخوضه فى وجود منافسين من قبلك .. أكيد حيكون عندك ميزة تنافسية (حندور عليها سوا) , عشان نقدمها للناس , و بعد كده حتكبر دايرة معارفك , بشكل يخليك تقدر تبيع أول قطعة من شغلك , و بعد كده العجلة تدور لما الناس تعرف قد إيه شغلك متميز و متقن .. و هكذا ..

Don’t-Be-Afraid-Of-Competition-300x300

  • استغل وجود منافسين , فى تحديد مميزات أحسن عندك

وجود منافسين , مش دايما بيكون شىء مضر .. بالعكس , ممكن تستغله لصالحك لو درست النقط اللى تقدر تتميز عليهم فيها .. زى ارتفاع السعر مثلا , أو صعوبة التوصيل , أو التكبر الواضح فى طريقة تعاملهم , أو نقص التواصل بينهم و بين العملاء , أو سوء خدمتهم لهم .. و هكذا .. و تبدأ تحسّن فى نفسك الحاجات اللى مش موجودة عندهم , و من هنا تخلق لنفسك نسبة متميزة من مبيعات السوق ككل إن شاء الله ..

  • الصبر مفتاح الفرج .. صدقوا لما قالوا كده

ما تتوقعش إنك أول ما تبدأ شغلك , إن الفلوس تبدأ تتدفق عليك بالآلاف و الملايين .. مفيش شغل كده تقريبا !! .. أغلب اللى انت شايفهم ناجحين قدّامك , اشتغلوا فى البداية – حتى بعد ما اتعلموا كويس – لفترة طويلة , لحد ما حصلوا على أول مرتب محترم أو قيمة مادية فى مقابل منتج أو خدمة قدموها !! .. المهم تصبر لفترة كافية , طالما متأكد من إنك بتقدم منتج أو خدمة متميزة ..

صبر

>>>>>>

و دلوقتى تعالى نتكلم فى الطرق اللى ممكن تحصل من خلالها على دخل إضافى ..

  • الترجمة العلمية أو الطبية

الموضوع بيبدأ بإنك تقيس قدراتك على الترجمة من الإنجليزى للعربى و العكس .. و ده ممكن تقوم بيه بسهولة , من خلال الموقع ده ..

http://www.cambridgeenglish.org/test-your-english/

و فى حالة اجتيازك للاختبار بدرجة ترضيك , ممكن تتقدم لأحد مكاتب الترجمة المنتشرة فى مصر و العالم , و تقدر توصل لهم إما من خلال Google لو بحثت عن جملة “مطلوب مترجمين” , أو لو تواصلت معانا ع الأكونت الخاص بينا , ممكن نبعت لك أرقام تليفونات و إيميلات , لعدد كبير من المكاتب اللى سمعتها كويسة , و أسعارهم مناسبة ..

أما لو ما قدرتش تمر بالاختبار , و انت حابب المجال ده و نفسك تتعلمه , ممكن تدخل ع الرابط ده , و تتعلم من خلال المحاضرات اللى فيه , أسس الترجمة المعتمدة من الألف للياء بإذن الله .. (و ابقى ادعى لى) ..

بعد إتقانك للمهمة , المكتب بيتصل بيك , عشان يقيس قدراتك فى الترجمة , و يديك محتوى و يطلب منك ترجمته فى فترة زمنية مناسبة , و على أساسه , بيقبل أو يرفض التعامل معاك , و بعد كده بتحددوا السعر (فى مقابل عدد كلمات معين) .. و ممكن تتخصص فى مجال الترجمة الطبية , أو تشتغل بشكل عام فى ترجمة أى موضوع تقدر عليه , فى الفن أو السياسة أو ما شابه .. و انت و قدراتك .. و لكن الترجمة الطبية و مصطلحاتها بتكون أقرب لينا كصيادلة , و أسهل فى الشغل , و كمان مطلوبة لندرة العاملين فيها ..

المهمات الموكلة إليك ممكن تكون ترجمة أبحاث كبيرة الحجم , أو روشتات أدوية جديدة حجمها صغير أو متوسط .. على حسب قدراتك و وقتك المتاح .. بعد إتمام المهمات , بتتبعت الفلوس على فودافون كاش مثلا , أو على حسابك فى البريد , و بتتأكد إنها وصلت , عشان تقدر تكمل فى المهمات التالية إن شاء الله ..

الميزة فى النشاط ده , هى إنك بتكسب كويس من البداية بإذن الله , مع أول مهمة تقوم بيها .. و الأسعار بتتفاوت من شهر للتانى و من مكتب ترجمة للتانى .. و كل ما كان وقتك يسمح , و علاقاتك طيبة مع مكاتب كتير , مكسبك حيبقى أكبر و أسرع بإذن الله

تقدر تنضم حالا لجروب رابطة المترجمين الفريلانسرز .. و تبدأ شغلك مع مكتب من الـ 3 دول ..

TransHome الأمل لخدمات الترجمةMSE للترجمة المعتمدة 

يلا .. اتلحلح .. ملكش حجة ..

  • الأعمال اليدوية

أى شىء تقدر تصنعه بإيدك , ممكن تلاقى حد يحب يقتنيه .. من أول منتجات الأركيت , مرورا بالكروشيه و التريكو , و حتى اللوحات الفنية السيريالية أو التعبيرية .. المهم تعرف إزاى تقدر تسوّق لها كويس ! .. خلينا نتكلم مثلا ع الكروشيه !! .. سيدات كتير بيحبوا يشتغلوه , و منهم ناس بتهاديه لزميلاتهم فى الشغل مثلا أو للقرايب , و عمرهم ما فكّروا إنهم يحصلوا من خلاله على مكسب مادى , و بالفعل الحاجات دى أسعارها كويسة جدا , بالمقارنة بأسعار خاماتها الرخيصة .. و لكن الفرق فى السعر بيكون ناتج عن الجودة و الاحترافية فى التقديم النهائى للمنتج ..

بتبدأ القصة بالتعلم برضه .. يعنى لو حضرتك من هواة الكروشيه , و مفيش عندك أى خلفية عن أساسياته , ممكن نتفرج على شوية الفيديوهات دى بالترتيب كبداية , و بعد كده نكمّل ..

بعد كده نبدأ نمرن إيدينا – بعد ما نشترى الأدوات اللازمة طبعا – و نبدأ نعرض منتجاتنا على الأهل و القرايب , عشان يقولوا لنا رأيهم الصادق تجاهها , و هل ينفع إننا نسوّقها بمقابل مادى ولا لأ ..

و بعد كده تبدأ مرحلة دراسة السوق و المنافسين .. تطبيق Instagram من أهم المنصات اللى ممكن نعرض عليها منتجاتنا المتخصصة فى الكروشيه (أو غيره طبعا) , و نبدأ نحط صور متميزة للمشغولات اللى بنقوم بيها بالتدريج , و نبدأ فى تجميع المتابعين المهتمين باللى بنقدمه , و نحط وسيلة للتواصل , زى الصفحة دى كده

http://instagram.com/crosheh

و زى ما قلنا , عشان نطور من نفسنا أكتر و أكتر , و نكبر بسرعة , لازم نتعلم أسس التسويق ع الـ Instagram من خلال فيديوهات زى ده

أما بخصوص التسلم و الاستلام , فممكن يتم على فودافون كاش برضه , و الشحن يتم عن طريق البريد , فى طرود سريعة , تصل خلال 72 ساعة , داخل أو خارج مصر بإذن الله ..

الميزة الرئيسية فى النوع ده من العمل الإضافى , إنك ممكن تشتغل وقتما تحب , و توقّف شغلك مؤقتا أو نهائيا وقت ما تحب .. و على قدر ما حتدّى للعمل ده من مجهود , حتقدر تجنى من خلاله بإذن الله ..

الميزة التانية كمان , هى إنك ممكن تعرض عمل الآخرين و تقول رأيك فيه , على أساس إنك خبير بالمجال بالفعل , و ده يزوّد ثقة الناس فيك .. و الأهم من كل ده , هو إنك ممكن تشتغل بشكل لا يركز على الاسم أو الوظيفة , و ما حدش حيعرف إنك صيدلى أو طالب فى كلية الصيدلية , إلا لو حبيت .. و ما تنساش , إنك ممكن فى يوم تنتشر أسرع من خلال الشغل ده , و تنسى الصيدلة باللى فيها !! .. انت و حبك بقى !! ..

  • الجرافيك

المجال ده بيتضخم كل ساعة أكتر من الساعة اللى قبلها .. و برضه بيعتمد فى البداية على مدى حبك لشغل الـ Media و الفوتوشوب و برامج المونتاج , .. و لازم برضه تتعلم فيه على قد ما تقدر بنفس الطريقة اللى قلنا عليها قبل كده .. اليوتيوب تقدر تتعلم عليه اللى انت عاوزه .. فيه 3 أنواع من الجرافيك بشكل أساسى .. و فيه غيرهم أكيد .. و لكن دول الأهم من وجهة نظرى …

  1. جرافيك ثابت .. اللى هو زى الفوتوشوب و اخواته .. و لكن أشهرهم الفوتوشوب ..
  2. جرافيك متحرك بدائى .. ممكن يتعمل ببرامج زى Powtoon أو Wideo أو حتى Flash ..
  3. جرافيك متحرك متقدم .. و ده بيتعمل ببرامج زى Adobe premiere و After effects ..

و مش حنعيد بقى إنك تقدر تتعلم كل دول بالتدريج و التطبيق برضه من خلال اليوتيوب .. انت بقيت تعرف النقطة دى لوحدك دايما .. المهم دلوقتى فى الخطوة الأولى بعد التعلم .. حاشتغل إزاى ؟؟!! ..

كل المطلوب حاليا , هو إنك يكون لك صفحة ع الفيسبوك , تكون متخصصة فى اللى تقدر تقوم بيه .. و تعرض عليها إبداعاتك , اللى ممكن تكون فى البداية , بدون مقابل خالص .. سواء صور ثابتة أو فيديوهات .. و تبدأ تتعلم معاه أسس التسويق ع الفيسبوك , و اللى أهمها إنك تقدم محتوى قابل للنشر بسهولة , يخلى صفحتك تكبر , و عدد أكبر يشوف اللى بتقدمه يوم ورا التانى .. لحد ما تبدأ تستقبل طلبات العمل عند ناس بشكل مستمر , أو بالقطعة .. يعنى الاتفاق على سلسلة أعمال متتالية , أو عمل كل فترة بشكل متقطع .. انت و حظك برضه .. و انت و مهاراتك اللى بتخرج للناس , و سعرك اللى بتعرضه عليهم ..

ميزة مجال الجرافيك , هى إنك بأى إمكانيات , حتلاقى عملاء يرضوا بإمكانياتك و يدوك فى مقابلها مبالغ مناسبة لقدراتك .. و كل ما مهاراتك تزيد , سعر أعمالك يرتفع بإذن الله .. و لكن أهم شىء هو الالتزام فى تنفيذ المطلوب بالكيفية و التوقيت المناسبين لكل عميل , عشان يرجع لك مرة تانية , و يقول لأصحابه و رواد الأعمال من معارفه عليك ..

أما عيبه , فهو – زى ما قلنا – إنه متطور دائما .. و لو توقفت فيه عن متابعة الجديد لفترة بسيطة , ممكن تحتاج وقت طويل , عشان ترجع للسوق و يبقى لك مكانتك فيه زى زمان !! ..

  • تصميم المواقع

تصميم المواقع ما بقاش صعب زى زمان , أو محدود ع المبرمجين اللى حاطين النظارات على عينيهم و مبرقين فى الشاشات طول النهار .. و لكن بقى فيه طرق و وسائل لتسهيل القصة على ناس كتير , بشرط إن يكون عندهم الوقت الكافى و الرغبة فى التعلم و ممارسة إبداع إنشاء المواقع ..

لو عاوز تتعلم إزاى تعمل موقع من البداية خالص , ممكن تشوف الفيديو ده

و بنفس طريق شغلنا فى الجرافيك , حينطلب منك مهمات لتصميم المواقع , بعد ما تنشر عن نفسك إنك قوى فى المجال ده .. و برضه أسعار القصة دى ممكن تتراوح على حسب الخدمات اللى حتقدمها أو حجم الموقع اللى حتقوم بتصميمه .. من 1000 لـ 5000 جنيه , بأسعار اليومين دول .. و ممكن أكتر لو حتستمر فى صيانة الموقع لصاحبه بشكل دورى !! ..

عيب الموضوع ده إنه متقدم شوية , و مشاكله كتير , و لازم عشان تدوس فيه , تكون فاهم كل فتفوتة فيه , عشان ما يبقاش شكلك زبالة قدّام العميل .. بجانب إن من أهم العيوب برضه , هو تحكمات العملاء بشكل ينرفز فى بعض الأحيان .. يعنى يطلب منك شىء و يرجع يغيّره , أو يكون صعب الإرضاء , أو يطلب منك التواجد أونلاين فى فترات غريبة , عشان يقول لك ع اللى هو عاوزه !! .. إلخ ..

  • التسويق الإلكترونى

ده بقى حدوتة كبييييييرة قوى .. منها الحلال و منها الحرام .. خلينى أقول لك عليه أهم الرسايل اللى فى زورى تجاهه .. ببساطة كده , انت ممكن تمسك التسويق على صفحة لمنتج أو شركة مشهورة أو مش مشهورة , و تبدأ تقدم عليها بوستات , يكون هدفها تواجد مستمر للـ brand اللى انت شغال عليه , ع الفيسبوك أو غيره من مواقع التواصل الاجتماعى .. و لو كان المنتج ده ما يغضبش ربنا , ففى الحالة دى الطريقة دى حلال إن شاء الله , لإنك حتيجى فى نهاية كل شهر , و تقبض مرتبك من صاحب العمل .. و لو قدرت تمسك أكتر من صفحة كأدمن فيها يعنى , ففى الحالة دى دخلك حيبقى كويس بإذن الله .. و الفيسبوك بيسهّل الموضوع ده يوم بعد يوم , عشان يبدو للناس إنك متواجد قدامهم على مدار اليوم .. و لكن التواجد الفعلى بشكل يومى , من أهم ما يكون , عشان الصفحة تفضل متشافة و فعالة قدّام الناس ..

عشان تتعلم أفضل طرق التسويق الإلكترونى للشكل اللى حكيناه ده , ادخل على صفحة School-Of-eMarketing ع الفيس , و تابع اللى بيقولوه , و اتعلم منهم يعنى إيه Inbound Marketing , و هو الصيحة الأشهر و الأرقى و الأحدث فى عالم التسويق بصفة عامة اليومين دول ..

أما التسويق الإلكترونى بشكله السىّء , فبيكون – فى وجهة نظرى – لما ما تعملش حاجة إلا إنك تجيب حد يشترى منتج معيّن غير نافع بالنسبة له , على أساس إنه حيضمن له وظيفة معيّنة , لما يعمل زيك و يسوق نفس المنتج , فى مقابل عمولة .. أو لما تعمل صفحة غير هادفة , و تيجى تبيعها بعد كده بالشىء الفلانى لمجرد إن عدد المتابعين لها كتير .. كل ده أى كلام , و مشكوك فى كونه حلال أو حرام .. عشان المجهود اللى بتقوم بيه , مش بيقدم نفع حقيقى , و لكن نفع وهمى , فى وجهة نظرى !! .. و برضه لو عاوز تتعلم أكتر عن التسويق الإلكترونى بصفة عامة , تابع Shereen Badr أحد أشهر المسوقات ع الفيسبوك و أغلب مواقغ التواصل الاجتماعى ..

  • التدريس الإلكترونى

و ده الشىء الأخير اللى حنتكلم فيه النهاردة , لووووو بتحب إنك توصل المعلومة .. ببساطة ممكن تكون خبير فى مجال معين , له علاقة – أو ما لهوش علاقة – بالصيدلة .. ممكن تكون بتحب الطبخ مثلا .. و فى الحالة دى , ممكن تعمل فيديوهات قصيرة عن أسرار الطبخ , و تبدأ تنشرها ع اليوتيوب , لحد ما تتأكد من إنك بتعمل الكلام ده بشكل مفيد و ممتع و تطبيقى للمشاهدين .. و ساعتها , همّا حيبدأوا يسألوك إن كان فيه شىء إضافى ممكن تقدمه لهم , عشان يفيدهم فى المجال اللى انت تخصصت فيه .. و ده حيديك الفكرة إنك تبدأ تنتج فيديوهات مدفوعة الأجر , زى ما حصل فى موقع Et3alem , و اللى قدموا من خلاله كورسات مصغرة لعدد من المحاضرين , و فتحوا الاشتراك للناس , فى مقابل 100 جنيه شهريا , عشان يشوفوا كل المحتوى اللى عليه خلال الشهر ده .. و ممكن انت تفكّر فى حاجات تانية , زى ما عملنا فى باقتنا Learn Pharmacy At Home , اللى قدمنا فيها أكتر من 52 ساعة مسجلة بجودة عالية , على 3 ديفيديهات , يمكن إرسالهم لأى مكان فى العالم , فى مقابل قيمة 1740 جنيه , حتى كتابة السطور دى .. و نجح فى تغيير حياة كتير من الصيادلة و طلبة الصيدلة , فى الصيدليات اللى اشتغلوا فيها بفضل الله ..

المهم إنك تقدر تقوم بالخطوة الاولى , و هى معرفة الشغف بتاعك و الحاجة اللى ممكن تتخصص فيها .. , و بعد كده تبدأ تسجيل الفيديوهات المجانية اللى قلنا عليها .. و ده كورس من موقع اليوتيوب نفسه , عشان تقدر تسجل فيديوهاتك بجودة أعلى , و محتوى أكثر إفادة

https://youtube.com/yt/creators/ar/index.html

فى نهاية كلامى معاك , أتمنى إنى أكون قدرت أنوّر لك حتة فى دماغك , بعدد من الأفكار اللى ممكن تطبقها لزيادة دخلك بالحلال , و استغلال وقت فراغك على مدار اليوم أو الأسبوع , عشان تحس بمزيد و مزيد من الحماس و القدرة على الإنتاج و تحقيق المكسب .. المهم ما تنسانيش بدعوة حلوة بظهر الغيب , ولا تنسى تـ Share المقال , لو كنت استفدت منه أى حاجة ..

تابعونا ع الفيسبوك , باسم / أحمد الجويلى .. عشان حنفضل نقدم لكم بإذن الله , بشكل منتظم , محتوى مفيد و جديد و ممتع بالنسبة لكم على مر الأيام ..

أحبكم فى الله ..

أحمد الجويلى

13 responses to “للصيادلة و طلبة الصيدلة فقط | 6 طرق مؤكدة لزيادة دخلك الإضافى يوميا ..

  1. السلام عليكم د احمد
    جزاك الله خير على مجهوداتك
    بس رقم التليفون للتواصل مش بيجمع

    • و عليكم السلام و رحمة الله وبركاته
      التواصل كان غير متاح الفترة الماضية بسبب سفرنا خارج مصر
      حاليا التواصل متاح بإذن الله🙂

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s