أكثر من 8 طرق للنصب و السرقة داخل الصيدليات .. و كيفية الوقاية منها ..


نصب 2

كتب الزميل العزيز د. Ahmed Nabeel بوست أكتر من رائع بخصوص الموضوع ده , من يومين , و كل اللى حاعمله , هو إنى حاعيد نشره بتصرف بسيط , و بعرض المواقف بأسلوبى قدر الإمكان , مع زيادة عدد الطرق اللى ممكن أكون سمعت عنها من زملاء أو تعرضت لها شخصيا , مع محاولة الوصول لطرق الحماية منها بإذن الله , و الحفاظ على صيدلياتنا من اللصوص و الحرامية ..
.
#1_الفلوس_المزورة : و دى أشهر طريقة .. و منتشرة فى الصيدليات الكبيرة , اللى ممكن يتم شراء طلبيات منها بـ 700 و 800 جنيه فى مرة واحدة , و ممكن تكون الفلوس كلها عبارة عن ورق بـ 100 أو 200 , و يتسلموا للصيدلى أو الكاشير مرة واحدة على بعض , فهو يعدهم ورا بعض و خلاص و يحطهم فى مكانهم , و ممكن يكون أغلبهم – إن لم يكن كلهم – مزورين , و دى حلها فى رأيى , يعتمد على نوع الصيدلية .. لو كانت صيدلية من اللى بيتعاملوا فى الموضوع ده كتير , فالحل ممكن يكون بجهاز موجود عند محلات الأجهزة الكهربائية , بيشتغل بالأشعة فوق البنفسجية , و بيقدر فى ثوانى يكشف الاحتيال بالطريقة دى ..
.
أما لو كانت الصيدلية مش بتتعرض للموضوع ده كتير , فالحل ممكن يكون بقلم رخيص ممكن يكشف الحيلة دى , مش بيكتب إلا ع الفلوس المزورة , و بيخلى لون الكتابة أسود .. و تقريبا بـ 15 جنيه ..
.
نصيحتى إنك ما تتكسفش من إنك تعمل حركة الكشف دى سواء بالجهاز أو بالقلم , أو حتى بعينك فى النور , قدام أى عميل , حتى لو عمل نفسه زعلان , و ساعتها تقول له إن المثل بيقول : حرص ولا تخونش ! ..
.
#2_المغالطة : العميل النصاب , بيدخل بورقة نقدية كبيرة , 100 أو 200 جنيه مثلا , و يطلب حاجة رخيصة أو متوسطة , و بعد ما تجيب الباقى , يلخمك فى طلب تانى يتطلب منك إن تديّر وشك عنه للحظات , بشكل يخليه ينتهز الفرصة , و يخبى جزء من الباقى فى كمّه أو بين زراير القميص , أو حتى فى جيبه , و فى ثوانى ينادى عليك , عشان يقنعك بإنك عطيته الباقى ناقص , و ساعتها لو كنت مش مركّز , ممكن تتلخبط بكل سهولة , و تدي له زيادة 50 أو 100 جنيه , لظنك إنك ما عطيتهالوش قبل كده .. و طبعا الخدعة دى بتتم من العملاء اللى فى الغالب مش بتشوفهم إلا مرة واحدة فى الصيدلية , و من الصعب تكرارها من نفس العميل .. و الحل لها هو إنك تراجع دايما على الكاونتر , الباقى بكل فئة قدّام عين العميل , عشان ما يغالطكش فيها بوضوح .. و تكون مركّز لو المغالطة دى تمت من عميل مش معروف بالنسبة لك أو أمانته مشكوك فيها .. و تطلب منه بثقة إنه يدور فى جيوبه بس على أساس إنك متأكد من عدّك للفلوس !! ..
.
#3_فخ_الدليفري_الأول  : عامل الديليفرى فى أغلب الأحوال بيكون شاب بسيط على نياته , لازم تعرّفه من أول يوم , الطرق اللى ممكن يتنصب عليها بيه , و تقول له إنك مش حترحمه لو وقع فى واحدة منهم , طالما انت قلت له ع اللى فيها .. و من أهمهم , لما العميل النصاب , يطلب طلب كبير بالتليفون (و طبعا بيكون غير معروف للصيدلية من قبل كده) , و ساعتها الصيدلى يحضر المطلوب بالكامل , و يبعته مع عامل الديلفرى , ع العنوان , اللى بيكون فى شقة مهجورة , أو حتى فيها ناس باسم غير اللى اتقال فى التليفون , المهم إن النصاب يعمل نفسه نازل ع السلم فى نفس التوقيت اللى العامل بييجى فيه , و يقابله ع الباب مثلا , و يلخمه بإنه يزعق له بخصوص التأخير مثلا , أو إنه يلومه على إن العلاج ناقص حاجة معينة أو جه فيها بديل أو ما شابه , و بعدين يطلب منه إنه يرجع مرة تانية الصيدلية , عشان يغيّر نوع معيّن أو عشان يزوّد حاجة ع العلاج , من غير ما يكون عطى له العلاج , و ساعتها , العامل يخرج من العمارة عشان يرجع بسرعة , فى حين إن العميل النصاب , بياخد بعضه و يطلع من العمارة , و مش بيشوف وشها تانى !! ..
.
و الحل هنا إن العامل يكون حويط و ما يستحيبش للخدعة دى – بناء على نصيحة الدكتور طبعا – و ما يتغرش بالصوت العالى ولا القدرات التمثيلية للعميل اللى قابله ع السلم , و عمل إنه كان رايح الصيدلية !! , بل إنه ممكن يطلب من العميل تمن العلاج , أو إنه يرجع بيه بالكامل مرة تانية , للصيدلية , طالما ما أخدش تمنه , و لا يتغرّ بكلام النصاب , لو قال له مثلا : ابقى قول للدكتور فلان , إن اللوا علّان بيسلم عليه , .. أو “يبدو يا ابنى إنك جديد و ما تعرفش مين المهندس ترتان جار الصيدلية !!” .. كل دى أدوات نصب مش أكتر !! ..
.
#4_فخ_الديلفرى_التانى : (هو انا لاغى الديلفرى عندى من شوية ؟؟!!) .. ينتشر الفخ ده فى المناطق الراقية اللى فيها عمارات لها بوابتين !! .. بأسلوب مشابه للفخ السابق , الطلب بينطلب ديلفرى , و ساعة وصول العامل المسكين , بتيجى النصابة من الطرف المقابل للشارع , و تدّعى إنها أخت اللى طلبت الطلب مثلا أو والدتها , و تاخد كيس العلاج , و تطلب من العامل الانتظار ع البوابة الرئيسية للعمارة , لحد ما تجيب الفلوس , و هى طبعا لما بتدخل , مش بتجيب الفلوس ولا حاجة , و لكن بتخرج من البوابة التانية , و ابقوا قابلونى لو العامل شاف الولية القرشانة دى تانى !! ..
.
و الحل هنا إن العامل برضه يكون حويط للفخ ده , و يرفض إنه يسييها لحد ما تخرج بالفلوس , و يبدأ يطلب منها بشياكة إنه حينتظر هنا , لحد ما هى تنزل له بالفلوس – لو الطلوع معاها لحد الشقة ممكن يكون محرج – أو إنها تنزّل الفلوس بالسبت من البلكونة , و هو يحط فيه العلاج !! .. بسيطة أهي  ..
.
#5_مطلوب_صيدلى : تنشر إنك عاوز صيدلى فى وسائل كتير , و النصاب يعرف بالقصة دى , و يتصل بيك (يا ولداه) , و انت توافق و تديه الميعاد اللى المفروض يقابلك فيه !! .. و لكن ييجى قبل الميعاد بشوية .. ساعة أو ساعتين كده .. و يوهم كل الموجودين , إنه اتقبل بالفعل للعمل فى الصيدلية !! .. و يبدأ يتعرف عليهم , و يطلب منهم إنهم يعرفوه على الأماكن فى الصيدلية , لما يستجيبوا له و الصيدلية تتزحم شوية , يبدأ يقلب منها ما خف وزنه و غلى ثمنه , سواء من التلاجة أو من ع الرفوف !! .. و بعد شوية , يتحجج بأى حجة عشان يسيب الصيدلية و يمشى إلى غير رجعة , على أساس إنه رايح يصلى , أو حيعدى على واحد صاحبه جار الصيدلية !! ..
.
و الحل هنا طبعا إنك تكون منبّه ع اللى موجودين فى الصيدلية تجاه الحيلة دى , عشان ما يسمحوش لحد بالتواجد أصلا داخل الصيدلية (ورا الكاونتر) إلا لما يكون حصل على ثقتك الشخصية قدامهم , و ده بالرغم من إن فيه نصابين طويلي النفس ممكن يحبكوا النصباية على مدار 10 أيام أو 15 يوم , من العمل المتواصل لحد ما يحصلوا على ثقة الصيدلى بالفعل , و فى يوم يتواجد في الصيدلية لوحده , و يقلب منها أكبر قدر ممكن من الأدوية , و يختفى إلى غير رجعة !! (و ده حصل مع صيدلى صديق بالفعل للأسف) .. و الحل هنا بيكون بالاطلاع على الإثبات الشخصى للصيدلى اللى جاى يشتغل معاك , أو إنه يكون جاى عن طريق معرفة موثوق فيه يعرفه شخصيا , بشكل يخليك تثق فيه بشكل أو بآخر , عشان فى أغلب الحالات دى – إن لم يكن كلها – النصاب ده مش بيكون صيدلى أصلا بالطبع !! ..
.
#6_العملة_الصعبة : النصاب فى الحالة دى بيكون فى الغالب واحدة ست , لابسة شيك جدا , و بتستهدف الصيدليات اللى جنب المطارات عشان تحبك النصباية !! .. تدخل عشان تشترى حاجات كتير (غالبا مستحضرات تجميل) , و تبيّن إنها اتزنقت فى الفلوس المصرى اللى معاها , و إنها مش حتكفّى , و تبدأ تعرض الشراء بالعملة الصعبة , سواء عربية أو أجنبية .. دولارات مثلا , و اللى ممكن تكون مزورة (زى الطريقة الأولى خالص) , أو ملغية أصلا فى بلادها , زى المارك الألمانى مثلا (و اللى بقى فيه “يورو” بدلا منه) .. و لكن الطمع بيلغى الحقائق العلمية البديهية دى , لما صاحبتنا تقول إن المارك الألمانى بيعمل مثلا 11 جنيه مصرى , و تعرض عليك إنك تحسبه إنه بـ 7 جنيه مثلا بس , عشان تفك زنقتها و تاخد الدوا و تسافر و تلحق الطيارة يا حبة عينى !! … و طبعا الحل فى الحالة دى معروف : بلاااااااش طمع .. و خليك فى عملة بلدك !! ..
.
#7التلاجة_البايظة : بصراحة دى عبقرية , و الشيطان ممكن يرمى السيجارة و يصقف لما يشوفها لأول مرة !! .. النصاب بيدخل الصيدلية , و عامل إنه بيكلم صاحب الصيدلية ع الموبايل (أيوة يا دكتور فلان .. أنا دخلت حالا أهو .. حاضر حاضر حنشوف فيها إيه , و أبلغك .. بتعمل تلج ؟!! .. حاضر بسيطة ان شاء الله .. انا فى انتظارك حاضر) .. و يوهم كل الموجودين بإن التلاجة بايظة , و إن صاحب الصيدلية بعته عشان يصلحها .. و يبدأ يتعامل زى اللى بيصلحوا التلاجات بالظبط , و يطلب من المتواجدين مساعدته .. واحد يشترى عدة معينة , و التانية تجيب اكياس عشان يفضى التلاجة .. و هكذا , لحد ما يستفرد بغنيمته , و يلم منها اللى هو عارف أسعاره من قبل كده , فى جيوبه , و يخلع بخفة بعد ما ياخد غرضه من التلاجة , و يرميها للموجودين , بعد ما أخدها لحم و رماها عضم !! ..
.
الحل : فى كلمتين : “بس التلاجة مش بايظة !! .. ثوانى نكلّم الدكتور عشان يثبت لك بنفسه !!!” … حتلاقيه خلع فى ثانية من قدّامك , أو ممكن (لو كان ذكى شوية) يعمل نفسه غلط فى الصيدلية , و كان يقصد صيدلية تانية !!
.
#8_المرتجع_بعدها_بكام_يوم : النصاب بيكون حرامى كمان .. يسرق علبة غالية من عندك , و ييجى بعد كام يوم , عشان يرجعها بنفس تمنها .. أصله لو راح صيدلية تانية (بتشتغل فى المسروق) , حياخدوها منه بسعر أقل بكتير .. المهم إنك لما تراجع اللى عندك , حتكتشف إنها مش موجودة فعلا , فترجعها , و تبقى كده كإنك عطيته سعرها بس بدون ولا مليم ناقص !! .. و الحل فى الحالات اللى زى كده , برضه على حسب نوع الصيدلية .. لو الصيدلية مقتدرة , و نظامها فيه ريسيت بيخرج مع كل طلب , ساعتها , المرتجع لازم يبقى بالريسيت .. أما الصيدليات الكحيـ …. قصدى اللى على قد حالها (زى صيدليتى) , فغالبا بيكون فيه طرق للتأكد من إنها مسروقة , زى إن ما يكونش مكتوب عليها طريقة الاستعمال , أو إن العلبة ما تكونش بتتجاب أصلا فى الصيدلية لإن سعرها غالى , أو إن المريض ينتظر لحد ما ييجى العامل أو الصيدلى اللى صرفها له بنفسه , عشان يفكره بيها , و هكذا !! .. المهم خلى بالك ..
.
#9_المرتجع_فى_ساعتها : دى أنقح من اللى فاتت !! .. النصاب خفيف اليد , بيشترى حاجات كتير ورا بعضها , و يدوّخ الصيدلى أو الأسيستانت معاه , و فى عز البهدلة دى , و بخفة يد متناهية , يبدل شريط أو أكتر من العلبة الغالية (بلافيكس مثلا) , بشريط يكون جاى بيه فى نفس الحجم تقريبا , و يكون برخص التراب , و يحطه بداله جوه العلبة و يقفلها تانى , و بعد شوية , يدّعى إن الفلوس معاه قصّرت , و يسيب العلبة الغالية , و ياخد باقى العلاج اللى ممكن يكون بملاليم !! .. و الحيلة دى لا تكتشف إلا مع المريض البرىء اللى بعده اللى بياخد العلبة و يروّح بيها , و يرجع يتخانق مع الصيدلى , على أساس إن الشريط اللى جوه مش بنفس اسم العلبة من بره !! .. و غالبا بيكون اتنسى صاحب العملة الأصلى !! ..
.
و الحل لها , هو إن سعادتك ما تحطش حاجة ع الكاونتر قدّام أى عميل , إلا لما تبقى عينيك فى وسط راسك عليه , أو فى وجود ناس من الطلبة أو من العمّال بتراقب , أو حتى فى وجود كاميرات مراقبة , عشان تمنع الحركة دى من الحدوث فى صيدليتك !! , بجانب إنك تشك قبل ما ترجّع العلب الغالية اللى زى دى , لأى حجة , و تفتحها مرة تانية , قدّام العميل , و الحرص واجب زى ما اتفقنا !! .. و ده لإن الحركة الأتفة من كده (و لكن عند خفيفى الحركة بقى) , هو إنه يطلب علب غالية , و بعدها علبة رخيصة أو حتى كوباية مية , و لما تسيب قدّامه الغالى , ياخده و يطلع يجرى !!!!! ..
.
.
.
.
.
.
و فى نهاية الكلام , باحب أوجّه 3 رسايل : ..
.
#ركب_كاميرات لو تقدر .. و لو ما قدرتش , اعلن إن فيه كاميرات حتى لو مفيش .. و ده بيخلى اللى داخل بنيّة السرقة يبقى مش على بعضه و خايف و ممكن يقرر إنه ما يسرقش عشان ما يتصورش و يتفضح !! ..
.
#لو_اتسرقت_ما_تتعقدش .. كلنا اتسرقنا , .. خلى عندك ثقة فى نفسك و ما تتهزش لو اتحطيت فى أى موقف من دول .. و ما تفتكرش إنها نهاية الحياة المهنية لو اتسرقت , بشكل يخليك تبطل تنزل الصيدلية !!! .. ولا يهمك .. القرش بيروح و ييجى , سواء من صيدليتك أو من الصيدلية اللى بتشتغل فيها ..
.
#تجاربى_الشخصية فى حاجات أنقح , حاحكى لكم عليها قريبا جدا بإذن الله , زى عدد من المواقف المحرجة اللى اتعرضت لها , و إيه اللى ممكن أكون وقعت فيه , و إيه اللى ربنا ألهمنى بالحل تجاهه داخل الصيدلية !! .. حننشرها ع البروفايل برضه إن شاء الله .. بإذن الله , ده حيكون قريّب ..
.
#و_أخيرا .. أحبكم_فى_الله ..
أحمد الجويلى

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s