‫‏الحيلة الوحيدة للتغلب على إلغاء شهادة البورد الأمريكي فى مصر‬ .. سابقا


بورد

سمعت إن شهادة البورد اتلغى فى مصر ؟؟!! .. اتصدمت ؟؟ .. طيب ممكن تفوق معايا من الصدمة بسرعة و تقرا الكلمتين الجايين دول , عشان ممكن يفرقوا قوى فى مستقبلك ؟؟!! .. و لو وراك حاجة سريعة , روح خلصها و تعالى تانى , عشان لازم نقرا بتمعن و على مهلنا .. و عشان القعدة ممكن تطوّل هنا !! ..

.

بتدرس البورد ليه ؟؟

.

من رابع المستحيلات إنك تكون قررت تدرس منهج البورد الأمريكى بأى تخصص من تخصصاته , و أشهرهم الفارماكوثيرابى طبعا , من باب تضييع الوقت مثلا , أو عشان معاك حسبة 10,000 جنيه , و مش عارف تصرفهم فين , فقررت إنك تدرس البورد !! .. و لكن من المتوقع إنك تكون افتكرت إن شهادة البورد (يعنى لما تكون Board-certified) حتكون بالنسبة لك مفتاح سحرى عشان تشتغل فى مكان أفضل بمرتب أفضل و مزايا أفضل .. و مش بعيد تخليك تشتغل فى مستشفى من مستشفيات الخليج مثلا بمرتب ضخم ولا حاجة !! .. مش كده ؟؟!! .. يعنى من الآخر , انت بتدرس عشان تشتغل ! .. مظبوط ؟؟ .. كويس قوى .. خليك مكمّل معايا ..

.

هى إيه المجالات بعد البورد – أيام ما كان فيه بورد ؟؟

.

هل سمعت عن مكان معيّن أو مصلحة حكومية معروفة أو حتى غير معروفة , بتشغّل اللى واخدين البورد فى مصر ؟؟ .. يعنى – لتقريب المثال شوية – احنا عارفين إن خريجى كلية الآداب مثلا , ممكن يحصول على دبلومة تربوى , عشان بعد كده يقدموا للعمل فى المدارس كمعلمين لغة عربية أو دراسات اجتماعية أو ما شابه .. مش كده ؟؟!! .. طب اللى بيدرس البورد بيروح فين ؟؟!! .. ده سؤال إجابته غير محددة للأسف .. يعنى كل واحد بعد ما درس البورد فى مصر خلال الـ 7 سنين اللى فاتوا , و اجتاز الاختبار بالفعل , و حصل على الشهادة , ممكن يكون اشتغل فى مكان مختلف عن التانى , و مفيش اتنين أعرفهم اجتازوا البورد , اشتغلوا فى مكان واحد , إلا لو حيقوموا بإعادة تدريسه مرة تانية فى مركز من المراكز المنتشرة لكده فى مصر !! .. و دى نقطة حنبقى نتكلم عليها بعدين .. بس المهم , نطلع من النقطة دى , بإن المستقبل بعد البورد , أو حتى من غيره , مش مرسوم بشكل واضح لكل الحاصلين ع الشهادة دى !! ..

.

هى الناس بتتعيّن إزاى ؟؟

.

ده السؤال اللى ناس كتير مش بتحب تفكر فيه , عشان إجابته مؤلمة حبتين , و لما تضغط عليهم شوية , عشان يقولوا توقعهم , يروحوا معلّقين كل إحباطاتهم على شماعة الواسطة !! .. بس ما حدش بيفكر أبعد من كده فى الغالب .. بس احنا النهاردة قررنا نعدى الحدود و نفكر فيما بعد الواسطة !! ..

.

حضرتك عارف يعنى إيه واسطة ؟؟ .. المثال ده حيقرب لك, و الصورة : .. لما أ. محسن مدير الشركة , يسأل المدير المالى فى جلسة عمل , و يقول له : مدير التسويق حيمشى يا أبو صلاح .. ما تعرفلناش مدير تسويق كويس ييجى بداله ؟ .. فالحاج صلاح يهرش فى دماغه شوية , و بعدين يبص له بحزم و يقول : عندى .. انت تأمر بس يا محسن بيه .. الواد فؤاد – صاحب ابنى الأنتيم – كفاءة و يفوت فى الحديد , و أنا أضمنه برقبتى ..

.

و بعد كده يتعمل إعلان صورى فى الجرايد , عن وظيفة خالية , و بعدها سلسلة مقابلات صورية فى مقر الشركة , مع عدد من المتقدمين , و كلهم يترفضوا , و فؤاد بس هو اللى يتعيّن , و كإنه هو اللى تم اختياره بكل شفافية !! .. وصلت ؟؟ .. طب فؤاد اتعين إزاى ؟؟!! .. بالواسطة ؟؟!! .. أباااااااااااادا .. أمال يبقى اسمها إيه ؟؟ .. أقول لك أنا : .. ده خليط من الخبرات + العلاقات + الثقة !! .. و لما بقوا موجودين بشكل كافى عند فؤاد , اتعيّن بسهولة .. و دى تعتبر أول زتونة فى المقال ده !! ..

.

أمال البورد قصته إيه ؟؟

.

البورد فى مصر زيه زى أى “هوجة” ناجحة .. و المصرى عاشق للتقليد و المشى ورا الرايجة !! .. لو واحد فتح سنترال و نجح , بعد شهر تلاقى البلد كلها سنترالات !! .. و لما نفس الشخص (الريادى ده) يقفل السنترال و يفتح بداله سايبر , و ينجح , كل البلد تقلب سايبرات !! .. المشكلة فى أساس التفكير المقلد نفسه !! .. و ده بيخلّى العرض أكتر من الطلب , لو اتكلمنا على مستوى تجارى , ففى الآخر , السلعة المقدمة نفسها قيمتها ترخص و ما تلاقيش اللى يشتريها !! .. فاهم الفولة يا زعيم ؟؟!! .. مركّز معايا لحد دلوقتى ؟؟!! ..

.

ده اللى حصل مع البورد الامريكى .. و سامحنى لو الكلام اللى جاى ده وجعك شوية .. شهادة ظهرت فى مصر من 8 سنين .. تم التسويق لها كويس على يد مركز واحد له سمعته المعروفة دلوقتى .. خرّج فى البداية عدد بسيط من الصيادلة الحاصلين على شهادة البورد الامريكى .. أغلبهم – للأسف – قرر إنه يعيد التجربة , و يفتح مراكز لتدريس البورد برضه !! .. لمجرد إنه بالنسبة لهم سبوبة جميلة , و الناس بتتهافت على الحصول عليها , على أساس إنها حتفتح لهم باب السعد بعد الحصول على شهادتها !! .. و بعد ما يحصلوا عليها , يكتشفوا إنهم لسه قاعدين فى البيت برضه , و أصحاب المستشفيات ما خبطوش ع الباب تانى يوم عشان يطلبوهم للشغل معاهم !! .. فيقرروا إنهم يفتحوا المركز الخاص بيهم .. و هكذا .. و عشان كده , خلال 7 سنين بس , بقى فيه مراكز كتيرة لتدريس البورد , و نادر منهم اللى بيقدم علم بجد , و أغلبهم بيدّى الأسئلة المتوقعة و خلاص (بنفس ستايل نماذج الامتحانات و التوقعات المرئية المعروف فى مصر) !! .. و عدد الصيادلة المتقدمين بقى فى مصر , هو الأكبر على مستوى العالم بعد اللى متقدمين من أمريكا نفسهم !! .. فالمسئولين هناك بدأوا يشكّوا فى القصة , و اكتشفوا فعلا إن فيه مخالفات بتحصل , و ممكن تسهّل من حصول المصريين تحديدا على الشهادة الصعبة دى , فقرروا إنهم يوقفوها فى مصر , و كانت الفضيحة الكبرى على رؤوس الأشهاد من المهتمين فى المجال الصيدلى على مستوى العالم !! .. بس دى مش قصتنا دلوقتى .. احنا هنا بنحاول نلاقى حل !!! ..

.

طب الحل إيه ؟؟!!

.

عاوز تشتغل فى مستشفى يعنى كصيدلى إكلينيكى ؟؟ .. و عاوز تعرف الزتونة ؟؟ .. الزتونة اللى مش حتتقلد بمرور الوقت , لإن اللى حيقوم بيها حيكون متميز فعلا , مش حاصل على شهادة نظرية و خلاص ! .. انا حاقول لك ع السر اللى قلته فى عدد من محاضراتنا و كورساتنا على مستوى الجمهورية , و لكنى أول مرة حاقوله على النت ..

.

أول حاجة لازم تعرفها هى التخصص .. لو عاوز تشتغل فى مستشفى كبير .. لازم تتخصص كصيدلى إكلينيكى فى الـ Cardiology مثلا , أو الـ Critical care أو الـ Nutrition .. أو أى تخصص طبى , ممكن يكون فيه مستشفيات كاملة قائمة عليه .. و قبل ما تعمل أى خطوة , اقفل على نفسك فى البيت ساعتين أو تلاتة يوميا – انت و قدرتك بقى – و انزل دحّ و مذاكرة و بحث , بخصوص التخصص اللى نويت تمسكه .. و طبيعى إنك حتلاقى الدنيا صعبة , و لكن انا حاقول لك على شوية “مسهّلات” كمان شوية !! .. المهم بعد 6 شهور أو سنة من المذاكرة اليومية دى , المفروض تكون خبير – و لكن بشكل نظرى بحت – فى الصيدلة الإكلينيكية فى التخصص ده !! .. و تبقى الخبرة العملية , عشان تبدأ تكسب فلوس من ورا اللى قمت بيه !! .. دلوقتى تبدأ مرحلة “ارمى بياضك” .. و تواصل مع مديرين المستشفيات اللى حابب تشتغل فى واحدة منهم , و اعرض عليهم إنك تتمرن عندهم ببلاااااااااااااش .. و ابقى قابلنى لو حد رفض !! .. انت رايح تفيد المستشفى من غير فلوس !! .. فما بالك لو كنت صبور , و بقيت بتروح فى ميعاد يومى ثابت , و تقعد فترتك كلها , و بنيت علاقاتك بشكل سليم داخل المستشفى كصيدلى إكلينيكى تحت التدريب , حتى لو كان فيه صيادلة قدام معاك و أكبر منك !! .. أكيد حتتثبّت بعد فترة قصيرة أو طويلة .. و حتى لو اتقلشت منها بعد فترة , اطلب من مدير المستشفى recommendation letter عشان تحطه فى الـ CV بتاعك , و ده حيكون أهم و أقوى من 1000 شهادة نظرية , المستشفيات دلوقتى ما بقيتش بتبحث عنها لوحدها , و الخبرة اللى حصلت عليها فى المستشفى إياها , تؤهلك لدخول مستشفيات تانية فى نفس التخصص بسهولة أكبر .. و ساعتها حتفرض خبرتك فى المقابلات الشخصية و حتى بعد ما تتقبل بسهولة , عشان بقى معاك خبرة !! .. و سوق العمل بقى بيشتغل كده حاليا زى ما انت واخد بالك !! ..

.

طب أبنى علاقاتى إزاى ؟!! ..

.

الإجابة ع السؤال ده بين إيديك , و بتشوفها كل يوم لعدد كبير من الساعات , و لكن للأسف مش واخد بالك منها , بل بتستخدمها أسوأ استغلال تقريبا !! .. الإجابة هى : وسائل التواصل الاجتماعى المختلفة .. ايوة .. الفيسبوك اللى حضرتك مستخدمه عشان تلعب من خلاله المزرعة السعيدة , و تشقط بنات , و تعمل اختبارات شخصية هايفة و تحديد مستقبل و قراية كف , .. فى حين إن هو طاقة القدر اللى ممكن تتفتح لك لو عرفت إزاى تستغلها لتحسين صورتك قدّام أصدقائك بشكل حقيقى و احترافى .. و كل ما تبنى علاقات مع ناس مهتمّين بمجالك , كل ما تزيد فرصة إنك تشتغل فى مكان أفضل !! .. بس انت خلّى النية دى فى بالك كل ما تقعد على الفيسبوك .. أقول لك على حاجة أنقح ؟؟!! .. لإنهم برّه انتبهوا للى باقول لك عليه بدرى عننا كالعادة , عملوا موقع تواصل اجتماعى متخصص للهدف ده .. و هو موقع LinkedIn , اللى ممكن من خلاله , تحط الـ CV بتاعك , و تتقله يوم بعد يوم , و الأهم إنك ممكن تبنى شبكة علاقات (بيسموها connections فعلا) , عشان تكون فى محط أنظار الناس اللى ممكن يشغلوك !! .. و لما بيلاحظوا نشاطك عليه بشكل مستمر , همّا اللى بيخبطوا على بابك و يطلبوك للعمل معاهم !! .. و ده حصل معايا بالفعل , و انا كنت شريك فيه و شفته بيحصل قدّام عينيا !! ..

linkedin-logo-breit

و قبل ما تقول لى إنك أول مرة تسمع عن الموقع ده , أو تتحجج بإن الدنيا صعبة فى تعليمه .. يهمّنى إنك تتعرف على زميلنا الصيدلى الرائع و الخلوق , و المتخصص فى الـ Social Media Marketing , و قال لى إنه متخصص فى الموقع المتميز ده , و أسعدنى بإنه على استعداد لتقديم أسرار و خبايا و كنوز الموقع ده لمن يرغب .. أقدم لكم د. Ayman Amin .. تواصلوا معاه ع الخاص , و قولوا له بس إنكوا من طرفى , و هو حيعمل معاكم الواجب ! ..

.

و لما تعمل كده , سعادتك حتتحرر من قيود التقليد و السير فى مسارات ناس كتير مشت فيها قبل كده , و تعمل زيهم لمجرد إنهم نجحوا بشكل حقيقى أو مزيف !! .. و الشاهد إنكحتكون قدرت تحقق المعادلة الصعبة : خبرة + علاقات + ثقة !! ..

.

طب ندرس البورد بقى ولا إيه ؟؟

.

أعتقد إنك بعد ما قريت المقال ده بكل الأسرار اللى فيه لحد دلوقتى , حتقدر تحدد إذا كنت فى حاجة للعلم القيم و الغالى الموجود فى منهج البورد الامريكى – فى أى من تخصصاته – أو ممكن تشق طريقك الخاص كصيدلى إكلينيكى – أو حتى صيدلى مجتمعى أو أى مجال تانى فى الصيدلة – بدون ما تسلك نفس الطريق اللى سلكه غيرك !! .. برغم إنى متأكد إن فيه ناس حتفضل تفكّر بنفس الأسلوب الفهلوى اللى ضيّع حضارة 7000 سنة !! .. و حتلاقى ناس يتحايلوا ع القرار اللى حصل , و يغيّروا جنسيتهم ببساطة فى الـ application اللى بيتقدم لدخول امتحان البورد فى أبريل الجاى !! .. و ساعتها يبقى كإننا بالمقال ده ولا عملنا أى حاجة , و تفكير المصرى الفهلوى حيفضل زى ما هو , يدوّر ع الطرق الأسهل و الأضمن على طول الخط !! ..

.

ما تنساش تشيّر المقال لو اقتنعت باللى فيه .. جايز حد حياته تتغير لما يقراه معاك ..

.

أحبكم فى الله …

.

أحمد الجويلى

 

 

 

 

 

 

 

 

 

 

 

 

 

 

 

 

 

 

16 responses to “‫‏الحيلة الوحيدة للتغلب على إلغاء شهادة البورد الأمريكي فى مصر‬ .. سابقا

  1. البورد ما اتوقفش هو فقط اتلغى امتحان ابريل وهيكمل بعد كدة من اكتوبر
    والسبب هو الشكاوى الكيدية بعد قرار المعادلة الاخير له بماجستير
    يعني اللي حصل في كلمة: تأجيل

  2. تنبيه: أهم 32 سؤال و جواب عن الصيدلة الإكلينيكية | تعلم الصيدلة .. في منزلك·

  3. افادكم الله ونفع بكم يادكتور أحمد. .مقالك ده كنز كبير. .بس ليا تحفظ على مسأله إن فؤاد لم يتم تعيينه بالواسطة☺

  4. جزاك الله خيرا…نفس احساسي اللي خلانى اتراجع عن البورد المهم الخبرة والتدريب

  5. السلام عليكم د احمد المحترم
    اول تعليق لي عند حضرتك وياريت تقبله
    اولا انا لم احصل علي البورد للان
    ثانيا من اين اتيت بمعلومة ان البورد اتلغي للصيادلة المصرريين وللابد
    ياريت مصدر توثيقي للمعلومة
    ثالثا البورد بمافيه من معلومات تعتبر هي الاقوي بالنسبة للصيدلة الاكلينيكية نعم هو اقوي واصظق المغلوملت لان القائمين علي الموضوع ده ناس عندها رقابة معلوماتية وامكانيات مادية وووو وده اهلهم فعلا ان منهج البورد يكون من اقوي الكورسات الاكلينيكية
    معذرة يعني من قال ان البورد بيتكلف عشر الاف
    اغلي سنتر بيدرسه باداربع الاف اون لاين وتلاته ونص في حالة الحضور
    حضرتك قلت في كلامك لو اتدرس صح
    ع فكرة الي بيدرسوا البورد ناس صيادلة زيك بالظبط وناس مجتهظين جدا جظا فبلاش تقليل منهم
    ملاحظ ان حضرتك بتحاول تصرف الناس عن تدريس منهج البورد الامريكي تفتكر ليه
    يمكن بتقلل من بضاعة الاخرين لسبب ما
    طيب بالنسبة للفةائد الي حضرتك اصلا حولتها لاشياء عديمة الفائدة
    لما بدرس منهج محترم محظث سنة ب سنة زي ده
    اولا هحس بالثقة في نفسي ان كصيدلي اتعلمت بروتوكولات علاجية محترمة وبالتالي ثقة بالنفس
    باقي بقة اني اطور نفسي يوميا علي كل جظيد
    لو انا دارس بورد وطلبت زي ماباقول اني ادرب في اي مكان فيه صيدلة اكلينيكال تفتكر لو اناقلت لهم انا ياجناعة شغال مع نفسي وبقرا كل يوم شوية والكتاب الي مش عاجبني او المقال الي مش عاجبني فكك منه وانا واد شلداطر ومطلع وووو
    ولا اقولهم انا مجتاز لمنهج محترم اسمه البورد الامريمي
    ولا اقةلهم انا واخد كورسات عند المحاضر فلان الفلاني
    تفتكر انعي يخلوهم يقبلوني
    يادكتور احمد
    المفروض حضرتك راجل كل سوم بتبحث وبتتعب علشان المعلومة فنيصحش ابدا انك تحقر من قيمة منهج محترم اسنه البورد الامريكي
    صدقني زي ماانت بتنشر رسايل من ناس سمعوا او حضروا لك محاضرات فيه ناس اتعلمت مويس جظا وعلي اسلةب علمي من دراسة البورد
    ع فكرة الي هيذاكر البورد ويجتازه علشان يفتح او يشتغل في سنتر مش عيب ابدا
    انت حضرتك اصلا بتعمل كده
    تحياتي

  6. العنوان مضلل وفيه كذب صريح برجاء تغييره
    ودليل عدم صحة الكلام الصورة اللي في اول المقال اللي بتقول انه اتوقف لمدة امتحان واحد فقط
    والواقع بيقول ان البورد اتعمل امتحانه في اكتوبر 2015 في مصر عادي في الجامعة الامريكية والاميدايست والناس داخلة دور ابريل 2016 وسجلوا للامتحان في مصر بالفعل اكتر من 200 صيدلي في 4 لجان اتنين في القاهرة وواحدة في المنصورة وواحدة في الاسكندرية
    مش لازم تكدب علشان تجذب الناس لقراءة كلامك

    • لو أحسننا الظن يا د. كريم , حنكتشف إن كتابة المقال تمت قبل مرور 24 ساعة من القرار الوارد فى المقال , و اللى ما كانش حد فاهمه بشكل كامل , إلا بإن الشهادة حيتم إصدارها داخل مصر , و ما تم فيما بعد كان تعديل للأمر , بعد وضع قيود أكثر و أقوى للتغلب على الغش المصرى .. و بكده , يبقى مفيش تضليل ولا كذب بفضل الله .. و ما نقدرش نغيّر عنوان المقال دلوقتى للأسف

  7. كلام يحترم يا دكتور…
    بس اكيد زي ما حضرتك عارف ان كل حاجه فبلدنا دي ماشيه بالشهادات
    فهل يعني اما اقول لمدير مستشفي عايز اتدرب معاك وانا عندي علم ومزاكر صيدله اكلينكيه..هيرحب ويوافق ولا هيقول فين الدليل علي كده…فنضطر نرجع تاني لموضوع الشهاده؟

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s