تكليف الصيادلة .. وماذا بعد ؟؟!! .. بقلمى | أحمد الجويلى​


1

الموضوع محيّر يا جماعة .. و لازم نقول القصة من وجهة نظرنا من البداية , عشان نفهم الموضوع ماشى إزاى .. 

.

القصة بدأت بإن الحكومة عملت وحدات حكومية و مستشفيات و غيرها من الوحدات التابعة للدولة (عشان تخدم المواطنين بشكل مخفض و رسوم رمزية) , و اللى المفروض يكون فيها صيادلة .. و مهن طبية أخرى طبعا .. و لكن احنا بنتكلم ع الصيدلى تحديدا .. و بالمناسبة , لو قريت حاجة , و حسيت إنها مش جاية على هواك , ما تكمّلش قراية الكلام !! .. و لكن ربنا يعلم إنى مش عاوز من ورا المقال ده إلا مصلحتك , حتى لو ممكن تفهمنى غلط و تكرهنى مؤقتا , لا قدر الله !! ..

.

لحد من 20 أو 30 سنة , على حد توقعى , الوحدات الحكومية كانت منتشرة على مستوى الجمهورية .. و عدد الصيادلة كان قليل .. و كان كل صيدلى – أيامها – شايف إنه ممكن يفتح صيدليته الخاصة , بدل التكليف , و تكون بالنسبة له أربح و أفضل من العمل بالحكومة , و اللى كان اسمه ما يفرقش بقى .. سمّيه ‫#‏تكليف‬ .. سمّيه برعى .. سمّيه سنيّة .. ماتسمّيهوش خالص .. و لكنه فى الآخر , عمل حكومى بمرتب .. تمام لحد كده ؟؟!! .. 

.

الأماكن الحكومية دى , كان فيه منها اللى قريب من العمران , و فيه منها اللى بعيد .. و شوية بشوية , الحكومة خلت اسمه “تكليف” .. يعنى الحكومة ‫#‏بتكلف‬الصيدلى إنه يشتغل عندها بمرتب ثابت .. و فى الأول , المرتب ده كان قليل , بما إنه عند ‫#‏الحكومة‬ بقى .. و لو ما كانش عاجبك , كنت الغى التكليف , زى ما انا لغيته بالظبط .. و ابقى قابلنى لو رجعت تانى !! ..😛

.

و فى الأثناء دى , و قصدى ع الـ 10 سنين الأخيرة من عمر المهنة فى مصر .. ظهرت شوية متغيرات , .. منها زيادة عدد الخريجين من الكليات الحكومية … و منها زيادة عدد الكليات الخاصة , و عدد الخريجين اللى بيطلعوا منها كل سنة , لحد ما وصلنا لأكتر من 13,000 خريج على مستوى الجمهورية , من كليات الصيدلة , كل سنة يا مؤمن😮 .. و ده رقم خزعبلى طبعا , مقارنة بكل دول العالم على حد توقعى !!! o.O

.

المهم إن الآية بدأت تتقلب شوية بشوية .. إزاااااااااى ؟؟ .. بعد ما كانت الحكومة مش لاقية صيادلة زمان عشان تعينهم فى الوحدات بتاعتها , اكتشفت بعد شوية , إن الصيادلة بقوا على قفا من يشيل , و بقى فيه أماكن أعرفها بشكل شخصى , المفروض إنها تشتغل زى الفل بـ 4 أو 5 صيادلة , و الدنيا تبقى زبادى خلّاط .. و لكن بسبب فرضية التكليف , اكتشفنا إن فى نفس الأماكن دى , ما يقرب من 30 صيدلانية و صيدلى , مقيدين إنهم بيشتغلوا فيها .. و المصيبة إنهم أحيانا مش بيروحوا إلا 2 أو 3 , اللى قلبهم ع الشغل !! .. 

.

بدأت تتضايق منى ؟؟!! .. صح .. أنا لو مكانك حاتضايق , لإنى حابقى عارف آخرة الكلام ده إيه !! .. خليك بس مكمّل معايا ..

.

بعد كده – خلال الـ 3 أو 4 سنين اللى فاتوا , الصيادلة الحكوميين حصلوا على امتيازات إضافية ما حدش يقدر ينكرها .. منها مثلا الكادر الحكومى , اللى خرجنا منه بزيادة فى المرتب .. قشطة يابا .. الله يسهّل له😉  .. و كمان حكم قضائى بإن اللى بيشتغل فى الحكومة , يقدر يفتح صيدلية خاصة باسمه .. صلاة النبى أحسن !!😀  .. و كل ده ما وصل بالخريجين الجدد إنهم يتمسكوا بشدة بفكرة التكليف , لإنها حتكون بالنسبة لهم لقطة , مما أدى إلى إن الناس كلها تقبل عليه , و عدد اللى المفروض “يتكلفوا” , يزداد !! .. يعنى إيه برضه ؟؟

.

يعنى الحكومة بقى مطلوب منها إنها تعيّن عدد أكبر كل سنة .. فيييييييييين ؟؟ .. فى نفس الوحدات الحكومية و الأماكن اللى فيها عدد كبير من الصيادلة بالفعل !! .. يا مصيبتى !! .. و مش كده و بس , .. ده اللى حابب يتنقل جنب بيته بيتنقل بقضية و يكسبها بسهولة .. و يبقى الوحدة الصحية اللى فى السلوم , مش موجود فيها إلا 2 صيادلة , و اللى موجودة فى المهندسين , موجود فيها 30 صيدلى .. !! و يا ريتهم بييجوا !! .. تضحك أكتر ؟؟!! .. الناس اللى اتخرجت و كانت لغت تكليفها , فيه منهم اللى رفع قضايا عشان يرجع التكليف تانى , من مبدأ إن الامتيازات اللى الصيادلة الحكوميين حصلوا عليها ما كانتش ظهرت على أيامهم , و على كده فمن حقهم يرجعوا تاني😉 !!

.

إوعى تفتكرنى بادافع عن الحكومة !! .. و إلا ساعتها حتكرهنى أكتر و أكتر !! .. لا يا سيدى , انا مش بادافع عن الحكومة !! .. بس باسألك سؤال : ‫#‏التكليف‬ – لو انت قبلته – يعتبر إيه ؟؟!! .. ممكن تقبله ليه يعنى ؟؟!! .. 

.

أقول لك انا .. التكليف فرصة طبعا .. لإنك حتعمل مجهود بسيط .. ممكن تروح يوم أو اتنين فى الأسبوع , على حسب المكان اللى انت اتكلفت فيه , إلا ما رحم ربى , و تاخد مرتب ثااااااااااااابت , يخليك ما تقدرش تفرط فيه .. و بعد كده تدوّر على أى طريقة تزوّد بيها دخلك بعد الظهر لو كنت صيدلى .. أو تكتفى بباقى اليوم فى البيت لو كنتى صيدلانية .. و ده برضه إلا ما رحم ربى .. فيه استثناءات يعنى .. و لكن الأغلبية كده .. 

.

الزتونة بقى , هى إن أى مكان تانى – غير الحكومة – بتروح تشتغل فيه , بتسأل نفسك قبل ما تشتغل فيه , ع اللى تقدر تقدمه فيه , و تاخد فى مقابله فلوس .. يعنى لو اشتغلت فى صيدلية أو دعاية أو معمل أو حتى فى مخزن , فحضرتك حتقدم قيمة , و حتاخد فى مقابلها أجر مادى .. أما فى التكليف , فحضرتك بتعتبره وااااااااجب من الحكومة ليك , مش العكس !! .. فى حين إنه هو اسمه تكليف !! .. يعنى مسئولية من الحكومة , و هى بتحطه على اكتافك , فى مقابل مرتب محدد , و انت تقبل بيه أو ترفض !! .. مش باقول لك الآية اتقلبت ؟!!! .. 

.

الغريب و المضحك دلوقتى , إن القانون الجديد اللى ظهر مؤخرا , هو زى أى قانون جديد , بيحتاج ترجمة و قواميس و تفسيرات و عدد من التنجيمات , عشان نفهمه .. و عشان كده , لسه فيه ناس بتقول إن التكليف اتلغى .. و ناس بتقول إنه ماتلغاش .. و ناس بتقول إن الموضوع بقى بالواسطة و المحسوبية .. و ناس بتقول إنهم كل سنة يقولوا كده , و فى الآخر الموضوع يطلع على فاشوش !! .. 

و ده مثال لـكلام على موقع نقابة الصيادلة الحكوميين ..

http://www.govphsyn.com/2015/03/1332.html#more

و ده رابط الخبر على موقع الصيدلة المصرية
http://www.misrpharma.com/31714

.

أقول لك الأغرب بقى من وجهة نظرى ؟؟!! .. المقال ده مش غرضه التكليف , ولا إنى أقول لك إنه اتلغى أو ما اتلغاش .. عن نفسى أنا لغيت التكليف الخاص بيا بعد تخرجى مباشرة , و طخّيت مشوار سخن للقاهرة من 8 سنين , عشان أكتب لهم كده على ورقة , عشان أتفرغ لإدارة صيدليتنا , مش أكتر .. و لكن المقال ده لتغيير شوية مفاهيم جوه دماغ حضرتك .. و مصارحتك بإنك لازم تتعلم استراتيجية “ضيف قيمة , للحصول على مقابل” , مش العكس !! .. احنا دايما بنفكر بطريقة “حتدينى كام ؟؟!!” , مش بطريقة “انا ممكن أقدم لك إيه ؟؟” .. و الحكومة زيها زى أى كيان فى مصر .. شوية بشوية , عدد الصيادلة قدّامها حيكون مرعب أكتر من دلوقتى , و من رابع المستحيلات إنها تكدّس 100 صيدلى فى صيدلية وحدة حكومية فى الأرياف , لمجرد إن التكليف واجب على الحكومة !! .. و المفروض إن سعادتك من دلوقتى تبدأ تدوّر ع البدايل الأنسب لك , و اللى ممكن تكسب منها بالحلال , من غير ما يكون فيه شبهة حرمانية فى مرتبك !! .. و ده حنبقى نتكلم عنه فى مقال تانى إن شاء الله .. 

و لكن برضه تقدر تشوف المقال اللي كتبناه قبل كده عن 6 طرق مؤكدة لزيادة دخلك الإضافى يوميا .. http://wp.me/p2YNXX-w9

.

أرجوك ما تفكرش بطريقة ‫#‏اللحظة_الأخيرة‬ , اللى فيها الناس بتنتظر لحظة ما قبل الوقوع فى الحفرة , عشان تبدأ تفكّر فى إنقاذ الموقف !! .. من يوم ما الكليات الخاصة عددها زاد , و عدد الخريجين أصبح بالشكل المخيف ده , و احنا بنهااااااتى , و نقول إن الحكومة عمرها ما حتقدر تعيّن كل الراغبين فى التكليف بشكل مستمر , لإنه حيبقى أكتر من طاقة أى حكومة فى العالم !! .. 

.

اللى حصل النهاردة , بيفكرنى بفيلم كرتونى قصير , اسمه “من حرّك قطعة الجبن الخاصة بى ؟؟” .. الجدل الداير ع التكليف النهاردة , بيتمثل حرفيا داخل الفيلم ده .. !! .. ياما طلبت من أصدقائنا و متابعينا إنهم يشوفوا الفيديو ده قبل كده .. و بنعيد نشره تانى النهاردة , .. و انا عارف إن فيه ناس كتير ناوية تتخانق معايا بعد المقال .. و لكن عشان خاطرى , شوفوا الفيديو أولا , و تعالوا نتخانق بعدها علطول , و انا مستنيكوا و مش حامشى , و مش حازعل من حضراتكم بعون الله .. 

.

يا ريت ما حدش ينسى إن من أول مراحل التعرض للصدمة , هو مرحلة ‫#‏الإنكار‬ , و هو إننا ننفى اللى العقل بيحتّمه , لمجرد إننا نحسّ – لا إراديا – بارتياح مؤقت .. و بعد كده ممكن نتفاجئ بإن الصدمة حقيقية للأسف ! .. أرجوووووكم شوفوا الفيديو .. اتفقنا ؟؟

.

شييييييييييييييييييييير لو اقتنعت😉🙂

‫#‏أحبكم_فى_الله‬ ..

أحمد الجويلى

2 responses to “تكليف الصيادلة .. وماذا بعد ؟؟!! .. بقلمى | أحمد الجويلى​

  1. انا مع سيادتك يا دكتور أحمد في كل كلمة.. واضيف كمان رأيي ان ياريت يلغوا التكليف فعلا .. بالمناسبة انا قدمت استقالتي من التكليف مع اني كنت شغال مفتش في الوزارة .. لأن الحال فعلا قرف بكل ما تحمله الكلمة من معنى .. خمسين صيدلي او تمريض او طبيب في المستشفى ولا ليهم اي لزمة بييجوا يمضوا ويمشوا وياخدوا مرتب آخر كل شهر ولا بيعملوا اي حاجه.. ويقوللك المرتبات قليلة طب ما لو مش عاجبك امشي! فالحين في الشكوى بس من الفساد بس ماينفعش تيجي على الفساد اللي هو مشارك فيه! انا باتمني التكليف يتلغي فعلا ويتعمل بعد كده قوانين لفصل الناس اللي مش بتعمل شغلها.. الحكومة لو اتشال تمانين في المية من اللي اسمهم شغالين فيها البلد ممكن يرجع يبقى فيها أمل تاني .. وكليات الصيدلة هايبقى فيها تعليم بجد مش هايبقى فيها آلاف البنات اللي داخلين صيدلة عشان تتكلف لما تتخرج وتتجوز وتاخد أجازة مدفوعة الأجر وخلاص كده او رجالة بتتكلف وتعمل اجازة وتسافر تسيب البلد ترجع عالجاهز على وظيفتها .. لا الدولة بتستفيد ولا الصيدلة بتستفيد وشكرا

  2. يا دكتور انا عايزه اقول لحضرتك عيش ع ارض الواقع شويه و حضرتك هتعرف قيمة التكليف بالنسبالنا كصيادله ايه .. لان بكل بساطه لو اتلغى التكليف هطلع هيبقى قدامى انى اشتغل مندوبه فى شركة مبيعات و دا مستحيل لبنت لان كل الظروف هتكون ضدها .. طيب خلينا نقول هفتح صيدليه .. و ده مش قبل 14 سنه ع ما اكون فلوسها … طيب خلينى اقول انى هشتغل مع دكتور صيدلانى فى صيدليته . دلوقتى الدكاتره ايه اللى يخليهم يجيبوا صيدلى يشتغل معاهم فى الصيدليه و ياخد 500 جنيه لما ممكن يجيبوا واحد بدبلوم و ياخدله 200 و يبقى شغال احسن من احسن صيدلى
    .

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s