الكلاش العجيب بين الصيدلى و الطبيب | الجزء الأول


جالى اتصال النهاردة الصبح , من صديق عزيز , بيقول لى : أنا حاولت أكلمك كتير عشان تقول لى ع المفيد فى قصة عمتى .. فلما سألته عنها , قال لى إنها عندها ضغط و سكر , و الدكتور كتب لها فولتارين حقن لمدة أسبوع بعد ما تعرضت لإصابة فى العظم على حد ما انا فاكر , و مع ذلك لما قال له إن الفولتارين بيرفع الضغط , الدكتور ما رضاش يغيره !! .. مع ملاحظة إن الكلام ده مكتوب فى الروشتة الداخلية (البامفلت) الخاصة بالدواء نفسه !! ..

.

الكلام ده خلّانى أفكر من أول و جديد فى الصراع الأزلى القائم بين الصيدلى و الطبيب .. و اللى حبيت أختصره فى المكالمة , و لكن حبيت أسرد فيه بعض النقط البسيطة بعد ما نناقش الحالة بشكل حقيقى بإذن الله دلوقتى ..

.

قبل أى شىء , هدّيت صديقى شوية , و قلت له إن فيه 5 معايير بنفكر فيها , قبل ما نحكم فى حالة زى كده إذا كان الـ ديكلوفيناك صوديوم ينفع ولا ما ينفعش .. و فيه غيرها طبعا .. و لكن الـ 5 دول , فى نظرى همّا أهم حاجة ..

.

أولا : مدى السيطرة على الحالة ..

.

يعنى , هل السكر و الضغط مظبوطين ولا ملخبطين ؟؟ .. عشان أكيد لو كانوا ملخبطين , الدنيا حتبقى أكثر خطورة تجاه استخدام الفولتارين .. و على هذا الأساس , الدنيا ممكن تختلف شوية فى الحكم على استخدامنا للفولتارين أو غيره من المسكنات ..

.

ثانيا : قدرة الفولتارين نفسه على رفع الضغط ..

.

عن نفسى ما وصلتش رقم محدد أقدر أقول إن الفولتارين يقدر يرفع الضغط بنسبته .. يعنى عشان نقرب الفكرة شوية .. احنا عارفين إن الفولتارين ممكن يرفع الضغط .. و لكن لحد قد إيه ؟؟!! .. كام مليمتر زئبق يعنى ؟؟ .. ماعرفش إذا كان فيه دراسة تمت تجاه القصة دى ولا لأ .. أنا بحثت بالفعل , و اللى يلاقى حاجة موثوق فيها , يشاور لنا عليها مشكورا .. و لكن من المنطقى إنه مش حيكون بقدرة الأدرينالين مثلا .. ولا بقدرة الفلودروكورتيزون برضه !! .. يعنى تأثيره حيكون أقل منهم .. و على هذا , فالموضوع برضه ممكن يختلف بسبب النقطة دى !! ..

.

ثالثا : مدة استخدام الفولتارين مع الحالة ..

.

و دى أحد المعلومات الواردة مع الحالة .. الطبيب قال إنه سيتم استخدامه لمدة أسبوع , .. يا ترى هل نقدر نقيس بشكل محدد , إن كان الكلام ده مناسب للحالة ولا لأ ؟؟ .. أعتقد إنه صعب .. و لكن بالمنطق برضه , أكيد الخطر حيكون أعلى من لو تم استخدام الفولتارين لمدة يوم أو اتنين , و أقل بكتير من لو تم استخدامه بشكل متكرر لمدة شهور !! .. و ده شىء تالت حيبدأ يغيّر من المعادلة زى ما احنا شايفين ..

.

رابعا : هل فيه بدايل أكثر أمانا ؟؟ ..

.

أى طبيب ممكن يسألك السؤال ده لما تعترض عليه فى دوا يكون كاتبه لأى حالة .. و لازم تكون محضر إجابتك الوافية و الحقيقية تجاهه .. و فى حالة عدم وجود بديل مناسب لاختيار الطبيب , بيتبقى السؤال البايخ : أمال معترض ليه ؟؟ .. و حيكون منظرنا فى غاية السوء , طالما احنا بنعترض و مفيش فى إيدينا شىء نقدمه إلا الاعتراض !! .. و فى الحالة دى مثلا , الباراسيتامول ممكن يكون بديل أكثر أمانا .. و لكنه حيكون أضعف بكتير فى قدرته على تسكين ألم العظام .. و مش حيكون كافى على الإطلاق !! ..

.

خامسا و أخيرا : هل فيه تعارضات دوائية ممكن تكون موجودة ؟؟!! .. 

.

إوعى تنسى إن علاج من اللى ممكن تكون الحالة بتاخده , ممكن يكون واحد من الـ ACEIs , و اللى لما تتواجد مع NSAIDs , الدنيا بتتبهدل فى الكلى لا قدر الله .. خاصة لو اتاخد معاها مدر للبول , و ده ما يسمى بالـ Triple Whammy effect .. و فى حالة زى دى , و اللى هى أساس شغلك كصيدلى مهتم بالدواء .. لازم تنبّه الطبيب للأثر ده , و لكن برضه بكل رفق زى ما حنقول كمان شوية ..

.

و على كده , فالأفضل فى الحالة دى فى رأيى , هو الموافقة على إعطاء الفولتارين لو كان الضغط و السكر متظبطين و يكون الدوا اللى بتاخده مش متعارض , عشان ما يكونش له تأثير عليهم , ولا على الكلى اللى ممكن تتأثر بيهم همّا التلاتة .. الضغط و السكر و الفولتارين , و ما ينفعش نتجاهلها .. و أقل متابعة ممكن نطلبها فى الحالة دى , هى قياس الضغط يوميا , حتى لو أكتر من مرة , عشان نتأكد إن الدنيا متظبطة حتى مع استخدام الفولتارين !! ..

.

و قبل ما نختم مقالنا , لازم نقول شوية نقط ممكن تفيدك أثناء التعامل كصيدلى إكلينيكى , أو حتى صيدلى مجتمعى أو حكومى , مع أى طبيب , فى حال الاعتراض على قراره الطبى ..

.

النقطة الأولى : خليك مسلّح بسلاح تقدر تستخدمه ..

.

و ده معناه إنك ما تتكلمش بخصوص الحالة إلا بعد ما تكون درست أغلب المعلومات الخاصة بيها , و مش غلط لو استثمرت من وقتك فى دراسة أكتر و أكتر من المعلومات اللى محتاجة شوية دقّة .. دعبس على دراسة معيّنة مثلا , .. أو اقلب الدنيا على مرجع تكون قريت فيه المعلومة قبل كده .. , عشان تبقى درعك الواقى قدّام هجوم الطبيب المحتمل , لما يحاول يثبت وجهة نظره برضه ..

.

النقطة التانية : ما تستخدمش سلاح فاسد ..

.

المعلومات الفاسدة و الشائعات المغلوطة أقوى من الأسلحة الفاسدة .. انتشرت شائعة علمية زمان , بتقول إن الديكلوفيناك صوديوم بيرفع الضغط , عشان الصوديوم اللى فيه , .. و إن الحل إننا نستخدم ديكلوفيناك بوتاسيوم .. و الغلطة هنا لها شقين , الأول إن السبب فى رفع الضغط هو الديكلوفيناك , زيه زى أغلب الـ NSAIDs , و الشق التانى إن حقنة الفولتارين مثلا فيها 75 مجم ديكلوفيناك صوديوم .. و ده بالنسبة و التناسب , أقل بكتير من رشة الملح (كلوريد الصوديوم) اللى بتتحط على طبق الشوربة اللى ع الغدا , فهل ده ممكن يسبب خطورة فظيعة لشخص ضغطه متظبط من قبل كده بالفعل ؟؟!! .. معلومة مغلوطة زى كده , ممكن تكون سبب فى قتل ثقة الطبيب فيك كصيدلى عارف المعلومات الجديدة فى مجاله .. أرجوك ما تديش الفرصة لحد إنه يشمت فينا كصيادلة !! ..

.

النقطة التالتة : القوة الناعمة أفضل 1000 مرة ..

.

فيه ناس بتطقش , و بتفتكر إنه لما يثبت وجهة نظره , يبقى هو اللى كسب .. و مش بيبص إلا تحت رجليه .. و بيكون المقابل إنه يخسر الطبيب نفسه , بدل ما كان ممكن يكسبه باللسان الحلو , و حسن المعاملة , و قليل من التواضع , بأسلوب راقى , و بدون تذلل !! .. عوّد نفسك على التعامل برفق و لين , قدر الإمكان , لإن ده من أهم مميزات الصيدلى الناجح .. و لكن يا فرحتى لما تكون موسوعة صيدلانية متحركة , و فى النهاية تخسر كل اللى حواليك من الأطباء , بسبب عجرفتك و غرورك بعلمك !! ..

.

النقطة الرابعة : ادى نفسك فرصة للتفكير فى إنك ممكن تكون غلط ؟؟!!

.

الإمام الشافعى – عليه رحمة الله – كان بيقول إنه فى أى مناظرة كان بيبقى هدفه هو الوصول إلى الحق , سواء على لسانه أو على لسان مناظره .. و الإمام مالك كان بيقول : كل يؤخذ من كلامه و يرد إلا صاحب هذا المقام (أو القبر) , يقصد النبى عليه الصلاة و السلام .. اشمعنى انت بقى اللى مستحيل تكون غلط ؟؟ .. خليها بنبرة إنك عاوز تتعلم من الطبيب , مش عاوز تتنطط عليه , عشان لو كنت غلط فعلا , الدنيا كده ممكن تعدى .. أما لو بدأتها بإنك بتتنطط , فحيكون شكلك …………. لو طلعت انت اللى غلط !! ..

.

النقطة الخامسة : أخبار مهارات الإقناع معاك إيه ؟؟ ..

.

دى أساليب مدروسة , تقدر تستخدمها فى إقناع اللى حابب تقنعهم بأى شىء فى بالك .. ممكن تطبقها فى قصتك مع الأطباء , و ممكن مع أى حد تانى .. و احنا كنا كتبنا قبل كده بالفعل أهم 9 حيل إقناعية فى رأيى ممكن تلجأ لهم فى أى وقت بإذن الله .. و ممكن تقراهم من هنا ..

.

النقطة السادسة : آمن بالتكامل , عشان الطبيب يؤمن بيه برضه ..

.

المسألة مش حرب يا سيدى الفاضل .. و ما تنساش إن فيه مريض ممكن تكون حياته متوقفة على استشارتك الصيدلانية , و القرار اللى الطبيب حيقوم بيه .. و ده هو الأهم , للوصول بالمريض الغلبان ده لبر الأمان , مش لانتصار زائف من حد فيكم على التانى .. ارتقوا بالله عليكم بقى !! ..

.

النقطة السابعة : ممكن تحسن الظن شوية ؟؟

.

أغلب الصيادلة عندهم ظن دائم بإن كل الأطباء متبزنسين و متظبطين من شركات الأدوية , عشان يكتبوا نوع معيّن أو اسم تجارى دون غيره .. و ده بيعزز فى أنفسهم نظرية الكومودينو اللى اتكلمنا عنها قبل كده , و لكن ده مش صحيح عند أغلب الأطباء .. اى نعم ممكن يكون فيه منهم قلة مندسة بتسمع كلام الشركات , لمقابل مادى أو معنوى أو ما شابه .. و لكن مفيش طبيب ممكن يجازف بصحة مريضه , إلا لو كان مستعد إنه يضحى بسمعته فى مقابل أى حاجة تانية .. و ده شىء نااااااااادر جدا , ما ينفعش نعممه على كل الأطباء اللى متواجدين فى عياداتهم أو مستشفياتهم .. و ده يخلينا نعيد الطلب الأخير .. عشان خاطرنا , ارتقوا !! ..

اتفقنا ؟؟

يمكنك قراءة الجزء الثاني من هذا المقال من هذا الرابط :

 http://wp.me/p2YNXX-Cr

..

أحمد الجويلى

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s