الكلاش العجيب بين الصيدلي و الطبيب |الجزء الثاني


جاتنى الرسالة دى ,
.•¸.••..•..•¸.••..•..•¸.••..•.
يادكتور بعد اذنك ايه راي حضرتك في هذا الكلام ؟؟ دة كلام احد طلاب كلية الطب بالفرقة السادسة حاليا
بصراحة انا تعبت نفسيا واحبطت بعد قراءة هذا الكلام !!!!

ترددت كثيراً قبل كتابة تلك الأنواع من البوستات على الصفحة الشخصية ولطالما حاولت أن أصمت عن الكثير من الاساءات التى توجه للأطباء من بعض الصيادلة ومن ناحية أخرى حاولت أن أوضح مرارا وتكرارا “أن الطبيب والصيدلي كلاهما فى حاجة الى أحدهما للآخر” ولكن لكل عمل خاص به ولا يصح لأحد أن يُنقص من قدر الثانى
وتكلمت كثيرا عن أن وجه التفاضل الوحيد بين البشر هو “التقوى” كما جاء فى قول الله تعالى “إن أكرمكم عند الله أتقاكم” ولكن للأسف البعض منهم اضطرنى لكتابة هذا البوست “والذى جاء عن غير رغبة منى” ولكن الحق لا فصال ولا نفاق فيه ,, ولير
ضى عنى من يرضى وليغضب من يغضب .. فانا لا أبالى بمثل هذا ..!!
عزيزي الصيدلى : كثيرا ما تحاول أن تتدخل فى التشخيص وللأسف يقع منك أخطاء لا حصر لها , وللأسف أيضا المريض مش بيجي للطبيب الا بعد ما تحصل مصيبة بسبب تدخلك “فيما لا علم لك به من الأساس” تحت شعار ال OTC ؟
طيب ايه هيَّا حدود ال OTC ؟
ملهاش حدود أهى اى حاجة تفتي فيها وخلاص وأهم شىء يطلع الدوا من الصيدلية .. وأنا وقفت فى صيدليات وعارف دا كويس وشوفته كتير
طيب ليه تفتي من الأساس فى حاجة انت لم تدرس أعراضها ؟
الأمراض ليها عشروميت ودا باب كبير فى الطب , وممكن تكون فاكر ال symptom دى لمرض بسيط وتطلع عنده مصيبة وللأسف بسبب علاجك ال symptomatic للأعراض بتتسبب فى كارثة كبيرة , زى واحد داخل الصيدلية عنده شوية ألم فى جنبه اليمين , روحت انت عطيته Spasmolytic فخف الألم وعملت Masking لل symptoms بتاعت ال appendicitis وبناء عليه حصل انفجار فى الزايدة !!
وعلى هذا قيس مئات الحالات اللى مينفعش تتعالج symptomatic واللى انت بسبب عدم دراستك للكلينكال مش بتعرف تقيِّم الحالة كويس وهل هيا تستدعى العلاج فى المستشفى أو لاء ؟!

صيدلي : أصل الطبيب كشفه الخارجى بيوصل ل 100 و 200 جنيه والمريض مش معاه فلوس يروح لطبيب فبيلجأ ليا فى الصيدلية وانا بريحه ؟؟

طبيب : حضرتك فى حاجة اسمها مستشفيات وزارت الصحة التذكرة بجنيه ,, ممكن يروح المستشفى يتشخص كويس وبعد كدا ابقى اصرفله انت العلاج , دا لو انت عامل عليه وبتؤمن بالتخصص وصدقنى والله المريض هيدعيلك بعد ما تعمله ريفير صح ..!
لكن عشان طبيب “طماع” كشفه بيعدى ال 200 جنيه تقوم انت تشخص العيان غلط أو تعالجه symptomatic يبقى كدا انت بتعالج خطأ بخطأ آخر
ودى كارثة !!!

صيدلي : أصل الطبيب بيعمل deel مع شركات الأدوية والاطباء دول مرتشين وشوية شتيمة كدا مش هقولها ع الصفحة عندى

طبيب : بص يا ريس الطبيب اللى ياخد هدايا من شركة عشان يمشى علاج معين (غالى ع المريض) دا طبيب مرتشى , لكن ليه مش بتجيب سيرة الراشى ؟؟
اها , اقصد صاحبك وحبيبك الصيدلى “اللى بيروح بنفسه للطبيب عشان يعرض عليه الرشوة أو الهدية مقابل انه يشتغل بالعلاج الفلانى !!
ليه بتشوف بعين واحدة بس
لو انت ضد الفساد فخليك منصف لله

صيدلي : اصل احنا عايزين العلاج يتكتب بالاسم العلمى وأنا هصرف الروشتة بالاسم التجارى

طبيب : أنا عن نفسى معنديش مانع , ع الأقل هرتاح من حفظ الأسماء التجارية “اللى مأخدنهاش فى الكلية” لكن هل تضمن ليا ان كل صيدلية فيها صيدلى ‫#‏فاهم_شغله‬ قاعد فيها ال 12 ساعة “مش هقولك 24 ساعة ؟
مش هتضمن دا يحصل , خلاص يبقى الحال على ما هو عليه , وملكش حق انك تتكلم من الأساس !!
لأن أنا مضمنش انى بعد ما اكتب علاج يجي Assistant عندك صارف بديل غلط ,, وكله هيجي على دماغ الطبيب , لان المريض ان مخفش هيروح للطبيب وهيقوله علاجك ملوش أى لزمة , دا ان رجع تانى أصلا !!
فمن فضلك لما تتكلم خليك منطقى شوية واتكلم بحكمة , لو عايز الاسم العلمى يُطبق “فالاطباء معندهومش مانع” بس انت التزم الأول والغى موضوع الاسيستانت اللى موجود فى كل صيدلية , وبطل انتخة ف البيت

الألشة الأخيرة : صيدلي : عايزين الطبيب يكتب ال Diagnosis فى روشته وانا هصرف العلاج ؟

طبيب : حضرتك لا أخدت هيستورى من مريض ولا عملت أى examination ولا شوفت أى investigation عشان تطلع علاج دا اولا
ثانيا : درست فين انك تقدر تكتب روشتة أصلا ؟؟
يعنى لو جبتلك عشان hemiplegia عايز medical ttt هل درست الكلام دا ؟
لو جبتلك عيان dermato myositis وعايز medical ttt هل درست الكلام دا ؟
لو جبتلك عيان pneumonia وعايز medical ttt هتصرف ازاى ليه روشته وانت مدرستش ازاى تكتب روشتة للعيان دا وايه ال principles بتاعت علاج الحالة دى ؟
وقيس على هذا الالاف من الأمثلة
دا فضلا عن عدم معرفتك بكامل الهيستورى للمريض
دا فضلا عن الاسيستانت اللى واقف دايما فى الصيدلية بتاعت حضرتك عشان تأنتخ شوية فى البيت
هيرد عليك واحد تبع ال clinical pharmacy ويقولك أنا دارس الكلام دا ؟
طيب بناء على الكلام دا المفروض تكون واخد تخصص محدد هتتكلم فيه ؟ لأن الطب بحر علم كبير ومحدش ملم بكل حاجة وبما انك مفيش تخصص فى كليتك , يبقى متفرقكش عندى كتير عن خريج الصيدلى الحكومى اللى برضه مبيعرفش يكتب روشته لأى مرض كان ..!!
هتلاقى ناس تقولك أنا صيدلى وعارف فى الفارما أكتر من الطبيب
أولا بديهى تكون انت أعلم بالمواد الفعالة من حيث التركيب لكن ك mechanism of action and indication and contraindication and side effects الطبيب يعلم كل هذا “خاصة فى تخصصه المحدد , فضلا عن انه درس الكلام دا فى 3 طب لما أخد فارما وفى 4 طب فى الرمد والانف والاذن وفى 5 طب لما درس الباطنة والاطفال وفى 6 طب لما درس الجراحة والنسا
فى كل درس عندنا هتلاقى definition then aetiology then pathology then clinical picture then examination then investigation then ttt
من الاخر دور الطبيب how to manage مش how to diagnose فقط:/
دا اللى يعرفه أى انسان , ودا اللى ماشى عليه الناس فى كل أنحاء العالم , فمتجيش انت عشان تفتكس علينا
لو روحت السعودية او امريكا او المانيا او انجلترا هتشوف كل دا … فمن فضلك خليك فى شغلك .
وأخيرا : احنا محتاجين ناس منكم تصنع لينا Oral insulin
عايزين antibioticis ملهاش resistant لل bacteria
عايزين antiviral محترم يقضى على hepatitic C بدل من الكفتة بتاعت عبدالعاطى😀
مطلوووووب منك حجات كتير فركز فى شغلك والكل هيدعيلك لما تنجح فى الحجات دى فى مصانع الأدوية وفى أبحاثك على ال drugs ألمختلفة ..
من الآخر دورك تصنيع وتوزيع الدواء وليس تشخيص وعلاج الأمراض
أظن الحدود واضحة بين كل مهنه , فمن فضلك خليك فى شغلك , من فضلك خليك فى شغلك , من فضلك خليك فى شغلك
آسف للاطالة , لكن الكلام دا واقف فى زورى من فترة وعايز اكتبه وياريت تتقبل كلامى أيها الصيدلي بصدر رحب وهدفنا كله راحة المريض اما بعلاجه واما بوفاته “حيث الراحة الأبدية
.•¸.••..•..•¸.••..•..•¸.••..•.

لكل الناس اللى اتضايقت من الرسالة دى , و اتضايقت منى شخصيا لما نشرتها , و كإن فيها شىء موجع بزيادة , حابب دلوقتى أقول لكم الرد اللى ربنا هدانا ليه , حتى بعد تنقيحه و تعديله بفضل الله .. و برضه حارد بنقط زى ما صاحب الكلام كان بيتكلم فى نقط ..
.
أولا .. حضرتك اتكلمت عن فكرة الـ OTC , و اتضح إنك ضدها , خوفا من تدخل الصيدلى فيما لا يعنيه , و إن أغلب الحالات اللى بتروح للطبيب , بيكون سببها هو “عك الصيدلى” .. كلام حضرتك ليس حقا يراد به باطل , و إنما ليس حقا من الأساس !! .. الكلام ده كان ممكن يكون جائز لحد من 5 أو 10 سنين , أيام ما كان أغلب الصيادلة مالهمش فى العلم الصيدلى ولا بيدوّروا على طرق لتطوير نفسهم .. و لكن دلوقتى الموضوع اختلف , و بقى فيه نقلة فى تفكير الأجيال الجديدة , و كثير من القديمة كمان .. و ياما بنشوف الدورات و الدبلومات و الكورسات مليانة على آخرها بصيادلة نهمين للعلم , و بيدرسوا أسس الـ OTC اللى حضرتك مش معترف بيه , و لازم تتأكد إنه فى خدمتك كطبيب قبل ما يخدم المريض , لإن من أهم قوانينه , التحويل على الطبيب المنااااااااسب بدل ما المريض يفضل يلف من نفسه على كل التخصصات , لحد ما يلاقى الطبيب المناسب بعد خراب مالطة .. أقول لك على حاجة أفضل ؟؟!! .. يا ريت تقرا المقال ده بشىء من التمعّن ..
أقول لك حدود الأوتيسي في مصر و ما تزعلش !!
http://wp.me/p2YNXX-q4
.
ثانيا .. الأطباء اللى موجودين فى التأمين , و تذكرة الكشف عندهم بجنيه , انت عارف من قبلى كيفية تعاملهم مع المرضى بتبقى عاملة إزاى !! .. لا كشف و لا تشخيص و لا أى بتنجان .. فبلاش نتاجر بصحة المريض على بعض , و نفتكر إنه لما يروح التأمين حيلاقى الكشف و العلاج فى المدينة الفاضلة اللى احنا عايشين فيها .. ما حدش ينكر إن الصيدلى بيقوم بدور خرافى فى علاج الحالات المناسبة له , و اللى لا تستدعى كشف ولا غيره .. و ده من غير ما نموّت المرضى زى ما بتقول بانفجار فى الزايدة لا قدر الله !! ..
.
ثالثا : فى موضوع الاسم العلمى و موضوع إن الطبيب يشخص و الصيدلى يعالج , أنا معاك 100% , و أنا أساسا ضد ترويج الوهم للطلبة أو للصيادلة , على أساس إن الكلام ده ممكن يجيب حقهم , بل على العكس , أنا مع إن كل صيدلى يطوّر نفسه على حدة , بشكل يخليه أقدر على التعامل مع الطبيب و المريض بشكل مناسب .. و لو مش مصدق موقفى من الاسم العلمى تحديدا , شوف الفيديو ده ..

.
رابعا : ما حدش يقدر يختلف معاك إن طالما الطبيب مسك الحالة , فبيكون المسئول الأول عنها , بشكل يخلى رأى غيره استشارى بالنسبة له لو كان فى مستشفى أو مستوصف أو حتى عيادة .. و لكن عيييييييييب جدا , لما تنكر – أو تكون ما تعرفش – إن بره مصر – و فى كتير من مستشفيات مصر المحترمة – ما بقاش الطبيب ينفع يلف ع المرضى فى الراوند بتاعه , إلا لما يكون معاه صيدلى إكلينيكى متخصص , عيّنته المستشفى , عشان يجبر قصور الطبيب فى معرفته بأدق تفاصيل الدواء , اللى ممكن يكون الصيدلى تخصص فيها على مدار 5 سنين و زيادة فى دراسته الجامعية , و الطبيب اهتم أكتر بالتشخيص , حتى مع معرفته بالدواء .. و لكن 1,000,000% هو لا يعلم كل العلم الصيدلانى تجاه علاج واحد , فما بالك بتعارضات دوائية و خلافه ؟؟!! ..
.
خامسا و أخيرا : الصيدلى مش شغلته و بس إنتاج الدواء .. فرع الإنتاج و التصنيع و الأبحاث و التطوير الصناعى اللى حضرتك بتتكلم عنه عشان ننتج oral insulin , هو حاجة مهمة طبعا مفيش كلام .. و لكنه مش الاهتمام الوحيد اللى المفروض الصيدلى يشغل نفسه فيه .. و بدلا من إنتاج مضادات حيوية عشان تتغلب على مقاومة البكتيريا , فيه مننا كتير بيحاربوا عشان يوعّوا المرضى بفكرة إن المضاد الحيوى مش بيتقص بالكبسولة , و إنه لازم ننهى الكورس العلاجى الخاص بيه , بدلا من إن الطبيب مش بيركّز على كده فى الـ patient counseling مع المريض , لإنه بيكون عاوز يلحق الكشف اللى بعده فى أغلب الحالات ..
.
أخيييييييييييرا خالص بقى : الدنيا مش قفش .. و لو كل واحد فينا عرف دوره , الدنيا حتتصلح , و يا ريت نبطل نقطع فى بعض , و ننتبه شوية للإنتاج و البناء بقى , .. و كختام , أنصح حضرتك بقراءة الجزء الاول من المقال اللى كتبناه قريبا.. جايز تلاقى فيه الحل بإذن الله ..
http://wp.me/p2YNXX-BW

و ممكن تبقى تتابعنا فيما بعد ع الفيسبوك , عشان جايز ساعتها تغير وجهة نظرك عن الصيدلى فى مصر ..

.

رابط البوست الأصلي : http://goo.gl/bmlDlu
مع تحياتى ..
Abu Bassem

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s