دليلك الأكيد عشان تعمل فى صيدليتك Health Day شديد !


1

خلينا نتكلم كفنّيين ! .. من أهم الحيل الجديدة لجذب العملاء لدخول صيدليتك , هى فكرة اليوم الصحى أو الـ Health day , و اللى ممكن يضاعف أرباح صيدليتك فى يوم واحد لأكتر من 10 أضعاف .. بس المهم تكون انت مركّز فى الخطة اللى حتقوم بيها .. و ده اللى حنناقشه معاك النهاردة فى خطوات مدروسة , عشان لما تقوم بيها و تنفذها حرفيا , ينجح يومك الصحى , بنسبة أكبر و أفضل بإذن الله ..

أولا : مرحلة دراسة الموقف و اختيار النوع ..

الـ Health Days أنواعها كتير .. منها ما هو قائم على مستحضرات التجميل و العناية بالشعر و البشرة مثلا , و منها اللى بيتكلم عن السمنة , و منها اللى بيناقش قصة مرض السكر و أهم النصايح اللى تتقدم للمريض اللى عنده سكر .. و هكذا .. و عشان كده , لازم تحدد إيه اللى ممكن يكون أنسب للمنطقة اللى انت فاتح فيها صيدليتك , عشان تقدمه فى يوم صحى .. يعنى لو المنطقة High-class , ممكن مجال العناية بالبشرة مثلا يكون حاجة كويسة .. و هكذا ..

فى المرحلة دى برضه , لازم تختار “الخبير” المناسب .. المثل بيقول

: زمّار الحى لا يطرب .. يعنى من الآخر , حيبقى أفضل لو اخترت خبير , جديد ع المنطقة , عشان يتواجد معاك فى اليوم ده , و يقدم نصايحه للعملاء اللى حييجوا طلبا لاستشارته بإذن الله .. و طبعا على حسب الخبرة الأكاديمية و العلمية و التطبيقية للشخص ده , حيتم اختياره , عشان اليوم ينجح معاك من الألف إلى الياء بإذن الله ..

6

  ثانيا : تحديد الميعاد و التوقيت ..

حاول تكون ذكى فى اختيار الميعاد بحيث يكون أغلب عملائك اللى ممكن يشرفوك فى الصيدلية , متاحين فعلا .. يعنى لو بنتكلم عن شريحة السيدات مثلا (فى يوم صحى خاص بمشاكل الشعر) , حاول تبعد عن الأوقات اللى بيكونوا فيها مشغولين فى البيت أو الشغل , أو ما يقدروش ينزلوا من بيوتهم لو الوقت متأخر مثلا .. يعنى أنسب وقت فى رأيى , من 12 لـ 5 عصرا مثلا .. غير كده ممكن يكون مش مريح بالنسبة للسيدات ..

2

التوقيت برضه شىء مهم .. عينك دايما على أيام الأجازة , اللى ممكن تسمح إنهم يحضروا معاك اليوم الجميل ده , و يبقى بالنسبة لهم متعة و استفادة فى نفس الوقت .. يعنى لو عطلة رسمية زى عيد العمّال مثلا , تبقى كده أصبت كبد التوفيق بإذن الله ..

تقدر تقرا 2

ثالثا : الدعاية الكافية بالطريقة المناسبة

ما تنساش إن الدعاية هى أساس اليوم ده , عشان الناس تعرف من قبله بفترة كافية , و تقبل على إنها تنزل من بيوتها أو تعدى عليك و هما راجعين من الشغل .. يعنى لازم يتوفّر فى الدعاية 3 حاجات : الإبهار + التشويق + تقديم قيمة مجانية ..

الإبهار ممكن ييجى عن طريق إعلان جذاب مبتكر , معمول بشكل جميل , على هيئة رسم كارتونى مثلا أو صورة تخطف الانظار و جنبها خبر إقامة يوم صحى فى صيدليتك , مع كل تفاصيله المتاحة , و يتوزع فى أماكن تجمع الناس على مدار الأسبوع .. النوادى , السوبرماركت الكبير .. قاعات الأفراح .. و هكذا

التشويق ممكن ييجى عن طريق إنك تقول للناس اللى حتيجى قبل اليوم ده للصيدلية , إن فيه مفاجآت مذهلة حتتقدم على مدار اليوم الموعود ده إن شاء الله ..

و أخيرا , القيمة المجانية .. المثل برضه بيقول : اللى ببلاش , كتّر منه .. و لو أعلنت عن وجود هدايا مجانية على مدار اليوم , مهما كانت بسيطة , حتلاقى الناس تقبل على معرفتها , بدافع الفضول و ده كفاية لإيجاد traffic غير مسبوق داخل الصيدلية بإذن الله ..

الدعاية ممكن تكون بطرق أسهل و أسرع , من خلال الـ SMS لعدد من الأرقام اللى تعرفها من داخل المنطقة .. أو من خلال صفحة الصيدلية على الفيسبوك , أو من خلال مجموعات الواتساب اللى أنشأتها لجمع عملائك عليها .. لدرجة إنك ممكن تطبع بانر قبل اليوم بشهر مثلا , و تحطه فى الصيدلية بشكل يجذب الانظار جدا ! .. و ممكن توزع من الفلايرات اللى تزيد معاك , داخل الصيدلية برضه , على العملاء اللى بيحبوا يطلعوا بحاجة من الصيدلية فى إيديهم يبصوا عليها ! ..

3

خلّى الناس فى المنطقة بتاعتك تتكلم عن اليوم ده .. فيه 3 أو 4 من أهل البلد , حتبقى عارف إن مفيش فولة بتتبل فى بقهم .. دول بقى جنّدهم معاك , حتى لو فى مقابل مصلحة معيّنة , بس المهم , إنهم ينشروا الخبر فى المنطقة كلها !! ..

تقدر تقرا 3

رابعا : اليوم المنتظر بدأ ..

 5

لازم تكون مظبط عمالة أزيد معاك , عشان العمالة العادية حتتفحت فى اليوم ده من فرط المجهود بإذن الله .. لازم المواعيد تكون مظبوطة , و الخبير يكون جه قبل اليوم بفترة كافية , و ساب عدّته أيا كانت بقى .. عشان ييجى يشتغل على رواقة فى اليوم اللى حيبقى فيه ضغط ده ! .. الكل لابس البالطو الأبيض النضيف .. و الصيدلية على سنجة عشرة .. و المكان بيبرق من النضافة .. راعى إنك النهاردة كإنك بتعمل افتتاح جديد لصيدليتك بإذن الله ..

خلّى بالك من السرقة .. الأمر ما يسلمش .. يعنى لو قدرت تعيّن واحد security من حبايبك المأمونين , يبقى كويس , أو ممكن تعتمد على كاميرات المراقبة لو كانت متوفرة بالنسبة لك ..

ما تنساش تخلّى العمالة عندك تهتم بالشاى و النيسكافيه , من باب الضيافة , و من باب تنشيط اللى بيشتغلوا كل شوية .. و لكن ابقى اهتم بتوفير “الحمّام” بعد كده , عشان مش لازم ننسى إن الحاجات دى لها تأثير مدرّ للبول .. خاصة القهوة !! …

خلّى ركن فى الصيدلية مخصوص للـ Patient-counseling بين الخبير و العملاء قدر الإمكان .. و اللى ممكن يكون وراه banner للدعاية عن الشركة الراعية لليوم , أو حتى عن منتج حابب تسوّقه بشكل أفضل فى اليوم ده ..

– إيه حكاية الشركة الراعية دى ؟؟!!

 4

الشركة الراعية دى شركة أدوية أو مستحضرات تجميل , ممكن تتفق معاهم على إقامة اليوم ده بالاشتراك معاهم , و همّا بيموّلوه ماديا أو عينيا , فى مقابل الدعاية لهم أو لأحد منتجاتهم .. و أحد أهم الشركات اللى نفسها مفتوحة تجاه النوع ده من التسويق , شركة إيفا , لإن فيها مستحضرات تجميل .. و حاجة زى أورلى لعلاج السمنة الزايدة مثلا ! ..

تقدر تقرا 4

خامسا : جنى الثمار المتأخرة ..

 

بعد الاستفادة من الـ traffic اللى حصل فى إن أى حد عاوز أى منتج تانى داخل الصيدلية , بيفتكرها و يشتريها بالمرة , و اللى ممكن يسألك برضه على حالة OTC خاصة بيه , الـ traffic اللى حييجى للصيدلية فى اليوم ده , المفروض نحافظ عليه , عن طريق جمع بيانات المشاركين فيه , و أرقام تليفوناتهم , و وسائل الاتصال بيهم , و دول يكونوا راس مالك , تحديدا لو عملت يوم صحى تانى , فدول أهم عملاء المفروض تخاطبهم بالدعاية , لإنهم اختبروا الموضوع معاك قبل كده .. و أكيد عجبهم بإذن الله ..

الأهم من كده , هو تهيئة التواصل الدائم معاهم فيما بعد , عشان تحافظ عليهم كعملاء دائمين للصيدلية بإذن الله , عن طريق العروض التسويقية اللى حتتبعت لهم , أو حتى اتصالك اليومى للاطمئنان على صحة 10 منهم ع الأقل , و ده سبب كافى يخليهم يختاروك من باب العلاقات الشخصية القوية بينك و بينهم ..

 

عيوب اليوم الصحى

 الكمال لله وحده , و ما تتخيّلش إن اليوم مافيهوش عيوب أو مفاجآت غير سعيدة .. دى طبيعة العمل الواقعى أساسا .. لازم تلاقى فيها شوية منغصات .. و من أهمها : ..

 

الخبير مش ببلاش .. الراجل جاى بفلوس .. ممكن يكون سايب صيدليته الخاصة , أو محل أكل عيشه , عشان يقضى معاك عدد من الساعات , فى منتصف اليوم , و ياخد فى نهايته مبلغ و قدره .. لازم فى الحالة دى المبلغ يكون مناسب و مرضى لكم انتوا الاتنين .. عشان فى حالة الاستمرارية , و محاولة تكرار اليوم الناجح ده , ممكن يحصل تفاوض من أول و جديد على المقابل .. و ده بيبقى صداع فى حد ذاته , و ممكن يخلى الناس تخسر بعضها .. و لكن خليك متأكد إن كل مليم حتصرفه فى اليوم ده , فهو مقابل خبرة حقيقية , مش أى كلام و خلاص .. بجانب إنه قابل للتعويض بشكل سريع أو بطىء , فيما بعد بإذن الله .. الزتونة : ما تسترخصش و تجيب خبير مش خبير أصلا !! .. (احم احم .. أنا ممكن أشتغل خبير فى حالات الـ OTC على فكرة .. هههههههههه😀 ) ..

 

الثقة راحت للخبير .. حتلاقى الناس بعد كده تسأل ع الخبير الفلانى اللى كان موجود .. ده ممكن يسبب لك بعض الضيق فى البداية , لإنهم حيحاولوا يتجاوزوك أو يهمّشوك .. و لكن التصرف الصحيح فى الحالة دى , هو التفخيم كمان و كمان للخبير ده فى عيون الناس , عشان سمعته تكون أفضل لما تعمل يوم صحى تانى .. و فى الآخر كل ده بيبقى مصلحة ليك .. و لكن امتنع عن إعطاء رقم تليفونه أو بياناته لحد (بدافع السرية) , عشان ما يتمش استخدامك كجسر مؤقت للوصول إليه فى البداية , و يبقى الأمر مش محتاج صيدليتك فى الأساس عشان تكون مكان للتواصل بينه و بين العملاء ..

استفيد انت بقى بتواجد الناس و ابنى ثقتهم فيك بطرق إبداعية مدروسة , فى تخصصات تانية , غير اللى الخبير بيشتغل فيها , و مفيش مانع إنك لو قدرت تلاحظ أحد مهاراته القابلة للتعلم , لازم تستفيد منها , عشان تطبقها بنفسك داخل صيدليتك بعد كده ..

 

ما ينفعش كل يوم .. مش حتقدر كل يوم .. ولا حتى كل أسبوع تعمل يوم صحى فى صيدليتك .. , عشان الناس ما تتعودش على كده , و عشان لازم يبقى فى نظرهم يوم غير عادى , يتم حشد الناس فيه عندك .. و للتغلب على كده , اعمل خطتك السنوية , لعمل 4 أو 6 أيام صحية على مدارها , و حددها من البداية , و نسّق مواعيدها مع الخبراء المطلوبين فى تخصصات مختلفة , قابلة للتطبيق داخل صيدليتك , و تعتبر ده تنشيط محبب لمستوى الصيدلية عندك بإذن الله .. مش أكتر من كده ..

.

قولوا لنا رأيكم فى الفكرة بالخطوات دى .. و هل فيه أفكار تحب تضيفها ؟؟ .. و لو نويت تنفذها , قول لنا , عشان نيجى نزورك يومها إن شاء الله ..

أحبكم في الله

أحمد الجويلى

3 responses to “دليلك الأكيد عشان تعمل فى صيدليتك Health Day شديد !

  1. فكرة جامدة بصراحة..بس انا صيدليتي في قرية مش عارف ينفع فيها الموضوع دة وانفذه ازاي

  2. طب لو انا ممكن اقرا كويس جدا عن الموضوع ينفع اقوم بدور الخبير خاصة ان صيدليتى فى مكان ارياف مغمور مفيش خبير عاقل يوافق يجى🙂

    ثانيا هو الصيدلية ضيقة للاسف ينفع اخليه زى استشارات ع مدار 3 ساعات فى يوم معين مش اجمع الكل فوقت قصير يعنى؟

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s