إزاى تلم مادة فى دماغك فى أقل من 72 ساعة ؟؟!!


1

تقريبا مفيش يوم بيعدى خلال فترة الامتحانات دى , إلا و بالاقى فيه ناس تبعت لى أسئلة ع الخاص , من نوعية :

– مفيش حاجة ممكن تخلّينى ما انامش أيام الامتحانات ؟؟

– آخد آنهى أحسن ؟؟ .. ترامادول ولا تامول ؟؟!! ..

– المادة رخمة و مش عاوزة تتحفظ .. أعمل إيه ؟؟!!

و عشان كده , قررت أقول كل الكلام هنا مرة واحدة , و أبقى أبعته لأى حد يسأل عليه , و حنحاول نرتّب أفكارنا قدر الإمكان , عشان تبقى سهلة فى التناول , و بعيدة عن الكلام النظرى البحت .. احنا عاوزين إجابات عملية , و ده اللى حاحاول أقدمه النهاردة إن شاء الله .. و لكن لازم نقول إن المقال لازم يتقرى كويس , و لا يصلح للناس اللى بتعمل scroll down , و تخلّص 5 صفحات فى 3 ثوانى !! .. اتفقنا ؟؟!! ..😉

1

★*  الــــزتـــونـــة من البداية : ..

ღϠ₡ღ لو بتسأل على أدوية تزوّد التركيز و تخليك تذاكر أحسن , لازم أقول لك ع المفيد , عشان ما أضيعش وقتك ..  ღϠ₡ღ

✿ ❀ ✿ الحاجات اللى فيها Ginkgo biloba , زى تيبونينا فورت , زى الفل و انا باحبها , و لو معاها جنسنج (زى جنكوبلاس) , (تيبونينا فورت أو جنكوبلاس , واحد منهم كفاية جدا) … بيبقى تأثيرها أحلى و أفضل , بشرط إن ما يكونش عندك مشاكل فى الكبد أو الضغط لا قدر الله .. و الاستخدام يكون لفترة بسيطة , فى رأيى ما تزيدش عن شهر أو اتنين , عشان الجسم ما يتعودش عليها و يحصل أعراض جانبية غير مأمونة , لا قدر الله ..

✿ ❀ ✿ الترامادول أذى السنين .. ابعد عنه بكل أشكاله , و ما تسمعش كلام صاحبك اللى بيعرضه عليك كحل سحرى يخليك تذاكر أحسن أو تظبط الدنيا فى وقت أقصر .. ما كانش حد غلب .. الترامادول قاااااااااااتل .. و انت عارف كده كويس .. و ياما ناس بتكلمنى عاوزين يبطلوا إدمانه و مش عارفين .. و بسبب إنه مش متوفر حاليا , انتقلوا للهيروين و العياذ بالله , عشان يقللوا إحساسهم بالألم .. أرجوك ما تبقاش منهم !!

✿ ❀ ✿ أركاليون , و أركاليون فورت , و أكتيفيت , و كل الحاجات اللى فيها Sulbutiamine , أنا مش بافضلها , برغم شهرتها بين الشباب , لإن من أهم أعراضها الجانبية , الأرق و الرعشة و الغثيان كمان و العياذ بالله .. , و عشان كده بلاش منه أحسن ..

✿ ❀ ✿ المنبهات و المنشطات المعروفة بقى , زى الشاى و القهوة و الكاكاو , و الكابتشينو كمان , تبقى حلوة لو كانت بالعقل .. يعنى مرة فى اليوم زى الفل , و لكن إنك تشرب 7 شاى و 9 قهوة و 12 كابتشينو فى يوم واحد , ده يبقى اسمه انتحااااااااار😮

✿ ❀ ✿ الأكل الصحى و الخضروات و الفواكه أصح 1000 مرة من المنبهات و الأدوية اللى بتلعب فى جهازك العصبى عشان تعدّى الامتحان و بعده ممكن ييجى لك اكتئاب أو خمول , أو أى أمراض عصبية و نفسية و العياذ بالله .. الأكل الصحى , حيرفع مناعتك و يساعدك على التركيز بشكل حقيقى , مش بشكل مزيّف زى ما حنقول كمان شوية ..

✿ ❀ ✿ فيه أسباب عضوية كتير ممكن تكون سبب نقص التركيز .. فلو كنتـ / ـى مريضـ / ـة أنيميا , لازم نخلى بالنا إن ده من أهم أسباب عدم القدرة ع المذاكرة , و النسيان اللى بنشتكى منه , و علاج الكلام ده , يعتبر أهم حاجة نفكر فيها فى الحالة دى , حتى لو بإننا نبدأ ناكل حاجات فيها حديد من دلوقتى , زى اللحوم الحمراء و الكبدة و الطحال , و الحاجات اللى فيها ورق أخضر , زى الملوخية و السبانخ , .. حتى الفجل و الجرجير كمان .. و ده لحد ما نفوق و نعمل تحليل Complete Blood Count  << CBC   , و نشوف إذا كنا محتاجين علاج صيدلى ولا لأ ..

✿ ❀ ✿ الفيتامينات المعروفة و مضادات الأكسدة , ممكن تعمل شغل خلال اليومين دول , لو سعادتك جربت الحاجات اللى فاتت , و مش لاقى فايدة كافية .. يعنى لو أخدت فيتاماكس بلاس , أو سيلينيوم ACE , الدنيا ممكن تتظبط أحسن .. و لكن بالعقل برضه زى ما قلنا .. مرة يوميا , حيبقى زى الفل إن شاء الله ..

ღϠ₡ღ طريقة المذاكرة بقى .. ღϠ₡ღ

شيل من دماغك طريقة الحفظ بتاعة زمان .. “التكرار يعلم الشطّار” .. التكرار دلوقتى بقة دقة قديمة .. دلوقتى فيه طريقة “الرابط الذهنى” .. و دى معناها إنك تربط معلومة قديمة عندك و حافظها كويس صم  , بمعلومة جديدة , فتلزق فيها بسهولة .. و كل ما كان فيها إبداع , كل ما كان أحسن .. مثلا لو حابب تفتكر إن ارتفاع الكعبة المشرفة 14 متر (و دى المعلومة الجديدة عليك) , فممكن تتخيل فى ذهنك الكعبة , ليلة 14 هجرية , و القمر بدر بينورها .. (المعلومة القديمة : الكعبة و الهجرة و ليلة 14 حاجات ثابتة عندك من قبل كده) … و بكده عمرك ما تنسى المعلومة بإذن الله …

✿ ❀ ✿ لو عاوز تعرف أكتر عن طريقة التعلم دى , شوف الفيديو الجاااااااااامد ده

✿ ❀ ✿ و فيه طريقة تانية , اسمها “قصر الذاكرة” .. دى انا باحبها قوى بصراحة .. و ممكن تشوف عنها فيديو محترم جدا هنا ..

و ده بالمناسبة لا يتعارض مع الكلام اللى ناس بتسأله بقى عن “أذاكر و انا قاعد ولا و انا ماشى ؟؟؟!! ” .. “أذاكر مع خلفية موسيقية ولا لأ ؟؟؟!!” .. أنا ماليش دعوة بكل الكلام ده .. ذاكر بالطريقة اللى تريّحك .. و لكن الأهم , ما تعتمدش ع التكرار , لإنك حتنسى المعلومة كده فى الامتحان .. حاول تربطهم ببعض أحسن , و تستمتع بيهم لما تعمل كده …

✿ ❀ ✿ و بمناسبة المتعة بقى , فيه تمرين جامد , قدمه د. أحمد عمارة , عشان يحوّل المذاكرة إلى متعة بجد , و يشرفنى إننا نوريه لحضراتكم هنا .. و ده لكل الناس اللى بتزهق بسرعة من المذاكرة , أو حاسّين إنهم بيتعذبوا و همّا بيذاكروا , و الوالد و الوالدة , بيسمّوهم “فرقع لوز” , عشان بيقوموا من ع الكتاب بعد أقل من 3 دقايق فقط !! .. التمرين أهو ..

✿ ❀ ✿ آخر حاجة نجب نقدمهالكم في هذا السياق هي الكتاب الصوتى الراااائع : ذاكرة أقوى بعد 10 أيام ..
http://www.mediafire.com/listen/ndf8fmdpylzmple/10_days_to_a_sharper_memory_audio_book.mp3

ღ مش لازم ننسى نقول إن فيه مواد لها طريقة مذاكرة معينة , هى الأفضل لها , مثلا الــعــقــاقــيــر , ممكن تتحفظ بالجداول الضخمة اللى بتجمع بين الاستخدامات و المواد الكيماوية و كل الاختلافات بين النباتات و بعضها .. ( و فى الآخر برضه بتتنسى للأسف !!😦 )

ღ أما الــصــيــدلــة الــصــنــاعــيــة , فلها طريقتها الخاصة , و اللى بتعتمد على فهم كل جهاز بيشتغل إزاى و تخيّل ده فى العقل كويس , قبل ما نفكر فى الحفظ ! ..

ღ أما الــمــيــكــروبــيــولــوجى بقى , فده مالوش حل عندى , بيتنسى حتى لو عملت إيه بالذى !!😥 .. لكن د. أسامة معروف متميز فيه بصراحة , و انا كنت أتمنى إنى أدرسه على إيده زمان , أيام ما كنت فى الكلية ..

˙·٠•● Ƹ̵̡Ӝ̵̨̄Ʒ ●•٠·˙ طب لو ما نفعش كل الكلام اللى فات ده ؟!! ..

✿ ❀ ✿ ولا تضايق نفسك .. ربنا مش حيضيّع تعبك لو كنت تعبت بجد .. أكتر الامتحانات اللى جبت فيها درجات كويسة , ما كنتش طالع منها و انا حاسس بكده ! .. بس كنت بابقى عملت اللى عليا قبلها كويس , و استعنت بالله .. و عشان كده الموضوع مش بحجم المعلومات اللى بتحشرها فى دماغك , و إنما بتوفيق ربنا ليك بناء على تعبك و تضحيتك بالخروجة أو بالقعدة ع الفيسبوك بالساعات بدون فايدة ..

✿ ❀ ✿ لو كنت ما تعبتش أصلا , فأرجوك ما تجيش على نفسك , و تقرر إنك تنجح بأى طريقة , حتى لو بالغش .. و ده ببساطة , لإنه ممكن يعدّيك من الامتحان فعلا , و لكن لما تنتقل للسنة اللى بعدها , حتتعثر أكتر , لإنك مش حتبقى فاهم اللى فات كويس !! .. و عشان كده , الأفضل إنك تاخد كل حاجة فى وقتها .. و بجد لو ريّحت سنة عشان تعيدها كويس , ده ممكن يكون أفضل من إنك تتخرج من الكلية بعد عدد سنوات قليل , و انت بطيخة و مش فاهم فيها يعنى إيه صيدلة من أصله !! ..

✿ ❀ ✿ انت دلوقتى بتشتغل عشان خاطر امتحان قريب .. امتحان دنيوى .. لكن انا باكلمك دلوقتى , بعد ما عدّيت الامتحان ده و غيره بفضل الله .. , فاسمح لى أقول لك إن اللى انت فيه دلوقتى سهل جدا , مقارنة بما بعد .. فما تفتكرش إن النجاح بالغش فى امتحانك الحالى , ممكن ينجحك فى حياتك المهنية فيما بعد .. ربك شايفك كويس , و هو اللى بيدى التوفيق و النجاح من عنده .. مافيهاش فهلوة دى .. و خليك فاكر الكلام ده .. ابعد عن الحرام , حتى لو حتقعد سنة زيادة فى الكلية .. ممكن دلوقتى تكون شايفها كبيرة قوى , لكن انا أعرف ناس كتير “دبلروا” أيام الكلية , و دلوقتى من أنجح الصيادلة , أيا كان مجالهم اللى بيشتغلوا فيه .. و بالنسبة لهم السنة اللى وقعوها كانت طاقة نور , حياتهم اتغيرت فيها للأحسن ..

✿ ❀ ✿ مش باقول لك اسقط .. لكن باقول لك : لو حتنجح , انجح صح .. انجح قدّام نفسك , قبل ما تنجح قدام الناس .. انجح بمجهودك , و معلوماتك اللى حتحتاجها بعد كده فى الوقت المناسب , عشان تكون صيدلى صح , تفخر بنفسك و قدراتك .. أسهل شىء هو النجاح المؤقت حاليا .. , لكن والله انا باقابل ناس ع الفيسبوك , يقولوا لى : احنا نسينا كل حاجة من أيام الكلية .. و ده ببساطة , عشان المعلومات ما دخلتش صح !! .. و ده موضوع اتكلمنا فيه قبل كده هنا >> (إزاى نذاكر صح ؟؟) ..

1

و أخيرا لو عجبك المقال , ما تترددش فى نشره .. و نتشرف بمتابعتكم لنا علىفيسبوك من هنا

احبكم فى الله ..

أحمد الجويلى

4 responses to “إزاى تلم مادة فى دماغك فى أقل من 72 ساعة ؟؟!!

  1. المقال تحفة .. تسلم ايدك يا دكتور ..
    #ملحوظة
    الصورة كمان تحفة كفاية انها من الفيلم الكوميدي التعليمي الرائع idiots 3 🙂🙂

  2. المقال جميل جدا واسلوبه تحفه بجد تسلم ايدك يادوك
    ربنا يكرم حضرتك يارب ويبارك فيك بجد حضرتك بتدى الواحد امل بعد مبيوصل لكلمه مفيش فايده =D =D

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s