الرد على الشبهات المثارة حول فكرة الـ 18 ألف جنيه شهريا !!


1

و آاااااادى قعدة , عشان نكتب فيها واحد من أطول البوستات فى حياتنا إن شاء الله .. و عشان الناس اللى مش بتحب تقرا كتير , لو عندك شبهة أو اتنين , عاوز تعرف عليهم الرد , دوّر على عنوانهم , و اقرا السطرين اللى تحتهم , و كان الله بالسر عليما ..

فيه مليون طريقة جات فى دماغى عشان أبدأ بيها المقال ده بصراحة , و لكن كلهم طاروا دلوقتى و ما بقاش قدّامى , غير إنى أقول السر اللى دفعنى لطرح الفكرة , و ربنا يعلم نيتى و صدقى فى ده ..

من فترة مش بسيطة , كتبت مقال عن 6 طرق إضافية عشان الصيدلى أو طالب الصيدلة يزود دخله بيهم بالحلال , و تقدر تقراه من هنا لو ما كنتش قريته .. و كان منها الترجمة الطبية و التسويق و خلافه .. و بعده مباشرة , لقيت أفواج من طلبة و صيادلة بيشكرونى على الخاص و العام , على طرح الـ 6 أفكار دول , و بدأ اهتمامهم يتوجه ناحية الترجمة الطبية كبداية لمجال جديد إضافى بالنسبة لهم .. و فيما بعد جه ناس تانية تقول إنها مالهاش فى الترجمة .. هل فيه مجالات تانية ممكن تكون مفيدة ؟؟ .. و كان ردى بإن فيه حاجة قريبا , و لكنى ما كنتش أعرفها بالتحديد , لحد ما حصل الموقف اللى حكيته فى بداية المقال السابق عن الفكرة .. (اللى هو ده) .. الفكرة اللى ممكن تخليك توصل لدخل شهرى – بإذن الله – بقيمة 18 ألف جنيه شهريا .. و بمجرد ما اتنشر البوست امبارح , انقسم قراؤه إلى 3 أقسام .. قسم كبير مقتنع بالفكرة و واثق بشكل كافى فى اللى بيقدمها , و متيقن إنه مش حيضره أو يحقق كسب أو منفعة لنفسه بدون ما يفيد الناس قدر إمكانه … و قسم ضخم , قرر إنه يكيل الاتهامات و الهجمات على الفكرة و يوصفها بإنها مسيئة للمهنة و كلها مادية جوفاء و شبهات كتير تانية , حيتم الرد عليها بالتفصيل فى السطور القادمة بإذن الله .. و قسم أخير – و ده أصغر جزء فيهم – و كإنه ما صدّق إنه يمسك عليا غلطة , فاتهمنى أنا شخصيا إنى بادق آخر مسمار فى نعش المهنة , و إن حقيقتى المادية ظهرت قدام الناس أخيرا , و إن نظرته فيا ما خابتش , رغم إنه كان متأكد إنى منافق و نصاب و حرامى و .. و .. و .. و بصراحة النوع الأخير ده , هو أكتر نوع أنا استفدت منه , لإنى كنت فى أمسّ الحاجة لحسناته اللى أهداها ليا على طبق من ذهب , و حطها فى حساب حسناتى البنكى فى الآخرة , بدون أى جهد منى بفضل الله .. و عشان كده , لازم أشكر الناس دى جامد بصراحة ..

تعالوا بقى نناقش – فى نقط واضحة – اعتراضات المعترضين , و نحاول نرد عليها و نفندها بأدلة واضحة لا تقبل الشك بإذن الله .. و نبدأ بأول حاجة أنا باهتم بيها ..

✿ ❀ ✿ بس كده يبقى حرام ..

هو إيه اللى حرام حضرتك ؟؟ .. التسويق حرام ؟؟ .. يااااااااااااااااه .. فكّرتنى بالذى مضى .. طول فترة دراستى , كنت مقتنع بإن شغلانة الـ Medical Rep حرام شرعا , عشان بيبقى فيها رشوة , و استغلال للمريض , عشان يشترى نوع معين من الأدوية بدلا من نوع تانى , لمجرد إن الشركة تكسب و الكلام ده كله .. لحد ما فى يوم , قابلت واحد صاحبى عند الكوبرى العلوى فى دمنهور , و وقفنا فى الشارع شوية , و لما سألته عن شغله أيامها , قال لى إنه شغال فى شركة “باير” .. شركة Multinational معروفة للصيادلة .. فاستعجبت جدا , و قلت له باستنكار : و ما خفتش من الحرمانية يا محمد ؟؟ .. فقال لى : على فكرة , احنا شغلنا فى الشركة Ethical جدا .. و مفيش عندنا أى رشوة من أى نوع , سواء صريحة أو مقنعة .. كل اللى بيحصل إنى بادخل للدكتور زيارة , أقول له فيها آخر المعلومات بخصوص الدوا بتاعى بشكل منسق , و أسلّم عليه و أمشى .. و هو حر بقى , يكتبه , ما يكتبهوش فى الروشتات .. ماليش فيه .. أنا عملت اللى عليا خلاص .. فين الحرام فى كده ؟؟

ساعتها تنّحت بصراحة , و ده ببساطة لإن “الصورة الذهنية” عندى اتغيّرت فى أقل من دقيقة , من صورة مندوب مهزّأ , داخل يعرض بضاعته ع الدكتور , و يترجاه إنه يكتب أدويته , فى مقابل رشاوى تبدأ بقلم شيك , و تنتهى برحلة فى أوروبا لمدة 10 أيام , بغض النظر عن أم مصلحة المريض , .. لصورة مندوب محترم عن شركة الأدوية اللى بيشتغل فيها , و داخل يفيد الطبيب بمعلومات ينتظر الاستماع إليها و الاستفسار عنها بخصوص الدوا اللى يفيده فى شغله كطبيب ..

و من ساعتها , اقتنعت إن شغلانة الـ Medical Rep , زيّها زى زى أغلب الشغلانات فى الدنيا .. حلالها حلال .. و حرامها حرام .. و اللى مسوأ الصورة الذهنية فى عقول الناس اللى بتسمع عنها , هو إن عدد كبير من مرتاديها ممكن يكونوا بيخالفوا ضميرهم , أو بيحطوا له المنوم فى الشاى , عشان يعرفوا يقدموا رشاوى للأطباء .. مش كده ؟؟ .. و لكن لو فى يوم عرفت إن فيه واحد بيشتغل زى صاحبى , فى شركة باير , أو غيرها , ساعتها ممكن تغير وجهة نظرك .. تمام ؟؟ ..

يبقى الموضوع مش فى إن التسويق حرام أو حلال .. و لكن هو تسويق لإيييييييييه ؟؟ .. و حيتم إزااااااااى ؟؟ .. و إيه المعايير اللى حيتم التسويق على أساسهاااااااااا ؟؟ .. و غيره و غيره .. و دى الأسئلة اللى حتحدد القصة حلال ولا حرام ..

نقطة مهمة بقى .. انت فاكر إن التسويق لبضاعة أو دوا و بس ؟؟!! .. التسويق ممكن يتم لأى شىء .. لإن معناه إنك بتقنع الناس بالشىء ده .. و اللى ممكن يكون “فكرة” , زى ما سوّقت انا كده امبارح لفكرتى الجديدة نوعا ما , و ربنا أكرمنى بإن أغلب اللى يعرفونا بيتكلموا عنها النهاردة !! .. التسويق ممكن يكون لخدمة .. التسويق ممكن يكون من أم عن بنتها عشان تتجوز , لما تاخدها تحضر معاها أفراح العيلة بحالها !! .. (و أعتذر عن قسوة المثال على قلوب البعض , و لكنه بيحصل) .. التسويق ممكن يكون لـ “دين” .. أنا أتفق مع اللى شايفين إن سيدنا محمد عليه الصلاة و السلام , هو أفضل مسوّق فى العالم , لإنه نجح فى إقناع عدد ضخم من الناس بالدين اللى كان بيدعو إليه , بشكل استمر أكتر من 1400 سنة حتى الآن , و سيظل حتى قيام الساعة بإذن الله .. و هنا أكيد حتلاقى ناس بتتهمك بازدراء الأديان و التطاول على سيدنا محمد عليه الصلاة و السلام .. حاشا لله .. و لكن الناس دى لسه “صورتهم الذهنية” عن التسويق لسه ما اتغيّرتش .. التسويق الصح الحلال مش عيب ولا حرام .. و لما تكون معاييره واضحة , بيسهل التفريق بينه و بين أى فكرة غلط أو مشينة ..

يا رب تكون نقطة الحرمانية اترد عليها كده ..

✿ ❀ ✿ ده مش دورنا أو تخصصنا كصيادلة ..

اسم الله عليك يا غالى .. و إيه هو دورنا أو تخصصنا ؟؟ .. الدوا ؟؟!! .. رائع .. زى الفل .. طب ليه بنلاقى ناس صيادلة بتشتغل فى مصانع الكيماويات و المنظفات ؟؟ .. عشان بيفهموا فى الكيميا اللى حضرتك ممكن تكون نسيتها أو بتدرسها حاليا و مش لاقي لها قيمة .. ليه بنلاقى خريجين صيدلة بيشتغلوا فى شركات مستحضرات التجميل ؟؟ .. عارف ليه ؟؟!! .. لإنهم حبّوا الكورس بتاع الـ cosmetics اللى أخدوه فى سنة تالتة فى مادة الصيدلانيات , و حسّوا إنهم يقدروا يتميزوا فيه , و مشوا ورا اللى بيحبوه , و نجحوا فيه بالفعل .. , أفضل من أى صيدلى , اتغصب على إنه يقعد فى صيدلية مش بيحبها , و يعامل ناس مش بيعرف يفيدهم , لمجرد إن أبوه عاوز يفرح بيه كصيدلى فى الصيدلية .. و بعد ما أهله كلهم ينتقلوا إلى الدار الآخرة , يبدأ يكرر نفس المشكلة مع عياله , و يفكر إزاى يخليهم يدخلوا المجال اللى كان هو بيحلم بيه .. هندسة مثلا !! .. و تستمر المأساة , بسبب إن كل واحد بيشتغل حاجة مش شايف نفسه فيها ..

من فترة بسيطة , كتبت عن ” نشأت ” خريج الصيدلة , اللى قرر إنه ما يشتغلش بالصيدلة , و يفتح ستوديو تصوير .. و فيما بعد , بقى أكتر واحد ناجح فى دفعته , لإنه مشى ورا حلمه اللى بيحبه , و ما دوّرش على تخصصه و دوره اللى ممكن يكون أجبر عليه .. و تقدر تشوف البوست بالكامل من هــنـا ..

صديق حديث بقى , مش حاقول اسمه عشان ما يزعلش منى , فرحت جدا لما لقيته فتح كافيه راقى جدا فى أحسن حتة فى دمنهور , و بقيت عميل شبه دائم عنده .. مع إنه خريج صيدلة .. لو كان قال لحد من 3 سنين بس إنه حيفتح كافيه , كان زمانه اتهاجم أكتر منى (هههههههههههه) .. , و لكن هو صدّق حلمه , و ها هو نجح فيه حاليا !! .. و انا من هنا باحيّيه دايما , زى ما كنت باحيّيه زمان , لما كان بيهتم بمواهبه و ينمّيها مع أجيال اتدربت على تنمية مواهبها تحت إيديه .. و قريب جدا حنشوفه ع التليفزيون بإذن الله , على فكرة ..

مش باقول لك اشتغل تسويق غصب عنك .. و لكن يا سيدى لو كنت بتحب التسويق و الفيسبوك , أديك لقيت باب جديد ممكن تخبط عليه و تمشى فى طريقه .. مش بتحبهم ؟!! .. ان شالله ما عنك اشتغلت تسويق ولا وعيت تجيب ملّيم من الفيسبوك .. ولا تزعّل نفسك .. بس سيب اللى بيحبوا الكلام ده , يمشوا ورا حلمهم و ما تتريقش عليهم ..

ولا باقولك برضه ما تطوّرش نفسك علميا و تتتخلي عن دورك كصيدلي و لكن كل الفكرة ان دي طريقة تقدر من خلالها تزوّد بيها دخلك الإضاااااااااااااااااافي

الدنيا واسعة .. ما تضيقهاش الله يكرمك .. و ما تبصش من خرم ضيّق و تشوف منه مجالات شغلك .. احنا – عشان كده مخصوص – قدّمنا لك “البللورة السحرية” , (تقدر تبص عليها من هنا) و اللى بتخليك توصل لأنسب المجالات بالنسبة لك ضمن 13 مجال صيدلانى .. طب و اللى مش حيلاقى نفسه فى واحد من المجالات دى ؟؟!! .. يولّع فى نفسه بعد التخرج ؟؟!! .. ولا يشتغل حاجة بيحبها , و يحاول يوظّف فيها 5 سنين أو أكتر من دراسة الصيدلة ؟؟!! .. العقل بيقول إيه هنا ؟؟!!

بس بالمناسبة , انت بتشتغل تسويق من غير ما تحس ! .. حتى لما بتقعد فى صيدليتك , انت بتعمل تسويق لصيدليتك و أخلاقك الخاصة , من غير ما تقصد .. ابقى حاول تمنع نفسك بقى , عشان التسويق عيب و كخة .. اتفقنا ؟؟!! ..

✿ ❀ ✿ حنشتغل عند الأطباء ؟!! .. مش عيب ..

نرجع تانى لـ “الصورة الذهنية” .. أول ما حضرتك بتقول فى السؤال “عند الأطباء” , مش “مع الأطباء” , يبقى حضرتك بتتخيل القصة على إن الصيدلى , حيبقى صبى طبيب , و الطبيب بيذله بفلوسه , عشان يعمل له شاى و قهوة , و مش بعيد يربطه فى شجرة و يجلده 100 جلدة كل يوم , و ممكن يطفّى السجاير فى صدره , عشان يحسّ بقيمته !! .. بالله عليك مش كنت بتفكر بالطريقة دى ؟!! ..

تيجى نغيّر الصورة لو سمحت ؟!! .. الفكرة إنك حتشتغل “مع” الطبيب لمصلحة المريض .. و كل واحد فيكم عارف حدوده كويس , و بيحترم الطرف الآخر فى “الشراكة” اللى حتتم لصالح المريض .. إزاى برضه ؟؟!! .. الصفحة اللى المفروض الصيدلى يشرف عليها كـ facebook marketer , حيتنشر عليها معلومات طبية و صحية مبسطة للجمهور – اللى هو المرضى الحاليين أو المستقبليين – زى المعلومة دى مثلا .. اضغط هـــــنـا كده و شوف المعلومة دى  .. المعلومة دى لما اتقالت من سنين , كانت سبب فى إنقاذ حياة 11 واحدة أنا أعرفهم من الوفاة المبكرة بسرطان الرحم .. شوف بقى كام واحدة تانية أنا ماعرفهمش ممكن يكونوا انتبهوا للى حصل ده .. دى إفادة للمريض .. مش كده ؟؟ .. على الجانب الآخر , المعلومة دى , أنا اللى كتبتها فى 2013 .. و حصل لها انتشار عالى على الفيسبوك , و تم نشرها أكتر من 9000 مرة , يعنى بقت viral بلغة مسوّقى الفيسبوك , و ده أدّى ببساطة إلى زيادة ثقة الناس فى العبد لله , كشخص له رسالة , و حابب إنه يفيد المهنة بأى طريق سليم .. , بعد كده اكتشفت من بوست بعتته ليا صديقة فاضلة , إن ده كان اسمه inbound marketing , و ده نهج جديد فى التسويق , قدّمه للعالم شخص فاضل اسمه Seth Godin , يعتمد فيه على التسويق غير المباشر .. التسويق بالمحتوى .. يعنى أثبت لك إنى شاطر فى مجالى , بالدليل , مش بإنى أقول عن نفسى إنى شاطر .. و هو نظام تسويقى غير قابل للهدّ على فكرة .. لإنه قائم على زرع الثقة فى عقول المحيطين بيك .. و استمرت من يومها مسيرة تعلم النوع ده من التسويق , و اللى اكتشفت إنى باستخدمه لنفسى قبل ما أتعرف عليه ..

السؤال بقى : لو طبيب أمراض نسا و توليد , قدّم النوع ده من المعلومات الصحيحة على صفحته , و هى نتاج علمه الشخصى نفسه , ده حيزوّد من ثقة المحيطين بيه ولا لأ ؟!! .. الإجابة : طبعا أيوة .. و مش كده و بس .. ده الناس حتبدأ تتابعه على الفيسبوك من خلال صفحته المفيدة و الممتعة , و مش بعيد يدخلوا عليها يوميا , عشان يشوفوا آخر البوستات المفيدة و الجديدة اللى بيقدمها .. ده التسويق اللى نويت تقديمه فى الـ mini-course اللى أعلننا عنه على فكرة .. و معاه خبرتى الشخصية و تجارب قمنا بيها على مدار سنتين من الدراسة فى المجال ده , بشكل ديناميكى مرن .. و اللى أعتقد إن مافيهوش أى إهانة على الإطلاق ..

✿ ❀ ✿ أى عيل فى سايبر يقدر يعمل كده

ده برضه يعتمد على “الصورة الذهنية” بتاعة حضرتك عن الموضوع , و اللى أعتقد إنها اتغيرت من النقطة اللى فاتت .. الموضوع مش “تكبير صفحات” و “جمع لايكات” كما هى فكرتنا المتوقعة عن التسويق الإلكترونى أو من خلال الفيسبوك .. الموضوع نشر علم صحى توعوى سليم , مدروس و له أسس مجربة , اتطلع عليها ناس صيادلة و غير صيادلة , و نجحوا فيها جدا , و لو حضرتك ما تعرفش إن فيه مهنة موجودة حاليا اسمها Social media marketer , و لها وزنها , و الناس اللى بتشتغلها فيه منهم المحترم و اللى بيكسب منها كتير بالحلال .. و منهم اللى بيعمل بيها بلاوى و يكسب حرام .. زى أى شغلانة , و ده لإن مواقع التواصل الاجتماعى , بقى لها قوة لا يستهان بيها حاليا .. و كونك مش واخد بالك منها , أو بتحاول تتجنب النظر إليها , فدى مشكلة حضرتك ..

العيل اللى فى السايبر , مش حيقدر يصيغ الفكرة العلمية الصحية , زى ما الطبيب المفروض يوصلها .. و مش حيقدر يرد على استفسارات الناس لما يسألوه بخصوص حاجة فى مجال النسا و التوليد مثلا , زى الـ Cord Prolapse .. و دى معناها إن الحبل السرى يخرج قبل الطفل ساعة الولادة .. حضرتك عارف إن حالة زى دى , لازم لها إنها تتحول قيصرية فورا ؟؟!! .. و ده ببساطة لإن الحبل السرى بيتقفل أول ما يشمّ الهوا علطول !! .. و ده من إعجاز الخالق سبحانه و تعالى .. العيل اللى فى السايبر حيقدر يصيغ معلومة زى كده للمتابعين للصفحة ؟؟ .. قول انت بقى ..

الفكرة اللى عرضتها , لازم يقوم بيها حد له فى المجال الطبى .. مش لازم صيدلى على فكرة .. و لكن أنا قدمتها لحضراتكم , لإنى افتكرت إننا أولى بيها , و ما نضحيش بيها , لحد ما نلاقى فى يوم باقى التخصصات الطبية تستولى عليها , لإنهم بيعرفوا يقتنصوا الفرص كويس , و لهم فى الشغل و الجهد أكتر مننا .. زى ما دخلوا مجال الدعاية الطبية برضه , و جينا احنا نناااااااااااااشد شركات الأدوية إنها ما تشغلهمش , على أساس إننا الأولى و الأحق , فى حين إننا لو بطّلنا نأنتخ , و عملنا اللى علينا , مش حنحتاج نناشد حد , لإننا حنكون فاهمين شغلنا !!! .. و دى برضه وجهة نظرى الشخصية ..

الصيدلى ممكن يكون عنده ساعة فاضية من وقته , ممكن يستفيد بيها فى إفادة متابعى الصفحة علميا , و يجنى من خلالها مقابل مادى , مش عيب إننا نفكر فيه لما نحطه فى أولويته السليمة .. ما يبقاش هو أول حاجة .. و فى نفس الوقت , مش آخر حاجة .. انت فاتح الصيدلية عشان تخدم الناس و تكسب مقابل مادى مناسب .. و حضرتك فاتح عيادة , عشان تقدم للناس علمك بخصوص التشخيص و العلاج , من غير ما تقدم لهم منتج غيره , فى مقابل فلوس برضه .. العلم و المادة وجهان لعملة واحدة .. و زى ما بنقول دايما .. اللى بيبص للفلوس بس , بيبقى تاجر .. و اللى بيبص للعلم بس , بيقفل صيدليته , عشان مش بتشتغل .. و فى النهاية , التوازن بين الاتنين هو الحل ..

✿ ❀ ✿ الطبيب الشاطر مش محتاج تسويق

برضه دى وجهة نظرك .. فيه أطباء كتير – على خلق و علم – و لسه بيبدأوا حياتهم .. و أكيد فيه واحد منهم انت تعرفه .. ممكن يكون لسه راجع من السفر , أو فاتح عيادته فى مكان جديد .. إنها “الصورة الذهنية” من جديد يا سادة .. مش كل الأطباء زى ما بتيجى صورتهم فى ذهن حضرتك يا أخى الكريم .. الطبيب اللى فى ذهنك , مش هو الـ target  بتاعنا أساسا .. احنا عندنا معايير نشرناها , لاختيار الطبيب اللى حنشتغل معاه .. مش حنشتغل مع الطبيب الأنزوح اللى بيبص للناس من فوق و عايش فى عيادته بالبرج العالى بتاعه , و الكشف عنده بعد شهرين لو حجزت النهاردة ..

الطبيب الشاطر محتاج تسويق لنفسه , عشان يوصل لعدد أكبر من المرضى , و يخدمهم بنفسه داخل عيادته .. الشهر ده بييجى له 10 عمليات فى تخصصه .. ممكن بسببنا , ربنا يرزقه فى الشهر التالى , بـ 15 عملية فى تخصصه برضه , جم من ناس بتتابع الصفحة و اقتنعت برسالته و علمه و أخلاقه , اللى بتؤهله لده .. و كونك مش بتركّز فى نظرتك على الأطباء , على النوع ده منهم , فدى مشكلتك برضه .. و لكن أنا لو سألتك على عمّك الطبيب او خالك الجراح , أو حتى صديق دفعتك من أيام ثانوى أو إعدادى و اللى اتخرج من كلية الطب قريبا , حتقسم لى إنه مش زى باقى الأطباء الوحشين اللى بيبزنسوا مع شركات الأدوية , أو يخلوا المريض يجيب النوع الغالى من العلاج , أو يخلوه يعمل جراحة مش ضرورية .. للمرة المليون , كل مهنة فيها الحلو و فيها الوحش .. احنا حنشتغل مع الحلو .. لو حابب تبص ع الوحش , أو حتى تشتغل معاه .. براحتك .. و لكن تأكد إن عملك ده , ربنا مش حيبارك لك فيه .. لإنه حيبقى حرام ! ..

✿ ❀ ✿ اشمعنى الأطباء ؟؟ .. و ليه مش تسويق بالعموم يعنى ؟؟

التسويق اللى بنقدمه , قائم على حاجة – نفعت معايا على المستوى الشخصى – اسمها personal branding , يعنى تحويل الشخص نفسه – بعلمه و أخلاقه – إلى brand , يعنى زى ماركة تجارية معروفة بين الناس كده .. و ده الشىء اللى أتقنته على مدار الـ 5 سنين اللى فاتوا .. و شايف إنه أسهل من التسويق لشركة أو كيان غير معروف مين اللى وراه .. افتكر إن أحد أسباب إنك بتشترى منتجات Apple من غير ما تفكر , هى ثقتك و إعجابك بـ ستيف جوبز .. الشخص اللى عمل branding صح لنفسه .. الحملات الرئاسية و الانتخابية , كلها قائمة على نفس الفكرة .. و دى مش معناها , تلميع الشخص و خلاص .. و إنما فى طريقتنا – اللى مش ممكن تتقلد – التسويق قائم على علم الشخص نفسه ..

مين من المهن ممكن تقبل كصيدلى إنك تتعامل معاه , عشان تسوّق لشخصه , بدون حساسية ؟؟ .. كنت فاكر إن الإجابة الانسب هى الطبيب (و تحديدا الجراح , زى ما حنقول كمان شوية) .. على أساس إنه فى المجال الطبى و مننا و علينا .. و لكن لو عممنا الفكرة , تحب تشتغل مع مدرسين خصوصيين مثلا ؟؟ .. و يسوقوا برضه لنفسهم , من خلال العلم اللى حينشروه للطلبة .. و على فكرة , واحد منهم , هو إيهاب رمزى , أو مدرس السوشيال ميديا اللى انتشر بفيديوهاته على الفيسبوك و اليوتيوب , عشان بيصلح طرق النطق فى الانجليزى .. أهو ده بيعمل branding زى الفل لنفسه .. و ممكن يكون حد أو أكتر ماسك له صفحاته ع الفيسبوك .. و ممكن يكون هو ماسكها بنفسه .. مش فارقة .. و لكن انا باتكلم فى الفكرة نفسها ..

التسويق لكيانات غير معروف مين اللى وراها , ممكن يكون أصعب , و لكنه برضه مدروس .. و ممكن تلاقى ناس تشتغل فيه .. و إليكم مثال حى بالبوست ده , و اللى أخدت منه صورة بعد ما نزل بيوم واحد … قولوا لى رأيكم .. ده تسويق ولا مش تسويق ؟؟

1

الفكرة ممكن تتعمم فيما بعد كده , و تلاقى ناس من كل المهن الشريفة , بس ناس ممكن تعتبرها “ياااى” .. زى السباكين مثلا و الحلاقين و غيرهم من أصحاب المهن اللى كتير من الصيادلة بيتعالوا عليها , و هم فى أمس الحاجة لها , بيشتغلوا تسويق من خلال الفيسبوك .. و طبعا حتلاقى ناس تاخد السطرين اللى فاتوا , و تنطلق بيهم و يقولوا إنى بادعوا إن الصيادلة يمسكوا صفحات السباكين و الحلاقين .. الناس اللى زى كده , إوعى ترد عليهم .. ولا حتى تعمل لهم لايك لو سمحت .. دول ربنا يعلم بيهم و باللى فيهم .. مالناش دعوة يا موهيي !! ..

مفيش حاجة اسمها البضاعة الجيدة تروّج عن نفسها .. حتى لو الموضوع كان انتقال للسمعة من شخص إلى شخص بعد ما شاف جودة البضاعة , فده فى حد ذاته نوع من أنواع التسويق , و هو الاعتماد على الـ word of mouth .. فيه أطباء – و صيادلة – تانيين بيطلعوا فى التليفزيون عشان يقدموا محتوى علمى , و يحطوا فى شريط تحت الشاشة , أو جنبهم فى الصورة , عنوان العيادة و رقمها !! .. ده تسويق برضه .. الكل محتاج تسويق لنفسه أو لفكرته .. و لكن الطريقة هى اللى بتختلف .. و كل اللى حصل إننا عرضنا على حضراتكم فكرة جديدة ..

✿ ❀ ✿ ليه الـ mini-course بـ 294 جنيه ؟؟ .. سبوبة صح ؟!!

بصراحة انا ماكنتش ناوى أتكلم عن النقطة دى على الإطلاق , من باب إنها تفضل سر , و لكن بما إننا بنقول كل القصة النهاردة , يبقى ليه لأ ؟؟!! .. ببساطة انا قلت فى المقال الأول إننا مش بنحتكر العلم .. و اللى يبحث عن أى مصطلح من المصطلحات اللى قلتها فى المقال الأول أو التانى , على جوجل , حيلاقى طوفان من المعلومات الضخمة الهائلة فى وشه , و يبدأ هو بقى يمزمز براحته .. و لكن – بنفس فكرة الطبيب – انا قررت إنى أنقل ده لحضراتكم مع عمل شوية مجهود فيه .. و لن أدعى إنى مش طالب منه أى مكسب .. لا طبعا .. لو عدد كبير اشترك معانا , أكيد فيه مكسب ليا , و ده شىء لا أخجل منه .. و لكن طالما لم أحتكر العلم , يبقى مش عيب بإذن الله .. الطبيب بياخد فلوس فى مقابل الكشف ليه ؟؟ .. هو ما قدمش شىء عينى للمريض .. و لكن على العكس , قدّم خبرة و معلومات و سهر سنين , عشان يتعلم المعلومات دى و يفيد بيها المريض بشكل عملى .. مع الفارق , انا شايف إنى باعمل نفس القصة .. لو مش عاوز تروح للدكتور عشان تتعالج , فيه مواقع كتير بتساعدك على الوصول للتشخيص الصحيح , استخدمها , و لما المرض يتفاقم , ابقى روح لدكتور كشفه أغلى 5 مرات , عشان تخف بعد ما غلبت ..

نفس القصة باطبقها من 5 سنين , فى تقديمنا لباقتنا التدريبية Learn Pharmacy At Home .. بنقول إنها بتساعدك فى الصيدلية , و ناس كتير اقتنتها بسعرها الحالى , و اتغيرت حياتهم المهنية إلى الأفضل من خلالها , و أعرف صيدلى زميل قرب يفتح صيدليته بالفعل , شافها 4 مرات بفضل الله , و يعترف بتأثيرها اللى شجعه على فتح الصيدلية , بعد ما كان خايف من الخطوة دى !! .. و لحد دلوقتى ناس تانية بتقرر إنها تفشل و تتخبط فى صيدلياتها أو فى تدريبها الصيفى لو كانوا طلبة , لمجرد إن الباقة سعرها مبالغ فيه بالنسبة لهم .. و لكن تقول إيه فى عقلية المصرى الرائعة ؟؟!! .. هى كده و حتفضل كده فترة محترمة , على حد توقعى .. و الشاطر بس هو اللى بيبدأ يفكر بطريقة مختلفة و جديدة و خارج الصندوق قدر الإمكان ..

✿ ❀ ✿ ليه ما تشتغلش انت الشغلانة دى ؟

قلت من شوية إنى باقدم باقتى التدريبية بالفعل , و كمان متواجد فى الصيدلية أغلب فترات اليوم , و مش باخاف من الحسد لو قلت إنى بفضل الله ممكن أكسب فى الشهر – سواء من الصيدلية او الباقة أو من أى مصدر دخل آخر – ما يكفينى عن تنفيذ فكرة جديدة زى كده .. و لكنى بالفعل طبّقتها بنفسى على نفسى و على آخرين .. و نتج عنها إن بينوّرنى على الخاص أكتر من 80 لـ 100 رسالة يوميا , ما بين استفسارات صيدلانية و مهنية و شخصية و غيرها , بافضّى لها نفسى بشكل شبه يومى بالعافية , ساعتين أو تلاتة كل يوم الصبح بعد الفجر .. فسعادتك , انا – بفضل الله – ما عنديش وقت إنى أنفذ الفكرة دى بحذافيرها زى ما باعرضها لحضرتك , عشان خاطر مصلحتك , مش مصلحتى .. و لو مش عاجباك , سيبها , و ما تتعبش دماغى !! .. و لو عاوز تطبقها من غير ما يبقى ليك علاقة بيا , يا سيدى اتفضل , مش حاقول لك حاجة .. و لكن الناس اللى معانا فى الـ mini course حيبقى لهم أحقية الدخول على الجروب السرّى اللى حنعمله و نساعد المتدربين معانا من خلاله , و نقدم لهم كنوز التسويق بشكل دورى بإذن الله , و نقيّم معاهم الصفحات اللى حيديروها كمان , زى ما قلنا … و ده فى حد نظرى , أهم من الـ mini-course نفسه ..

✿ ❀ ✿ أسوّق لصيدليتى أحسن

يا سيدى سوّق براحتك .. فيه صيدليات كتير بتسوّق لنفسها ع الفيسبوك و لها صفحات ناجحة .. منها سلاسل كبيرة , و منها صيدليات مفردة .. دى حاجة حلوة و كل حاجة .. و لكن فكر معايا فى الحالة اللى جاية دى ..

لو انت مستخدم للفيسبوك من محافظة الدقهلية مثلا , و شفت صفحتين .. الصفحة الأولى لصيدلية بتقدم دوا , موجود زيه فى أى صيدلية تانية .. و الصفحة التانية لطبيب بيقدم علم متجدد بينتجه بنفسه أو بينقله بشكل جميل .. فى الحالتين ثقتك فى الصفحتين و أصحابهم حتزيد .. و لكن لما تيجى تتحول من مستخدم للفيسبوك , لمنتفع بالقيمة اللى بيقدموها .. إيه اللى حيحصل ؟؟ .. ببساطة حتروح للطبيييييييب اللى اعجبت بصفحته عشان تكشف .. و بعده حتنزل تجيب الدوا من أقرب صيدلية .. و بعد ما تروّح , ممكن تبقى تدخل ع الخاص بتاع صفحة الصيدلية , عشان تسأل إذا كان الدوا صح ولا غلط , و ممكن تسأل على طريقة الاستخدام و الأعراض الجانبية كمان !! .. و ده حصل مع صيدليات كتير عملت كده .. و ده أدّى إلى أن الصفحة تقفل ببساطة بعد فترة بسيطة .. و صديقى د. ممدوح عز , و صيدليته بأسيوط , من أقوى الامثلة على كده .. (ممكن تشوفها من هــنــا ) ..

✿ ❀ ✿ طب اشمعنى الجراحين ؟؟ ليه مش أطباء عاديين ؟؟

ببساطة , عشان العملية مع الطبيب بتفرق ماديا أكتر من الكشف … و ده بيخليه يوافق لو اتعرض عليه إنك تدير صفحته من بيتك , فى مقابل 3000 جنيه شهريا .. أما لو طبيب مش جراح , ممكن يرفض , مهما كان كشفه غالى , و عدد الكشوفات اللى بتيجى له على مدار اليوم .. و يا رب تكون القصة كده واضحة فى سطرين أهو ..

✿ ❀ ✿ هل الطبيب يقبل يسوّق لى ؟؟

دى برضه قصة “تنطيط” و سمعة مهنة للأسف , مع كامل احترامى لكل اللى سألوا السؤال ده بصراحة .. أنا عاوز أفهم : إيه المانع إن خريج كلية طب محترم , يكون بيحب مجال التسويق و الـ social media و يتفق معايا على إنه يدير صفحتى الخاصة ؟؟ .. الموضوع مش سبّة يعنى ولا عار .. و زى ما اتكلمت عن صيدلى فتح كافيه .. ممكن أتكلم عن طبيب صديق عزيز جداااااااااا , و يعمل بالصحافة فى واحدة من كبريات الصحف حاليا !! .. و ده بجانب شغله كطبيب برضه .. هل هو كده أساء لمهنته ؟؟ .. ولا هو الموضوع خاص بالعلاقة المشطشطة بين الطبيب و الصيدلى ؟؟ .. غيرة و حقد و تعالى متبادل بين أعضاء كتير من المهنتين على بعض !! .. فى حين إن الدنيا أبسط من كده .. و الحياة أقصر من إننا نفضل نتعالى على بعض و نشوف مين فينا كعبه عالى ع التانى !! .. ارتقوا الله يكرمكم ..

✿ ❀ ✿ طب لو الطبيب غلط و موّت بنى آدم ؟؟ .. مش المسئولية عليا ؟؟

نفس الفكرة نسوقها بشكل جديد .. و لو تم التسويق لصيدلية , و طلع منها علاج غلط , هل المسئولية عليك ؟؟ .. طب لو العلاج موّت بنى آدم .. هل عليك مسئولية ؟؟!! .. الإجابة تعتمد على نوع الخطأ .. هل هو متعمد ولا عن غير قصد ؟!! .. يعنى برضه لو دكتور نسا و توليد , أخطأ فى يوم عن غير قصد , و البيبى مات فى بطن الأم قبل ما يخرج , هل كده المفروض نعدمه أو نقفل له العيادة ؟؟!! .. فكر فى السؤال ده بالعقل شوية , بعيدا عن العواطف … لا طبعا .. العيادة بتكمّل و الدنيا بتمشى , زى بالظبط لما بتغلط و تطلّع دوا مكان دوا داخل الصيدلية .. هل عملت كده عن عمد ولا بغير قصد ؟؟!! .. أما بقى لو كان الطبيب ده متخصص فى عمليات الإجهاض للأجنة غير الشرعيين , ففى الحالة دى , العمل معاه – سواء بمقابل مادى أو ببلاش – يعتبر حرام شرعا !! .. لإنك ساعدته فى الإثم .. حلوة التشبيهات دى .. صح ؟؟

لازم تفتكر إننا – فى التسويق الصح , مش المقلد – مش حنخطف مرضى طبيب من طبيب تانى .. ولا حنجيب سيرة طبيب منافس بالسوء .. ولا حنوقّع بين طبيب و صيدلى .. .. كل الكلام ده تسويق قذر , مش ده اللى حنعلمه للناس اللى حتشتغل معانا أو نوت تزوّد دخلها بالحلال من خلال اللى حنقدمه إن شاء الله ..

✿ ❀ ✿ طب ليه قلت ع اللى بيشتغلوا بره مصر إنهم بيهينوا كرامتهم ؟؟

بصراحة ده شىء لازم أعتذر عنه , و كان ناتج عن إنى فقدت أعصابى امبارح فى لحظة من اللحظات , و أنا أكرر اعتذارى .. و لكن انا وقعت فى خطأ التعميم للأسف .. و هو إنى وصلت للناس إن كل اللى بيشتغلوا فى الخارج بيهينوا نفسهم .. مع إنى كنت أقصد اللى بيرضى بكده , و هم مش قليلين للأسف من زملائنا , اللى بيخرجوا من البلد بحثا ورا المال و فقط , و يعملوا لدى الكفيل بشكل مهين .. أنا ضد ده .. و لكن لو كنت سافرت – أو ناوى تسافر – و معاك أهلك و أطفالك بشكل يحافظ عليهم , و تشتغل بشكل راقى من غير ما حد يذلك أو يتحكم فيك لمجرد أنك أجنبى عن البلد أو غريب عنها .. و انا أعرف ناس بتشتغل بالطريقة دى برضه .. لإنهم بيضيفوا قيمة محترمة للمكان اللى بيشتغلوا فيه , و قليل اللى يقدر يضيفها زيهم .. و كلهم أصدقائى و حبايبى .. فانا أعتذر بشدة عن النقطة دى لو كانت وضح من كلامى إنها تخص كل اللى بيشتغلوا بره مصر .. و أرجو قبول اعتذارى ..

و فى نهاية كلامى , باشكر كل الناس اللى انتقدت الفكرة , و حفّزتنى لكتابة الكلام ده , لتوضيحها و نشرها بشكل أوضح للناس , و باشكر كل اللى وثق فينا , و ما انتظرش المقال ده للتيقن من جودة الفكرة , و قرر يحجز الـ mini-course بـ SMS على رقم 01008916220 , و ما تعبش باله بالاستفسار عن سر إن سعره بـ 294 جنيه , مش 300 جنيه !! ..

˙·٠•● Ƹ̵̡Ӝ̵̨̄Ʒ ●•٠·˙ و أخيرا خالص بقى , تابعونا على الأكونت الشخصى بتاعنا (من هــنــا) , عشان حنقدم خلال ساعات , الكتاب العلمى الأول لينا “حوارات صيدلانية (الزتونة)” , مجانا للتحميل فى 64 صفحة عالية الجودة , بدون ما تدفع ولا مليم فى مقابله , عشان احنا ماديين و بنشتغل دايما بنظام السبوبة و كده ..

رجاء أخير .. لمجرد إن ماحدش من اللى هاجمونى أو هاجموا الفكرة , يفوق متأخر لما يلاقى الفكرة بتنجح بإذن الله , من غير ما تهين المهنة ولا حاجة , يا ريت الناس اللى تشوف المقال ده , تبقى تبعته لهم لو ما وصلش لهم فى الوقت المناسب , عشان تبقى الفكرة وصلت لهم برضه بالكامل , و لما يختاروا الاستمرار فى طريقهم , بدون أى دخل إضافى حلال , يبقى مالناش ذنب , و يكونوا هما أصحاب قرارهم إن شاء الله ..

و أخيرا كالعادة : أحبكم فى الله ..🙂

أحمد الجويلى

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s