‏الدليل الوافى‬ و 6 ‫‏نصائح غالية‬ من أجل ‫‏تشويه‬ أفضل


‫#‏الدليل_الوافى‬ و 6 ‫#‏نصائح_غالية‬ من أجل ‫#‏تشويه‬ أفضل ..😀 ..

.
1) .. ‫#‏بلاش_أسماء‬ ..
ذكرك للأسماء , حيخلّى القارئ يبحث عن الاسم الجارى تشويهه , و يدخل على بروفايله , و مش بعيد يتابعه لمجرد إنه يتأكد من صدق افتراءات حضرتك .. و ساعتها ممكن جدا يقتنع بيه هو شخصيا , و ينقلب عليك .. و الأهم إنه ممكن ينفّعه فى يوم من الأيام , فتتحرق انت و ريحتك تطلع و العياذ بالله .. (يعنى من الآخر عملت له دعاية مجانية عند ناس ما تعرفهوش) !!🙂
.
2) .. ‫#‏ارسى_على_تهمة‬ ..
ركّز على شائعة واحدة , و انطلق بيها فى كل حتة , لإن الموضوع بالكيف مش بالكم , و مش معنى إن افتراءاتك على ضحيتك كتير , يبقى كده وقوعه حيبقى أسهل , .. لا يا غالى .. ركّز على سهم واحد , و اطلقه صح , و إن شاء الله يجيب أجل الفريسة و نخلص بقى .. >_<
.
3) .. ‫#‏اختار_تهمة_مش_عندك‬ ..
حاول قدر الإمكان تبعد عن التهم اللى تم إطلاقها زمان عليك , لإن كل ما حد يقرا الكلام اللى بتكتبه , ممكن يسأل نفسه : طب و إيه الفرق كده ؟؟ .. يعنى التهم المعلبة القديمة , زى النصب و المادية و الجشع و التدليس و الكلام ده كله , بقى ممكن إطلاقها على أى حد:/ .. حاول تبتكر تهمة مش فى القاموس , و انطلق بيها ..
.
4) .. ‫#‏خليك_بوشّ_واحد‬ ..
عيب لما تطلق الشائعة أو تروّّجها أو تكتب كومنت عند حد فى بوست يظهر لأصدقاؤه بس , و تروح للضحية تتملقه و تتمحلس له , على أساس إنك كده واد فتك .. صدّقنى يا غالى , الفيسبوك كله أوضة و صالة .. و ممكن ربنا يوقعك فى شريك فى جريمتك الأخلاقية , و يقوم واخد لك screenshot من الخاص عنده بصورتك جنب كلامك , و ينشره , و ساعتها بيبقى شكلك كلـ…. احم .. زبالة يعنى ..😀
.
5) .. ‫#‏انتظر_انتقام_ربنا‬ ..
على مدار 29 سنة من حياتى ماشفتش مخلوق افترى على حد , إلا و تابعت مسار حياته , و لقيت ربنا بينتقم منه فى الدنيا قبل الآخرة .. و الغريب يا مؤمن , إن الانتقام غالبا بيكون من نفس نوع الفرية اللى بيفتريها المواطن مطلق الشائعات .. و ده عشان ربنا يورّينا عجائب قدرته طبعا .. يلّا يا عم .. هنية لك , ربنا حيكرمك بانتقام مخصوص على مقاسك😉 ..

6) .. ‫#‏ابدأ_فى_البناء‬ ..
لو خلاص يا سيدى , أرضيت شهوتك الانتقامية , و أشبعت ميولك الافترائية , حاول تنتج بقى .. بلاش تورّينا احنا حتعمل إيه .. و لكن ضيف شىء للحياة بشكل مختلف , و ما تبقاش متلقى باصص للناس فى رزقها و مستكتره عليها .. و آمن بإن الرزق مكتوب , و إنك لو سعيت , ممكن ربنا يزرقك من وسع , من غير ما يقل رزق الشخص اللى بتنفسن منه ..🙂 ..
..

و يا رب تكون استفدت من الـ 6 نصايح دول , لإنهم بصراحة من خلاصة خبراتى فى الأيام اللى فاتت🙂 ..

卝 ❀ ✿¸¸¸.•*´¯`✿ ❀ ✿ ❀ ✿ ❀ ✿¸¸¸.•* ´¯`✿ ❀ . ◊

و قبل ما اختم الموضوع ده حابب  اسرد موقفين افتكرتهم , العامل المشترك بينهم أبويا , و الفارق بينهم حوالى 19 سنة ! .. نطّوا فى دماغى , لما شفت اللى بيحصل لى اليومين دول زى شريط السينما اللى بيجرى بسرعة ..😉 ..

00سنة 1996 , كان عندى 10 سنين .. عدّيت على بابا و هو بيحلق دقنه (أيامها كان لسه بشنب😀 ) , و سألته : بابا .. أعمل إيه لو حد شتمنى بأمى فى المدرسة ؟؟ .. أبويا ساعتها بصّ لى بغضب لحظى لمدة ثانية أو اتنين , و رجع بص فى المراية قدّامه , و تظاهر باللامبالاة , و قال لى باقتضاب : تسكت و تعمل نفسك ما سمعتش حاجة .. بصراحة انا كنت حاتجنن .. أمى غالية عليا جدا , و ما اقدرش إنى أسمع شتيمتها بودنى و أسكت .. سألته باستغراب : إزاى أسكت ؟؟ .. دى أمى .. , ساعتها ابتسم , و شطف وشّه , و قال لى : هو مش بيشتمك بأمك , و لا بيشتمك انت , و لكن بيستفزك لإنه شايفك شاطر فى المدرسة و هو لأ .. مش هو بليد ؟ .. قلت له : آه .. , فقال لى : عشان كده , انت ممكن تتصرف بـ 4 طرق , تحب تعرفهم ؟؟ .. فقلت له : أيوة ..

خرج معايا فى الصالة , و قعدنا سوا , و قال لى :
= أول طريقة إنك تردّ عليه الشتيمة بشتيمة زيها , و فى الحالة دى , مش حنخلص , و لما ييجى المدرس أو المدير عشان يصلح بينكم , حيعاقبكم انتوا الاتنين زى بعض , طالما انتوا الاتنين شتمتوا بعض .. فقاطعت : بس هو اللى بدأ !!  😮  فقال لى : الغلط ما فيهوش مين اللى بدأ .. و لكن فيه إنكوا انتوا الاتنين شتمتوا بعض بالأم .. و عشان كده انتوا الاتنين حتتساووا !! .. و كمان حتبقى نزلت لنفس طبقته اللى نفسه إنك تنزل لها ! .. و تتشغل بقى عن الدراسة , و نفضل فى مشاوير ع المدرسة , و مروااااح و مــــــجــــــــىّ , و فى الآخر , تفوت عليك انت دروس كتير , و برضه حتخسروا بعض لحد ما تسيبوا المدرسة و كل واحد يروح فى حاله ..
تانى طريقة بقى إنك تسكت زى ما قلت لك .. بس تسكت عن ضعف .. و انت حاسس إنك متضايق إنه شتمك بوالدتك , و انت ماعرفتش تردّ , عشان هو أتخن منك مثلا , أو مش حتعرف تضربه لو اتعاركتوا , و فى الحالة دى برضه , انت الخسران , لإنه متعود ع الشتيمة , فشتمك و حينسى إنه شتمك , لكن انت حتفضل فاكرها له , و كل ما تشوفه فى المدرسة بعد كده , ممكن يبان عليك إنك مخنوق منه و كارهه .. و برضه نبقى كده ما وصلناش لهدفنا الكبير ..
.
– يعنى مش ده اللى كنت تقصده لما قلت لى أسكت ؟؟
= لا يا احمد .. انا قصدى لسه ما جاش ..
.
تالت طريقة , هى إنك تسكت عن قوة .. إزاى بقى ؟؟!! .. عارف قصة حكيم المدينة اللى دخل عليه بلطجى , و ضربه بالقلم ؟؟ ..
.
– لا .. مش عارفها .. هو ضربه ليه ؟؟
= الحكيم فعلا سأله نفس السؤال ده بعد ما تمالك أعصابه بسرعة , فقال له إنه عمل كده , عشان راهن واحد صاحبه “بلطجى برضه” على إنه يقدر يضرب حكيم المدينة بالقلم , و بكده كسب الرهان ..
– طب الحكيم عمل إيه ؟؟
= الحكيم ضحك و قال له : بس انا مش حكيم المدينة , حكيم المدينة قاعد هناك أهو .. و شاور له على شرطى المدينة , و اللى راح البلطجى عشان يضربه بالقلم فعلا , و أول ما حصل ده , الشرطى قطع له إيده فى ساعتها قدام كل الناس اللى قاعدين .. و لما سألوا الحكيم عن سر اللى عمله , قال لهم : ضربته بيد غيرى ..
.
– يعنى أعمل إيه ؟؟ .. أحاول أوقّعه فى شر أعماله يعنى ؟؟
= طب ممكن تصبر لحد ما تسمع الطريقة الرابعة ؟؟
– حاضر ..
.
= الطريقة الرابعة , هى إنك تسكت و انت واثق و مطمئن إن ربنا حيجيب لك حقك و زيادة , فى الوقت المناسب , و يورّيك انتقامه من اللى ظلمك , طالما انت خليته وكيلك فى المشكلة .. تعرف تقول “حسبى الله و نعم الوكيل” يا احمد ؟؟ .. دى معناها إنك خليت ربنا يتولى القضية بالنيابة عنك .. عارف لما تجيب محامى شاطر قوى , عشان يمسك قضيتك السهلة بالنسبة له ؟؟!! .. تقعد ساعتها و انت حاطط فى بطنك بطيخة صيفى .. التشبيه مع الفارق , و لله المثل الأعلى .. أهو ربنا بقى بيدافع عنك , أول ما تقول “حسبى الله و نعم الوكيل” , فى الدنيا قبل الآخرة , بس المهم ما تستعجلش , لإنك ممكن ما تلاحظش اللى حيحصل بسرعة , و لكن بالنسبة لك مثلا , ممكن تلاقيه الحصة الجاية يتذنب , و ممكن ما يتذنبش , و لكن يسقط فى السنة بحالها .. و ساعتها حتفتكر الكلام اللى باقوله لك دلوقتى ..
.
– يعنى هى دى الطريقة اللى انت عاوزنى أنفذها ؟؟ .. طب إزاى أتعامل معاه بعد كده ؟؟
= هى دى بالظبط .. و ما تستناش مخلوق يجيب لك حقك .. ربنا يمهل و لا يهمل .. توكّل عليه هو , مش حد تانى .. و لو زميلك ده كلمك بعد كده , حاول تعامله كويس ..
.
– o.O ..  أعامله كويس ؟؟!! .. ده شتمنى ..
= انت مش حتعامله هو .. انت حتعامل ربنا .. كل ما يشتمك , تخيل ميزان حسناته و ميزان حسناتك , و الحسنات بتتنقل من عنده لعندك .. و لو حبيت تزوّد حسناتك , ابتسم فى وشه , و تخيّل كل ابتسامة و هى بتتقل ميزانك أكتر و أكتر طالما واخدها بالنيّة دى إن شاء الله .. و خليك فاكر إن دى هى الطريقة الوحيدة , اللى ممكن تتفوق فيها انت أكتر , و يتغير هو كمان و يحبّك , و ممكن يقتدى بيك , و تنجحوا انتوا الاتنين , و تبقى انت كده ساعدته يبقى حد كويس من غير ما تحسّ .. المهم تخليك فاكر إنك بتعامل ربنا , مش بتعامله هو ..

.

.

.

18

.
من يومين بقى و انا راجع معاه فى العربية , قلت له ع اللى بيحصل معايا ع الفيسبوك , فضحك ضحكة خفيفة , و قال لى :

= زعلان ؟؟ ..
– لأ ..
= ليه ؟؟ ..
– عشان كله فى ميزان حسناتى إن شاء الله ..
= جدع .. تبقى فاكر اللى قلته لك زمان .. أقول لك على حاجة تفرحك كمان ؟؟
– خير يا حاج ؟؟
= بيقولوا إن عبد الحليم حافظ لما كان بيلاقى الناس بطّلت تتكلم عليه , كان يوزّ الصحفيين اللى يعرفوه من تحت لتحت , عشان يطلعوا عليه أى إشاعة , تخلى الناس تتكلم عنه أكتر , و يفضل ع الساحة , فيسمعوه أكتر لما ييجى فى الراديو أو التليفزيون .. فما تزعلش .. ده كله فى مصلحتك , طالما انت مش بتعمل حاجة غلط .. ربنا يقويك ..

– و نعم بالله يا حاج .. بس والله انا مش زى عبد الحليم😀 .. أنا صوتى حلو , بس مش للدرجة دي😉😛 ..

 = انا عارف إنك فاهمنى .. المهم تخلّى ربنا قدّامك و راقب اللى حيحصل , و استعجب من حكمته و كرمه و فضله , لما ياخد لك حقك , و يزيدك انت رفعة و قبول بين الناس ..
– ربنا يرزقنا التوفيق و الإخلاص و القبول يا حاج ..

.
#حدث_بالفعل #بتصرف_بسيط
#ربنا_يخلّيك_لينا_يا_حاج_أسامة
#انت_و Mama Samia #طبعا 😀  ..

 19

إذا بقيت مع الله , 

و أرضيته فى عملك و حياتك , 

فلن يستطيعوا أن يصلوا إليك 

أو يشوهوا سمعتك .. 

ربما يستطيعون أن يصوبوا عليك بنادقهم , 

و لكن قبل انطلاق الرصاصة , 

ترتعش أياديهم 

من تأييد الله لك ..

مهما ألقوا عليك من أوساخهم , 

فلن تنال من طهرك , 

طالما ظللت تنسب الفضل لله 

قبل أى شخص .. 

و قبل أى شىء ..

إذا عملت أنت .. هم سيتكلمون ..

إذا بنيت أنت .. هم سيتشاكسون ..

و إذا بلغت ما تتمناه .. , 

سيقولون أنه يحب الظهور ..

إذا أفحمتهم بالرد , .. 

اتهموك السفسطة ..

و إذا تجاهلتهم , .. 

اتهموك بالبرود ..

اعمل أنت و اجتهد .. 

فلن يرضى عنك هؤلاء أبدا .. 

اسع فقط إلى رضا الله .. 

و اخشه قدر استطاعتك

د. أحمد الجويلى  ..

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s