9 نصائح جويلية يجب أن تطبقها فى ليلة الامتحان


1

انا مرّيت بنفس الزنقة دى كتير .. و سألت ناس أكتر عن أفضل الطرق اللى كانوا بيتغلبوا بيها على توتر و قلق الليلة دى .. و أكيد الهدف من كده , بيكون إننا نحل بأفضل طريقة فى الامتحان نفسه تانى يوم ..

و عشان كده , اللى حاقول لك عليه النهاردة , هو نتيجة خبرات شخصية , و تجميع لأهم النصايح المركزة من أكتر من مصادر خاصة بالخبراء فى مجال التعليم و علم النفس و خلافه .. من الآخر , حطّ النصايح دى حلقة فى ودنك , و ابدأ فى تطبيقها من الليلة لو تقدر بإذن الله ..

1) .. لازم تنام .. لازم تنام .. لازم تنام ..

مفيش حاجة اسمها “أطبّق ليلة الامتحان” .. انت كده بتؤذى نفسك و فاكر إنك حتبقى فايق , و لكن للأسف , جهازك العصبى ممكن يفضل فايق طول الليل , و ساعة الامتحان نفسه , يطالبك بالنوم بقى , و تبقى مش عارف تحلّ ولا تنام !! .. و ياما شفت ناس من زمايلى فى لجان الامتحان بـ”تقيّل” ربعاية كده فى أول الامتحان , و توصّى المراقب يبقى يصحيهم !! .. و على إيه الغلب ده يا ابنى ؟؟ .. ما تنام فى بيتكوا قبل ما تيجى !! ..

2) .. اهتم بآخر 3 ساعات ..

القاعدة بتقول إن بنسبة 80% فيه أسئلة حتشوف إجاباتها و انت بتراجع فى آخر 3 ساعات قبل النوم – أو قبل الامتحان – و عشان كده , لا يفضل إنك تذاكر جزء جديد أول مرة تشوفه , فى الفترة دى , و إنما المفروض تهتم بالأجزاء اللى ذاكرتها كويس , و تراجعها بطريقة سريعة , بأسلوب التصفح , أو نظرة طائر محلّق على المنهج بالكامل , من غير تركيز ع النقط اللى مش فاهمها أو محتاجة حفظ من البداية خالص !! .. من الآخر , فى الفترة دى , اللى نعرفه – و نركّز عليه – أحسن من اللى ما نعرفهوش !! ..

3) .. ذاكر بالطريقة اللى تريّحك ..

ما تسمعش كلام اللى كانوا بيقولوا “ما تبقاش فرقع لوز , و ذاكر و انت قاعد” , أو “ما تذاكرش على خلفية موسيقية” .. يا عم ذاكر بالطريقة اللى تعجبك , المهم إنك لما تيجى تفتكر اللى ذاكرته , تلاقى نفسك فاكره فعلا , .. و حاول إنك ما تجربش طريقة مذاكرة جديدة عليك فى الأيام المزنوقة دى .. لإنك حتتشغل بتطبيقها , عن استيعاب المعلومات نفسها !! ..

4) .. إوعى تنزل من غير فطار ..

إوعى تسمع كلام اللى يقولوا لك “خليك خفيف” , أو “الفطار بيكبس ع المراوح قبل الامتحان” .. سعادتك محتاج جلوكوز , عشان مخك يعرف يدعبس جواه ع المعلومات و يجيبها من قفاها ! .. و ده مش حيحصل و هو على لحم خلاياه الرمادية !! .. و ما تفتكرش إن المنبهات اللى ممكن تشربها قبل الامتحان , زى القهوة أو النيسكافيه و غيرهم , ممكن يقوموا بالدور ده !! .. انت ممكن تفضل مصحصح زى الفل بسببهم فى الامتحان , و لكن برضه مش قادر تستدعى المعلومة , أو حتى تفهم السؤال !! .. و فى الآخر انت مش حتفطر ديك رومى يعنى , عشان تقول لى إنه حيكبس على مراوحك !! .. عن نفسى , كنت باضرب سندوتش فول على فلافل (أو اتنين) قبل الامتحان بساعتين , برغم إن أصدقائى كانوا بيضربوا كف على كف – من الاستغراب يعنى – لما يشوفونى باعمل كده , و مع ذلك كانت بتبقى النتيجة مميزة بفضل الله .. و طبعا مش لازم تعمل زيّى .. سندوتش مربّى أو أى فطار معتاد بالنسبة لك حيكون زى الفل إن شاء الله …

5) .. تجنب المشاكل العائلية و بر والديك كويس ..

احنا ماشيين أصلا بدعاهم و بركتهم !! .. ما تجيش ع اليومين دول تحديدا , و تتعصب أو تتنرفز عليهم , أو تعامل الحاجة بشكل غير مناسب , لمجرد إن الامتحانات ضاغطة عليك و مضايقاك .. ما تتحججش !! .. اطلب من الست الحاجة إنها تدعى لك , بعد ما تبوس إيديها ليلة الامتحان , و قبل ما تنزل الصبح .. ! .. أعرف ناس كانوا بيعملوا المستحيل فى المذاكرة , بس أمهم كانت مش راضية عنهم , و ييجوا فى الآخر إنهم سقطوا فى أكتر من مادة ! .. أعتقد دلوقتى إن العلاقة بقت واضحة قدامك ..

6) .. قرّب من ربنا صح ..

دى ممكن تكون نقطة بديهية بالنسبة لك .. أعرف زملاء كتير كانوا يقطعوا صحوبياتهم مع البنات اللى يعرفوهم أيام الامتحانات بس , ولّا اللى كانوا بيحطّوا الطرحة و يصلّوا الفرض بفرضه , من زميلاتنا !! .. هو الواحد مننا كده .. بيعرف ربنا أكتر فى الزنقة .. بس بالله عليك , استثمر الفرصة دى , فى إنك تقرب منه صح بقى .. قرّب و ما تبعدش تانى .. ما تقرّبش على المستوى الظاهرى و بس .. قرّب من جوه كمان .. طبعا ما تنساش الدعاء و الصدقة بنيّة تيسير الأمور .. و دى لها مفعول أقوى من السحر .. السحر الحلال .. بس ابقى ادعى لى لما تشوف النتيجة إن شاء الله ..

7) .. حضّر المطلوب للامتحان من بالليل ..

ما تنساش اقلامك و مسطرتك و موبايلك و بطاقتك و رقم جلوسك و الآلة الحاسبة لو الموضوع فيه أرقام , و غيره من الحاجات المعروفة دى .. أحسن ما تقوم الصبح تدوّر عليهم و ترتبك لما ما تلاقيهمش !! .. سندوتشك فى شنطتك .. و مطوتك فى جيبك .. اللى يقول لك غششنى قطّعه .. غش انت (اللمبى ستايل😀 ) ..

1

8) .. خصص وقت للراحة .. فكّ عن نفسك ..

مش حاقول لك ابعد عن الفيسبوك , سواء ع الموبايل أو اللاب .. انت ممكن تقول لى إنك بتتابع التطورات على جروب الدفعة , أو بتسأل زمايلك على حاجات , و تراجع معاهم .. و انا حاصدّقك (مش حاعمل زى الحاج لما يعدّى عليك و يقول لك : ابقى قابلنى لو فلحت طول ما البتاع ده قدامك😉 ) .. كل المطلوب إنك تحدد الوقت اللى حتقعد فيه عليه , حتى لو كان 5 دقايق بعد كل 30 دقيقة فى المذاكرة ! .. حقك تتطمن ع الـ news feed برضه !!😉😀  .. و لكن عشان الدنيا ما تبوظش منك , أنصحك بالـ Application ده , بالتحديد لو كنت من مدمنى الموبايل و تصفح الفيسبوك و تويتر بالذات من خلاله , أثناء فترات المذاكرة .. البرنامج اسمه Locker for study .. و تقدر تحصل عليه من هنا ..

https://play.google.com/store/apps/details?id=com.mjsoft.apps.sl

من المهم برضه – للحفاظ على صحتك البدنية – إنك تقوم تتمشى لمدة 5 دقايق فى الأوضة – بعد كل 30 – 45 دقيقة من “الدح” و القعدة المزمنة ع الكتاب .. عشان نظرك ما يضعفش يا عمنا , و فى نفس الوقت , القعدة الكتير ممكن تجيب التهاب فى البواسير (بجد) لا سمح الله ..

9) .. حل الأسئلة السابقة ..

الهدف من النقطة دى , مش إنك تتوقع الأسئلة اللى ممكن تيجى لك بنفس النص , و إنما تتعوّد ع الطريقة نفسها , سواء كانت اختيار من متعدد , أو كتابة مقالات , أو التعليق على حالات , أو ستركشرات مثلا .. اعرف الدكتور حيجيب الامتحان إزاى , عشان ما تتصدمش لما تشوف الأسئلة .. انت محتاج الخطوة دى , من غير ما توتّر نفسك قبل الامتحان , لو ما عرفتش تحل أى سؤال , نطّ علطول , و اعرف إجابته , بس بعد ما تبذل كل جهدك فى استنتاج الإجابة .. و المهم تحاول تربط الإجابة الصحيحة بالفهم لمحتوى السؤال , يعنى مش تعرف إن السؤال ده كانت إجابته رقم C و خلاص .. لا .. الدكتور فى الامتحان , مش لازم يجيب السؤال بالنص يعنى !! .. و ساعتها لو اخترت C ممكن تلبس اسود , لا قدر الله ..

˙·٠•● Ƹ̵̡Ӝ̵̨̄Ʒ ●•٠·˙

و بكده , أكون خلّصت الـ 9 نصايح اللى عندى , و أرجو إنهم يكونوا أفادوك .. و لو ده حصل بالفعل , حاول تفيد بيهم حبايبك , من خلال نشرهم دلوقتى ع الاكونت بتاعك ع الفيسبوك و تويتر و غيره , عشان ننقذ ما يمكن إنقاذه , و إن شاء الله تتوفقوا جميعا فى اختباراتكم يا أبطال , و نفرح بنتايجكم الجامدة المشرفة , فى كل المواد بعون الله ..

.

Ƹ̵̡Ӝ̵̨̄Ʒ Ƹ̵̡Ӝ̵̨̄Ʒ بالمناسبة , ممكن تشوفوا مقالنا السابق , عن لمّ المادة فى 72 ساعة  بإذن الله😀 , من هنا .. http://wp.me/p2YNXX-E0

.
‫#‏يا_رب_تنجح_يا_تتح‬ 😀 ..

يارب تنجح يا تتح

‫#‏أحبكم_فى_الله‬ ..

أحمد الجويلى

3 responses to “9 نصائح جويلية يجب أن تطبقها فى ليلة الامتحان

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s