الاسم العلمى و نظرية الكومودينو


مفيش وقت أكتب مقالات طويلة من الحجم العائلى – كعادتى – عشان أقول لكم على قصة ‫#‏نظرية_الكومودينو‬ اللى دوشت دماغكم بيها خلال اليومين اللى فاتوا , و ارتباطها بفكرة ‫#‏الاسم_العلمي‬ للأدوية أو الروشتات .. و عشان كده , حاقول الأفكار اللى عندى متجزئة فى البوست ده , و أهلا بكل الناقدين و المؤيدين .. و يا ريت اللى ناويين يشتموا , يركّزوا كويس فى البوست , و يحضروا اتهاماتهم المسبقة , عشان الكلام حيبقى حلو قوى على صحتهم إن شاء الله .. و ربنا يقدرنا ..😀
.
نبدأ على بركة الله ..
.
1) .. كان ياما كان  :) .. كان فيه سلطان :) .. بيحب يصيد الغزلان .. و كان مفيش حاجة اسمها أحذية و نعال .. الناس كانت بتمشى حافية , بما فيهم السلطان .. أرض المدينة كانت ممهدة و ما تعوّرش .. و لكن أرض الغابة بتاعة الصيد , كانت مليانة شوك و حجارة .. جمع السلطان كل الوزراء , و سألهم : هو انا حافضل أتعوّر كتير كده كل ما أنزل الغابة للصيد ؟؟ .. أنا عاوز حل .. فأحد الوزراء قال : بسيطة , نجيب 100 ألف حيوان , و نقتلهم , و ناخد جلدهم , نبطّن بيه الغابة , عشان رجلين سعادتك ما تتعورش ;) .. و لكن وزير نبيه قال : مش الحل إن الغابة تتغير عشان خاطر سعادتك , و لكن الأسهل إن حضرتك تتغير عشان تواكب الظروف .. بإننا نقتل حيوان واحد , و ناخد من جلده ما يكفى لتبطين أقدام سعادتك .. مش تبطين الغابة .. ;) .. و يقال إن دى كانت بداية اختراع فكرة الأحذية .. ;) ..
.
2) .. “ابسط يا عم .. طالما موضوع #الاسم_العلمي رجع بقوة كده , يبقى انت اللى حتبقى ع الحجر و حتـ lead الدنيا , عشان الصيادلة يلحقوا نفسهم , و يبقوا قدّه .. ” .. صديقى قال لى الكلمات دى , فردّيت بسرعة : بس انا مش شايف أصلا إن ‫#‏الاسم_العلمى‬ حل مناسب !! .. فقال لى : بس ده فى مصلحتك .. فقلت : أكون منافق عشان مصلحتى ؟؟ :/ .. و أدّعى إنه حاجة حلوة , عشان أقدم دورات و كورسات أكتر , و الناس تقتنى الباقة مثلا ؟!! o.O .. لو على كده , فطظ فى مصلحتى .. بس ما أخالفش ضميرى ..🙂
.
3) .. حمادة بيجرى فى البيت دايما من غير ما يبص قدّامه .. و فى كل مرة تقريبا , صوبع رجله الصغير , يتخبط فى رجل ‫#‏الكومودينو‬ .. يبدأ فى العياط :'( , فتيجى ماما تجرى , عشان تسكّته , و فى الآخر ما يسكتش , غير لما ماما تكلّم الكومودينو , و تقول له : بقى كده يا كومودينو ؟؟!! .. :o .. كده تضرب حمادة فى صوبعه يا كومودينو ؟؟!! ؟؟ >_< .. طيب .. خد يا كومودينو .. و تروح ماما ضاربة الكومودينو :D , و يضحك حمادة , بعد ما حس إنه أخد حقه من الكومودينو :) , و يعتقد يوم بعد يوم , إنه مش بيغلط , و إن أى حد – و أى شىء – غيره , ممكن يغلط .. و لما يكبر , يفضل يطالب الحكومة و الناس اللى حواليه بإنهم يطبقوا قوانين و لوائح , عشان ظروفه تتحسن , من غير ما يحسّ بمسئوليته عن الوضع اللى هو فيه !! ..:/

كومودينو
.
4) .. من 1) و 2) و 3) .. نستنتج إنى حاليا مش حاسس إن فكرة الاسم العلمى , ممكن تكون هى الحل الانسب لمشاكل مهنتنا , حتى لو على مستوى الـ Community Pharmacy بس !! .. و ده بعد ما كنت – فى بداية ظهور الفكرة – من أشد مؤيديها , و منتجى فيديوهات توعوية بخصوصها , تقنع مشاهديها بأهميتها !! .. تقدر تشوفها بالمناسبة فى أول 4 حلقات من الموسم الثالث من‫#‏رسائل_صيدلانية_يومية على Youtube , و لكنى فى يوم – من سنتين كده – سألت نفسى : و لو الاسم العلمى اتطبق فعلا بالنسبة للأدوية , يا ترى المشاكل حتتحل ؟؟ .. و حتتحل إزاى ؟؟!! .. و نزلت بخيالى شوية على أرض الواقع , و تخيّلت المريض المصرى لما يدخل الصيدلية العادية بتاعة أى حد فينا , و معاه علبة فاضية , لنوع معيّن .. و ليكن زنتاك 150 مجم 💊 مثلا (بعد ما بقى اسمه رانيتيدين 150 مجم 💊 , طالما الاسم العلمى اتطبق) .. و الصيدلية مفيش فيها النوع ده , أبو علبة‫#‏أبيض_فى_أزرق‬ و الشريط منها بـ 10 جنيه .. فالصيدلى حيحاول يصرف رانيتاك 150 مجم 💊 مثلا (اللى بقى اسمه هو كمان رانتينيدين 150 مجم 💊 , بعد تطبيق الاسم العلمى) .. و لكنه لسه بـ 7 جنيه للشريط , و العلبة لونها ‫#‏أخضر‬ .. و سألت نفسى السؤال اللوذعى : هل المريض حيقبل ياخد الشريط الموجود , بدل الشريط اللى هو عاوزه و مش لاقيه ؟!! .. و لقيت إن الإجابة فى 80% من الحالات : مستحيل o.O .. و لكنه حيقول – بعنفوانه و جبروته : معلش يا دكتور .. انا عاوز ده , عشان باستريّح عليه :( .. و على الجانب الآخر فى 20% من الحالات , المريض حياخد العلاج الموجود (الأخضر أبو 7 جنيه) 💊 مش بسبب تشابه الأسماء , و لكن لثقته فى الصيدلى اللى واقف قدّامه و اقتناعه بأخلاقه أو بعلمه أو ممكن خوفا منه , لو كان المريض ضعيف الشخصية مثلا .. و لكن الشاهد أن تشابه الاسم العلمى فوق العلبتين , ما أفادنيش فى أيتها حاجة على الإطلاق .. بل إن فيه ناس – حاليا , بدون تطبيق الاسم العلمى – ممكن تاخد شريط رانيتاك بدلا من زنتاك , لمجرد إنها‫#‏وثقت‬ فى الصيدلى , أو حتى بعد ما اتصلت بالطبيب و أكّد لها إنهم بنفس التركيب !! ..
.
‫#‏ملحوظة‬ هامة / الكلام ده على study متواضعة , أجريتها بنفسى فى استطلاع رأى بسيط , تقدر تشوف نتايجه لما سألنا أصدقاءنا الكرام (أكتر من 90 فرد) , على مدى قدرتهم على إقناع المريض بصرف ‫#‏سيفوتاكس‬ 1 جرام حقن , من شركة Eipico , بدلا من شركة T3A , أو العكس , برغم إنهم بنفس الاسم التجارى قدّام المريض .. و لكن العلب و الأسعار مختلفة طبعا !! .. اللينك من هنا .. 👇
.
https://www.facebook.com/ahmed.elgewaily/posts/10152789819956207
.
5) .. انا فى الـبوست ده , مش حاتكلم عن أى شىء تمت مناقشته قبل كده على لسان زملاء مؤيدين أو معارضين لفكرة الاسم العلمى , يعنى مش حاتكلم عن الفروق الأخلاقية بين الصيادلة و بعضهم , أو الصيادلة و الأطباء , فى البزنسة و الديلز اللى ممكن تتعمل مع شركات الأدوية .. و لا حاتكلم عن مستوى الصيدلى العام , اللى ممكن ما يعرفش الفرق بين الـ No How , اللى يخلّى البنادول بيجيب مفعول أفضل من أبيمول (و باقى الباراسيتامولات اللى فى السوق) , برغم إن البنادول و الأبيمول مصنعين داخل نفس الشركة .. شركة جلاكسو !! (فما بالك لو شركات مختلفة) .. ولا حاتكلم عن إن الـ assistants الكرام , ممكن يتعلموا الصرف بالاسم العلمى فى غضون شهرين , و مش حيبقى فيه إجبار للصيادلة اللى بتسيبهم فى الصيدليات لوحدهم , على إنهم يوقفوا معاهم صيدلى برضه , لإن ده المفروض يكون طالع من ضمير صاحب الصيدلية نفسه , مش كرقابة خارجية , أو خوفا من التفتيش الصيدلى .. ولا حاتكلم عن إن الطبيب المصرى – فى حالة تطبيق الاسم العلمى – ممكن ببساطة يكتب اسم الشركة فى الروشتة جنب كل اسم علمى , و ده حتقوم الشركات بيه ببساطة , بل ممكن يقول للمريض , العلبة الأولى دى لونها أصفر , و التانية أحمر , و التالتة أخضر .. و لو الصيدلى عطاك حاجة تانية , سيبه و امشى .. و ساعتها , نبقى شربنا أكبر حملة فكرية , استمرت 4 سنين و أقنعت الصيادلة بإن الحل لكل مشاكلهم – أو لأغلبها – فى تطبيق الاسم العلمى !! :/ … فى حين إننا لو فكرنا شوية كده بس , حنلاقى إن الحل أبسط من كده بكتير , و ده حنقوله فى نهاية الكلام بإذن الله ..
.
6) .. كل ما أقول لحد من أصدقائى الأعزاء , المؤيدين لفكرة الاسم العلمى , ألاقيه يتضايق و يزعل , و يقول لى بحسرة و استنكار : انت مش شايف الخسارة بالملايين قد إيه ؟؟!! :o .. انت مش شايف الإكسبيرد اللى بنشربه كل شهر ع الرفوف ؟؟!! :o .. انت مش شايف طمع الشركات و الأطباء و نقابة الأطباء و وزارة الصحة و .. و .. و ؟؟!! .. و هنا علطول , بتنط فى دماغى قصة ‫#‏حمادة_و_الكومودينو‬ , لما رمى اللوم ع الكومودينو , فى حين إنه كان المفروض هو اللى يفتّح و هو ماشي ;) , و يبدأ فى تغيير نفسه بشكل حقيقى , على مستوى فردى , يضمن إن صيدليته تبقى رقم 1 فى منطقته .. و ساعتها كان المريض حيثق فيه , و يبقى له عميله المخلص , اللى ممكن جدا يسمع كلامه باحترام و ينفذه – أيا كان – أكتر من كلام أى حد تانى !! .. أعزائى , انا مش باتكلم عن الواقع الأليم – اللى انا شايفه زيكم بالظبط – و لكن أنا باتكلم عن الحل الأنسب و اللى اتجرب على مدار الـ 3 سنين اللى فاتوا على فكرة , و نفع بجدارة بفضل الله , و اللى ما ينفعش – فى وجوده – نطبّق الاسم العلمى – او نطالب بتطبيقه – و بعدها نقعد نفكر فى الأسلوب الأفضل , اللى “أجبر” بيه المريض إنه ياخد منى الدوا اللى هو مش مقتنع بيه !!! :/ … يا جماعة انتوا ناس عاقلين o.O .. الحل بسيط , و هو الحصول على ثقة المريض , و دى أساليب بيتم تدريسها , إما من لقاء واحد بينك و بين المريض فيما يسمى بالـ one-minute call , أو بشكل تدريجى لأصحاب المنطقة اللى انت فاتح فيها الصيدلية , و اللى بيبقى مكسب الصيدلية معتمد عليهم بنسبة 80% فى معظم المناطق !! ..
.
7) .. أصدقائى الأعزاء , و متابعينا الكرام .. قبل ما تفتكروا إنى مش عاوز الخير للمهنة , ولا الرفعة للصيادلة , اتعب نفسك ثوانى فى تذكر – على سبيل المثال لا الحصر – حملتنا ‫#‏أنا_صيدلى_فاهم_شغلى‬ , اللى قدّمناها على مدار 3 سنين حتى الآن , لايف و أونلاين , و كنا بنحاول نقوم بيها بكل الطرق الممكنة .. والله مش من باب المنّ أو الرياء – و ربنا يزرقنا الإخلاص :) – و لكن عشان أفكرك بشكل عملى شوية , إنى مش رايد للمهنة دى إلا كل خير :) , و لكن ضد استنزاف الوقت و المجهود , فى أفكار و مشاريع , لن تزيدنا – فى رأيى المتواضع – إلا تواكل و عناد مع الأطباء :( , و اللى مسئوليتهم الأولى هى صحة المريض , أيا كانت أخلاقهم إيه بقى .. دورنا استشارى للطبيب يا سادتنا الكرام .. و لا يوجد بلد على وجه الكرة الأرضية تطبّق الأوهام اللى زرعها فى عقولنا من سبقونا , بإن الطبيب فى الدول المتقدمة بيكشف , و الصيدلى بيعالج :) .. الكلام ده محض وهم و افتراء !! .. بالظبط زى لما نقول إن الكومودينو كان غلطان !! .. أعلى مرتبة وصل إليها الصيدلى الممارس فى البلدان المتقدمة , هى الصيدلة الاكلينيكية فى المستشفيات , و بيكون رأى الصيدلى فيها استشارى بخصوص الدواء , مش إجبارى بهدف التنطيط على الطبيب و الضغط على رقبته أو عمل راسنا براسه .. لتقريب الفكرة , عمرك شفت طبيب تحاليل أو طبيب أشعة أو طبيب مناظير أو طبيب تخدير بيحاول يمشّى كلامه على الطبيب الرئيسى المتابع للحالة ؟؟!! .. غريبة , مش كده ؟؟ .. و عمرها ما تحصل .. لإن الموضوع ‫#‏تكامل‬ مش تنافس و طحن فى العظام .. !! .. طول ما بنبصّ للطبيب بنظرة عدائية , حيبص لنا بنظرة عدائية برضه !! .. ◀ ▶
.
8) .. الحل إيه ؟؟ ✔✔✔ .. ادخل على YouTube , و ابحث عن ( restoring patient trust ) , حتلاقى فيديو مدته 15 دقيقة تقريبا , كان تم تقديمه فىTEDxShibinelKom من سنتين , و حتعرف فيه وجهة نظرنا بالتفاصيل .. عشان تتأكد إن الحل – فى رأينا البسيط – هو إن كل صيدلى و صيدلانية , يكونوا على قدر المسئولية بصفة خاصة .. و لو عدد الصيادلة اللى فاهمين شغلهم زاد بنسبة معيّنة , يسمّيها أستاذى و قدوتى د. Taher Hegab بـ ‫#‏الكتلة_الحرجة‬ , فساعتها المشاكل حتتحل لوحدها بإذن الله , لما المريض المصرى يلاقى نفسه كل ما يدخل صيدلية , بيقابل صيدلى أو صيدلانية على قدر المسئولية , ساعتها ثقته فى الصيدلة المصرية ككل حتبقى مناسبة إنه ياخد العلاج و هو مغمّض , لإنه بقى مدرك إن الصيدلى عاوز مصلحته , قبل ما يفكّر فى إنه يكسب و خلاص !! ..
.

˙·٠•● Ƹ̵̡Ӝ̵̨̄Ʒ ●•٠·˙

فى نهاية الكلام , لو اقتنعت بالكلام – و عندك استعداد تتشتم و تتخوّن زيى – اتفضل share براحتك للبوست , و خد نيّة إنك بتوفّر على ناس كتير مجهود و وقت السعى فى دروب لا تؤدّى إلا إلى مزيد من التوهان – مع كامل احترامى لكل من يقف عليها طبعا – و نيّة الدال على الخير كفاعله كمان لو حبّيت ..
.
ملحوظة أخيرة .. البوست اللى بتقراه ده , المفروض يكون التطبيق العملى على‫#‏اختبار_الثقة‬ اللى أقمناه من يومين تلاتة برضه ..

اللينك من هنا .. 👇

, و طلعت نسبته إن فيه ما يقرب من 1000 شخص ممكن يثقوا فينا و فى إننا مش حنقول شىء بنيّة سيئة أو أنانية بإذن الله .. و دول أول ناس أنتظر منهم الدعم – بعد توفيق ربنا سبحانه و تعالى – لما الطلبة و الصيادلة يشوفوا البوست ده و نبدأ نتخانق بسببه لا قدر الله .. و أرجو إن حبايبنا ما يخذلوناش و يتواجدوا معانا فى النضال الفكرى – كبيرة قوى الكلمة دى معلش – اللى ممكن نخوضه الفترة الجاية إن شاء الله ..
.

Ƹ̵̡Ӝ̵̨̄Ʒ Ƹ̵̡Ӝ̵̨̄Ʒ

‫#‏و_على_الله_التوفيق_و_القبول‬
‫#‏أحبكم_فى_الله‬
.
أحمد الجويلى

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s