أفلا يتدبرون القرآن .. مع د. أحمد الجويلى


كمحاولة مختلفة لكسر النهج ده السنة دى فى رمضان , حاحاول مجتهدا إنى أطبّق – على قدّى – قول الله : “أَفَلَا يَتَدَبَّرُونَ الْقُرْآَنَ” .. و أرجو من الله الإخلاص و التوفيق و القبول , و إنه يقدرنى على توصيل رسالة يومية مكتوبة زى دى , فى خواطر سريعة حول آية أقراها فى كتابه العزيز , من كل جزء من الأجزاء الثلاثين إن شاء الله ..

Ƹ̵̡Ӝ̵̨̄Ʒ Ƹ̵̡Ӝ̵̨̄Ʒ

1

كلنا عارفين قصة يهود بنى إسرائيل فى سورة البقرة , لما سيدنا موسى أمرهم بذبح بقرة , عشان يعرفوا من خلالها مين اللى قتل الرجل اللى ماعرفوش المسئول عن جريمته .. أنا مش جاى عشان أعيد القصة , و لكن لفت انتباهى أثناء قراءتى لـ #الجزء_الأول من كتاب الله , إن اليهود كانوا متنطعين قوى , و كان كل هدفهم هو التعسير على سيدنا موسى , عشان ما يدبحوش البقرة , عنادا و تكبرا منهم , و ربما لعدم تصديقهم إن يمكن الكشف عن أسرار جريمة قتل بالطريقة دى , فعسّر الله عليهم , و جعلهم يذبحوا بقرة معيّنة مفيش زيها فى البلد , بمواصفات تعجيزية , لدرجة أن بعض الآثار تذكر , إنهم اشتروها بثقلها ذهب !! .. لاحظت إن سيدنا موسى فى كل مرة كان يقول لهم “اذبحوا بقرة” .. و كإنه بيقول “أى بقرة فيها المواصفات دى و خلاص” .. بس همّا غاويين يعسّروا على نفسهم !! ..
.
.
الكلام يطول , و الأفكار تتوالى فى النقطة دى , و لكن انا مش عاوز أسهب !! .. اسأل نفسك عن عدد المرات اللى عندت فيها مع ربنا – حتى بدون قصد واعى منك – و فضلت تسأل عن حكم معيّن فى الفقه , عشان فى الآخر تنفّذ اللى على هواك , زى إنك تسمع شيخ معيّن بيقول إن نوع معيّن من الخمر حلال , فتمسك فى كلامه , لمجرد إنه ينقل ما جاء فى الكتب !! .. أو إنك تفضل تضيّق على زوجتك فى ملبسها مثلا , عشان تكون أكثر التزاما , و تبحث عن فتوى غريبة , تقضى بإن ما ينفعش العينين تظهر من تحت النقاب , درءا للفتنة !! .. , و كفاية عين واحدة تظهر , لو المرأة حتتكعبل و هى مغطية عينيها .. و تكون الشمال بس اللى ظاهرة !! .. و يرجعوا يقولوا بعد كده , هما الشباب بيلحدوا ليه !! ..
.
ناس كتير نسيت اللى قالته أم المؤمنين عائشة , عن أن ما خير رسول الله صلى الله عليه وسلم بين أمرين إلا أخذ أيسرهما ما لم يكن إثما، فإن كان إثما كان أبعد الناس منه .. ناس كتير تقول بلسانها إنها بتاخد بالأيسر عند اختلاف العلماء , و لكن لما تتحط فى الاختيار , تضيّق على نفسها و تختار المرهق بالنسبة لها , و فى الآخر ما تقدرش تكمّل أو تواصل فى طريق الالتزام من فرط الإحساس بالتقيّد الزائد !! .. فى حين إن ربنا أعطانا الحرية فى حاجات كتير .. يا شيخ : مشاهدة كرة القدم حلال ولا حرام ؟؟!! .. اجعل وقتك فى طاعة الله يا ابنى .. فيفهم الشاب أن كرة القدم حرام , و أنها فى غير طاعة الله , فى حين إنه لو جعلها من باب إدخال السرور على مسلم , حتكون طاعة لله برضه !! .. .. .. يا شيخ : التليفزيون حلال ولا حرام ؟؟!! .. (2002) حرام يا بنيّتى .. كله مفاسد .. (2010) الشيخ نفسه على قناة تليفزيونية , يدعو لانتقاء المفيد من التليفزيون , و ترك المضر .. (طب ما قلتش ليه الكلام ده من زمان ؟؟!! .. البنيّة من يومها مستحرمة تتفرج ع التليفزيون !!) ..
.

و على العكس بقى , تلاقى اتباع الهوى برضه , لما صاحبنا يرمى كل كلام المشايخ , و يرفض الحجاب , و ما عندهوش مانع إن زوجته تمشى بالميكروجيب , و لما تسأله عن السر , يقول لك : استفت قلبك .. و انا قلبى مرتاح !! .. أهو ده – فى رأيى – عناد من النوع الآخر .. الله أعلم بحساب كل صنف فيهم أو رضاه عليهم و علينا أو سخطه و العياذ بالله .. و لكن ليه مش بنفكّر شوية فى القرآن , بنيّة #التدبر ؟؟ .. ولا الدنيا كلها كرّ للمصحف بسرعة و خلاص ؟؟ ..

卝 ❀ ✿¸¸¸.•*´¯`✿ ❀ ✿ ❀ ✿ ❀ ✿¸¸¸.•* ´¯`✿ ❀ . ◊

1

أثناء قراءتى لـ #الجزء_الثانى فى كتاب الله , استوقفنى – بنية #التدبر – مشهد النهر فى قصة #طالوت_و_جالوت .. اقراه كده من الصورة بسرعة , و ارجع لى تانى , .. حتلاحظ معايا شوية حاجات .. و برضه مش جايين نعيد #القصة , و لكن بنحاول ننزل بيها على أرض واقعنا الحالى , كما كان يوصى دايما شيخى الحبيب , رحمة الله عليه ..
.
#طالوت و جنوده – يقال كان عددهم من 70 إلى 80 ألف – من خيرة #الشباب القوى , راحوا يحاربوا فى #الحر الشديد , فربنا اختبرهم بنهر , و طالوت قال لهم إن اللى حيشرب منه حيكون سقط فى الاختبار , و اللى مش حيشرب منه , أو حياخد منه مقدار كف اليد , حيكون نجح فيه ! .. #اختبارعجيب , قائم على 3 حاجات المفروض تتوفّر فى الجندى المثالى : #الثقة و #التوكل .. و
..

✿ ❀ ✿ الثقة .. لو المشهد اتكرر حاليا , كنا حنلاقى ناس كتير بتشكك فى كلام القائد , اللى اختاروه طوعا , و انضموا تحت لوائه بإرادتهم , و كنت حتلاقى منهم واحد بنصّ لسان طالع يقول له : اقنعنى !! .. إزاى النهر يعدّى قدامنا و احنا عطشانين , و ما نشربش منه ؟؟!! .. عقله القاصر – يا عينى – كان لسه ما قدرش يوصل إلى إن الماء ممكن يكون غير صالح للشرب , برغم إنه ماء عذب !! .. زمان ما كانوش اكتشفوا إن فيه معادن ثقيلة , و تلوّث مائى , و مخلفات مصانع مهببة , ممكن تكون بتنزل فى النهر .. و أعتقد ما كانش فيه زمان #فوسفات  .. و لكن الشاهد إن الابتلاء جه بشكل معيّن .. ما ينفعش ساعة الحرب , تسمع الأمر من القائد , و تقول له : ادينى يومين لمّا أقتنع !! .. الحياة أقصر من كده يا عمّنا ..

.

✿ ❀ ✿ التوكل .. عارف إيه اللى حصل فى القصة بعد كده ؟ .. اللى شربوا كتير , اسودت شفاههم و غلبهم العطش فلم يرووا وبقوا على شط النهر و جبنوا عن لقاء العدو (و الكلام ده طبقا لتفسير البغوي .. مش كلامى) .. أما اللى ما شربوش أو شربوا قدر كف اليد , قوى قلبهم , و صح بدنهم , و قدروا يعدّوا النهر , بدوابهم و أمتعتهم !! .. شىء غريب .. المفروض المنطق بيقول العكس .. مش كده ؟؟!! .. هنا نرجع للأصل و نسأل : هو الكتالوج الربانى قال لك إيه ؟؟ .. قال ما تشربش .. يبقى المنطقى إن الكتالوج هو اللى يجيب نتيجة سليمة و صحيحة .. مش عقلك الخاص القاصر .. ما تعتمدش على الأسباب , و لكن اعتمد على مسبب الأسباب .. صيدليتك مش بتكسب برغم إنك بترضى ضميرك ؟؟ .. إوعى تلجأ للحرام عشان تكسب ! .. دوّر ع الحلال و انت متوكّل على الله , و هو حيساعدك .. الكتالوج بيقول كده ..

✿ ❀ ✿الإيجابية.. الناس اللى شربت من النهر , ضعفوا معنويا كمان !! .. قالوا “لا طاقة لنا اليوم بجالوت وجنوده” !! .. بقوا سلبيين , برغم إن ربنا مبشرهم بالنصر من البداية خالص , زى ما القصة بتقول !! .. أما اللى سمعوا الكلام من البداية , قالوا إييييييييييه ؟؟ .. قالوا “كم من فئة قليلة غلبت فئة كثيرة بإذن الله” !! .. ياااااااه ع الصبر و الإيجابية !! .. انزل معايا كده على أرض الواقع , و ابعت الكلام ده فى مسج مسجلة بعلم الوصول , لكل اليائسين اللى بيقولوا إن “بلدك مابقاش ينفع فيها نجاح” , أو إن “الصيدلية دى عمرها ما تكسب إلا بالمخدرات” , أو إن “البلد دى قدّامها مليون سنة عشان تتقدم” !! .. عارف نهاية القصة كانت إيه ؟؟ .. “فَهَزَمُوهُم بِإِذْنِ اللّهِ وَقَتَلَ دَاوُودُ جَالُوتَ” .. الزتونة فيييييييييين ؟؟ .. “بإذن الله” ..

卝 ❀ ✿¸¸¸.•*´¯`✿ ❀ ✿ ❀ ✿ ❀ ✿¸¸¸.•* ´¯`✿ ❀ . ◊

1

أثناء قراءتى لـ #الجزء_الثالث من كتاب ربى , مررت بقصة سيدنا زكريا , و اللى كلنا ممكن نكون عارفينها .. و افتكرت خاطرة سريعة من خواطر الشيخ محمد متولى الشعراوى , لما ذكر من وجهة نظره أن لما سيدنا زكريا طلب أن يكون له #آية , بعد ما ربنا استجاب دعاءه بالذرية الصالحة , فكانت الآية اللى أمره الله بيها , #تكليف أكتر منها #معجزة , بإنه يمتنع عن الكلام مع الناس , إلا بما يوازى عندنا لغة الإشارة !! .. و لما وقفت مع الآية شوية بنيّة #التدبر , و حاولت أنزل على أرض الواقع , و أشوف حجم التشابه اللى بينها و بين اللى بنعمله , لقيت إنه مذهل !! .. و التشبيه مع الفارق , و لله المثل الأعلى طبعا ..
.
احنا كتير بندعى ربنا عشان يحقق لنا حاجة معيّنة , و نطلب من اللى حوالينا إنهم يدعوا لنا بيها , و فى الآخر ما يكونش فيها السعادة اللى كنا متخيلينها !! .. كام مرة طلبت البنت من أهلها – و دعت ربها – إنهم يجوزوها شخص معيّن , و هو أساسا مش كفء لها .. و لما أصرّت وافقوا على مضض , فكان سبب فى شقائها مدى حياتها ؟؟!! ..
.
كام مرة دعا واحد صاحبنا إنه يبقى غنى , من غير ما يدعى معاها بالسعادة و راحة البال , فتأخر المال عنه , فقرر الحصول عليه من حرام , فجاله المال , و راحت منه السعادة و الصحة و الزوجة الصالحة كمان ؟؟!! ..
.
كام مرة بنفتكر إن الحاجة اللى بنجرى عليها هى السبيل الوحيد لسعادتنا , فى حين إنها ممكن تكون أسرع طريق للحزن و التعاسة ؟!! .. و نفتكر إن تأخير ربنا ليها , هو غضب علينا منه , فى حين إنه رحمة بينا و فضل !! .. مش باقول لك “ما تدعيش” , و لكن باقول لك “اختار اللى تسعى عليه” , و اطلبه من ربنا , و كن واثق إنه رايد بيك الخير أيا كان مكانه و زمانه , اللى ربنا مختارهم لك .. و لو كان حلمك فى حاجة معيّنة , ثق فى إن ربنا حيديها لك فى الوقت المناسب ليك , حتى لو ما كنتش شايف كده ..
.

卝 ❀ ✿¸¸¸.•*´¯`✿ ❀ ✿ ❀ ✿ ❀ ✿¸¸¸.•* ´¯`✿ ❀ . ◊

1

فى #الجزء_الرابع , شدت انتباهى الآية اللى بنقراها كتير , و حافظينها تقريبا , و اللى بتحذر المؤمنين من التراجع عن إيمانهم بمجرد وفاة النبى عليه الصلاة و السلام .. تعالوا نلاحظ فيها شوية حاجات , ..

✿ ❀ ✿ (مات أو قتل) !! ..

النبى عليه الصلاة و السلام , لم يُقتل .. ليه ربنا قال “أو قتل” ؟؟!! .. هل ده معناه إن ربنا كان بيجهّز الصحابة و المؤمنين , إن النبى ممكن ما يكونش بينهم فى يوم و ليلة .. بشكل مفاجئ يعنى ؟!! .. ربنا جهّز المؤمنين بالآية دى , إنهم يثبتوا على الدين , حتى لو كانوا طلعوا فى غزوة , و النبى قتل فى أثنائها , و افترض معاهم إنهم ممكن يرجعوا من الغزوة بدونه على قيد الحياة , و ساعتها كان لازم الرسالة تستمر , و الدين ينتشر برضه .. يعنى الخلاصة بالنسبة لك إنك تكون قوى حتى قدّام أصعب ظروف الحياة المفاجئة ..

✿ ❀ ✿ #ضد_التواكل .. بالآية دى ,

ربنا نزع من قلوب من سمعوها التواكل أو رمى المسئولية على النبى دائما , طالما هو رمز الدين الإسلامى !! .. و كإن ربنا بيفكرهم بحقيقة الحياة , و إن نهايتها الوفاة لجميع المخلوقات , بمن فيهم النبى اللى موجود بين إيديهم , و ممكن ما يتخيلوش الحياة من غيره !! .. أعتقد إن كل صحابى وصلته الآية دى , شعر إنه مسئول عن الدين برضه , و إن مش النبى لوحده هو اللى عليه الحمل و الثقل الخاص بالدين و الرسالة !! ..

✿ ❀ ✿  موقفك إيه بعد #غياب_الحافز ؟ ..

فى واقعنا الحى , ممكن نفضل نشتغل فى المكتب , طول ما المدير مراقبنا !! .. أو نغضّ أبصارنا عن بنات الناس , طول ما اختنا لسه ما اتجوزتش !! .. أو نفضل ناكل أكل صحى , طول ما احنا فى فترة الدايت !! .. طب و بعد كده ؟؟!! .. المدير مشى .. اختنا اتجوزت .. الدايت خلص .. خلاص بح ؟!! .. حتعمل الصح ولا حتنتظر وجود حافز خارجى ؟؟!! .. قيس بقى على كل حاجة فى حياتنا .. يا ترى الحافز اللى بيحركك فى حياتك , داخلى ولا خارجى ؟؟؟ .. الحافز الداخلى دايما أقوى و أطول فى فترة التأثير من الحافز الخارجى المؤقت .. النبى عليه الصلاة و السلام , كان حافز خارجى للصحابة للاستمرار على الدين و القيم الإسلامية .. و بوفاته , فيه اللى كمّلوا على الدرب , و فيه اللى ارتدّوا علانية , و أقيمت بسببهم “حرب الردة” , و فيه اللى ارتدوا فى الخفاء , و كانوا خناجر فى ظهر الدعوة الإسلامية !! .. أو ممكن ما نكونش نعرف عنهم حاجة حتى الآن .. المهم و الخلاصة : خلّى حافزك و محركك , داخلى , مرتبط بالله .. و هو اللى مش بيتغير ولا يموت ولا يزول .. و بكده تضمن استمرارك على الطريق القويم بإذن الله و فضله و كرمه ..

.
وصلت ؟؟
卝 ❀ ✿¸¸¸.•*´¯`✿ ❀ ✿ ❀ ✿ ❀ ✿¸¸¸.•* ´¯`✿ ❀ . ◊
1
أثناء تلاوتى لـ #الجزء الخامس من #كتاب_الله , بنية #التدبر , لفتت انتباهى آخر #آية فى الجزء .. و هى استفهام واضح – استنكارى – من الله , يفيد بإن الله لا يريد لعباده العذاب إن قاموا باللى عليهم من #الشكر و #الإيمان و تبعاتهم , و ده يخليك تسأل نفسك عن المشاكل اللى بتقع فيها , مش بنيّة الاعتراض على قضاء الله , و لكن بنيّة البحث عن السبب اللى خلاك تقع فيها !! .. نظرية السبب و النتيجة قابلة للتطبيق غالبا مع اللى بيحصل لنا فى الدنيا سواء هو خير أو شر !! .. و لكن المشكلة إننا دايما بنعلّق الأمور على شماعات مختلفة , و لما نغلب أو ما نلاقيش شماعة مناسبة , نقوم راميين الموضوع كله على فكرة #الابتلاء , برغم إن الابتلاء ممكن يكون بالخير (اللى المفروض نشكر ربنا عليه) أو بالشر (اللى المفروض نصبر عليه) ..
.
.
 ✿ ❀ ✿ التحدى الأكبر إن فيه ناس بتتمسك بالنظرية اللى فاتت دى – و منهم ناس مشهورين جدا – بشكل بيخليهم يتجاهلوا آيات واضحة فى القرآن , أو مش بيعرفوا يوافقوها مع كلامهم , زى لما ربنا قال في سورة البقرة : ( وَلَنَبْلُوَنَّكُمْ بِشَيْءٍ مِنَ الْخَوْفِ وَالْجُوعِ وَنَقْصٍ مِنَ الْأَمْوَالِ وَالْأَنْفُسِ وَالثَّمَرَاتِ وَبَشِّرِ الصَّابِرِينَ ) .. و هنا ربنا لم يذكر إن المؤمنين كانوا عملوا ما يغضبه أو يحيد بهم عن الطريق المستقيم , .. و مش بيقدروا يفسّروا إن ممكن يكون فيه ابتلاء بالنقم , زى إصابة طفل صغير بمرض عضال , أو أم فاضلة بعاهة دائمة , أو ما شابه من الابتلاءات !! .. و اللى لو تجاهلناها , ممكن نفضل نحيّر عقولنا للبحث عن السبب ورا ظواهر زى دى , بشكل ممكن – لما نيأس من وجود سبب له – نشكّ فى عدل الله (حاشاه) , طالما كل نتيجة كونية لها سبب بنقوم احنا بيه , زى ما بيقول أصحاب المنهج ده !! ..

✿ ❀ ✿ الصحيح فى نظرى أن الجمع بين النظريتين .. النظرية اللى بتقول إن الإنسان مسئول عن حياته بشكل كامل , و أن قراراته هى اللى تؤدى إلى مستقبله بإذن الله , مع النظرية اللى بتقول إن الابتلاء ممكن يكون بالخير أو بالشر , و لا يوجد ما يمنع الله (حاشاه) من أن يبتلى مؤمنا صالحا بشىء يبدو فى ظاهره إنه ضار , و لكن يمكن أن تكون له منافع فى الدنيا أو فيما بعد فى الآخرة .. قال رسول الله صلى الله عليه و سلم ” مَا مِنْ مُؤْمِنٍ يُشَاكُ بِشَوْكَةٍ فَمَا فَوْقَهَا ، إِلا رَفَعَهُ اللَّهُ بِهَا دَرَجَةً ، وَحَطَّ بِهَا عَنْهُ خَطِيئَةً ” .. و مش عاوزين ننسى إن النبى عليه الصلاة و السلام , أدميت قدماه فى رحلة الطائف , و كسرت رباعيته فى إحدى الغزوات , و عانى من سكرات الموت و الحمى قبل وفاته .. ما ينفعش – عقليا – نقول إنه أصيب بكل ده , بسبب ذنوب ارتكبها أو معاصى قام بيها , لإنه أساسا المعصوم عليه الصلاة و السلام ..

.
الموضوع كبير , و يطول شرحه , و محتاج تشغيل دماغ , و لكننا دلوقتى قبل الفطار بحاجة بسيطة , فحاكتفى أنا بالكلام ده , و يهمى إنى أعرف رأيكم ..
卝 ❀ ✿¸¸¸.•*´¯`✿ ❀ ✿ ❀ ✿ ❀ ✿¸¸¸.•* ´¯`✿ ❀ . ◊
1
محتاج آيات قد إيه عشان تؤمن ؟!! .. الآية دى مذهلة , و بتفسّر لك لو قريتها بنيّة‫#‏التدبر‬ , إن فيه ناس مفيش منهم فايدة , و مع ذلك , احنا مأمورين بأمرهم بالمعروف و نهيهم عن المنكر , لإن ده دورنا فى الحياة .. !! ..
.
ما تستغربش بعد كده لما تشوف عناد الملحدين اللى بيقولوا على العالم إنه جه صدفة !! .. ولا كبار العلماء اللى مستكبرين يقولوا إن الكون له خالق !! .. أصلها مش بالعلم يا سيدى الفاضل , و لكن بالهدى و الاستنارة !! .. ما تسمعش كلام اللى يقول لك : ربنا عرفوه بالعقل !! .. لا يا حبيبى .. ربنا عرفوه بالوحى .. و لما كان فيه هدى فى القلوب , استنارت و عرفت الحق ..
.
ما تستغربش برضه من تصديق آلة الإعلام المستمر عند كتير من الناس .. مش عامتهم و بس .. ممكن تلاقى طبيب او مهندس مقتنع بشىء يستحيل بالنسبة لك تصديقه .. عااااااادى خالص .. و حتى لو ظهر له الشىء اللى بينكره , و شافه بعينه , و مسكه بإيده , برضه حينكره .. الطبيعة البشرية عنيدة .. , و كل همّ الواحد مننا إنه يثبت لنفسه إنه صح .. دى غريزة , و عشان كده , ما تتوقعش من حد دلوقتى إنه يغيّر وجهة نظره بصعوبة تجاه الأشياء .. و إنما اعمل اللى عليك معاه .. وجّهه للنور .. و مالكش دعوة بقى إن كنت انت اللى حيكون لك التأثير , ولا اللى حييجوا من بعدك و يقوموا بنفس الدور بإذن الله ..
.
卝 ❀ ✿¸¸¸.•*´¯`✿ ❀ ✿ ❀ ✿ ❀ ✿¸¸¸.•* ´¯`✿ ❀ . ◊
2
كام مرة قلت فى نفسك “مستحيل كل دول يكونوا غلط” ، و قررت تمشى معاهم للسبب ده ؟؟ .. كام مرة بصيت لمراتك بصة فيها إساءة أو قلت كلمة تعايب بيها عليها ، لمجرد إنك بتشوف الممثلات و المطربات و هما فى كامل زينتهم ؟؟ .. #الآية فى قمة الوضوح ، و مش محتاجة #تفسير .. مش لازم يكون الكتير هو #الصح .. ممكن #العيب يعجبك شخصيا لصفات مغرية فيه ، و لكن طريق #الاستقامة هو #الأساس اللى المفروض نمشى عليه ..
.
عمرك فى #يوم قررت تقف مع الحق و كان اللى معاه عددهم قليل ؟؟ .. هل شغلت نفسك بانك تدور على الحق من اساسه و تنقيه من بين الشوائب اللى بتحيط بيه ، عشان تحصل عليه خالصا بدون اى باطل ؟؟
.
اسأل #نفسك الاسئلة دى لما تقرا الآية دى بنية #التدبر ، و انا متاكد انك ممكن تغير كتير من افكارك و قناعاتك لو وصلت لمغزاها بالنسبة لك بإذن #الله ..
.
卝 ❀ ✿¸¸¸.•*´¯`✿ ❀ ✿ ❀ ✿ ❀ ✿¸¸¸.•* ´¯`✿ ❀ . ◊
1
كلنا عارفين إن الشيطان ضعيف .. {إِنَّ كَيْدَ الشَّيْطَانِ كَانَ ضَعِيفاً} .. و مع ذلك , ممكن يكون بيعرف يضحك على أغلبنا فى أوقات كتير !! .. و عشان كده , أكيد عنده أسلحة إحنا مش بنعرف نواجهها برغم ضعفها .. و من وحى الآية , حنحاول نتدبر بعض المعانى , عشان نعرف إزاى الشيطان بيوسوس لنا , و إزاى نقدر نتغلب عليه بإذن الله .. فيما نسميه #فلسفة_الوسوسة !! ..
الفلسفة مقسمة لـ 4 أجزاء من وجهة نظرنا !! ..
.
✿ ❀ ✿ #الفائدة_المزيّفة .. شفت إبليس وسوس لسيدنا آدم و ستنا حواء بإيه ؟؟ .. بإنهم يكونوا ملكين , أو يكونوا خالدين !! .. لا عنده دليل على كلامه , ولا يقدر يثبت منه حرف , إلا إنه حلف لهم (قاسمهما) , .. قالوا للحرامى احلف !! .. مين قال أساسا إن آدم و حوا كانوا ممكن يكونوا سعداء لو أصبحوا ملكين أو اتكتب لهم الخلود ؟؟!! .. ياما ناس عاشت 100 سنة , و كانوا مشلولين مثلا فى آخر 30 سنة من حياتهم , لدرجة تمنى الموت !! .. اعقلها كده !! ..
.
الحل : دايما دوّر ع الفايدة الحقيقية .. و حاول تتأكد من إن الطريق اللى انت ماشى فيه هو الصح بشكل مستمر , .. قيّم حياتك دايما , و حطّ نفسك تحت ميكروسكوب المراقبة الذاتية .. و اطلب من اللى حواليك كمان يقيموك .. بشرط إن يكون فيه الخير , مش أصدقاء سوء يعنى ..
.
✿ ❀ ✿ #ادعاء_النصح .. (إنى لكما لمن الناصحين) .. إبليس بيعرض علينا طرق مختصرة – من وجهة نظره – قال إيه , عشان يريّحنا .. نسرق عشان نرتاح .. نزنى عشان نستمتع .. نقتل عشان نخلّص نفسنا من شر حد .. نشرب عشان ننسى .. دوّر ورا كل معصية – حتى لو غير دول – حتلاقى إن وراها وعد زائف بحاجة حلوة !! .. في حين إن الخاتمة من وراهم دايما بتكون منيّلة بستين نيلة !! ..
.
الحل : ما تبصش للراحة المؤقتة .. خليك نظرتك بعيدة شوية , و احسب احتمالات النجاح و الفشل من كل خطوة بتقوم بيها , و اسأل ربك التوفيق و الهدى .. و اتأكد إن أغلب السعادات المؤقتة , بييجى بعدها ندم طويل فى فترته جدااااااا ..
.
✿ ❀ ✿ #إرضاء_التعجل .. آدم بطبيعته متعجل , و همّه إنه كل شىء يتم بسرعة , لدرجة إنه كان عاوز يقوم يجرى بمجرد دخول الروح إلى جسده , قبل ما توصل إلى قدميه , زى ما روى فى بعض الأثر .. و طبعا حيكون متعجل على إنه ياكل من كل ثمار الجنة , عشان يدوقها على الأقل !! ..
.
الحل : من تعجل شيئا قبل أوانه , عوقب بحرمانه .. خليك صبور , و واثق فى كرم الله عليك , و اللى حييجى فى وقته المناسب , و المكتوب من قبل ما تتولد , و لكن الأهم إن الحلال يبقى منهجك قدر إمكانك , عشان ما يضيعش منك كل اللى بتبنيه ..
.
✿ ❀ ✿ #إشباع_الفضول .. الفضول من أغرب الصفات البشرية , .. ممكن يكون سبب فى اختراعات مفيدة , و اكتشافات عظيمة , .. أو هلاك و خراب للإنسان و العياذ بالله !! … إبليس بيعرف يلعب ع الوتر ده كويس جدا , لدرجة إنه ما قرّبش الثمرة لآدم و حواء بشكل ملموس .. هو أساسا عاجز عن إنه يعمل أى حاجة إلا الوسوسة !! .. و لكن كلماته كان لها تأثير السحر عليهم , بعد ما أشعل جواهم جذوة الفضول بزيادة !! ..
.
الـــحـــــل : مش حاقول لك : اقتل فضولك , و لكن دوّر على طرق سليمة لإشباعه .. مش لازم تحرق نفسك بالنار , عشان تشوف تأثيرها على الجلد عامل إزاى !! .. ممكن تشوى حتة لحمة فيها عشان تجرب !! .. دور على السكك البديلة , عشان تعرف تعيش بأمان , من غير ما ترمى نفسك فى التهلكة ..
.
كل دى استراتيجيات تفكير , محتاجة تدريب و تمرين للنفس عشان تستخدمها مع كل وسوسة , حنتعرض لها بعد رمضان , لما الأبالسة يتفك قيدهم للأسف , و لكن هى دى الحياة .. اختبارات متتالية , و يا رب ننجح كلنا فيها ..
كده خلصنا كلامنا عن #فلسفة#الوسوسة ..  يهمنى أعرف انطباعكم برضه عن الآية و الكلام لو قريناها بنية#التدبر ..
.
卝 ❀ ✿¸¸¸.•*´¯`✿ ❀ ✿ ❀ ✿ ❀ ✿¸¸¸.•* ´¯`✿ ❀ . ◊
1
“و إيه يعنى ؟؟!! .. الحرية مكفولة للجميع ! .. خلّى اللى يتجوز أى حد يتجوز !! .. مش مشكلتنا .. ” .. ده كان رأى كتير من اللى تضامنوا مع ‫#‏المثليين‬ , لما صدر قانون قريب فى ‫#‏أمريكا‬ , يسمح بزواجهم من بعض فى كل الولايات , حتى اللى كانوا مش بيسمحوا بكده !! .. الموضوع شائك طبعا , لإنه بيقترب فى نواحى كتير منه , من تابوه‫#‏الجنس‬ , و اللى بنتجنب الكلام فيه بشكل عام , و لكن بيننا و بين بعضنا , ممكن يكون هو الهاجس اللى غالبا بندوّر عليه .. و مع كل ده , كنت اتكلمت زمان عنه بعنوان#‏تيجى_نتكلم_فى_الجنس‬ ؟؟ (اللينك >> من هنا ) , للتدليل بس , على إن مش كل كلام فى الجنس عيب .. و لكن العيب عيب , و المسموح مسموح , و المطلوب مطلوب ..
.
من الآخر كده , عشان الناس اللى مش بتحب تقرا كتير .. خدها قاعدة : الكتالوج الربانى بتاعك بيقول إن زواج الذكر يكون من الأنثى , و غير كده , بيكون اسمه ‫#‏شذوذ‬عن المعتاد .. أما لو عاوز تعاند و تكابر , فتعالى بقى نتكلم و نشد فى شعر بعض  زى ما حتشوف في الكام نقطة اللي جاية ..
✿ ❀ ✿ مش دى خلقة ربنا ؟؟!! .. حتعترض ؟؟ .. ما هو ربنا هو اللى خلقهم كده !! ..
.
يعنى إيه خلقة ربنا ؟!! .. تعالى نفهم أولا إن الشذوذ الجنسى – فى رأيى المتواضع بعد بحث و دراسة – هو نوعين .. نوع #جينى , يعنى صاحبنا مولود كده .. و ده نسبة بسيطة جدااااااا , نتيجة خلل فى الكرموسومات , و بيكون انجذابه لنفس جنسه شىء مفسّر , و هرموناته و شكل جسمه و علاماته الخارجية بتكون واضحة , و ده النوع اللى الطب فى كل العالم , يسمح معاه بعمليات تغيير الجنس , زى ما #سيد زمان اتحوّل لـ #سالى لو تفتكروا , .. و ده ربنا خلقه بالنسبة الصغيرة دى , لحكمة , ممكن تكون إننا نحمد ربنا على كوننا طبيعيين و عاديين , زى لما يتولد طفل بـ 3 عيون , فنحمد ربنا على نعمة إننا بعينين اتنين فقط ! ..

✿ ❀ ✿  و زى ما اتضح , فالحالة لها علاج طبى حديث , زى مرضى داء السرقة مثلا , و اللى بيكون عندهم خلل فى المخ , يؤدى إلى دفعهم لسرقة أى حاجة للتغلب على إحساس سىء , و الشعور براحة مؤقتة .. خلاص , العلم وصل إلى إن حالة زى كده ممكن تتعالج دوائيا , و يتم السيطرة عليها .. و ما ينفعش نقول على أى واحد بيسرق إن دى خلقة ربنا

.
أما النوع التانى , فهو نوع #سلوكي , يعنى نشأ من فساد مجتمعى , زى الـ sexual abuse فى الصغر مثلا , أو مشاهدة الإباحية من النوع المحظور ده , بشكل بيغيّر فى طبيعة الشعور بالاستمتاع عند الطفل الصغير , و يغيّر من طبيعته اللى ربنا خلقه عليها بفطرة سوية و سليمة !! .. المشكلة هنا نفسية , و يمكن علاجها على يد متخصصين , و على مدار فترة طويلة , بعد استشارات نفسية , و تحليل سليم للسبب اللى أدّى إلى كده , و فيه مراكز نفسية شبه متخصصة فى القصة دى , و لكن لإننا بنعامل كل مشكلة بالتكتيم و التعتيم , فعدد اللى بيحاولوا يتعالجوا من الموضوع ده قليل جدا على أرض الواقع , و بيحاولوا يخفوا نفسهم فى محاولة للتشبه بخالد الصاوى فى فيلم عمارة يعقوبيان !!! ..
✿ ❀ ✿ طب إيه الخوف من انتشار الكلام ده ؟!! .. ما كل واحد حر فى نفسه !! ..
.
ببساطة و زى ما شرح د. مصطفى محمود فى كتبه , الزواج بين الذكر و الأنثى , هدفه التكاثر و استمرار وجود الجنس البشرى على الأرض .. لو عكست القصة , فده حيؤدى إلى انقطاع النسل تدريجيا و لو انتشر فى الدنيا , ممكن يؤدى إلى هلاك البشرية , و ده عكس مراد الله فى الأرض !! .. و عشان كده , لما بدأ #اللواط فى قوم سيدنا #لوط , ده كان سبب كافى جدا لإهلاكهم (بدرى بدرى) , قبل انتشار وبائهم (السلوكى) بين الناس , بشكل يؤثر على استمرار البشرية !! ..
.
و عشان كده , لو قرينا الآية بنية #التدبر , حنلاقى إن مش كل حاجة تنفع معاها الحرية .. و زى ما وصلنا زمان إلى علة تحريم #الزنا مثلا , و على أساسه تم تجريمه قانونيا كمان , فنرجو إن الناس لما تفهم إن #الشذوذ الجنسى يساوى هلاك المجتمعات اللى بتسمح بيه , بالرغم من إن الكتالوج الربانى واضح , بدون الحاجة لمعرفة العلة .. و شىء واضح فيه مدى خطورة الأمر !! ..
卝 ❀ ✿¸¸¸.•*´¯`✿ ❀ ✿ ❀ ✿ ❀ ✿¸¸¸.•* ´¯`✿ ❀ . ◊
1
بدون تعليق .. بس واخد بالك من مين اللى بيكلم التانى فى الآية ؟؟!! .. تعليقك ايه ؟؟
.
卝 ❀ ✿¸¸¸.•*´¯`✿ ❀ ✿ ❀ ✿ ❀ ✿¸¸¸.•* ´¯`✿ ❀ . ◊
1
يا عالم بكل خلقك يا رب .. #سبحانك .. فعلا فيه ناس كده .. مفيش فايدة من الكلام معاهم ، و لكن لإن دورنا هو الأمر بالمعروف و النهى عن المنكر ، يبقى لازم نستمر فى توعية الجميع ، لأن الهدى مسألة ربانية بحتة ، و ممكن تحصل على أهون سبب .. #ربنا قال لنبيه أصلا “ليس عليك هداهم” .. لانه مجرد سبب فى الهدى و مش المنوط بتحقيقه .. كل ما عليه هو السعى و التبليغ ..
.
اعمل اللى عليك بغض النظر عن النتيجة ممكن تكون ايه ..
.

卝 ❀ ✿¸¸¸.•*´¯`✿ ❀ ✿ ❀ ✿ ❀ ✿¸¸¸.•* ´¯`✿ ❀ . ◊

1

شىء معجز فى القرآن ، لما تحس إن آية معينة ، بتكلمك ، و تعلق على اللى بيحصل قدام عينيك .. واخد بالك ؟؟!! ..

نفس المؤثر يؤدى إلى نتيجتين عكسيتين ، على حسب الجهة اللى استقبلته ..

#سبحانك_ربي

卝 ❀ ✿¸¸¸.•*´¯`✿ ❀ ✿ ❀ ✿ ❀ ✿¸¸¸.•* ´¯`✿ ❀ . ◊

1

عارف ؟؟!! .. أنا الآية دى مش عاوزة تفارق دماغى خلال الـ 24 ساعة اللى فاتت !! .. باحاول أتخيّل الموقف قدر الإمكان و أطبّقه على أرض الواقع حاليا !! .. تخيّل معايا كده .. شوف التناقض الفكرى اللى الأم ممكن تكون اتحطت فيه !! .. ربنا بيقول : فإذا خفت عليه فألقيه فى اليوم .. شفت لفظ “خفتِ” ؟؟!! و وراه شفت لفظ “فألقيه” إزاى يوحى بالقسوة فى ذاته ؟؟!! .. يعنى مش “ضعيه” أو “سيّريه” مثلا .. لأ “فألقيه” , و لكن بعدها علطول “ولا تخافى ولا تحزنى” , لإن ربنا أعلم بعاطفة الأمومة ممكن تكون قوية قد إيه !! .. و عشان كده – و مع كل الطمأنة الربانية – ربنا قال “إِن كَادَتْ لَتُبْدِي بِهِ لَوْلَا أَن رَّبَطْنَا عَلَى قَلْبِهَا” , .. امتحان صعب قوى لقوة إيمان أم سيدنا موسى ! .. يا ترى احنا بنتحط فى مواقف صعبة زى دى ؟؟!! .. أكيد طبعا .. بس احنا مش بناخد بالنا .. تحب أشاور لك على مثال ؟؟
.
اللى يبقى فى حاجة ماسة للمادة .. الفلوس يعنى .. و يتعرض عليه رشوة أو تتاح له السرقة بأى شكل , ممكن يسدّ حاجته , و لكن بالحرام .. هل بيفكّر إنه لما يرفض المال الحرام ده , يبقى كإنه بيرميه “فى اليم” , و لكن رجوعه إليه بالحلال و تعويض ربنا ليه بيكون بمثابه “إنا رادوه إليك” بس لما تعمل اللى عليك و تتوكل على الله و تاخد بالأسباب .. فكر فيها كده .. الكون ده كون مين ؟؟ .. مين اللى خلقه ؟؟ .. الله سبحانه و تعالى .. مش كده ؟؟!! .. لما انت تعمل – بنية التقوى – حاجة , و تحتسبها لوجه الله , ربنا حيكون معاك كريم فى كونه اللى بيتحكم فيه كما يشاء , و حيعوضك .. لما أم موسى وثقت فى وعد ربنا لها , ربنا ردّ لها ابنها فعلا , و جعله من المرسلين ..
.
من ترك شيئا لله , عوضه الله خيرا منه .. طب و من يفعل شيئا لله ؟؟!! .. أكيد ربنا حيبارك له فيه .. قوانين منطقية .. و لكن لما نيجى ننفذ (فى موضوع المال الحرام مثلا) ممكن ثقتنا فى عقلنا , تبيّن لنا إن ده تضييع لفرص ممكن ما تتكررش , فى حين إننا بننسى إن ده كون ربنا , و هو اللى بيوزّع الأرزاق , و فى لحظة ممكن تلاقى حد بيكلمك عشان يديك فلوس – بأى حجة – لتعويض المال الحرام اللى رفضته ده , بس احنا محتاجين نثق فى الله , أكتر من ثقتنا فى عقلنا ..
.
الشاهد إن الاستنتاجات المنطقية – بعقلنا القاصر – أحيانا مش بتكون حقيقية , و بيحصل عكسها بشكل ربانى يصعب تفسيره إلا بإنه توفيق من عند ربنا أو إنها إرادته وحده لتسيير الأمور بشكل يحيّر العقول !! ..
.
ثق فى الله , زى ما أم موسى وثقت فى وعده لها ..

 卝 ❀ ✿¸¸¸.•*´¯`✿ ❀ ✿ ❀ ✿ ❀ ✿¸¸¸.•* ´¯`✿ ❀ . ◊

 أنفق فى سبيل الله , أو أدّى الناس حقوقهم اللى متأخرة عليا أولا ؟؟ .. ولّا أؤجل إنفاقى ده و إعادة حقوق الناس , لحد ما ربنا يفتح علينا , و ساعتها نبقى نتكلم فى الإنفاق و الحقوق ؟؟!! .. ربنا أجاب على السؤال ده ببساطة لما قال : لَنْ تَنَالُوا الْبِرَّ حَتَّىٰ تُنْفِقُوا مِمَّا تُحِبُّونَ (آل عمران – 92) ..

.
‫#‏أنفق_أولا_ينفق_الله_عليك‬

 卝 ❀ ✿¸¸¸.•*´¯`✿ ❀ ✿ ❀ ✿ ❀ ✿¸¸¸.•* ´¯`✿ ❀ . ◊

مَّا يَفْعَلُ اللَّهُ بِعَذَابِكُمْ إِن شَكَرْتُمْ وَآمَنتُمْ وَكَانَ اللَّهُ شَاكِرًا عَلِيمًا (النساء147) ..
.
الآية دى فى حد ذاتها كافية لإثبات إن أى حاجة بتحصل لك بشكل يضايقك فى الدنيا هى رسالة ربانية هدفها إنك تصلح من طريقة تفكيرك و تمشى فى طريق أصح من اللى انت ماشى فيه دلوقتى .. اصبر على ابتلاء ربنا ليك بالنقم ، بس مع التفكير فى حل جذرى للمشكلة اللى وقعت فيها ، و تأكد من المثل القائل : امشى عدل ، يحتار عدوك فيك .. إزاى عدوك ممكن يؤذيك طالما انت مش بتعمل حاجة غلط ؟؟ .. حد فهم حاجة ؟؟ .. لو حصل ، طبق بقى على حياتك و ظروفك الخاصة قبل الآخرين ..
.

 卝 ❀ ✿¸¸¸.•*´¯`✿ ❀ ✿ ❀ ✿ ❀ ✿¸¸¸.•* ´¯`✿ ❀ . ◊
1
ما يحدث لك نتيجة لقراراتك ، و لا يوجد إجبار إلا ما تجبر نفسك عليه بتفكيرك المحدود .. #تحرر
 卝 ❀ ✿¸¸¸.•*´¯`✿ ❀ ✿ ❀ ✿ ❀ ✿¸¸¸.•* ´¯`✿ ❀ . ◊
1
فيه ناس ارتضت إن دورها فى الحياة يكون هو الصد عن سبيل الله .. زى اللى كانوا على أيام النبى ، بيصلوا فى المسجد الحرام بالصفير (المكاء) و التصفيق (التصدية) ، عشان يلغوشوا على باقى المتواجدين للصلاة بجد .. لاحظ معايا العقلية دى كده .. مش بيكتفى بالمعصية فى بيته .. ولا بيجاهر بيها و خلاص ، .. و لكن بيتفنن فى منع غيره عن الطاعة و حثه على المعصية ، عشان ما يبقاش لوحده .. لو فكرت شوية ، حتلاقى إن أفضل طريقة لدحض اللى زى ده هى #التجاهل .. لما تلاقى حد بيبيع بضاعة مسروقة على أول الشارع ، ماتديهوش اهتمام ، سواء إيجابى أو سلبى .. لو شجعته أو بلغت عنه ، حتكون فى الحالتين أثبتت إنه لفت انتباهك ، و ده ممكن يكفيه ، لإنه فى عقله الباطن حيكون اتأكد إنه استحوذ على جزء من تفكيرك ، و لو فى المرة الأولى كان بالسلب ، ممكن فى المرة التانية أو التالتة أو العاشرة ، أو حتى المليون ، يكون بالايجاب ! .. قديما قال سيدنا عمر بن الخطاب : أميتوا الباطل بقلة ذكره ..
卝 ❀ ✿¸¸¸.•*´¯`✿ ❀ ✿ ❀ ✿ ❀ ✿¸¸¸.•* ´¯`✿ ❀ . ◊

1.jpg

فيه حديث سمعناه كتير ، لكن لو تدبرنا فيه بشوية تأمل محترمين , حنلاقيه يوازى آلاف من الخطب التحفيزية و اللقاءات الحماسية على يد عتاولة التنمية البشرية .. رجل من الأنصار جه للنبى عليه الصلاة و السلام , يسأله الصدقة , فسأله النبى عن إذا كان فى بيته شىء .. شوف هنا إن “شىء” نكرة , و يعنى بيها “أى شىء” .. فقال له الرجل إن عنده “حِلْسٌ” (رداء أو حصير) يلبس بعضه و يبسط بعضه , و “قدح” (إناء) يشرب فيه الماء .. يعنى نقدر نقول إن الراجل – حرفيا – ع الحديدة , أو نقدر نقول إنه مش حتى مش لاقى الحديدة !! ..
.
كان من السهل على النبى عليه الصلاة و السلام إنه يأمر له بمال من بيت مال المسلمين , أو حتى بصدقة متكررة من أحد أغنياء الصحابة .. و لكنه حب يعلّمنا قيمة – فى نظرى – أعلى و أهم .. قيمة ‫#‏العمل_الحلال‬
.
النبى قال له “ائْتِنِي بِهِمَا” .. و لما جابهم , النبى عمل عليهم مزاد أمام الحاضرين .. و تم بيعهم بدرهمين بالفعل .. النبى أعطاه الدرهمين , و قال له “اشْتَرِ بِأَحَدِهِمَا طَعَامًا فَانْبِذْهُ إِلَى أَهْلِكَ وَاشْتَرِ بِالْآخَرِ قَدُومًا فَأْتِنِي به” .. يعنى لازم يتطمن على أهله – حتى لو بأقل القليل – وبعد كده يجيب وسيلة العمل اللى حيقوم بيه .. و لما عمل كده فعلا , النبى شدّ عليه عصاية بيده الشريفة , و قال له “اذْهَبْ فَاحْتَطِبْ وَلَا أَرَاكَ خَمْسَةَ عَشَرَ يَوْمًا” .. و هنا هو كلّفه بعمل مناسب ليه , لا يحتاج خبرة فظيعة أو دورات تدريبية معقدة عشان يتعلمه ..
.
و لكن المدهش فى معنى الحديث إن النبى طلب منه الاستثمار فى مهنته الجديدة (كحطاب) , عن طريق التضحية بأغلى ما كان يملكه قبل كده , و هو رداؤه و إناؤه .. ما هو برضه كان يقدر يخلّى أى صحابى غنى يديه الدرهمين !! .. ليه خلاه يبيع “اللى حيلته” ؟؟!! .. عشان يتعلم إنه لازم يستثمر صح , عشان يكسب صح !! .. مش حتكسب إلا لما تضحّى بمال أو وقت أو مجهود أو فرص , أو غيره , عشان تنجح !! ..
.
و لكن الأهم فى نظرى , إنه علّمه الصبر على مهنته الجديدة , عشان ما يرجعش بعد يوم أو اتنين و هو زهقان منها أو شايف إنها ما جابتش همّها .. طلب منه عدم العودة إلا بعد 15 يوم , .. و حصل فعلا إنه جه بعدهم و معاه 10 دراهم , و هنا قال له النبى عليه الصلاة و السلام “اشْتَرِ بِبَعْضِهَا طَعَامًا وَبِبَعْضِهَا ثَوْبًا” .. يعنى تم تعويضه عن اللى دفعه فى الأول و بزيادة .. و قال له “هَذَا خَيْرٌ لَكَ مِنْ أَنْ تَجِيءَ وَالْمَسْأَلَةُ نُكْتَةٌ فِي وَجْهِكَ يَوْمَ الْقِيَامَةِ إِنَّ الْمَسْأَلَةَ لَا تَصْلُحُ إِلَّا لِذِي فَقْرٍ مُدْقِعٍ أَوْ لِذِي غُرْمٍ مُفْظِعٍ أَوْ دَمٍ مُوجِعٍ” ..
.
من الدروس المستفادة كمان من الحديث ده , إن الرجل ما تأففش من العمل الجديد اللى النبى كلّفه بيه !! .. ولا قال : بقى أنا .. فلان بن فلان , على سن و رمح , أشتغل حطّاب ؟؟!! .. ده انا أموت م الجوع ولا اشتغل الشغلانة دى !! .. يقولوا عليا إيه فى أسواق قريش لما يشوفونى ماسك القدوم ؟؟!! ..
.
بالعكس , الراجل راح و سمع الكلام و اشتغل و كسب , برغم إنه كان ممكن يسرق عمل غيره و ينسبه لنفسه , و يسرق شغل سيدنا عثمان بن عفّان , أو عبد الرحمن بن عوف , على أساس إنهم لو اتسرقوا فى مبلغ بسيط , ده مش حيفرق معاهم !! .. و يحلل ده لنفسه مثلا , أو يقول : ما هى كل القبيلة بتعمل كده !! .. أو أى حيلة شيطانية تانية , يضحك بيها على ضميره !! .. و عشان كده ربنا بارك له و رجع بـ 10 دراهم ..
.
الحديث فى سنن ابن ماجة .. و مرّ علينا كلنا , حتى فى أيام المدرسة .. و لكن شتّان بين المعلومة لما تتقال عشان تتكتب فى امتحان التربية الإسلامية و تتنسى بعده , أو فى خطبة ع المنبر , و ينساها المصلون و هما بيلبسوا الجزم على باب الجامع , و لما تتقال بنيّة التطبيق على أرض الواقع , و استخدامها لهدفها الحقيقى بين الناس ! ..
.
عشان كده الناس – إلا ما رحم ربى – بقت تشتم و تخوّن و تتريق ع اللى يدعو إن الناس تشتغل و تنتج و تبدع و تتحرك .. و بقوا يفتكروا المبادرات لتعليم الذات و الاستفادة الشخصية , تمثيليات مؤامراتية تهدف لإنهم ينسوا حقهم فى التعيين الحكومى كموظفين !! .. و بقى أغلبنا حاطط إيده على خده فى يأس أزلى , أو فى جيب اللى قدّامه و ياخد من قوته , بدون ما يقدّم له شىء نافع بحقّه , و يبصّ للناس اللى بتعمل شىء مفيد أو مختلف , على إنهم مجانين أو مخابيل .. و ده يؤكد إن ده غير اللى ربنا و رسوله يحبوا إنهم يشوفونا عليه , لما ربنا قال “وَقُلِ اعْمَلُوا فَسَيَرَى اللَّهُ عَمَلَكُمْ وَرَسُولُهُ وَالْمُؤْمِنُونَ”
.
فى شهر مايو الماضى , أعلنت عن فكرة يمكن أن تصلح كعمل إضافى للصيادلة أو الطلاب اللى عندهم وقت فاضى .. ممكن تشوفها هنا ..  (http://wp.me/p2YNXX-EK ) .. و اتهريت بسببها شتيمة و تريقة و تخوين من زملاء أفاضل .. و اتقال عليا الأقاويل , و اللى قررت بسببها إنى أخلّى الفكرة مجانية تماما , و أراهن على 80 عضو تقريبا , طبقوا مبدأ ‫#‏المجد_للمبادرين‬ و دخلوا معانا فى جروب مغلق , للتدريب على أسس الفكرة , لحد ما زادت قدّامهم الفرص المعروضة , و اشتغل عدد منهم بالفعل بالفكرة دى .. و مش جاى النهاردة فى أول 2016 , من باب التفاخر بإعلان نتيجة الشغل فى الـ 7 شهور اللى فاتوا , و لكن من باب شكر نعمة الإصرار و التصميم و الصبر , اللى ربنا أكرمنى بيهم , عشان يفتح من خلالهم طاقة نور و هدى لغيرى , و يكون لهم مصدر دخل حلال و مرضى .. و لكل اللى أكرمونى باتهاماتهم اللى رديت عليها هنا بالتفصيل ( http://wp.me/p2YNXX-EA ) , أحب أقول لهم إنى – بإذن الله – مش حابطّل أفكّر فيما يفيد , مش بدافع العند أو حتى التجاهل لآرائهم و انتقادهم الكريم .. و لكن فى محاولة منى لتطبيق مبدأ ‫#‏فليغرسها‬ اللى النبى عليه الصلاة و السلام زرعه فينا ..

1
.
‫#‏اتعلم_صح_باستمتاع‬

˙·٠•● Ƹ̵̡Ӝ̵̨̄Ʒ ●•٠·˙

#أفلا_يتدبرون_القرآن 

#انشر_لو_اقتنعت

#محاولة_للتدبر

أحمد الجويلى

.

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s