نصائح بخصوص الانجاب


3

✿ ❀ ✿  خلال الفترة اللى فاتت , اهتميت شوية بموضوع ‫#‏تأخر_الإنجاب‬ و اللى بشكل خاص بيكون الزوج فيه هو السبب نتيجة مشاكل فى الحيوانات المنوية .. و وردت إليّ ع الخاص كم غير طبيعى من المشاكل اللى بتختلف حدتها من حالة للتانية .. و لكن كان عندى أكتر من تعقيب جديد على الحالات اللى تواصلت معاها , و أحب إنى أنشرهم هنا بشكل تقل فيه حدة الحرج قدر الإمكان ..

.

1) .. احنا مش بنعالج ولا بنتعدى حدودنا الصيدلانية فى مجال الـ OTC , و إنما بنقدم نصايح علاجية تصلح لحالات كتير بإذن الله , و ده لكل اللى اعترضوا ع الخاص , و قالوا إننا بنفتى بغير علم .. و ربنا يعلم إننا بنقدم المعلومة بعد ما بنكون اتاكدنا منها من أكتر من مصدر .. و مش بنخترع , و لكن بنفخر بإننا بنكتشف إن نصايحنا مش بتتقال على يد عدد كبير من المتخصصين اللى ممكن تكون الحالات راحت لها قبل كده بشكل مستفيض أو مفصّل زى ما بيحصل معانا ..
.
2) .. الأمل فى الله لا ينقطع .. وجود الخلايا المنتجة للحيوانات المنوية , معناه استعداد مناسب لإنتاجها بالفعل , حتى لو مفيش أى حيوانات منوية .. و اللى دايما بندوّر عليه هو السبب اللى أدى لعدم الإنتاج .. و ده اللى المفروض نتجنبه قدر الإمكان بعد ما نعرفه !! .. أنا دايما ضد العلاج الأعمى لكل الحالات على إنها حالة واحدة !! ..
.
3) .. فيه حالات ما نقدرش نقدم لها نصيحة .. زى حالة غياب الخلايا المنتجة للحيوانات المنوية نفسها .. و العلم للأسف لسه ما قدرش يوصل لحل للمشكلة دى حتى الآن بشكل مؤكد .. و لكن برضه ما ينفعش نفقد الأمل .. و فى نفس الوقت , ما ينفعش نصدّق حد يقول لنا إن ‫#‏الحقن_المجهرى‬ ممكن يكون حل لمشكلة زى دى ..
.
4) .. ما ينفعش نزود الطين بلة لو كان فيه مشكلة بنعالجها , بإننا نزداد فى الوزن , أو ندخّن أو نبطّل الأكل الصحى قدر الإمكان .. , و بكده المشكلة تبقى مشكلتين أو أكتر .. احنا بنحاول نقلل المشاكل مش نزوّدها !! ..
.
5) .. الحقن المجهرى مش هو الحل النهائى لحالات كتير .. علمت إن فيه حالات فضّلت إنها ما تتواصلش معايا من أساسه , لمجرد إن عمليات الحقن المجهرى المكلفة جدا , قضت على كل ما يملكوا من مال , و أصبحوا ع الحديدة , لمجرد إنهم رغبوا فى طفل , و لكن من خلال طريق واحد مش أكتر .. بجانب إنى لقيت حالة تعرضت برضه لنفس المشكلة النادرة اللى تعرضنا لها من 3 سنين , و هى OHSS أو زيادة حساسية المبايض للتنشيط , مما كان حيؤدى بالزوجة للوفاة , و لكن ربنا لطف ..
.
6) .. ضعف الحيوانات المنوية مش سبب كافى للانفصال بين الزوجين لو كان فيه مقومات تانية , ممكن يحصل من خلالها استمرار للزواج .. و ده لإن المشكلة ممكن تتحل فى وقت بسيط بإذن الله .. أنا كنت فى قمة الحزن لما تواصل معايا حد , و فى نهاية كلامه قال لى إنه حاليا مطلق بسبب المشكلة دى !! ..
.
7) .. الإنجاب قبل كده , يعتبر بشرى سارة للزوج و الزوجة , و معناها إننا لو قدرنا نرجّع الظروف الصحية لنفس حالتها أيام الإنجاب الأول , ففيه أمل كبير إن يحصل إنجاب جديد ..
.
8) .. لغاية دلوقتى لقيت حالات بتتحرج من طلب العلاج , و بيرموا كل الحمل على الزوجة , و فاكرين إن أى تأخر فى الحمل يكون سببه العامل النسائى .. و ممكن ينكروا كلام الأطباء و التحاليل لفترة طويلة , و ما ياخدوش بالأسباب ..
.
9) .. الأخذ بالأسباب فى الموضوع ده تحديدا مهم جدا .. و لكن الاعتماد عليها و الظن بأن طالما صلّحنا الحالة المرضية , يبقى لازم يحصل حمل , شىء فيه اعتراض على قدرة الخالق و إرادته فى العطاء و المنع ..
.
10) .. الحالة النفسية و الروحانية للزوج و الزوجة من أهم معززات و مقويات فرص النجاح فى الحصول على حمل .. و الاستهانة بيهم عن طريق مضاعفة النكد أو السخط و العياذ بالله , شىء لن يؤدى إلا إلى مزيد من التعاسة و الضيق ..
.
11) .. ترتيب الأولويات و موازين الثقة محتاجة إعادة تعديل عند ناس كتير .. منهم اللى ما عندهوش مانع إنه يسافر من دولة لدولة , عشان يشترى عشب غير معروف أو زئبق أحمر , كله وهم , و يقنع نفسه إنه بيتعالج .. و لما يتعرض عليه إنه يسمع كلام علمى بجد , أو يتوجه لمتخصص حتى لو بالمجان أو بسعر رمزى , ممكن يتوانى و يؤجل ألف مرة , لمجرد إنه جرب سكة الطب قبل كده و ما نفعتش !! ..
.
12) .. القدرة على الإنجاب عند الرجل , يمكن تشبيهها بإنها المعادلة الصعبة اللى – عشان تتحقق – لازم تكون كل أطرافها موزونة و متظبطة بشكل دقيق .. سواء على المستوى الهرمونى أو النفسى أو الرياضى أو الغذائى أو غيره من المستويات .. و أى خلل فى أى مستوى من دول , ممكن يؤدى إلى انحدار شديد فى الخصوبة عند الرجل ..
.
13) .. اللى بنقدمه فى الموضوع ده مش بنهدف من وراه لأى ربح مادى , حتى لو استدعى زيارة عندنا فى الصيدلية , مهما طالت مدّتها .. كل الفكرة إننا بنتاجر بيه مع الله , و باحاول دايما إنى أصفّى نيتى تجاهه على هذا الأساس , لعل ربنا يبارك لى فى ابنى , اللى جه للحياة بعد صبر ما يقرب من 3 سنين , كنت فيهم أنا المريض بعدم القدرة على الإنجاب , و اللى وصلنا له بفضل الله , كان بالنسبة لى محرج إنى أعلنه , أو أصرح بأسباب نجاحه مع حالات كتير .. و لكن اللى بنشوفه حاليا بيثبت لى إن من الضرورى إنى أعلن إن أحد أهم أسباب تأكدى من فعالية النصايح دى , هو إنى بنفسى كنت أحد أهم اللى جربوها على نفسهم ..
.

♪♫•*¨*•.¸¸¸¸.•*¨*•♫♪

4

✿ ❀ ✿

‫#‏حدث_بالفعل‬
‫#‏بوست‬+18
.
لسه قافلة معايا من شوية ع التليفون .. سيدة تخطت الأربعين , و متزوجة من 18 سنة من زوجها اللى تخطّى الخمسين حاليا , و تبخر من عندهم الأمل فى الإنجاب , بعد ما عرفوا من أول سنة من بعد الزواج , أن الخلايا الأم (المنتجة للحيوانات المنوية) غير موجودة عند الزوج من الأساس !! .. لفّوا بين الأطباء المختلفين اللى بدأوا يدعبسوا و يدوّروا على حيوانات منوية فى استكشاف لعيّنات من الخصية اللى بياخدوها من الزوج , كل مرة ببنج وعمليات و مضادات حيوية وقائية و جروح و خياطة , .. و فى الآخر برضه ما يلاقوش .. لدرجة إن مفيش حد فيهم كلّف نفسه و أعطاهم أدوية أو محفزات للإنتاج عشان الزوج يمشى عليها على أى أمل !! ..
.
سألتها محرجا : هل الزوج حلل تحليل هرمون الذكورة ؟؟ .. قالت : آه , بس مش فاكرة كانت نتيجته إيه .. سألتها فى حرج أكثر : هل يوجد انتصاب ؟؟ .. تلعثمت شوية و قالت : آه شوية .. حتى إن الرغبة الجنسية قليلة .. فسألتها بشكل نمطى : و هل حد من الاطباء اللى تابعتوا عندهم علّق ع الكلام ده ؟؟ .. و صعقت لما كانت الإجابة : ما حدش أصلا سألنا فى الكلام ده .. و كإن الدكاترة كانت بتتحرج !! .. كل الفحوصات كانت بتتم بشكل سريع , لاستبعاد الحاجات المعروفة سلفا , زى دوالى الخصيتين , أو الخصية المعلقة , أو صغر أو كبر حجم الخصيتين , أو ما شابه ..
.
أكملت السيدة : و انا ما كنتش فاهمة يعنى إيه كل الكلام ده , و فاكرة كل ده طبيعى ..
.
حسيت ساعتها بمدى ضخامة المسئولية اللى باحاول أقدّم رسايلها لكل راغب فى تقبلها منى , بعد ما تأكدت من صدق قول الله جل جلاله “و فوق كل ذى علم عليم” .. برغم إن الزوجين راحوا لأسماء تخض من الأطباء العظام , ذوى المراكز المتخصصة و معامل التحاليل المتقدمة !! .. بجد كنت حاتجنن من اللى باسمعه !! .. معقول ولا واحد من دول خطر على باله إنه يسأل عن الانتصاب أو الرغبة , أو غيره من العلامات المعروفة لمدى طبيعة هرمون الذكورة و تأثيره !! .. معقول ماحدش منهم فكر يديه بدايل لهرمونات الذكورة ؟؟!! .. حقن الـ Nandrolone و اخواتها اللى بتطلع كمنشطات – بشكل غير سليم ولا مطلوب – للى عاوزين يبنوا عضلاتهم فى الـGymGroups , .. خلاص ؟؟!! .. كلها داسها قطر ؟!! ..
.
الست كانت مذهولة لما عرفت إن ممكن يكون فيه أمل لما زوجها ياخد الحقن دى , لفترة مناسبة , و يرجع إنتاج الخلايا الأم , بإذن الله , … لدرجة إنها سألتنى .. طب انا ممكن أخلف بعد الأربعين ؟؟ .. سألتها عن انتظام الدورة , فقالت إنها لا زالت منتظمة , فقلت لها : إذا كان ربنا سبحانه و تعالى أصلح لسيدنا زكريا و سيدنا أيوب زوجاتهم , و أنجبوا منهم , فهل حيعجز عن كده مع حضرتك ؟؟!! .. حاشا لله طبعا .. ادخلى على ربنا فى دعائك من باب الذل و الأمل .. و إنه أهل إنه يرزقكم بالذرية الصالحة , حتى لو انتوا ما كنتوش أهل لكده , بسبب ذنوبكم و تقصيركم .. ‫#‏الدعاء‬ و‫#‏الصبر‬ و ‫#‏الصدقة‬ و ‫#‏الاستغفار‬ و ‫#‏الرضا‬ .. 5 أسلحة , أعتقد إن ربنا أكرمنى لما هدانى لفهم كيفيتهم صح فى الموضوع ده .. و أعتقد إن ممكن الدنيا تتحسن لو اشتغلنا عليها صح من النواحى دى ..
.
ممكن تدعوا لهم – و لكل مشتاق – إن ربنا يرزقهم الذرية الصالحة و يبارك لهم فيها ؟؟!!
.
‫#‏دايما_فيه_أمل‬

♪♫•*¨*•.¸¸¸¸.•*¨*•♫♪
1
مستوى هرمون البرولاكتين الطبيعى فى السيدات فى حالة عدم وجود حمل – زى ما الكتاب بيقول – هو ألا يزيد عن 23mcg/L .. المشكلة إنه – فى وجهة نظرنا – ممكن يكون أقل من كده بكتير , و لكنه بيؤدى إلى أعراض زيادته فى الدم .. و من أهمها تقليل الخصوبة !! .. أطباء كتييييييييير – مع كامل احترامى لهم – بيصدقوا التحاليل و بيرفضوا إعطاء أدوية , أو حتى بعض النصايح لتقليل مستوى الهرمون فى الدم , لو كان التحليل طبيعى , فى حين إن كل أعراض زيادته موجودة .. و ده فارماكولوجى بحت .. كل اللعبة فى زيادة حساسية المستقبلات للهرمون الطبيعى بتركيزه , و ده اللى لازم يخلينا ناخد بالنا منه , و نشتغل عليه كإنه عالى بالظبط .. و نبدأ نوصى بوصف أدوية تقلل من تأثيره و أعراضه المعروفة فى الجسم .. و أهمها تضخم و ألم الثديين أثناء الشهر بالكامل , أو قبل نزول الدورة بأيام تحديدا ..
.
و ممكن يحصل العكس ، و يكون التحليل عالى ، و مفيش أعراض .. و هنا برضه لازم نقلله ، لو كنا بندور على حمل ..
.
عرفتوا ليه #الرضاعة مانع طبيعى للحمل ؟؟
.
#اتعلم_صح_باستمتاع
♪♫•*¨*•.¸¸¸¸.•*¨*•♫♪
6

✿ ❀ ✿ من الأسباب الخفية ورا ضعف الحيوانات المنوية و قلة عددها و كفاءتها , هو استخدام اللابتوب فوق الركبتين (أو على الحجر) لفترات طويلة .. و التفسير المنطقى لكده , مش لمجرد إن اللابتوب بيسخن أو إنه بيخرّج حرارته بشكل كبير على الخصيتين مباشرة و بس .. ده أكيد تفسير مقبول .. و لكن بعد ما شركات إنتاج اللابتوب بدأت تعدّل من مواصفات الأجهزة , خلت المروحة الخاصة باللابات جانبية , و أغلب الحرارة مش بتبقى موجهة لتحت اللاب ..
.
السبب الأهم فى وجهة نظرى هو التأثير المغناطيسى و الكهرومغناطيسى اللى بيخرج من اللاب .. و اللى ممكن يؤثر على عدد كبير من الرجال بالسلب , و يقلل من إنتاجيتهم للحيوانات المنوية بشكل سليم .. من المعروف إن وجود ‫#‏مغناطيس‬بشكل مستمر بجوار الخصيتين ممكن يؤثر على كفاءتهم .. و عشان كده دايما بننصح بعدم وضع الموبايل (اللى فيه مغناطيس عند الميكروفون) فى المنطقة دى , مثلا عند سواقين التاكسي , و اللى بيعملوا كده عشان ما يتسرقش منهم لو اتحط فى مكان تانى !! ..
.
كلامنا كده ع الموبايل أبو مغناطيس صغنن !! .. فما بالكم بجهاز لابتوب أكيد مليان مغناطيسات أقوى من كده .. ده أسلوب حياة و عادات لازم تتغير عند الراغبين فى الإنجاب , حتى لو من النهاردة .. و التنويه عنها بيكون من دور أى معالج حريص على صحة مرضاه , مش مجرد الحصول منهم على مقابل علاجهم و خلاص !!! ..
.
المعلومة تبدو بسيطة – و ربما هايفة – فى نظر كثير من المعالجين , لإنها معروفة عندهم بالفطرة , و لكن عند زوجين بيدوروا ع الأمل بشمعة , ممكن تكون سبب فى إن ربنا يرزقهم بالذرية الصالحة .. و ده اللى لسه قايله لى صاحب لحالة مشابهة , و كان عندى فى الصيدلية من ساعة تقريبا , لما عدّى عليا عشان يسألنى على حالة ابنه اللى عنده 3 شهور , و جه بعد انتظار أكتر من 3 سنين .. و كانت المشكلة الرئيسية – والله أعلم – هى النقطة اللى بنقول عليها دى ضمن النصايح العامة و الخاصة , و اللى انتبه لها قوى ساعة لما قلت له عليها من سنة و شهرين , لما زارنا فى الصيدلية مع زوجته , و قعدوا وقت طويل لعرض حالتهم و الاستفادة بمعلومات تطبيقية بخصوصها ..
.
مش معنى كلامى إن كل اللى بيستخدموا اللابتوب بالطريقة دى بيحصل لهم مشاكل فى الحيوانات المنوية .. الأمر يتوقف على مدى قوة و خصوبة الزوجين سوا .. و مدى تعرضهم لعامل سلبى أو أكتر و قوة و استمرارية التعرض ده .. و لكن احنا فى تعاملنا مع الحالات بنحاول ندور على اكبر عدد من الأسباب المحتملة , و اللى ممكن تكون ورا المشكلة .. و على الله التوكل و قصد السبيل ..

♪♫•*¨*•.¸¸¸¸.•*¨*•♫♪

1


#ع_الماشى 💊 | 💊 زيادة نسبة التشوهات فى تحليل السائل المنوي عند الزوج , لا تسبب سقوط متكرر عند الزوجة , طالما #الحمل بيحصل بشكل طبيعى , مش حقن مجهرى أو أطفال أنابيب 👇 .. و ده لإن الحيوان المنوى المشوه مش بيقدر يوصل أصلا للبويضة و يخصبها فى كل الحالات تقريبا .. و فى حالات السقوط المتكرر , الأفضل إننا نبدأ ندوّر ورا السبب عند الزوجة , و اللى ممكن يكون نقص فى وصول الدم للجنين , لنقص السيولة مثلا , أو إصابة سابقة بالـ Toxoplasmosis , أو ممكن زيادة الحركة و نقص ثبات الرحم , .. أو أى أسباب أخرى متعلقة بالموضوع ..
.
زيادة التشوهات ممكن تؤخر حدوث الحمل ككل ، و لكن لا تسبب السقوط المتكرر
.
و الله أعلى و أعلم

♪♫•*¨*•.¸¸¸¸.•*¨*•♫♪

images

✿ ❀ ✿ ‫#‏نداء‬ : يا جماعة عشان ما يحصلش مشاكل بعد الزواج بفترة بسيطة ، اقروا كتاب‫#‏تحفة_العروس‬ , لمؤلفه : محمود مهدي الإستانبولى ، تحديدا الثلث الأوسط ، عشان فيه تفاصيل دقيقة و مهمة عن العلاقة الخاصة بين الزوجين ، و ده بدل ما تسمعوا كلام الأخت ‫#‏انتصار‬ ، لإن اللى بتقول عليه السيدة الفاضلة دى ، بيخرب البيوت مش بيبنيها .. لإن الأخطاء فى الحدوتة دى بتبقى أسرع و أخفى طريق للانفصال السريع والعياذ بالله .. و ده بعد ما اكتشفنا إن حتى الأب و الأم مش بيكون عندهم الجرأة ولا المعلومات الصحيحة ، عشان يقولوها لولادهم اللى على وش جواز !! ..
.
و من الجهل ما قتل ..

♪♫•*¨*•.¸¸¸¸.•*¨*•♫♪

1

✿ ❀ ✿ تأخر الحمل ممكن يكون نعمة من ربنا لحد ما الظروف تتعدل و تبقى على قدر مسئولية بيت فيه أطفال .. قابلت حكايات كتير الفترة اللى فاتت ع الخاص ، و اتأكدت من نظرتى لها ، إن حكمة ربنا مالهاش مثيل فى خلقه ، و هو أفضل من يعلم التوقيت المناسب لعبده عشان يبقى اسمه أبو فلان ..
.
‫#‏صباحكم_يقين_و_رضا‬

˙·٠•● Ƹ̵̡Ӝ̵̨̄Ʒ ●•٠·˙

نفسى البوست ده يوصل لكل زوجين لسه ما أنجبوش .. لعل يكون فيه أمل حقيقى جديد بالنسبة لهم ..
.
‫#‏و_ربنا_يرزقنا_الإخلاص‬
‫#‏أحبكم_فى_الله‬
.
أحمد الجويلى

 

3 responses to “نصائح بخصوص الانجاب

  1. السلام عليكم ..انا اول مره اشوف موقعكم او اعرف عنه بس فرحت جدا بيه و استفدت منه جدا و كان لى سؤال بخصوص الحاله الموجوده فى اول البوست لو الهرمونات التستوستيرون كويس و الاف اس اتش عالى ..يكون ايه الحل …لان ادامى حاله شبيهه جدا و ارجو مساعدتها

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s