صيدلى مغترب ؟؟ .. اشترك فى برنامج الصيادلة المغتربين


 

أثناء زيارتى الماضية للكويت , قابلت عدد كبير من الصيادلة اللى بيشتغلوا هناك , و عملت Market Research مبسط , بان لى من خلاله , الفرق بين سوق الدواء الخليجى و المصرى .. و الفرق بين طبيعة العملاء فى السوقين .. و كان مطلوب منى إنى أقدم دورة مختصرة للصيادلة بالكويت , من تنظيم سلسلة صيدليات Pharmazone االعزيزة 🙂 .. و كانوا 3 أيام رائعين بفضل الله , و سابوا فى عقلى ذكرى طيبة جدا ..

الشاهد إن على مدار 6 شهور فاتوا , فضلت أطوّر فى برنامج متخصص , موجه لصيادلة الخليج تحديدا , و لكنه ينفع لأغلب صيادلة الخارج , اللى بيتميزوا بالآتى : ..

مطلوب منهم العمل لفترة أطول نسبيا على مدار اليوم

مفيش عندهم وقت لحضور المحاضرات أو الندوات التدريبية

بيقابلوا المريض أو العميل مرة أو مرتين بالكتير

لازم يسيطروا على كم كبير نسبيا من العمالة المتواجدة بالصيدلية

أحيانا ممكن ينطلب منه تحقيق رقم بيع معيّن , مش أقل منه

يتواجد بمصر لمدة شهر أو اتنين بالكتير كل سنة

المهم إن البرنامج ده أصبح متاح حاليا بفضل الله , بشكل يشبه برنامج 91 صيدلة اللى بدأنا فيه من حوالى 10 شهور مع الطلبة و الصيادلة .. و لكن برنامج الصيادلة المغتربينأكبر و أمتع ..

8

قبل ما تسافر .. احسب خطواتك .. السفر فرصة قيّمة .. و لكن للى يتوفّق فيها فقط

إيه فكرة البرنامج ؟؟

فكرة البرنامج إننا بندّيك أهم المعلومات اللى المفروض تكون عند الصيدلى المغترب – من وجهة نظرنا – عشان تكون أقدر على الاستمتاع بعملك داخل الصيدلية , و فى نفس الوقت تزداد إنتاجيتك و إيرادات صيدليتك بشكل ملحوظ فى فترة قصيرة بإذن الله ..

بس كده ؟؟

مش كده و بس .. احنا بنقدم لك محتوى مصوّر , تتفرج عليه بالمعدل المناسب ليك , من المفروض إنه يغيّر فى قناعاتك الشخصية و أفكارك , و يخليها أكثر إيجابية بإذن الله .. و تبدأ تكتشف إنك ممكن تلاقى وقت لتطوير نفسك بالفعل , بشكل ممتع و محبب للنفس .. مش بنفس الأسلوب المعتاد اللى ممكن ينفّرك فى العلم و المعلومة .. يعنى من الآخر , حنخليك حد تانى غير اللى انت تعرفه عن نفسك ..

طب إيه اللى حيضمن لى الاستمرار فى البرنامج ؟؟

الضامن ربنا يا سيدى .. و لكن عشان هدفنا إنك تكون حد مختلف , .. حنرجو إنك تستمر معانا فى البرنامج بناء على ميزتين ممكن ما يكونوش موجودين فى أى مكان تانى ..

الميزة الأولى : جودة المادة المقدمة , و اللى تم اختيارها بعناية , و اترتبت مراحلها بشكل مدروس , يخليك مستمتع بيها و متشوق للانتقال بينها .. و كل ما تخلّص مرحلة , تنتقل للمرحلة اللى بعدها بسلاسة و بساطة إن شاء الله ..

الميزة التانية : إننا عيّننا صيادلة زملاء أفاضل , كـ متابعينمتميزين معانا , عشان يكونوا قادة البرنامج في أكاديميتنا , و حيكونوا مسئولين قدّامنا عن سير كل مشترك معانا فى البرنامج بإذن الله , .. و تطوّعوا للإشراف على البرنامج بالكامل  , .. و حيكون من ضمن مسئولياتهم إنهم يحفّزوا المشاركين على إتمام مشاهدة المحتويات المطلوبة منهم بالترتيب , و يتابعوا نشاطهم و استمراريتهم فى البرنامج .. اللى يخسّع , يفكّروه .. و اللى يخلّص محتوى معين فى فترة مناسبة , حيكون له هدية ما حدش ياخدها غيره .. و اللى مش لاقى وقت , يشجعّوه ع الاستمرار .. و هكذا ..

طيب , فيه شهادات معتمدة للبرنامج ده ؟؟

احنا مش بتوع شهادات .. و لكن مع وصولك لكل علامة فارقة فى البرنامج , حتكون مؤهل لفرصة مختلفة من الفرص اللى بيتم طرحها بشكل مستمر ع البروفايل الشخصى او الرسمى لنا .. لإننا فى أوقات كتير بنعلن عن فرص عمل للناس اللى مرت معانا ببرامج معينة أو حضرت دورات أو كورسات محددة .. و فى الحالة دى , احنا اللى حنرشّحك للجهة اللى حتشتغل معاها , و حنقول لهم إنك واصل معانا فى البرنامج للمرحلة رقم كذا .. و مين عارف ؟؟!! .. ممكن قريبا جدا نعتمد البرنامج من أحد الجهات المعروفة , بعد ما يقيّموه بنفسهم , و يشوفوا مدى تأثيره الإيجابى , على المشتركين فيه بإذن الله ..

d8add982d98ad8a8d8a9_d8a7d984d8b3d981d8b1_d981d98a_d8a7d984d985d986d8a7d985

لسه فيه وقت تطوّر نفسك .. حتى بعد ما تكون حققت حلم السفر

هو البرنامج مجانى ولا بفلوس ؟؟

ما تنعاش هم النقطة دى خالص .. احنا هدفنا إنك تتعلم و تطوّر نفسك .. و ده فى حد ذاته مكسب لينا .. ابدأ يا سيدى من غير ما تدفع ولا ملّيم .. و لو طلبنا منك أى مقابل , ابقى فكّر 1000 مرة قبل ما تدفع أى جنيه .. المهم إنك ما توقفش تعليم ..

لو كنت اشتركت فى برنامج 91 صيدلة , ينفع أشترك فى برنامج الصيادلة المغتربين ؟؟

ينفع طبعا .. و لكن يفضل إنك تكمل برنامج 91 صيدلة على خير أولا , و بعده نشوف إيه اللى ناقصك فى برنامج الصيادلة المغتربين , و تحصل عليه بإذن الله ..

طب هو البرنامج كام مرحلة ؟؟

مش حينفع أقول لك من دلوقتى بالظبط .. لو قلت لك ممكن تتخض أو تخاف أو تكسّل أو يصيبك أى شعور سلبى .. و لكن خلينى أقول لك إن البرنامج محتاج نفس طويل , لإنه مش مرحلتين أو تلاتة .. و كل مرحلة عبارة عن محاضرة أو فيديو أو سلسلة مقاطع قصيرة .. و لكن برضه احنا راعينا التنويع و الدقة .. و عشان كده المراحل مش صيدلة و بس كمان .. المراحل فيها تنمية و تفكير و إبداع و علم و ضحك و تحفيز و مهارات بيع و إقناع و OTC و تسويق و إنجليزى و إسعافات .. و غيره و غيره و غيره .. من الآخر حنظبطك إن شاء الله ..

طب ينفع آخد كل المراحل مرة واحدة و أشوفهم مع نفسى ؟؟

على جثتى إن شاء الله🙂 .. آفة مجتمعنا النسيان , و إننا بنركن الحاجات اللى المفروض نشوفها فى فولدر اسمه “هام جدا” ع الأجهزة  و مش بنفتحه إلى الأبد , و مع ذلك بنوهم نفسنا إننا عملنا اللى علينا .. و عشان كده , تقدر تعتبر اللى بنقوم بيه حاليا هو محاولة للقضاء على الآفة دى .. و أول خطوة في المحاولة , هى إننا نقسم اللى حضرتك المفروض تشوفه و تدرسه إلى مراحل مبسطة , سهلة الاستيعاب و التذكر و التطبيق بإذن الله ..

طب حيبقى مطلوب منى وقت قد إيه , عشان أفضّيه للبرنامج على مدار اليوم ؟؟ .. أنا مشغول 

و انا عارف إنك مشغول يا سيدى .. انت و قدرتك .. مش مطلوب منك أكتر من 45 دقيقة كل يوم .. و لو ما تقدرش عليهم .. حاول ما تقللش عن 15 دقيقة كل يوم (و يا سلام لو كانوا قبل النوم علطول) .. أهم حاجة المداومة و الانتظام .. يا سيدى اقتطعهم من الوقت اللى ممكن تقعده ع الفيس يوميا , أو احسب إنهم ماتش كورة من اللى ما تقدرش تفوّته .. فيه وقت .. بس احنا اللى مش بناخد بالنا منه ..

هو ينفع للى سافروا و بس ؟؟ .. يعنى ما ينفعش لحد لسه عاوز يسافر ؟؟

أكيد ينفع للجميع .. و لكنه مخصص عشان يناسب طبيعة السفر خارج مصر بصفة عامة .. و عشان كده هو ينفع للى سافروا أو لسه ناويين يسافروا

d8aad981d8b3d98ad8b1_d8a7d984d8b3d981d8b1_d981d98a_d8a7d984d985d986d8a7d985

النجاح مالوش ميعاد .. و لكنه قرار .. تقدر تاخده فى أى وقت .. و انت اللى بتحدده

طب أعمل إيه دلوقتى ؟؟

ببساطة لو نويت ع الاشتراك , مفيش أكتر من إنك تتواصل مع أكونت أكاديميتنا الرسمى El-Gewaily Acad (اضغط هنا) و ابعت له رسالة , يكون مكتوب فيها 3 كلمات فقط .. و هى برنامج الصيادلة المغتربين” عشان يتم توصيلك بمندوبنا اللي حيتابع معاك البرنامج خطوة خطوة بإذن الله ..

طيب خلاص كده ؟؟ ولا فيه حاجة تانية نسيت تقول عليها ؟؟

آه خلاص .. و لكن كالعادة لازم أفكّرك بإنك لو عاوز تاخد ثواب محترم (نقل علم) , مفيش أسهل من إنك تـ share البوست ده على الـ account بتاعك ع الـ social media , و تعمل معاه mention لحبايبك اللى سافروا أو نفسهم يسافروا بإذن الله .. مش حنوصّيك بقى .. و الدال على الخير كفاعله ..

صحيح .. كنت حانسى .. البرنامج له عدد محدد للبدء فيه , و هو 100 فرد لكل دفعة .. و مش حينفع اشتراك عدد أكبر من كده , عشان مندوب الأكاديمية بيكون مطلوب منه متابعة شبه يومية ع الخاص عندهم – زى ما قلنا لكل المشتركين بإذن الله , .. و عشان كده , اللى حيتأخر فى الاشتراك – لا قدر الله – ممكن يتم وضعه ع الـ waiting list , عشان يبدأ البرنامج , بعد فترة طويلة شوية , على بال ما أغلب الدفعة الأولى تخلّصه بإذن الله .. و لكن طبعا حنفكركم بإن .. المجد للمبادرين ! ..

ملحوظة : فيه شوية لينكات حلوة , زى دى كده .. حتلاقيها لو ضغطت ع الكلمات اللى مكتوبة بالأزرق الغامق الكبير ما بين اللى كنا بنقوله .. ممكن تعجبك إن شاء الله لو شفتها ..

اتعلم صح باستمتاع

أحبكم فى الله

أحمد الجويلى

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s