نصائح جويلية .. من أجل نومة هنيّة


الأرق و سنينه .. من أغتت المشاكل اللى ممكن تواجهنا إما بشكل مزمن أو متقطع .. و للأسف فيه ناس كتير فاكرة إن الحل يكمن فى حباية ناخدها كل ليلة , عشان ننام زى الغرقانين , من غير ما نحس بحاجة , و نقوم تانى يوم كإننا مضروبين على دماغنا !! .. و تبقى دى طريقة حياتنا .. اسمح لى أقول لك إن البدايل النافعة لعلاج الأرق , بغض النظر عن المنومات , كتيرة جدا .. منها اللى بينفع مع الحالات البسيطة , و منها اللى تم تخصيصه للحالات المستعصية .. و لكن احنا هنا حننشر بعض الطرق الجديدة نوعا ما , و كيفية عمل أهمها , و إزاى ممكن نطبقها .. و إن شاء الله تكون مفيدة بالنسبة لك !! ..

لا تتوقع إننا حنتكلم فى المقال ده , عن إننا لازم نشرب اللبن الدافى قبل النوم , أو إننا ما ننامش فى النور , أو غيرها من النصايح اللى أكيد سمعت عنها .. طبعا دى نصايح فعالة و مفيدة .. و لكن احنا ناويين نتكلم عن الجديد نوعا ما بالنسبة لك .. و عشان كده لازم تركّز أكتر دلوقتى أثناء القراءة ..

24644407

 أولا : تجنبت المهدئات ؟؟ .. تجنب المنبهات بقى ! 

إذا كنت طالب , فمن الغالب إنك بتشرب منبهات كتير عشان تركّز أثناء فترة المذاكرة .. اسمح لى أقول لك إن المنبهات بصفة عامة , و أشهرها المنتجات اللى فيها كافيين بكميات متفاوتة , إذا ما أخّرتش ميعاد نومك عن الطبيعى و أصابتك بالأرق , فمن المؤكد إنها بتخلّى جودة نومك نفسها غير صحية , لإنها تؤثر على جهازك العصبى و عقلك الباطن , حتى أثناء النوم .. و من المنطقى إنك ما تنامش بعمق كافى , بعد ما تكون شارب نيسكافيه أو قهوة أو أى مشروب كافيينى محترم !! .. و عشان كده , اعتمد فى محاولاتك لزيادة التركيز , على المقويات الحقيقية من الأغذية اللى فيها فيتامينات و معادن صحية تساعد على وصول الدم بكفاءة لخلايا المخ , و ده يساعدك على تذكر المعلومات بشكل سليم .. يعنى م الآخر : اهتم بالخضروات , مش المنبهات ..

dreaming_memory

 

ثانيا : ثبت ميعاد و مكان نومك 

أسهل طريقة لتحطيم ساعتك البيولوجية و إصابتك بأرق مزمن , هو إنك تنام فى أوقات مختلفة , بدون موعد محدد ! .. النظام الهرمونى و الكيميائى لمخك بيتجنن من الأسلوب ده .. لإن فيه مواد لا تفرز فى المخ إلا أثناء النوم .. و مواد تانية تفرز فقط وقت ما انت صاحى ! .. و باللى بتعمله , بيكون تدمير مخك على إيدك , مش على إيد حد تانى !! .. و عشان كده , حتى لو ما قدرتش تتحكم فى فترة نومك خلال النهار , التزم بإنك تكون موجود فى سريرك للنوم , فى وقت محدد كل يوم , و شوية بشوية , ده حيبرمج عقلك على الدخول فى النوم , بتطبيق باقى النقط اللى حنقول عليها إن شاء الله ..

تثبيت مكان النوم برضه مهم .. لإن ده رابط شرطى , ممكن العقل يفهمه بشكل مناسب .. بعد فترة كافية من تعويد المخ على النوم فى مكان معيّن , بيبدأ يرتبط عنده التواجد فى المكان ده , ببدء طقوس النوم العقلية .. و عشان كده , ماتحسدش الناس اللى بتعرف تنام فى أى مكان .. لإن مش كل أنواع النوم بتكون مفيدة للجسم بنفس الدرجة .. ياما بنشوف ناس تقوم من النوم و نفسها تنام تانى .. و أحد أسباب كده زى ما بنقول دلوقتى , هو عدم تثبيت ميعاد و مكان النوم نفسه ! ..

من الملحوظات المهمة : ما تذاكرش فى السرير .. كده الرابط الشرطى بتاعك حيتلخبط .. و عقلك الباطن ممكن يربط المذاكرة بالنوم !! .. و تلاقى النوم يكبس عليك أو ما تبدأ تذاكر ! .. و ده اللى بيحصل مع أغلبنا للأسف , عشان مش بنراعى النقطة دى , و بنذاكر فى السرير برضه !! .. خلّى سريرك للنوم و بس ..

elbows-chin-newborn-baby-albuquerque

ثالثا : اجهد نفسك بجد خلال اليوم 

لو مهمتك كطالب حاليا , هى المذاكرة , و مش شايف إنها مجهدة للجسم بشكل كافى , عشان يحسّ فى نهاية اليوم بحاجته للنوم , .. ما تبخلش على جسمك بإنك تلعب شوية رياضة حلوين , حتى لو بإنك تعمل شوية تمارين سويدى , أو تجرى فى مكانك لمدة ربع ساعة مثلا .. مع الاهتمام بالتنفس السليم خلال التمارين دى .. الواحد بينام بعمق لما الجسم يحتاج راحة حقيقية .. و لكن طول ما الجسم مرتاح , النوم بالنسبة له حيبقى مجرد طفاسة عقلية , لمجرد إن وقت النوم جه .. و عشان كده , الرياضة ممكن تكون بديل مناسب للمجهود البدنى المطلوب عشان نستمتع بالنوم ..

snoring-sleep-apnea

رابعا : اظبط البيئة المحيطة

من الحيل اللى ممكن تضحك بيها على عقلك الباطن , إنك تشغّل على موبايلك أو لابك ملف موسيقى أو صوتى , فيه موجات مصممة للمساعدة على النوم .. و ده بيبقى رابط شرطى جديد , بيبدأ العقل يتعوّد على النوم , بمجرد الاستماع إليه بشكل متكرر كل ليلة .. بجانب إن ده بيحسّن جودة النوم نفسها , لإنه بيبرمج العقل الباطن على مشاهد مبهجة و مريحة للأعصاب , ممكن يحلم بيها أثناء النوم ..

اليوتيوب غرقان ملفّات صوتية زى دى , بتساعدك بقوة على النوم السليم و المريح , زى أصوات الطبيعة و الأمطار و البحيرات العذبة و المحيطات و العصافير و الغابات .. و فيه ملفّات موسيقية هادية للى بيحبّوا يسمعوها .. و فيه تلاوات هادية و مريحة للأعصاب من القرآن الكريم .. اختار بقى و نقّى اللى تحب تسمعه على حسب ميولك قبل ما تنام ..

close-up portrait of a beautiful sleeping baby on white

خامسا : جلسات الاسترخاء علاج سحرى

تحب تنام خلال أقل من 20 دقيقة ؟؟ .. مشكلة الأرق تتلخص فى عدم قدرتنا على الاسترخاء السليم لعضلات الجسم , مع تفكيرنا فى أغلب السلبيات اللى بنمر بيها على مدار اليوم .. و كل ما فكرة تروح من ذهنك , تيجى فكرة تانية .. و مهما طلبت منك إنك ما تفكّرش فى السلبيات دى , مش حتقدر تمنع نفسك برضه , لإن عقلك ما يفهمش النفى , و عشان كده لازم نشغله بالتفكير فى شىء تانى يساعد على الاسترخاء .. و ده اللى الجلسة بتوفّره بسهولة , لما تشغل تفكيرك فى الاستماع إليها , و تنفيذ الاقتراحات اللى بتسمعها .. و بعد دراسة تطبيقية لمدة 3 سنوات للجلسات دى , قدّمنا جلسة الاسترخاء الخاصة بينا , اللى تقدر تسمعها من هنا .. حمّلها على موبايلك , و اسمعها قبل النوم يوميا بانتظام , لمدة 21 يوم , و ادعى لى ..

sleeping-baby

سادسا : حيلة التنفس اللى مش بتخيّب أبدا

فى الحالة دى , فيه حل أسرع , ممكن يساعدك على الدخول الهادى و السريع فى النوم .. ركّز فى تنفّسك البطىء جدا .. و مع كل شهيق , قول فى سرّك “واحد” .. و مع كل زفير , قول “اتنين” .. بالظبط كده .. “واحد .. اتنين .. واحد .. اتنين” .. و لو استمريت على كده ببطء و استرخاء ذاتى , أوعدك إنك حتنام قبل ما يعدّى عليك 3 دقايق فى الوضع ده .. بشرط إنك لو سرحت فى أى فكرة تانية , تبدأ من الأول , و تجاهد نفسك على التركيز فى كده .. حتلاقى نفسك بتنام زى الأطفال الصغيرين بالظبط بإذن الله ..

o-sleep-apnea-myths-facebook

سابعا : استخدم العطور المهدئة للأعصاب

فى رحلتى الأخيرة للكويت , أعجبت جدا بفكرة قام بتطبيقها فندق كراون بلازا اللى كنت مقيم فيه أثناء تقديمى لإحدى الدورات التدريبية , لما لقيت البخاختين دول جنب السرير .. و لما قريت اللى مكتوب عليهم و جربتهم , برشّ نقط بسيطة من محتوياتهم على المخدة أو على رسغ اليد , كانت الليلة اللى عملت فيها كده , من أهنأ الليالى اللى نمتها فى حياتى , لإن العطور اللى كانت موجودة , ساهمت فى تهدئة أعصابى أثناء النوم ..

 

sleep

و بالنسبة لك , انت مش محتاج تروح نفس الفندق لتطبيق نفس الفكرة .. استخدم العطر الأنسب ليك , مهما كان تمنه  , و اللى تحسّ عند استخدامه , بمزيد من الاسترخاء و الهدوء النفسى ..

 

ثامنا : شاهد شىء إيجابى 

خلى آخر حاجة تشوفها أو تسمعها , قبل ما تنام تكون إيجابية .. حتى لو كان فيديو مضحك أو تحفيزى أو صفحة من كتاب مشوّق .. ابعد عن مصادر الخوف و الرعب و القلق مهما كانت قبل نومك .. لإن فى الغالب عقلك الباطن حيكرر جواه اللى عينيك شافته فى آخر 45 دقيقة قبل النوم .. ممكن تستخدم نفس الحيلة لتذكر الأجزاء صعبة الحفظ من المناهج , و خليها هى آخر حاجة تتذاكر قبل ما تنام , عشان عقلك يراجعها أكتر من مرة أثناء نومك .. ده السبب الخفى , اللى بيخلّينى أوصى حبايبنا المشتركين معانا فى الاستمتاع بمحتوى باقتنا التدريبية Learn Pharmacy At Home , بإنهم يشوفوا المطلوب منهم , قبل النوم مباشرة .. بكده غالبا مش بيحتاجوا يذاكروا كتير ..  المهم , ما تسيبش نفسك فريسة للى ممكن تشوفه بسلبية فى بوستات عشوائية ع الفيسبوك و انت فاتح موبايلك , أو للتليفزيون اللى ممكن تكون الست الوالدة مشغلاه فى الأوضة اللى جنبك , ..

o-sleeping-baby-facebook

تاسعا : جهّز مهام الغد

إعداد قائمة ذهنية بالمهام اللى المفروض تقوم بيها تانى يوم , حتى لو بشكل سريع , بيساعد مخك على التفكير فيها بشكل إيجابى أثناء النوم , و يبدأ يعدّ نفسه للقيام بيها لما تقوم بإذن الله , و يسهّل مرورك بخطواتها , .. تخيّل المشاوير اللى حتعملها , و الأماكن اللى المفروض تروحها , و الناس اللى ممكن تقابلهم .. كل ده بشكل سريع , ممكن يساعد فى سرعة استيقاظك بفوقان و روقان لليوم التالى بإذن الله ..

Baby sleeping with a smile

 

عاشرا : نام على وضوء , ما تنساش أذكار النوم

ورد عن النبى عليه الصلاة و السلام , دعاء جميل , مفيش مرة قلته لما كان عندى أرق , إلا و نفع معايا ..

عن زيد بن ثابت رضي اللّه عنه، قال‏:‏

شكوتُ إلى رسول اللّه صلى اللّه عليه وسلم أرَقاً أصابني فقال‏:‏‏”‏قُلِ اللَّهُمَّ غارَتِ النُّجُومُ وَهَدأتِ العُيُونُ و أنْتَ حَيُّ قَيُّومٌ لا تَأخُذُكَ سِنَةٌ وَ لاَ نَوْمٌ، يا حيُّ يا قَيُّومُ أَهْدِىءْ لَيْلي، و أنِمْ عَيْنِي‏”‏ فقلتُها، فأذهب اللَّه عزّ و جلّ عني ما كنتُ أجد‏.‏

و دلوقتى .. لو لقيت إن النصايح دى مفيدة بالنسبة لك .. ما تبخلش بيها على حبايبك , و اعمل share للمقال البسيط ده , عندك ع البروفايل بتاعك .. و إن شاء الله تكون فايدته فى ميزان حسناتنا جميعا ..

و ما تنساش تراجع المقال تانى , عشان تضغط ع اللينكات اللى تخص الكلام المكتوب بالأزرق .. و ابقى ادعى لى ..

#اتعلم_صح_باستمتاع

#أحبكم_فى_الله

أحمد الجويلى

2 responses to “نصائح جويلية .. من أجل نومة هنيّة

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s