إزاى تحفظ أى structure مكلكع بكل سهولة ؟؟!! ..


خلينا نتفق إنها معضلة عند أغلب طلبة كلية الصيدلة على مستوى العالم كله , مش فى مصر بس .. و هى إن فيه chemical structures كتير لازم تتحفظ أثناء الدراسة .. و الموضوع بيبقى أرخم كل سنة , عن السنة اللى قبلها .. و فيه ناس , الموضوع بقى عقدة عندها , و الدنيا بتبوظ عندهم نفسيا أول ما يشوفوا أى structure مهما كان بسيط .. و عشان كده النهاردة حنحاول نقدم بعض الحلول , و نرجو إنها تكون مفيدة و تطبيقية عند حضراتكم .. بس خليك معايا للآخر ..

hhh

أولا : الكيميا العضوية , مش بعبع .. 

المشكلة بتبدأ فى الثانوية العامة , مع دراسة منهج الكيميا العضوية , سواء بالعربى او بالانجليزى , على يد مقدم بايخ للمعلومة , ما قدرناش نستمتع معاه بالمعلومة , أو قال لنا نحفظ الدنيا قدّامنا زى ما هى كده , بأسلوب عقيم أو رخم , من غير ما نحب المادة على إيده .. و مع مرور الوقت , العلم ده بيزداد رخامة , لإن أساسه الأصلى مش مبنى كويس .. و عشان كده لو حضرتك فى بداية المشوار , أنصحك بإنك تدرس الكيميا العضوية باستمتاع , على يد حد ممكن يقدمها لك فى شكل بونبوناية لذيذة , .. و إذا ما لقيتش , فعليك و ع الـ Youtube ربنا يبارك له , ما خلاش حد نفسه فى حاجة .. تقدر تشوف من خلاله الكورس ده ..

أو حتى ده

و لو بالنسبة لك , لسه اللغة الإنجليزية مشكلة عويصة , ممكن تشوف ده برضه كحل بديل ..

 

ثانيا : اعرف المطلوب إيه بالظبط فى الامتحان ..

النقطة دى فى غاية الأهمية .. خلينا نتفق على إن الشكل الكيميائى للمركبات , مش من الحاجات التطبيقية داخل الصيدلية , و هو الكارير اللى أغلب الصيادلة بيشتغلوه بعد التخرج .. أما فى المصانع و الأبحاث و غيرها من المجالات المتخصصة , فلازم نعترف إن الشكل الكيميائى و التسمية كمان , بتكون مهمة جدا , و لكن بيتم التركيز عليها بعد انتهاء الدراسة بالشكل الكافى .. يعنى من الآخر , ممكن تلاقى الممتحن عارف الكلام ده كويس , و على أساسه , بيورّيك الشكل الكيميائى المكلكلع فى مادة الكيمياء الصيدلانية مثلا , فقط عشان تبقى متعرّف عليه من بعيد , أو فاهم خباياه , من غير ما يطلب منك فى مرة , إنك ترسمه فى الامتحان , من الخيال بالكامل على ورقة فاضية .. و ده اللى حصل مع اختبار دفعتى شخصيا , لما لقينا المركبات مرسومة فى ورقة الامتحان , و كل المطلوب مننا هو إننا نعرفها و نعرف معلومات أخرى بخصوصها ..

 

ثالثا : افهم زتونة كل مركب ..

كل مركب كيميائى بيكون له مدخل للتعرف عليه , لو انطلب منك إنك تحفظه .. و بمجرد ما تعرف المدخل , باقى المركب بيكون سهل جدا .. و المدخل ده ممكن يكون كالآتى

  • التقسيم : الأسبرين مثلا .. بمجرد ما نعرف اسمه البديل أو الكيميائى , حنعرف إنه مجموعة Acetyl ماسكة فى أساس المركب و هو حمض الساليسيلك .. و بكده ممكن نفتكره فى الامتحان بمجرد تذكر الاسم العلمى

2517730

  • تغيّر المجموعات المكملة : الفروقات بين المضادات الحيوية فى مجموعة الـ Fluroquinolones مثلا , هى الفرق الرئيسى بينها و بين بعضها , و على اساسها بيحصل اختلاف فى التأثير و الأعراض الجانبية , و ده اللى بيسمى الـ SAR أو اختصار لـ Structure – Activity Relationship .. أما أساس المركب نفسه , اللى مش بيتغير , بيبقى اسمه Pharmacophore ..

بالظبط زى لما تنزل اليابان لأول مرة و تتخض لما تكتشف إن كل السكان شبه بعض بالنسبة لك  .. و لكن بمرور الوقت , ممكن تلاقى فروق بسيطة , تخليك تقدر تميّز بين كل واحد و التانى , لما تعرفهم كويس .. دوّر ع الفروقات دى و افهمها بقى ..

hhh

رابعا : حطهم تحت بنّورة المكتب

من الحيل الممتعة اللى كنا بنعملها أيام ما كنا طلبة , مع الحاجات اللى فيها رسومات زى كده , هى إننا نجمّعها فى ورقة واحدة كبيرة من حجم A2 مثلا , و نحطّها تحت بنورة المكتب , أو فوق شباك السرير , بالشكل اللى يخلّى عيننا تقع عليهم لا إراديا أكبر عدد من المرات .. و خلّى عقلك الباطن يسجّل اللى حيشوفه لا إراديا , و استمتع لما تلاقى نفسك بتفتكر المعلومات تلقائيا فى الامتحان , حتى لو ما كنتش مراجعها قبلها بفترة بسيطة , .. تماما زى الناس اللى حفظت خريطة العالم , بأسماء عواصم البلاد , عن ظهر قلب , لمجرد إنها كانت فى اوضتهم فى مكان واضح , بدل برواز الفن السيريالى اللى ماحدش فاهم من رسمته حاجة !! ..

خامسا : يا سيدى تخيّل ..

دى الحيلة المفضلة عندى بصراحة !! .. غذى فى ذهنك ملكة التخيل و الإبداع , و ابدأ تخيّل الأشكال اللى بتشوفها , بعيدا عن إنها كيميا و كده .. و ابتسم لما تكتشف إن مركب الـ benzophenone شبه الفراشة الجميلة .. و مش غلط إنك تلوّنها باللون المفضل ليك , عشان تقرب الصورة من بعضها ..

 

أو إن كل مجموعة كيميائية , لها تخيّل خاص بيها فى ذهنك .. مثلا مجموعة الـ COOH دى لها رمز الخل .. أما مجموعة الـ CHO فدى لها رمز السكر , أما مجموعة الـ C=O فدايما كانت مرتبطة فى دماغى برمز زجاجة الاوكلادور أو المونيكير يعنى .. بعد كده عملية تشبيك المركبات المعقدة فى ذهنى كانت بتتم بشكل مضحك و ممتع جدا , لما أتخيّل قدّام عينى إن المركب من دول عبارة عن إزازى خل فوق , و شوية سكر ع اليمين .. وإزازتين مونيكير على جنب .. و هكذا .. بتبقى مسخرة !! ..

 

خلينا نتفق إن دى مش كل الحيل اللى ممكن تستخدمها .. و ممكن تكون انت بتستخدم حيلة أو اتنين ما قلناش عليهم هنا , و ده مش معناه إنهم غلط .. و لكن طالما بينفعوا معاك , يبقى ع البركة .. دى أهم حاجة .. و كمان برضه لازم نقول إن فيه فيديوهات كتير بتشرح الموضوع بشكل مفصّل , ممكن تشوف منها مجموعة عجبتنى بصراحة من هنا

أو هنا

أو هنا .. .. و ده جميل للى عاوزين يحفظوا شكل الأحماض الأمينية الـ 20 المعروفين فى الكيميا الحيوية كمان ..

و كهدية للى وصلوا معانا لحد هنا , خدوا الكنز ده .. كورس كامل .. 27 محاضرة فى الـ medicinal Chemistry .. من هنا ..

 

أخيرا بقى , عشان تكتمل الفايدة , ما تنسوش تقروا مقالاتنا السابقة عن المواضيع المتعلقة بكلام النهاردة , زى مثلا عن إزاى نذاكر صح بصفة عامة , و كمان قواعد حضور المحاضرات الأربعون , و إزاى نلم أى مادة فى دماغنا خلال أقل من 72 ساعة .. و أخيرا , قواعدنا التسعة قبل الامتحانات .. فقط اضغط على اسم المقال اللى تحب تقراه , عشان يفتح معاك فى window جديدة .. و استمتع .. و ما تنساش تضغط share للبوست عندك ع البروفايل , أو فى جروب دفعتك , عشان يدعوا لك و يدعوا لى ..

 

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s