دليل الطفشانين من صيدلة | ممكن تشتغل كده لو صيدلة ما نفعتش معاك


من يومين كنت راكب عربية أجرة Careem فى القاهرة , لقيت , و لقيت السواق بيحكى لى عن نفسه , و عن حياته .. و اتفاجئت لما قال لى إنه فى الأساس خطاط و رسام .. و لكن من 4 أو 5 سنين , قرر إنه يسيب محله لأخوه اللى كان بيشتغل معاه , و بدأ يستخدم عربيته فى شغلانة شريفة و ناجحة و مافيهاش سرقة , زى كده .. و يومها غصب عنى , سألت نفسى عن إذا كان فيه صيدلى ممكن يقرر فى لحظة جنون , إنه يسيب مهنته , و يشتغل على عربيته الخاصة , براتب 6000 أو 7000 جنيه شهريا , لمجرد إنه بيحب يسوق عربيته و يهتم بيها !! ..

من فترة كبيرة , كتبنا شوية اقتراحات عن Part-time jobs نقدر نشتغلها بجانب وظيفتنا الصيدلانية المعتادة , أيا كانت , عشان نزوّد دخلنا بسهولة و استمتاع بإذن الله .. و ده كان بعد ما قدّمنا البلورة السحرية , اللى ممكن تقول لنا أنسب career صيدلانى ممكن نشتغل فيه بعد تخرجنا , بشكل يتناسب مع اللى بنحبه و نقدر نقوم بيه فى نفس الوقت .. و لكن كل ده ما نفعش مع ناس كتير ممكن تكون كرهت المهنة بالكامل , سواء قبل أو بعد تخرجها , و ما فلحتش معاهم محاولاتنا فى تحسين صورتها فى عيونهم , لما قدمنا لهم برنامج 91 صيدلة المجانى , أو حتى باقتنا التدريبية Learn Pharmacy At Home .. كل ده ما نفعش !!

1918106_1037460239626301_1422980067868588621_n.jpg

و انطلاقا من مبدأ إننا نعمل اللى يسعدنا , حتى لو ما كانش منطقى أو ممكن مجتمعنا يضحك علينا فيه فى بدايته .. فكلامنا النهاردة فى غاية الجنون , لإنه للى قرروا إنهم يسيبوا الصيدلة تماما , و قرروا يروحوا مجال تانى يشتغلوا فيه بعد ما حال الصيدلة فى مصر ما بقاش عاجبهم ..

و عشان كده لو انت لسه حاطط فى دماغك فكرة عفى عليها الزمن , زى إن فيه شغلانة أرقى من التانية , أو إنى لازم أشتغل بمجموعى , أو إن الناس حتاكل وشّك لو عملت حاجة معيّنة , أنصحك بإنك تقفل المقال ده دلوقتى حالا , لإنه مش ليك على الإطلاق ..

أما لو كنت طاقق زيّنا , و ما يفرقش معاك إلا إنك تكون مرتاح فى شغلك و بتكسب منه كويس بالحلال , ففى الحالة دى , ممكن تلاقى فى كلامنا شىء يشعل فتيل النجاح فى دماغك , و يغيّر حياتك بالكامل ! ..

أولا : خلينا نتفق على إن الوضع الحالى اللى انت فيه حاليا , لو كنت مش راضى عن مهنتك , و نفسك تسيبها بس مش عارف , يعتبر بالنسبة لك أكتر شىء مؤرق تفكيرك , و نفسك ترسى على بر ترتاح عليه .. دايما نفسك تنط من المكان اللى انت فيه , و لكن خايف من المستقبل فى المكان اللى ممكن تنط إليه .. و فى الحالة دى , لازم تشوف الـ TED Talk دى , قبل ما نكمّل كلامنا ..

بجد ما تكمّلش السطور الجاية قبل ما تشوف الفيديو .. هو كله 15 دقيقة .. حتى لو كنت باقة , شوفه .. و لو ما قدرتش دلوقتى , ما تكمّلش المقال إلا لما تشوف الفيديو .. اتفقنا ؟؟

.

.

.

.

شفت الفيديو ؟؟ .. طالما وصلت لهنا , أنا حاصدّقك .. و فى كل الحالات , انت المستفيد من الكلام ده .. يا رب يكون الفيديو فرق معاك .. شفت لما اتكلم على القمصان ؟؟😉 .. تحفة , مش كده ؟؟!! .. تحب تكمّل معايا .. اتفضل ..

اللى لازم تعرفه قبل ما تعمل  Career shift  إن الدنيا مش حتكون وردية من أول يوم .. بل إنك ممكن تخسر .. و ده وارد جدا فى البداية على فكرة .. و عشان كده , الفلوس اللى ناوى تغامر بيها , لازم تتوجد قبل ما تحط اول طوبة فى مشروعك , أو تفكّر إنك تسيب الصيدلة ككل !! .. و ده من ضمن الحاجات اللى اتعلمتها من محاضرة د. إيهاب مسلم , عن أشهر الخرافات اللى ممكن تهد شركات كتير .. و ممكن تشوفها من هنا بالكامل مجانا

 

بالمناسبة , د. إيهاب مسلم نفسه , كان طبيب .. خريج كلية الطب .. و لكن لقى نفسه أكتر فى مجال الاستشارات التسويقية للشركات و التدريب على كده ..

الشاهد إنك دلوقتى عارف إنك ممكن تشتغل كموظف فى كيان مختلف .. و ممكن تنشئ مشروعك الخاص بيك .. عشان يكونوا بالنسبة لك Full-time Job بإذن الله ..

كموظف ..

انت تقدر تشتغل فى كمعلم أجيال فى مدرسة خاصة , ممكن تستغل معرفتك بالعلوم التطبيقية زى الكيميا و الفيزيا و الأحياء , و تربّى فصل بحاله على حب العلوم دى – أو واحد منها – زى ما انت حبيتها , بطريقة شرح متميزة و متابعة و شغف بالطرق الجديدة فى توصيل المعلومة .. و كمان ممكن تدّى دروس بعد الظهر , لو وظيفتك الصباحية كانت غير كافية بالنسبة لك ..

كمان تقدر تشتغل فى شركة تسويق أو توظيف , اعتمادا على مهاراتك فى التحدث و اللغة و الإقناع .. انت ممكن تكون رئيس قسم الموارد البشرية فى أى شركة ممكن تكون بتفهم فى شغلها , و تكون مسئول عن اختيار الموظفين اللى فيها فيما بعد ..

لو بتحب حاجة اشتغلها .. والله لو كنت باحب السواقة أكتر من الصيدلة , و توفّرت بالنسبة لى فرصة العمل بـ Uber أو Careem ما كنتش اتأخرت .. و لكن للأسف , انا باحب الصيدلة أكتر .. من الآخر اعمل اللى بتحبه , و سيبك من كلام الناس .. و ما تنساش إن كل مهنة حلال , هى مناسبة ليك لو كنت بتحبها .. و طظ فى كلام الناس .. صدقنى لو سبت الصيدلة , و بقيت سفير .. حتلاقيهم برضه يقولوا باستهجان : ساب صيدليته , عشان يبقى حتة سفير لا راح و لا جه !! ..

كصاحب مشروع ..

انت ممكن تفتح أى مشروع بتفهم فيه .. أو ممكن تكون بتحبه , بس لسه عاوز تدرس كتير بخصوصه .. المهم تاخد المبادرة و انت فاهم صح .. أعرف من أصدقائى اللى فتح كافيه متميز فى مكان رائع بدمنهور .. و أعرف اللى فتح ستوديو تصوير .. و أعرف اللى فتح مطعم .. و أعرف اللى فتح مكتبة .. و كل دول كانوا صيادلة أو خريجي صيدلة .. منهم اللى اشتغل بالصيدلة , و منهم اللى كان مقرر مصيره المختلف , من قبل ما يتخرج .. و بمجرد ما حصل المراد , عطى والده و والدته شهادة تخرجه اللى كان نفسهم فيها , و اشتغل الحاجة اللى نفسه فيها ! .. لو حابب تخترع حاجة جديدة , ممكن تدوّر على جوجل و يوتيوب عن كلمة Entrapreneur , و دى لما ترجموها , خلوها “رائد أعمال” .. و دى فتح جديد , و فيه كورسات كتير بتتقدم بالمجان فى كل حتة ع النت , عشان تفتح مشروعك الجديد الخاص بيك .. اتعلم إزاى تعمل مشروع , و استعين برأى اللى سبقوك .. بس المهم , جهّز نفسك للمواجهة و الصعوبات .. بس استمتع بكل لحظة بتعيشها فى مغامرتك الجديدة ..

نصيحة أخيرة

ابعد عن المجالات المشبوهة .. و اللى فيها شبهة حرمانية أو نصب .. ما تجريش ع الفلوس كاولوية بالنسبة لك .. و افتكر إن النجاح مش فى جمع المال .. و لكن فى جمعه بالطريقة الصحيحة , مع وجود بركة فيه و فى صحتك و فى عيالك و فى كل حياتك .. الفلوس مش كل حاجة يا بطل ..

الكلام ممكن ما يكونش تفصيلى بزيادة , أو بيعرّفك المفروض تعمل إيه بشكل كامل .. و لكن يكفينى إنك تكون خرجت منه بأى استفادة أو إلهام , بإنك ممكن تنط من حوض السمك الصغير , عشان تنزل برجليك فى المحيط الكبير , من غير ما تكون خايف من المخاطرة .. بس تكون مجهّز عدتك الكافية للعوم أو للغوص باستمتاع إن شاء الله ..

أحبكم فى الله

أحمد الجويلى

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s