إزاى تستفيد بـ 10 طرق مختلفة بعضويتك فى جروب First Pharmacology Course Online ؟؟


1

مفيش أصعب من جمع 100 ألف صيدلى و طالب صيدلة على مستوى الجمهورية , فى مكان واحد !! .. و لكن ده بفضل الله , اتحقق على مدار 5 سنين و نص , و حتى كتابة السطور دى , من خلال وجود أكبر جروب صيدلانى عربى متخصص على الفيسبوك حتى الآن , و هو جروب First Pharmacology Course Online , .. و اللى بنشرح النهاردة , بمنتهى الدقة , إزاى تقدر تستفيد منه , سواء كنت صيدلى أو طالب فى كلية الصيدلة .. و يا ريت تاخد بالك , إن أى مقطع مكتوب بلون مختلف , هو عبارة عن مدخل لموضوع أو بوست جديد , ممكن يفتح معاك لو ضغطت عليه , و يضاعف استفادتك من المقال بإذن الله ..

✿ ❀ ✿ أولا : صوّر و خلينا نقرا معاك ..

من أهم و أسرع طرق الاستفادة من تواجدك معانا ع الجروب , هو إنك تسأل 100 ألف صيدلى و طالب , عن نظرتهم لروشتة جات لك و انت فى الصيدلية , و فيها صنف أو أكتر مش باين كويس .. علطول , صوّر الروشتة , و ارفعها فى ثوانى ع الجروب , و انتظر من دقيقة لـ 5 دقايق , لحد ما تلاقى الإجابات بتتوالى , فى نفس الوقت , اللى حتحاول فيه بنفسك إنك تستعلم تليفونيا , من الطبيب اللى كتب الروشتة , عن اللى كان يقصده , من باب تأكيد المعلومة بشكل أقوى بإذن الله ..

الميزة دى من أسرع الميزات المتاحة فى الجروب , و اللى بتخليك تاخد خبرة “قراءة الروشتات” فى مدة أقصر من زملائك اللى ممكن يكتفوا بتفحص الروشتات اللى بتيجى لهم داخل صيدلياتهم بس .. لكن بالنسبة لك , الجروب بيفتح لك آفاق أوسع على آلاف من خطوط الدكاترة اللى ممكن تشوفها عندنا إن شاء الله , و تشارك فى حل طلاسمها !! .. ياما كان الجروب سبب فى استقرار روشتات صعبة , و صرفها بنجاح , قبل ما يخطفها المريض المتعجل , و يقرر إنه يصرفها من صيدلية تانية !! ..

IMG-20160613-WA0006

و بخصوص الروشتات برضه , فى اليوم اللى تلاقى فيه الدنيا نايمة , سواء عندك فى الصيدلية , أو ع الجروب كمان لا قدر الله , ممكن تمزمز بنفسك فى واحدة من أكبر تجميعات الروشتات , اللى قام بتفنيدها د. أحمد عبد الرحمن , مؤرخ الجروب معانا , و حط تحت أمر حضرتك , أكتر من 1400 روشتة , بحل محتوياتها و مناقشتها بفضل الله , ممكن تشوفها من هنا بسهولة إن شاء الله ..

لتعزيز الخدمة : حاول تكون الروشتة واضحة جدا من حيث الإضاءة و زاوية التصوير .. و يا ريت تحدد ترتيب الصنف المطلوب قراءته بدقة , .. و كمان يا ريت تقول لنا بالمرة , المريض ممكن يكون بيشتكى من إيه , أو أى حاجة تعرفها عنه , عشان ده أكيد بيساعد فى استنتاج إيه اللى ممكن يكون مكتوب ..

˙·٠•● Ƹ̵̡Ӝ̵̨̄Ʒ ●•٠·˙

✿ ❀ ✿ ثانيا : اسألنا عن رأينا فى اللى محيّرك .. 

انت ممكن تسأل واحد صاحبك عن رأيه بخصوص كتاب معيّن , أو دراسة محتوى معين , أو حتى لما تيجى تعمل market research قبل ما تفتح صيدليتك .. و ممكن صاحبك يقول لك وجهة نظره بإخلاص .. و لكن دلوقتى فيه مصطلح أهم , اسمه الـ virtual trust , أو الثقة الافتراضية , اللى ممكن تحصل عليها , لما تسأل 100 ألف شخص عن رأيهم فى شىء معين , أو وجهة نظرهم تجاهه .. أكيد لو رد عليك أغلبهم برأى ثابت , ففى الحالة دى أكيد حيكون هو الأقرب للصواب .. و الغريب إنك ممكن ما تكونش تعرف منهم ولا واحد من قبل كده !! .. و لكن دى سيكولوجية وسائل التواصل الاجتماعى حاليا خلاص !! ..

IMG-20160613-WA0010

انت ممكن تسأل بقى عن عدد لا يحصى من الحاجات , و تاخد رأى الناس فيه .. ممكن تسألهم عن سمعة طبيب معين , أو شركة أدوية معينة , أو برنامج من برامج إدارة الصيدليات .. أو حتى شركة من شركات تجهيز الصيدليات و عمل الرفوف و الديكور و كده .. و ممكن لو لسه طالب , تسأل عن ظروف الدراسة فى كلية معينة , أو كيفية التحويل من كليتك لكلية تانية , أو عن الطريقة المثلى لدراسة مادة معينة , .. اسأل بقى براحتك و عيش .. كل دى مجرد أمثلة بسيطة ..

IMG-20160613-WA0009

لتعزيز الخدمة : حاول دايما ترفق صورة فى البوست بتاعك , بشكل يدل على محتواه قبل ما نقراه .. و ده كمان حيسهّل عملية وصولك للبوست فيما بعد لما تبحث عنه فى أرشيف صور الجروب ..

IMG-20160613-WA0007

˙·٠•● Ƹ̵̡Ӝ̵̨̄Ʒ ●•٠·˙

✿ ❀ ✿ ثالثا : حالات إنسانية صيدلانية .. معاك برضه

خلينا نعترف إن الجروب مش خيرى فى الطراز الأول .. يعنى هدفه مش نشر الحالات الخيرية بصفة عامة .. و لكن الحالة لها علاقة بالصيدلة , بأى شكل من الأشكال , احنا تحت أمرك .. سواء لو بتدوّر على دوا ناقص لحالة .. أو لو كان الدوا غالى , و بتدوّر عليه بالمجان أو بسعر مخفض , أو حتى لو بتدور على طبيب او مستشفى ممكن يقام فيها بعملية معينة .. و هكذا ..

IMG-20160613-WA0011

لتعزيز الخدمة : يا ريت توصّلنا بصاحب الحالة أو المسئول عنها بشكل مباشر .. و تكون اتأكدت بما لا يدع مجالا للشك إن الحالة حقيقية , و مفيش فيها شبهة سلبية من أى نوع .. و نحاول نبعد عن الحالات غير الصيدلانية أو الطبية , اللى ممكن تعرض البوست للحذف , نتيجة إن فيه جروبات غير صيدلانية , أكبر من جروبنا , ممكن يكون مناسب لعرض الحالات اللى زى كده ..

˙·٠•● Ƹ̵̡Ӝ̵̨̄Ʒ ●•٠·˙

✿ ❀ ✿ رابعا : شيّلنى و أشيّلك 

أو بمعنى آخر , تبادل النواقص و الرواكد .. فيه أدوية غالية كتير ممكن نوفرها عندنا , و نكتشف إن تاريخ صلاحيتها قرب .. لو كنت المسئول داخل الصيدلية , ممكن تعرضها للبيع او البدل عندنا ع الجروب , .. و حتلاقى حبايب كتير قريبين جدا , فى نفس محافظتك , ممكن يقابلوك و ياخدوها منك .. و العكس صحيح لو بتدوّر على أصناف ناقصة برضه .. مفيش أى مانع من إنك تسألنا عليها .. و بعون الله , حتلاقى اللى يقول لك إنها موجودة عنده بالفايض .. و ربنا يعيننا على توفيق راسين فى الصيدلة علطول !! ..

لتعزيز الخدمة : خد صورة شيك للأصناف الراكدة عندك , بشكل يغرى للحصول عليها منك , و نزّلها فى البوست , و حاول تتابعه كل شوية , عشان ما يختفيش لو اتنسى لا قدر الله .. و الأمر نفسه برضه بخصوص الصنف الناقص اللى بتدوّر عليه .. هات صورته من على جوجل , عشان نضمن إن هو ده اللى انت بتدوّر عليه ..

˙·٠•● Ƹ̵̡Ӝ̵̨̄Ʒ ●•٠·˙

✿ ❀ ✿ خامسا : حنحل معاك الفوازير

من أسوأ المواقف اللى بنتعرض لها فى الصيدلية , هى “فوازير العملاء” , لما يدخل الحاج الكبير , و يسأل على نوع علاج معيّن , ما يعرفش عنه إلا عدد بسيط من المعلومات غير الدقيقة !! .. و المفروض إن كل واحد فينا يبدأ يفتح المندل , عشان يعرف قصده إيه ساعتها !! .. ما تتعبش لوحدك .. قول لنا ع التفاصيل اللى الحاج قال لك عليها , و احنا حنفكّر معاك , لحد ما نوصل للحل بإذن الله ..

لتعزيز الخدمة : اعرف من المريض كل التفاصيل الممكنة عن العلاج اللى ماجابش أى حاجة “من أتره” !! .. و لو عرفت كمان هو بيشتكى من إيه بدقة , تبقى خدمتنا خدمة العمر , عشان ده حيسهل علينا حل الفزورة بإذن الله ..

˙·٠•● Ƹ̵̡Ӝ̵̨̄Ʒ ●•٠·˙

✿ ❀ ✿ سادسا : وظفنى شكرا 

لو كنت بتدوّر على شغل فى المجال اللى بتحبه .. مفيش أسهل من إنك تدخل تقول بياناتك فى بوست حلو كده , و تعلن فيه إنك متاح للعمل فى الفترة بين الساعة كذا و الساعة كذا .. و يا سلام بقى لو كتبت خبرتك السابقة مثلا , أو المؤهلات اللى تخلي باقى الأعضاء اللى بيدوّروا على ناس يشتغلوا معاهم , يختاروك .. و العكس صحيح برضه لو كنت انت اللى بتدوّر .. اعلن عن حاجتك لحد يشتغل معاك , و حطّ كل التفاصيل الممكنة .. و إن شاء الله تلاقى عندنا أكتر من حد يتقدم للعمل , و تختار بينهم براحتك , بعد ما تعمل معاهم الإنترفيو المتين على مزاجك !! ..

IMG-20160613-WA0005

لتعزيز الخدمة : قول عنوانك , و المرتب اللى ممكن نتكلم عليه .. و إيه اللى تقدر تقدمه , و إيه اللى حتحتاجه بوضوح من الطرف الآخر .. كل الحاجات دى بتساعد على عدم تجاهل البوست بتاعك , و الاهتمام بيه لأقصى درجة إن شاء الله …

˙·٠•● Ƹ̵̡Ӝ̵̨̄Ʒ ●•٠·˙

✿ ❀ ✿ سابعا : استثمر معلوماتك و انشرها لنا

ستيفن كوفى .. الله يبشبش الطوبة اللى تحت راسه .. كان بيقول إن من أهم طرق الاستفادة بالمعلومة , هى إنك تـ share it .. يعنى تنشرها .. و ده شىء حيثبتها فى دماغك بشدة , و يخليها ما تطيرش فيما بعد .. لو وقع قدّامك تعارض دوائى , أو عرض جانبى معين , أو حقنتين اكتشفت إنهم رسبوا بعض لما اتحطوا فى نفس السرنجة .. ادخل علطول قول لنا ع اللى حصل معاك , و شوف باقى خبرات الحبايب اللى ممكن يكونوا اتعرضوا لنفس المعلومة قبل كده , أو بالنسبة لهم ممكن تكون جديدة , و يبدأوا ياخدوا بالهم منها .. و طالما انت عملت كده , فبرضه حتستفيد من ناس تانية قامت بنفس الدور !! .. و كله يستفيد بإذن الله .. و تقدر تشوف مقالنا السابق عن طريقة المذاكرة الإبداعية برضه .. عشان ما تنساش المعلومة ..

ممكن برضه تـ share البوستات المفيدة من الصفحات العلمية اللى انتشرت بالعربى حاليا بمنتهى السهولة .. و كله فى ميزان حسناتك إن شاء الله …

لتعزيز الخدمة : حنحاول نتكلم بأسلوب علمى قدر الإمكان .. و يا سلام لو اتأكدنا من صحة المعلومة اللى حننشرها , بالبحث فى المراجع العلمية السليمة .. و اللى ما عندهوش المراجع , فقط يبعت لنا رسالة ع الاكونت الرسمى للـ El-Gewaily Academy , و احنا نبعتها له لحد عنده إن شاء الله ..

˙·٠•● Ƹ̵̡Ӝ̵̨̄Ʒ ●•٠·˙

✿ ❀ ✿ ثامنا : اسال مجرب و صيدلى فى نفس الوقت 

حالات كتير ممكن تكون OTC أو نتصرف فيها طبقا لحدودنا المعروفة داخل الصيدلية .. و الحل لها ممكن يكون متداخل و مركب .. و ممكن يكون فيه أكتر من حل لنفس الحالة .. انت ممكن تسأل براحتك – تحديدا لو كنت انت المصاب لا قدر الله – عن أحدث الوصفات العلاجية لمشكلتك , من خلال خبرة باقى الأعضاء .. ممكن واحد فيهم يقول تمرين معين , أو عقار ما , أو حتى عشب معين , يكون فيهم الشفا من عند الله ..

لتعزيز الخدمة : قول كل ما يمكنك وصفه من التاريخ المرضى للحالة .. و تجاوب مع أسئلة المستفسرين فى التعليقات عن حالتك .. و قدر الإمكان ابعد عن الأسئلة العامة , زى مثلا “إيه أحسن حاجة للصداع ؟؟” .. أو “ممكن منوم ؟؟” .. الأسئلة دى بتكون عامة بشكل مستفز , و بتلاقى الردود عليها قليلة , أو غير مفيدة للأسف !! ..

˙·٠•● Ƹ̵̡Ӝ̵̨̄Ʒ ●•٠·˙

✿ ❀ ✿ تاسعا : قضايا المهنة شىء ضرورى

مشاكل المهنة لا تنتهى على كل القطاعات و المستويات .. من أول تطوير التعليم , لحد مشكلة التكليف الحكومى , مرورا بمافيا شركات الأدوية , و النواقص , .. و انتهاء بمأساة الزيادة الجديدة فى أسعار الأدوية !! .. كل دى مشاكل ممكن نتناقش فيها , و نحاول ندرسها من جوانب كتير فى جلسات عصف ذهنى , ممكن تبدأها بنفسك فى بوست صغيّر , يجتمع عليه عدد ضخم من الأعضاء بين عشية و ضحاها !! .. و حجم الاستفادة و استنارة العقل , بيصعب تخيل مداه بجد !! ..

لتعزيز الخدمة : عشان خاطرى بلاش خناق !! .. احنا بنتناقش , مش بنتعارك .. مش لازم شتيمة ولا تخوين ولا قدح فى الذمم !! .. شايف المشكلة ؟؟ اعرضها ببساطة .. شايف حل ؟؟ اعرضه بذوق !! .. بلاش ضرب أو سلبية او إحباط أكتر ما الناس محبطة بالله عليك .. عشان كل ده بيعرض تعليق حضرتك , أو البوست كله للحذف لا قدر الله ..

˙·٠•● Ƹ̵̡Ӝ̵̨̄Ʒ ●•٠·˙

✿ ❀ ✿ عاشرا : شاركنا المسئولية

الجروب فيه 26 أدمن حتى الآن .. و لو فضلوا كلهم صاحيين على مدار الـ 24 ساعة , برضه مش حيكفّوا للرد او التواصل او السيطرة على كل بوستات الجروب و نشاطاته .. انت ممكن تشاركنا المسئولية لو حابب الجروب يفضل على قيد الحياة و الإفادة بإذن الله .. البوست اللى تحس إن فيه أى “تعدّى” من أى نوع .. فقط اضغط عليه report , و ده بيظهر لكل الأدمنز اللى قاعدين فى نفس الوقت , أو لما أى واحد فيهم يدخل الجروب فيما بعد .. و ده حيضمن لحضرتك إننا نتصرف بشكل لائق مع اللى حصل .. لو ده صعب , اعمل منشن للعبد لله أو لواحد من الادمنز الكرام فى كومنت .. و برضه حيتم القيام باللازم إن شاء الله ..

1

لتعزيز الخدمة : ربنا يعلم حجم المجهود اللى بيقوم بيه الادمنز – و أنا أقلهم – عشان الجروب يفضل واقف على رجليه .. و كلهم تقريبا مش بيستفيدوا أى شىء , و بيتواجدوا فقط ورا الكواليس بمنتهى الإخلاص و إنكار الذات !! .. والله الناس دى تستحق التحية على مجهودهم .. أرجوكم بلاش تهجم عليهم بشكل غير لائق .. اشتمونى انا ماشى لو شفتوا أى أخطاء , لكن بلاش هما .. اتفقنا ؟؟


طبعا فيه طرق أكتر من كده للاستفادة .. و انت ممكن تكتشفها بنفسك بإذن الله .. و لكن تقدر تعتبر دول اللى وردوا على خاطرى , لما شفت السؤال ده امبارح قبل ما انام , و قررت إنى أكتب البوست ده للرد عليه بشكل مفصل قدر الإمكان ..

13407009_10153491163876207_928684290159985084_n.jpg

♪♫•*¨*•.¸¸¸¸.•*¨*•♫♪

و قبل ما أختم مقالى , حابب أنوّه بسرعة عن إن أحد أسباب استمرار الجروب حتى الآن – بفضل الله – هى محاولتنا كـ 26 أدمن باستمرار , إننا نحافظ على قوانينه اللى ارتضيناها جميعا (تقدر تشوفها هنا) , و اللى بتفضل الأدب على العلم .. و اللى بتفضل المستحق للعلم على الرافض له , أو على الزاهد فيه , أو على اللى عاوز ياخده بغير حقه ! .. و عشان كده , القوانين دى لمصلحة حضرتك , مش لمصلحة الأدمنز بجد !! .. و عشان كده , احنا دايما بنقول إننا مش الجروب الصيدلانى الوحيد .. و لكن أخلاقنا هى اللى بتميزنا بفضل الله .. و عشان كده برضه , أهلا و سهلا بإضافاتكم لأصدقائكم , اللى ممكن يحبوا يشرفونا بالجروب , و يضاعفوا عدده أكتر و أكتر بكل خير بإذن الله .. الجروب مجانى , و حتفضل عضويته مجانية بإذن الله .. و مرحبا بكم جميعا فى أى وقت ..

اتعلم صح باستمتاع

أحبكم فى الله

أحمد الجويلى

One response to “إزاى تستفيد بـ 10 طرق مختلفة بعضويتك فى جروب First Pharmacology Course Online ؟؟

  1. يوجد مركز طبي خيري بقرية تابعه لمنيا القمح بمحافظة الشرقيه
    المركز يحتاج الى اطباء تخصص باطنه انف واذن اسنان ونسا
    ولو لمدة ساعه واحده يوميا
    وجزاكم الله خير

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s