قواعد الـ stress management الأربعون


stress-management

خلال الفترة اللى فاتت , اتعرضت لضغوط كتير , منها اللى يبدو إنه بسيط , زى دوشة باسم شبه المستمرة , و عناده الفظيع عند التعامل معاه , مرورا بمشاكل الشغل اللى لا تنتهى , و انتهاء بالظروف الاقتصادية اللى لا تخفى على حد , و كلنا بنعيشها بلا استثناء .. و ده خلانى أبدأ أدوّر على طرق متعددة , منها المعروف , و منها غير المعروف , عشان أخرج بنفسى من حالة الـ stress شبه الدائمة دى , و اللى كانت بدأت تؤثر على صحتى الجسمانية , بشكل واضح ليا و لغيرى .. أقرب المقربين منى بقوا بيقولوا لى إن وشّى بقى يدّى أكبر من سنى الحقيقى 10 سنين ع الأقل !! .. و من باب تذكير نفسى و إياكم , حاحاول أقول لكم على 40 نصيحة مؤثرة , يمكن استخدام أغلبها بنجاح بإذن الله ..
.
1) اتعامل مع الـ stress على أساس علمي , و شوف المحاضرة دى Stress Management – Perception & Interpretation , للرائع Dr Michael Olpin , و أكتر من ساعة من المتعة العلمية , بصوت و صورة واضحة , و كمان english subtitles , ممكن تكون سبب فى تحسين مستواك فى الإنجليزية ..https://youtu.be/QLuJXkS4SIE
.
2) بص للـ stress بنظرة مختلفة , فرقت معايا شخصيا , لما شفت الـ TEDx talk الرائعة دى , للمتميزة Kelly McGonigal , اللى ممكن تخلّى الـ stress صديقك بجد .. https://youtu.be/RcGyVTAoXEU .. (أقل من ربع ساعة , مترجمة بالعربى لو حبيت)
.
3) اقرا الآية دى بقلبك أكتر من مرة “يَاأَيُّهَا الَّذِينَ آمَنُوا عَلَيْكُمْ أَنفُسَكُمْ لَا يَضُرُّكُمْ مَنْ ضَلَّ إِذَا اهْتَدَيْتُمْ” .. ماتخافش لما الأزمات تطيح بالمحيطين بيك , طالما انت ماشى صح .. و للتأكيد أكتر , اقرا قول الله تعالى “مَا يَفْعَلُ اللَّهُ بِعَذَابِكُمْ إِنْ شَكَرْتُمْ وَآمَنْتُمْ وَكَانَ اللَّهُ شَاكِرًا عَلِيمًا ” .. اتطمن طالما بتعمل اللى عليك ..
.
4) ابتسم بالعافية أول ما تقوم من النوم .. (بصوت مصطفى بكرى) .. و فى دى كتبنا كلمتين حلوين قبل كده , ممكن تقراهم من هنا http://wp.me/p2YNXX-8V
.
5) اتعوّد ما تشتكيش .. #الشكوى ممكن تكون مريحة مؤقتا , لكنها مؤذية ليك على المدى الطويل , عشان بتحسّسك إنك كائن مظلوم و بائس بدون سبب , في حين إنك المفروض تتحرك , عشان تعرف السبب فى اللى انت فيه , و تتغلب عليه ..
.
6) اقرا قرآن يوميا .. له تأثير عجيب .. و لو ما لحقتش تقرا , اسمع بصوت الشيخ المفضل ليك .. و ادعى لى .. #سورة_مريم بتحوّل حالتى النفسية 180 درجة , خاصة لو بصوت الراجل ده https://goo.gl/MwyYMK
.
7) العب رياضة يوميا , .. حتى لو كانت المشى بجدية لمدة 30 دقيقة يوميا .. فما بالك بقى لو زوّدت .. حتى شوف Dr. Mike Evans بيقول إيهhttps://youtu.be/69F_7Fimf2c (مدبلج بالعربي) ..
.
8) فرغ طاقتك السلبية بشكل إيجابى .. مفيش مانع إنك تجيب حاجة تضربها ع المكتب من غير ما تتكسر , بدل ما ترزع فازة فى الأرض , أو تحدف طفاية السجاير فى المراية , على طريقة المسلسلات العربية !! ..
.
9) لما تنتبه لنفسك متضايق أو متوتر , اسأل نفسك على السبب , عشان أحيانا الواحد بيكون متضايق بدون سبب واضح .. و لما تكتشف سبب أو أكتر , افصلهم عن بعض , و حتكتشف إن كل مشكلة منهم , ممكن تكون بسيطة لوحدها , أو ممكن تنتهى فى وقتها بدون مجهود عسير منك ..
.
10) اسمع جلسات استرخاء .. ممكن تخليك تقوم بعد 20 أو 30 دقيقة , بنفسية مختلفة تماما .. و ده مثال عليها .. بصوتى شخصيا على فكرة 😉 ..https://youtu.be/lYr6M7BwJYc ..

relax-for-healthsmall

.
11) العب لعبة بسيطة ع الموبايل , تفصل بيها عن الشغل كل شوية ..
.
12) حاول تحط موبايلك صوت مريح للأعصاب , ممكن تشغّله فى الخلفية , سواء بموسيقى أو بدون .. لفترات طويلة , .. و موجود على YouTube بغزارة .. و دى مجرد أمثلة عليه :
.
طيور : https://youtu.be/m6xBRts6J_E
بحر : https://youtu.be/Yk_Gn4so5LE
أمطار : https://youtu.be/fVI50xI3jMI
غابات : https://youtu.be/7QcfjDKmN_0
أنهار : https://youtu.be/G1UI0EV3Jng
.
13) كل شيكولاتة بالنكهة اللى بتحبها .. بس مش كتير , عشان وزنك ما يفرطش منك ..
.
14) ابعد السكريات الكتير , لأنها بتحسّن الـ mood بشكل سريع , لكن بعد كده بيحصل لها craving بيخليك مرتبط بيها , و ما تقدرش تسعد إلا من خلالها , و فى الحالة دى , ابقى سلّم لى على كرشك ..
.
15) اشرب أعشاب مضادة للتوتر , متوفرة على هيئة أكياس , أو عند العطار : بابونج / تيليو / ينسون / كركديه .. إلخ .. و ابعد عن القهوة و المنبهات الكتير , عشان الدنيا مش ناقصة شدة أعصاب بسببهم ..
.
16) هات ورقة , افتح Note ع الموبايل , و اكتب فيها 10 نعم ممكن يكون غيرك محروم منها .. و لاحظ نفسك و انت بتبتسم لا إراديا مع آخر نعمة أو اتنين تكتبهم ..
.
17) جرب #متعة_العطاء , و اوصل لأسرة فقيرة , بدون سابق ميعاد , و خبّط على بابهم , و اسألهم عن ظروفهم , و تصدق عليهم باللى نفسك تجود بيه .. و كلمنى عن شعورك و انت خارج ..
.
18) كل ما واظبت على رقم (17) بشكل مستدام , و قيمة مناسبة , و نية صادقة , حيحصل شوية حاجات :
– ربنا حيوقّف لك ولاد الحلال
– مش حتحسّ بالضنك و القلق
– حتلاقى الرزق جاى لك من حيث لا تحتسب
.
19) استغفر بقلبك مع لسانك , مش بلسانك بس .. حس “أستغفر الله العظيم” و انت بتقولها ..
.
20) ماتفتحش الفيسبوك قبل ما تنام مباشرة .. عادة قاتلة من مجاميعه .. ربنا يتوب علينا منها .. حاول تنفّذ رقم (6) أو رقم (10) بدلها ..
.
21) ماتفتكرش إنك لما تشتغل طول الوقت , فانت كده بتحمى نفسك و بيتك من الأزمات و الديون .. اعمل اللى عليك , و سيب الكل على ربنا .. هو اللى بيرزق .. خلّى لبيتك وقت مقدس , و استمتع بجزء من يومك مع أهلك , حتى لو كان الشغل بالنسبة لك مش تعب ولا حاجة ..
.
22) خد دش سخن فى ربع ساعة أو أكتر , بعد ما كل الناس تنام , و دلّع نفسك بقى بالشاور جل و الشامبو , لحد ما تبوش ..
.
23) كل ما تفتكر .. فكّ الـ ( ||| ) اللى بتبقى بين عينيك لا إراديا .. و خد نفسين تلاتة من أعماق رئتيك .. و خرّجهم ببطء شديد جداااااااا ..
.
24) مش عيب إنك تتفرج على مقطع كوميدى أو مسرحية مضحكة , كل ما لاقيت وقت فاضى لكده .. زى الـ 12 ثانية دول كده 😉 .. https://goo.gl/PnA4KI ..
.
25) بلاش أفلام رعب .. أدينى حذّرت أهو ..
.
26) اعمل unfollow للناس الكئيبة اللى ع الفيس .. خليهم friends عادي , بس ماتشوفش بوستاتهم فى الـ news feed كل ما تفتح الفيس !! ..
.
27) انجز كل يوم مهمة تفرحك بنفسك .. مهما كانت صغيرة .. و كافئ نفسك بحاجة بسيطة من اللى قلناهم فوق ..
.
28) اتفرج على فيلم Blood Diamond .. و لو كنت اتفرجت عليه , حتفهم قصدى ..
.
29) كل بشكل صحي .. خضار و فاكهة على قد ما تقدر .. و قلل من البروتينات اللى بتزوّد حموضة جسمك عمّال على بطال , و تخلّى مودك زى الزفت ..
.
30) ما تكتفيش بالمعايدات و الكلمات السريعة ع الفيس .. اخرج من قوقعتك , و زور قرايبك و أصدقاءك .. بس ما تتكلموش فى حاجة كئيبة ..
.
31) اتعلم كل يوم معلومة جديدة لها علاقة بمجالك فى وقت قصير .. لو صيدلى أو طالب صيدلة , اللينك ده ممكن ينفعك https://goo.gl/OunDhr
.
32) ما تركنش فلوس معاك .. قيمتها حتقل , و حتكتئب أكتر .. استثمر بذكاء , و اختار الشىء اللى حتقتنيه , قبل ما يغلى أكتر فى الأيام الجاية !! .. و الـ stress حيقل لما تكتشف فيما بعد إنه غلى فعلا ..
.
33) لو ما عندكش حساسية من البخور , اشترى تشكيلة حلوة , و شهيص نفسك ..
.
34) لو غنى , و بتلعب بالفلوس لعب .. جرب تروح spa و تعمل مساج محترم , ينسّيك كل حاجة ..
.
35) لو ليك فى اليوجا , دوس .. بتعمل أجدع دماغ ..
.
36) لو جرىء , فيه حاجة اسمها الـ Digital Drugs , .. دى تسمعها بالهيدفون لفترة كافية , حتلاقي نفسك كإنك واخد ترامادول أو حاجة من أشباهه .. عن نفسى ما جربتهاش , لكن لو نفسك تخوض التجربة (على مسئوليتك) , دوس يا برنس ..https://youtu.be/tyUDTWta7vs
.
37) ما تنساش الأجازة الأسبوعية , و السنوية من الشغل .. افصل فيهم عن العالم , و اقفل موبايلك , سيب لابك , و اطلع على أى حتة جديدة .. حتى لو سفارى لوحدك فى الصحرا ..
.
38) خلى ليك زيارة أسبوعية او شهرية , لـ مستشفي ابو الريش للاطفال , أو مستشفى الأورام فى محافظتك .. و ابقى قابلنى لو لقيت عندك و لو لحسة stress فى قعر الكوباية بعد كده ..
.
39) جرب تبقى تمشى فى الشوارع و هى فاضية بالليل قبل الفجر , .. لوحدك .. بس حاسب من اللى ممكن يثبتوك لا قدر الله ..
.
40) “وَمَنْ أَعْرَضَ عَنْ ذِكْرِي فَإِنَّ لَهُ مَعِيشَةً ضَنكًا” .. بلاش تكون من دول ..
.
#شير_لو_استفدت_حاجة
#نأسف_لطول_المقال
.
أحمد الجويلى

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s