عاوز يبقى لى صيدلية , و مفيش فلوس .. فيه حلول ؟؟


خلينا نتفق مع بعض على إن حلم أغلب الصيادلة – إن لم يكن كلهم – فى مصر , بمجرد تخرجهم من الكلية , هو امتلاك صيدلية تدر دخل كبير , خلال مشوار حياتهم العملية .. فيه ناس بتحقق الهدف ده بدري , و ناس بتحققه متأخر .. و ناس مش بتحققه خالص .. و السبب الأوضح ورا التأخر فى كده , غالبا ما بيكون ضعف التمويل المادي .. يعنى مفيش فلوس تفتح بيها صيدلية .. و النهاردة , احنا جايين عشان نحلّ لحضرتك المشكلة دي بإذن الله , بشكل عملي و تطبيقى .. و لكن مطلوب إنك تركّز فى كل كلمة و كل حرف .. و ربنا يرزقنا التوفيق و الإخلاص و القبول ..

طبعا مش محتاجين نوضّح إن الواقع اللى انت شايفه صعب , بل سىّء لدرجة بشعة , و يصيبك بالكآبة لو فكرت تفتح الصيدلية اللى نفسك فيها .. , عشان كده , الحلول اللى حتقراها معانا النهاردة , ممكن تكون مختلفة شوية , بدل ما تنجح فعلا فى فتح صيدليتك المعتادة , و بعد كده تقفلها بفشل ذريع , لمجرد إنها ما كسبتش ماديا زى ما كنت تتخيل !! ..

•┈┈┈●•••❁❁✍❁❁•••●┈┈┈•

  • استثمر في البراح الجديد

زى ما انت شايف .. الصيدليات بقى على قفا من يشيل .. و بين كل صيدلية و التانية , 3 صيدليات .. و لو حتشتري صيدلية منهم , الموضوع حيكون صعب عليك جدا , برغم إنك لما تدقق شوية , مش حتلاقيها بتكسب قوي يعني , و لكن مع ذلك سعرها بيكون عالي جدا بالمقارنة باللى ممكن تكسبه من وراها في القريب العاجل , أو البعيد الآجل !! .. و عشان كده , من الأفكار اللطيفة , إنك تبدأ تدور ع الأماكن اللى الأسعار فيها أقل , و لكن شغلها الجدي حيبدأ خلال سنين جاية بإذن الله .. المناطق الجديدة نسبيا .. يعنى مثلا مدينة برج العرب في اسكندرية , لسه فيها صيدليات بكر , و مستقبلها جاي بإذن الله .. ممكن تستثمر هناك , و تبقى تلقي نظرة عليها كل شهر أو اتنين , عشان تتابع مدي نمو المنطقة اللى حتبدأ فيها الشغل , و تختار اللحظة الحاسمة , اللى ممكن تقرر فيها إنك تفتح صيدليتك ,و تمارس فيها شغفك .. و لكن ده طبعا حيستلزم إنك تنقل حياتك نفسها فى المدينة الجديدة دي , عشان ما تضيّعش يومك فى ساعات السفر , غير ساعات التواجد داخل الصيدلية !! .. و بصراحة دي حتبقى حاجة حلوة لو بتحب الهدوء و العزلة .. دور فى محافظتك أو جنب محافظتك ع المكان اللى ممكن تستثمر فيه بالشكل ده , بمجرد ما يمتد له العمران , و يبقى فيه كثافة سكانية مناسبة .. و استمتع بكونك من أوائل الصيدليات اللى بتفتح فى المنطقة !! ..

ادخل على جروبنا First Pharmacology Course Online , و اسأل على المناطق دي .. و ابدأ بدري ..

  • شارك أنتيمك

مش لازم تبدأ لوحدك .. تقدر تشارك صديقك الوفي , و تتخلص من المثل الدارج “صاحبك لا تناسبه و لا تحاسبه” .. الكلام ده مش صح , طالما انتوا الاتنين حتتقوا الله فى شراكتكم .. بدل ما كل واحد فيكم يعمل صيدلية صغيرة يتم أكلها من خلال حيتان السوق , تقدروا تتعاونوا , و تحطوا فلوسكم على بعضها , و تعملوا كيان أكبر , يقدر ينافس بقوة .. و لو سمعتكم كويسة , ممكن تستعينوا بتمويل أصدقاء صيادلة جدد برضه , بنظام الشراكة , مش الإقراض أو الربا و العياذ بالله .. و تكونوا ع الحلوة و المرة سوا بإذن الله .. الشراكة ممكن تتم مع صيدلية قائمة بالفعل , .. زى ما حصل في المدينة اللى انا عايش فيها .. بطل القصة قرر يستثمر أغلب أمواله اللى حصل عليها من مجال الدعاية , فعرض على صاحب صيدلية من أقدم صيدليات المنطقة (و لكن شكلها بقى عتيق فعليا) , إنه يجددها بالكامل , بديكورات جديدة , و نظام تخزين مبدع , في مقابل إنه يكون شريك الصيدلي العجوز .. و أصبحت حاليا من أجمل و أقدم صيدليات المنطقة .. مش من أقدمها بس ..

  • استثمر علاقاتك

الأب (مخاطباً ابنه) : أريدك أن تتزوج الفتاة التي اخترتها لك !!
الإبن : و لكني سأختار عروستي بنفسي !
الأب : و لكني اخترت لك ابنة بيل جيتس !!!
( بيل جيتس هو أثرى رجل في العالم صاحب شركة ميكروسوفت )
الإبن : حسناً ، في هذه الحالة أوافق
الأب (مخاطباً بيل جيتس) : لدي عريس لابنتك
بيل جيتس : لكن ابنتي ما زالت صغيرة السن على الزواج
الأب : ولكن العريس هو نائب رئيس البنك الدولي !!!
بيل جيتس : آه !! في هذه الحالة أوافق ..
الأب (مخاطبا مدير البنك الدولي) :
لدي شاب يصلح لمنصب نائب رئيس البنك ,
المدير : و لكن لدينا عدد كبير من النواب ،
و لا توجد مناصب شاغرة ..
الأب : و لكن نائب الرئيس المقترح هو زوج ابنة بيل جيتس ,
المدير : آه !! في هذه الحالة تم تعيينه ,أجّر بلاش تمتلك

يمكنك تطبيق القصة السابقة عليك .. ربما لا تملك من الدنيا إلا فكرة إقامة صيدلية , و علاقات طيبة مع ناس كتير ممكن يساعدوا بعض .. الهدى من الله , يكمن فى نجاحك فى توصيل الخيوط المناسبة ببعضها .. انت تعرف واحد صاحب أرض في منطقة مناسبة , و مقاول شاطر , و صيدلي خبرة بالعلم الصيدلي , و لكن لا يملك المال , و صيدلي آخر غني جدا , و لكن لا يعرف أى شىء في الممارسة العملية .. و آخر متميز فى الإدارة .. و هكذا .. تنسّق انت كل ده مع بعضه , و تعرفهم ببعض باحترافية , في مقابل أن يكون لك حصة من إيراد الصيدلية .. ربما تستبعد إمكانية تنفيذ ده فى عقلك , و لكني أعرف 4  أشخاص بالاسم , بيديروا حياتهم كلها من خلال نفس اللعبة دي .. و في كل مرة بينجحوا باقتدار .. السر فى العلاقات الطيبة !! ..

  • مارس فن الإدارة

إذا لم تكن تمتلك إلا قدرتك على إحياء الصيدليات الميتة , و كنت جربت نفسك فى أكتر من مكان اشتغلت فيه كمدير براتب شهري , فإيه المانع إنك تخلّى ده هو تخصصك ؟؟!! .. اعمل برنامج لإحياء الصيدليات خلال 6 شهور , و خليه زى وصفة خاصة بيك , و تعرض على أصحاب الصيدليات اللى بتواجه الصعوبات الإدارية , إنك تديها قبلة الحياة , لإعادتها للسوق مرة تانية .. و طبّق خبراتك الرائعة بمقابل يتم تحديده من الدخل اللى حييجى من الصيدلية فى الـ 6 شهور التاليين على سبيل المثال , و حط لنفسك الضمانات الكافية , اللى تؤكد لك إن حقك حيكون في أمان .. لو مش مصدّق إن الفكرة يمكن تطبيقها , تابع صفحة Pharmacy Analyzer , و تواصل معاهم ع الخاص , و قول لهم إنك من طرفي , و ادعي لى ..

  • ابعد عن الدخلاء

أسوأ فكرة ممكن تخطر في بالك , عشان تمكنك من فتح صيدلية باسمك في وقت بسيط , هى إنك تطلب التمويل من غير صيدلي , و يكون هو صاحب الصيدلية من الباطن , و تشتغل فيها انت بأى شكل .. لا نعيب فى أصحاب المهن الأخرى , و لكن مهنة الصيدلة مهنة تربط بين العلم و التجارة .. لو قررت العمل بفلوس غير الصيدلي , فانت بتحطّ الرسالة و العلم تحت رجليك , و تعلي من شأن الجزء التجاري فقط , و فى الآخر تزعل لما يتقال عليك “بياع” أو “بقال” !! .. بجانب إن ده غير قانوني من الأساس , و يستوجب غلق الصيدلية و سحب ترخيها , لإن صاحب الصيدلية لازم يكون صيدلي قانونا !! .. فأرجوك بلاش تستسهل , لإنك فيما بعد مش حتكون صاحب الكلمة داخل الصيدلية , و صاحب رأس المال هو اللى حيبدأ يطالبك بمكسب أكبر لتعويض رأس المال اللى استثمره معاك فى أقل وقت , و مش حيحط في باله أى اعتبارات صحية أو أخلاقية – إلا عند ما رحم ربى – لما يتم التعامل مع العملاء , و حيبقى الموضوع تجاري بحت !! ..

  • تخصص و اعمل لنفسك براند

لو قررت إنك تفتح صيدليتك و خلاص .. حاول ما تخليهاش زى أى صيدلية .. خلي عندك ميزة تخلّى العملاء ييجوا لسعادتك بغض النظر عن وجود 11 أو 12 صيدلية فى نفس الشارع اللى انت فيه .. بس عشان خاطري , اعرف إن الخصم مش ميزة تنافسية , ده خراب بيوت مستعجل !! .. الميزة التنافسية اللى اقصدها ممكن تكون زى وجود دكتور خبرة محترم داخل الصيدلية .. أو تميزها فى مجال مستحضرات التجميل مثلا .. أو وجود قسم خاص بالأعشاب , .. أو التخصص في قصة التغذية و السمنة و النحافة .. أو حتى التركيبات المعروفة .. وفّر النواقص كويس .. المهم إن الناس تدخل تسأل عليك بالاسم .. و ساعتها , مش حيهمّك المنافسة ولا حتنزعج من الأحوال الاقتصادية المتردية .. لإن الناس محتاجاك في حاجة , ما حدش بيقدمها كويس غيرك .. تمام يا غالي .. اعرف أكتر عن إزاي تعمل لنفسك Brand من هنا ..

لو لقينا تفاعل حضراتكم مع البوست ده مشجع , حنبدأ التحضير لدورة كاملة , عن إزاى تفتح صيدلية متميزة , من الألف إلى الياء , بشكل يضمن نجاحها و استمراريتها بشكل قوي بإذن الله , و يقلل من المخاطرة و الخساير لأقل الدرجات .. و عشان كده , Share البوست على بروفايلك , و على جروب دفعتك , و تابعنا ع الفيسبوك كويس , انتظارا للكنوز الجديدة , اللى حنقدمها لحضرتك بشكل شبه يومي بإذن الله ..

بالمناسبة , المقال يحتوى على روابط داخلية , حاول تستكشفها على رواقة فى وقت فراغك .. حتفيدك جدا بإذن الله ..

•┈┈┈●•••❁❁✍❁❁•••●┈┈┈•

 

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s