مبروك المدام حامل .. تعالى بقى اسمع الكلام


لسه فاكر لما قابلني مع زوجته في الفندق بالمنيا .. مع إنهم من أحد مراكز محافظة سوهاج .. و كانت المشكلة عندهم في تأخر الحمل .. و المشكلة كانت مقسمة عليهم بالتساوي .. هو كان عنده ضعف في حركة الحيوانات المنوية , و هي كان عندها زيادة في تأثير هرمون البرولاكتين , بالشكل اللي كان لا بد معاه إننا نقعد ساعتين نقدم في نصايح شاملة و متكاملة , و اللي بشروني بعدها بـ 4 شهور , بإن الزوجة بقت حامل .. و بعدها بـ 5 شهور , بلغوني إن الحمل كان في توأمين بفضل الله .. و من أيام بسيطة , شرف للحياة ولد و بنت زي القمر , .. هذا من فضل ربي ..

أول ما عرفت بخبر الحمل , قلت للزوج عدد من النصايح , حنحاول إننا نفصّلها هنا , عشان هي تعتبر موحّدة في أغلب حالات الحمل الجديد .. و ربنا يرزقنا التوفيق و الإخلاص و القبول ..

23-maternity-photo-ideas-by-yulia-preview

طالما حصل الحمل , انت كمان حتشيل المسئولية

  • حمض الفوليك علينا حق

من أهم الحاجات اللي لازم تواظب عليها الزوجة اليومين دول أول ما تفكر في الحمل , فما بالك لو حملت فعليا , هو تناول أقراص حمض الفوليك .. و فيه منه أسماء و تركيزات كتيرة في السوق .. ما تحيّرش نفسك , و ادي أنسب تركيز , اللي هو ده

folic_acid_5mg_tab_eng

حمض الفوليك مهم جدا لنمو الجهاز العصبي للجنين خلال الشهور الأولي (تحديدا أول شهرين) من الحمل .. و بيمنع حدوث تشوّهات للنخاع الشوكي , أشهرها ما يسمى بحالة Spina bifida , اللي بيكون صعب علاجها جدا بعد الولادة , لو حصلت لا قدر الله .. تقدر تتعرف عليها أكتر من هنا ..

طبعا مش كل اللي ما أخدوش أقراص حمض الفوليك بيحصل معاهم كده , لإنهم ممكن يكونوا بيعوضوا احتياجهم له من مصادره الغذائية , بشكل  منتظم و صحي , .. يعني بياكلوا الخضار و الفواكه و الكبد و البيض, .. و عشان كده كلامنا موجّه أكتر للزوجات الجدد اللي كل أكلهم فاست فود , و بيبسي .. و حسبي الله و نعم الوكيل !!!

  • المثبتات أمر لا بد منه

لو كان الحمل عزيز او جاي بصعوبة , حتلاقي الزوجة هي اللي بتسألك على حاجة تساعد على تثبيت الحمل شوية , و هنا من الممكن وصف المستحضرات اللي فيها مثائل البروجيستيرون , زي يتيروجيستان كبسول .. و ده ممكن يؤخذ بالفم أو مهبليا في أول 3 شهور من الحمل بأمان بإذن الله .. و طبعا له بدايل كتير , زي برونتوجيست لبوس أو حقن ..

ultrogestan100-1

بعض الأطباء الجدد بيقولوا إن المثبتات مالهاش دور قوي في عملية الحفاظ ع الحمل الجديد , و إن البروجيستيرون الداخلي اللي بيفرز داخل الجسم , أقوى و أهم .. و عشان كده حنمسك العصاية من النص , و ندي المثبتات برضه عند الحاجة , و لكن حنهتم بالنقطة الجاية أكتر ..

  • ارتاحي على ضهرك يا شابّة 

من أهم النصايح اللي بنقدمها بشكل فطري للحامل في شهورها الأولى , هي أهمية الراحة .. ابتداء من إمكانية الحصول على أجازة من الشغل مثلا , و مرورا بعدم شيل التقيل في البيت , أو التنفيض مثلا , و انتهاء بمراعاة وجود كائن جديد داخل الرحم , ممكن يتأثر بالاهتزازات العنيفة اللي ممكن تحصل عند الجري مثلا , أو صعود السلم بسرعة , أو حتى عند الجماع !! .. المفروض إن الراحة تكون بالعقل برضه .. يعني صحيح إننا نرتاح على ضهرنا أغلب الوقت , لكن مش كل الوقت .. احنا مش في مستشفى برضه .. و ده عشان نساعد الدم على إنه يجري و يتحرك و ما يتجلطش في الأوعية الدموية .. يعني ما تمنعش مراتك إنها تروح تغسل إيديها في الحمام بعد الأكل مثلا , و تجيب لها الدورق و الطشت لحد عندها .. كده دي مش راحة .. ده فقع مرارة !!

  • المية .. المية .. و كمان مرة المية

المية تعتبر من أهم النصايح اللي بيتنسي تطبيقها و صاحبتنا قاعدة تتفرج ع التليفزيون في ملل طول النهار , لحد ما الزوج يرجع من الشغل !! .. مع إنها نقطة في غاية الخطورة .. لازم 3 لتر مية نقية يوميا (صيف شتا) عشان يحصل تروية كافية للجنين , و الدم ما يقفش عند المشيمة لا قدر الله .. و ما تخافيش من دخول الحمام كتير .. احنا لسه قايلين إن ده مهم عشان الدم يتحرك في الجسم أصلا , .. و بعدين انتي مش حتروحي الحمام جرْى يعني !! .. بجانب إن لسه الحمل ما كبرش بالشكل اللي يضغط ع المثانة , و يخلّيكي رايحة جاية ع الحمام فعلا ..

glass-of-water.png

المية النقية , عنصر في غاية الأهمية بالنسبة للحمل

  • الراحة النفسية

إوعى تضايقها أو تعصّبها أو تدوس لها على طرف .. دي خلاص حتجيب لك وليّ العهد بإذن الله .. و ده يخليها تتدلّع زي ما هي عاوزة !!! .. الزوج لازم يتقال له الكلام ده , عشان هرمون الحمل أحيانا بيؤثر على الحالة المزاجية للزوجة .. و فيه زوجات بيدخلوا فيما يسمّى “اكتئاب حمل” .. الشاهد إنك تقدر تساعدها بإنك تخليها تسمع الجلسة دي يوميا , و مفيش ضرر منها إن شاء الله ..

ماتنساش تبقى توشوش الزوجة بحذر , و تقول لها : بس برضه يا ريت ماتسوقيش فيها !! ..

  • بلاش أدوية من غير ما ناخد بيها خبر

أغلب الأدوية في الحمل ممكن تكون ممنوعة إما لنقص الدراسات و المعلومات بخصوص تأثيرها ع الحمل , أو لإن تأثيرها الضار معروف بالفعل .. و عشان كده , المفروض الزوجة قبل ما تاخد أى حاجة , نكون عندنا علم بيها , عشان الأمور في الموضوع ده , متغيرة بشكل مستمر , يعني ممكن حاجة كانت ممنوعة من سنة , النهاردة يكون مسموح بيها أثناء الحمل .. و تقديرية جدا كمان .. يعني ممكن الكتاب يقول على علاج معيّن إنه ممنوع أثناء الحمل , و لكن رؤية الدكتور المتابع لها تقول غير كده , .. زي مثلا لما تكون الزوجة عندها صرع , .. كل مضادات الصرع مش محبذة أثناء الحمل .. و لكن الحالة أحيانا بتحتاجها , و بنفضل حاطّين إيدنا على قلبنا طول فترة الحمل .. و دور الصيدلي المجتمعي كاستشاري هنا , أساسه إنه يبقى همزة الوصل العلمية و الدوائية بين دكتور النسا و دكتور المخ و الأعصاب اللي الزوجة بتتابع عندهم , و بنبقى كإننا ماشيين ع الحبل , و بنهري الزوجين نصايح للمرور بفترة الحمل , و من بعدها الرضاعة , بأقل خساير بإذن الله ..

لو كنت صيدلي , ما تترددش في إنك تتأكد من مدى أمان الأدوية اللي ممكن تحتاجها الحامل , من خلال موقع Drugs.com , و شوف المعلومات بدقة و تحديث كافي , عشان الغلطة المرة دي مش بتكلفك روح بني آدم واحد .. لكن اتنين !! ..

و ممكن تستثمر من وقتك ساعتين تقريبا , و تشوف المحاضرة دي .. للعتاولة فقط على فكرة

  • بلاش ملح ولا شطة

فيه أكلات و إضافات كده , بلاش منها عشان ما نزعلش .. و على رأسها الملح , تحديدا لو كان ضغطنا عالي أو طبيعي في بداية الحمل .. ربنا يكفيكي شر ارتفاع الضغط أثناء الحمل .. الدكتور الشاطر لازم يتأكد إن مفيش edema في القدمين في كل زيارة أو متابعة , عشان ده من أهم علامات ارتفاع ضغط الدم و تسمم الحمل لا قدر الله .. و برضه بلاش شطّة ولا حاجات تسبب إمساك خلال الحمل .. و كل ده عشان نتجنب الحزق في أول 3 شهور تحديدا .. بجانب إن الشطة و القرفة و اخواتهم , حاجات ممكن تزوّد انقباضات الرحم تلقائيا لا قدر الله !! .. و احنا بنتشعبط في رضا ربنا .. مش ناقصين البلاوي دي !! ..

  • بلاش أعشاب , الله يكرمك

مش معنى إن حاجة يكون أساسها عشبي , إنها كده تكون آمنة .. فيه أعشاب كتير لا يفضل إننا ناكلها أو نشربها خلال الحمل .. و على سبيل المثال لا الحصر : الحلبة / الينسون / الكراوية / الشمر / القرفة / العرقسوس / السنامكي / المريمية .. كل الكلام ده بلاش نشربه و كإنه شاي .. حتى الشاي المعتاد المفروض نقلل منه , عشان احنا خايفين من حدوث أنيميا برضه .. و القهوة و الكاكاو بلاش منهم برضه , عشان حينبّهوكي جامد .. أقول لك حاجة ؟؟!! .. اشربي نعناع .. اشربي ليمون .. اشربي لبن ..

  • ما تنسيش الألبان و الخضروات

للأسف احنا ما نقدرش ناخد كالسيوم و حديد من الصيدلية , قبل الشهر التالت و الرابع .. و عشان كده , سعادتك لازم تهتمي بمصادرهم الطبيعية في الأكل .. زي الألبان و الخضروات الورقية .. يعني نص لتر لبن ع الأقل يوميا .. و الخضار يكون نيّ قدر الإمكان , عشان تستفيدي من الحديد اللي فيه كويس .. , و بصراحة , الخوف المرة دي مش ع الجنين , لإنه حياخد حقّه منك تالت و متلت , لكن ممكن يسيبك يا عيني ع الحديدة .. أو حتى من غير الحديدة .. فليه نعرّض نفسنا لنقص الكلام ده , بشكل ممكن يمنعنا من حدوث الحمل التاني بشكل سليم لا قدر الله ؟؟!! ..

  • ابنك ولا شياكتك ؟؟

بلاش الشياكة قوي بقى أثناء الحمل .. احنا في مهمة قومية لمدة 9 شهور .. و دي فترة حرجة و ممتعة في نفس الوقت .. يعنى تهتمي فيها بصحتك و صحة طفلك القادم , مش بشكلك و مظهرك , اللي ممكن صبغات الشعر تخليه أفضل , لكن تسبب تشوّهات لجنينك لا قدر الله .. و الملابس الضيقة اللي ممكن تكتم نفس البيبي , تحديدا من الشهر الرابع .. سلامة ابنك أهم من حجم كرشك !! .. و مش حنوصّيكي بقى على تغيير كل أحذيتك ذات الكعب العالي , إلى أحذية بدون كعب على الإطلاق , عشان ضهرك ما يدعيش عليكي قريب .. تقدري تخزنيهم في النيش من تحت , بدل ما تتحسّري عليهم كل ما تشوفيهم جنب الباب !! ..

  • تابعي مع دكتور شاطر

مفيش حاجة اسمها “لسه مش وقته” .. طالما عرفتي إنك حامل , لازم تروحي تتابعي مع دكتور نسا شاطر , عشان يقيس وزنك و ضغطك و علاماتك الحيوية , و تبقي تعدّي عليه مع زوجك , كل 3 أسابيع أو شهر , بشكل دوري , عشان لو حصل مشكلة , يكتشفها بدري بدري .. و بالمناسبة , السونار مش لعبة , بالشكل اللي يضطرنا إننا ننفذه في كل زيارة .. الحمل كله ممكن يخلص بمرتين تلاتة سونار .. و بارك الله فيما رزق .. ما تتأخريش في زيارة الدكتور لو حسيتي بأعراض غريبة من أى نوع .. دكتور النسا المفروض يكون زي فرد من أفراد العيلة , بمجرد وصول خبر الحمل ..

article-prenatal-visits-315x315

احرصي على ميعاد المتابعة الدورية مع طبيبك

على فكرة , فيه اختراع برضه , اسمه التحاليل الدورية أثناء الحمل .. يعني مثلا , تحليل البول المفروض لو اتعمل كل شهر , و لقينا في مرة منهم صديد بنسبة كبيرة , كده لازم نعالج الحالة , حتى لو مفيش أعراض مرضية خالص !! .. أيييييوة .. ما يسمى بـ asymptomatic bacteruria مش بتتعالج في حالات كتير .. لكن في الحمل , لازم تتعالج بمضاد حيوي آمن أثناء الحمل ..

و ده شىء بندرسه بالتفصيل الممتع , في دورتنا Gewebiotics  , اللي حتتقدم في 3 محافظات عن المضادات الحيوية داخل الصيدلية , خلال أجازة نصف العام 2016/2017 إن شاء الله .. ممكن تلقي نظرة عليها هنا برضه

  • مش لازم ترجّعي على فكرة

مش كل الستات زي بعض في حملها .. و مش عشان جارتك كانت بترجّع في أول 3 شهور من حملها , يبقى حملك لازم يكون بنفس الشكل !! .. ده مش منطقي أصلا .. أعراض الحمل ممكن تختلف من واحدة للتانية , على حسب طبيعتها الجسمانية و استعدادها النفسي للحمل .. و عشان كده , الزتونة من النقطة دي , إنك ما تقارنيش نفسك بحد .. و تسمعي كلام المتخصصين اللي بتتابعي معاهم , سواء الطبيب أو الصيدلي .. و مفيش حاجة اسمها إن الحموضة سببها “شعر العيّل” اللي بيقف عند المعدة !! .. ده هري و أي كلام !! .. شعر العيّل أساسا بيكون لسه ما اتكوّنش في أول 3 شهور يا فالحة !! ..

  • ربنا يخلّي لنا النت 

مالكيش حجة خالص .. لازم تطوّري نفسك أسبوع بأسبوع , و تتعرفي على أهم مراحل الحمل من خلال النت .. و لكن بالمراجعة مع الطبيب و الصيدلي اللي بتتابعي معاهم .. مش كل معلومة ع النت ممكن يكون موثوق فيها .. و كلام صاحبات التجربة مش دايما بيكون سليم .. و لكن فيه مواقع سهلة و مبسطة , بتقدم المعلومة باللغة العربية .. زي سوبر ماما مثلا .. و فيه تطبيقات أندرويد كمان , بتديكي تحديثات شبه يومية , عن الحالة اللي المفروض حملك يكون عليها كل فترة .. زي حملي اليوم – بيبي سنتر , و غيره من البرامج المشابهة , و لكن حاولي ما تقعديش ع النت أو الموبايل كتير , عشان تتجنبي أى خطورة محتملة لهم ..

الشاهد من كل الكلام ده , إنهم مجموعة من النصايح العامة و البسيطة اللي ممكن نوجهها لأى صاحبة حمل جديد .. و بعد كده , كل حالة تقدر بقدرها .. تقدروا تشرفونا بالتواصل بخصوصها , على الأكونت الشخصي لينا , برسالة ع الخاص …

One response to “مبروك المدام حامل .. تعالى بقى اسمع الكلام

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s