إزاي تحقق أقصى استفادة من اشتراكك في ملتقى توظيفي ؟؟


تخيل معايا لو كان واحد من أهم أحلامك , هو إنك تسافر كندا , عشان تشتغل في مجال الأبحاث مثلا , و في يوم صحيت من النوم , و نزلت تقعد على كافيه , لقيت اللي قاعد ع الترابيزة اللي جنبك , بيتكلم في التليفون , و بيقول ببساطة : أيوة يا دكتور .. أنا حاخلص أجازتي في مصر , و آجي لحضرتك كندا تاني , عشان نخلّص البحث بتاعنا سوا .. تمام تمام .. مع السلامة ..

يا ترى إحساسك حيكون إيه ؟؟

يا ترى حتضيّع أي وقت , قبل ما تفتح معاه أي موضوع , أو ع الأقل تاخد رقم تليفونه , عشان تبقى تكلمه تاني في أقرب فرصة ؟؟

مستحيل طبعا إنك تضيّع الفرصة دي من إيدك ..

ده اللي المفروض يكون إحساسك ببساطة , لما تسمع إن كلّيتك حتعمل “معرض توظيف” , أو Job Fair , .. و لازم تجهّز نفسك لليوم ده بشتّى الطرق بإذن الله , و ده ببساطة , لإن حياتك المهنية , ممكن تتوقّف ع اليوم ده

يعني إيه ملتقى توظيفي ؟؟

يا سيدي ده معناه إن فيه ناس محترمين في جامعة ما , قرروا إنهم يجيبوا لك شركات الأدوية , و الأماكن اللي ممكن تشتغل فيها بعد التخرج , لحد عندك في الكلية .. عشان تقابلهم و تعرض عليهم الـ CV بتاعك .. و تزوّد من فرص التحاقك بالعمل بعد التخرج بإذن الله .. و ممكن تتدرب معاهم كمان و انت لسه طالب ..

بالمناسبة , اللي بيكونوا موجودين من الشركات , أغلبهم بيكون من مسئولي قسم الموارد البشرية , يعني الناس المسئولة عن التوظيف .. يعني ممكن تحفى عشان تقابلهم في إنترفيو بعد التخرج لما يعلنوا عن وظيفة في جرنال أو ع الفيسبوك .. تخيّل معايا , إنهم همّا اللي جايين لحد عندك في الكلية , لمدة يوم واحد أو أكتر , عشان يقابلوك و يتعرفوا عليك , و يشوفوا إذا كان ممكن تشتغل معاهم بعد التخرج , أو تتدرب معاهم قبله ولا لأ !! ..

الناس دي بتتجمع في ساحة أو خيمة أو قاعة كبيرة , جوه الجامعة أو براها بقى .. مش حتفرق .. و كل شركة بيكون لها الركن أو المكتب الخاص بيها , و عليه عدد من العاملين بيها .. و كل المطلوب منك هو إنك تمرّ عليهم , و تقدم لهم الـ CV بتاعك و تتعرف ع المختلف عندهم عن الشركات التانية , و إيه فرص التميز اللي ممكن تحصل عليها لو اشتغلت معاهم .. شوف الأنتكة يا راجل !! ..

إزاي أستعد للحدث ده ؟

أولا : اعرف ميعاد الملتقى كويس , و عدد أيامه , و فضّي نفسك ع الآخر , و لو فيه محاضرات على هامش الملتقى , استعلم عن المحاضرين اللي حيقدموها , و المواضيع اللي حتتناقش فيها ..

ثانيا : اسأل كويس ع الشركات اللي حتشارك في الملتقى , و ابدأ ابحث عنهم سواء أونلاين على جوجل و غيره , أو أوفلاين , من خلال المناقشات مع الحبايب اللي اشتغلوا فيها أو لا زالوا بيشتغلوا فيها حتى الآن ..

ثالثا : حضّر CV محترم , قابل للتعديل على آخر لحظة .. تقدر تشوف عنه أكتر من هنا ..

رابعا : اكوي هدومك – يفضل تكون رسمية قدر الإمكان – و احلق دقنك و ظبط قصّة شعرك , عشان تكون في أوسم فورمة ليك ..

خامسا : نام كويس قبل اليوم بهدوء و روقان ..

إزاي أتصرف في يوم الملتقى نفسه ؟

تخيّل نفسك في اليوم ده , كما لو دخلت مغارة أو كهف مليان كنوز .. الكنوز دي هي العلاقات اللي حتخرج بيها بشكل مميز من الملتقى .. حط في بالك دايما , إن سر نجاحك فيما بعد , حيكون بعلاقاتك الطيبة اللي ممكن تبنيها النهاردة .. و مفيش فرصة أكبر من كده في رأيي .. انت تقدر تجيب كرسي , و ترابط في مقر الملتقى براحتك , بانتظار الصبور , و ترقب الصقور , لحد ما تلاقي أحد المتواجدين من الشركات , السكة قدامه بقت فاضية , سواء في أول اليوم أو في نهايته , أو حتى منتصفه  .. و تبدأ تتقدم منه , عشان تعرف نفسك له , و تتعرف عليه , و تقدّم له الـ CV الخاص بحضرتك .. و يا سلام لو نجحت في إنك تحصل على الكارت الشخصي الخاص بيه , و اللي ممكن من خلاله تتواصل معاه ع الواتس مثلا فيما بعد , أو تلاقيه بسهولة ع الفيس , .. و مفيش أسهل من إنك تقول 3 عبارات في بداية الكلام مع أي حد , عشان تكسب ثقته و تعاطفه ..

  • أنا باحلم إني أكون ناجح زي حضرتك .. ممكن حضرتك تدلني على أول الطريق ؟
  • إيه أهم 5 صفات أو مميزات أو مهارات لازم تكون عندي , عشان يكون لي مكان في شركة حضراتكم ؟
  • هل ممكن أنول شرف إننا نكون أصدقاء ع الفيسبوك  , عشان أتعلم أكتر من حضرتك ؟

سواء تمت الإجابة على أسئلتك في نفس الوقت , أو تمت فيما بعد ع التليفون أو الواتس مثلا , فانت كسبت خبرة كبيرة جدا .. و بقى عندك علاقة تقدر تقويها , بناس بتشتغل في أحد شركات الادوية .. و العمل عليها بشكل مستمر و متواصل , ممكن يكون سبب في نجاحك و تنقلك الواثق في طريقك المهني من خطوة لخطوة بإذن الله ..

أنا سمعت إنهم مش بيقبلوا حد , و جايين يلمّوا بياناتنا و بس .. هل ده صحيح ؟؟

برغم صعوبة تصديق ده , و عدم منطقيته من الأساس , و لكن اسأل نفسك : انت خسران إيه لو قرّبت ؟؟!! .. مش حتخسر حاجة , و لكن حتلاقي نفس اللي قال لك الإشاعة دي , واقف قدّام أحد الشركات بيقدم الـ CV بتاعه برضه , عشان الفرصة ما تضيعش عليه .. و لكن هو كان عاوز يفتي قدامك و خلاص !! .. و بعدين ماتنساش إن بياناتك كده كده موجودة في عشرومية حتة , من أول فيسبوك و جوجل , لحد آخر مطعم طلبت من عنده أي أوردر ديلفري .. و انت اللي بيكون عندك فيما بعد حرية التصرف في قبول أو رفض أي عرض حيعرضوه عليك ..

طب انا شغفي مش إني أشتغل في شركة أدوية بعد التخرج .. أعمل إيه بقى ؟؟

على راسي كلامك .. لو كنت حددت شغفك خلاص , و نويت على أي كارير تاني , تأكد إنك لسه محتاج تصقل مهارات , ممكن تلاقيها في تدريب صيفي في أحد الشركات .. زي التفاوض مثلا .. زي مهارات التقديم .. زي العمل تحت ضغط .. زي العمل في فريق .. كل الحاجات دي مش لازم تكتبها في الـ CV بعد كده لو حتشتغل في مصنع مثلا , و لكن حتلاقيها بتفيدك كـ معرفة تراكمية , و خبرات ممكن ما تلاقيهاش في مكان تاني .. فماتضيّعش الفرصة دي الله يكرمك , لمجرد إن موضوع الشركات و الـ Medical Rep مش مستهويك ..

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s