نصائح اقتصادية لن تتوقعها


1
أغلب الخبراء الاقتصاديين دلوقتي , حيبدأوا ينصحوا بمجموعة من القوالب الجاهزة من النصايح المعروفة تلقائيا , لو بصينا تحت رجلناا .. و لكن لعّيبة الشطرنج , و اللي بيعرفوا يبصّوا أبعد شوية , ممكن يكون لهم رأي تاني !! ..
.
1. شد الحزام .. بس مش قوي ..
.
من الطبيعي في الفترة دي , إنك تبدأ تقلل مصروفاتك اليومية أو الشهرية , و ممكن كمان تبدأ في التوفير بشكل جنوني .. و لكن الوضعع الحالي بظروفه الواضحة , مش حيتحل بمجرد التوفير .. بل ممكن يكون التوفير النهاردة , هو محض الخسارة ..
.
المقصود إن المصري بيوفّر بتقنية الاسترخاص .. اللمبة تبوظ , فيشتري اللمبة أم 4 جنيه , بدل اللمبة أم 27 جنيه .. في حين إن اللمبة أم 4 جنيه , ممكن تشتغل شهرين و تتحرق , لكن أم 27 جنيه , بتشتغل بالسنين زي الفل !! .. يبقى التوفير مع أم 27 !! .. واصلة ؟!! ..
.
التوفير معناه إعادة تقييم الاحتياجات, و دي خاصة بكل شخص على حدة .. يعني ممكن النوتيلا تكون وقود إبداعك المستمر , و لكن عندد غيرك مجرد رفاهية يمكن الاستغناء عنها .. لو النوتيلا مهمة بالنسبة لك , دعبس عليها , طالما ممكن تحسّ بالاكتئاب من غيرها ..
.
2. إياك و القروض و الجمعيات ..
.
و مع ذلك , لما تيجي تدوّر على حل لمشكلتك المادية حاليا , ابعد عن الاقتراض بأي شكل من أشكاله .. أقول لك حاجة مفاجئة ؟؟!! … التوجه لجمعية خيرية لطلب العون و المساعدة – في رأيي – أكرم من الاستدانة بمنتهى الحرج من صديق , أو الدخول في جمعيات , ممكن تشفط راحة بالك , كل ما تحطّ راسك ع السرير .. بل إنك ممكن تدخل 3 جمعيات إضافية في وقت واحد , عشان تسد ديون جمعية قبلهم !! .. الدين بيقفل كل سكك التفكير اللي ممكن تهديك لمصدر دخل إضافي سليم .. و كل اللي بيحصل , هو إنك بتنجرف في تيار السلف و الاقتراض , و ممكن تدخل في دوامة الربا نفسه لا قدر الله !! ..
.
3. سافر .. بس احسبها أولا على قد ما تقدر ..
.
عشان خاطري .. لو نويت تسافر , اعرف أولا إن الجنة مش في الخروج و خلاص من البلد .. و ده ببساطة بسبب شوية مسلمات , ..
أولها إن كل بلد فيها الغني و الفقير .. اسأل نفسك عن إزاي حتكون غني بإذن الله ..
و ثانيها إنك لما حتسافر , مش حتاخد جنسية البلد اللي حتروح لها تاني يوم , و لكن حيبقى اسمك أجنبي أو مهاجر أو غريب , .. و علىى هذا الأساس , وطّن نفسك على إن الموضوع مختلف – و لو قليلا – عن أحلامك الوردية ..
و ثالثها دوّر ع القيمة اللي حتقدر تقدمها بشكل مختلف , قبل المميزات اللي ناوي تحصل عليها .. لإن أرض الله واسعة و كل حاجة , وو لكن دلوقتي مفيش دولة ممكن تقبل بيك بدون ما تعرف كويس إنت ممكن تفيدها بإيه ..
و رابعها , تأكد إن الأزمة اللي بنمر بيها حاليا , فيه زيها كتييييير في دول عمرك ما كنت تتخيل إنها تمر بأزمات .. و لكن ربنا يستر ..
.
4. ابدأ مشروعك الخاص .. خليك في القشطة ..
.
اللي بيحصل في مصر حاليا , أنا باشبّهه – بلغة الصيادلة – زي لما الـ emulsionn يفصل منك بسرعة .. و تلاقي قدّامك طبقتين من سائلين , صعب إنهم يمتزجوا مهما رجيت الإزازة .. الشاهد إنهم قبل كده كانوا داخلين في بعض شوية , أو كان بيبقى فيه طبقة متوسطة .. .. أو زي اللبن , لما تسيبه شوية في التلاجة , فتلاقيه عمل قشطة فوق كده .. و الباقي تقريبا بيكون لبن خفيف , منزوع الدسم !! .. الحاصل حاليا بقى إن الـ emulsifier بايظ , أو حد بيخلي التركيبة تفصل بشكل أسرع من المتوقع أو المطلوب ! .. المهم إنك تخلّي الهدف بالنسبة لك , هو الحفاظ على نفسك في منطقة القشطة .. و ده عن طريق إنك تبدأ مشروعك الخاص , بعد ما تكون درست معايير نجاحه كويس , و اتأكدت إنه حيكون مفيد و قوي بإذن الله … و المشروع مش لازم يكون بتقديم منتج .. و إنما بتقديم خدمة , من الآخر .. دور في مجال الـ #freelancing !! ..
.
5. ماتنساش ربنا و حقه عليك ..
.
في الأوقات العصيبة اللي زي كده , ما تنساش تصلّي .. ما تكسّلش عن وردك اليومي من القرآن و الأذكار .. ما تستتقلش الصيام .. إحناا في أقصر أيام ممكن تصومها بدون عناء .. و ما تفتكرش إن الموضوعين منفصلين عن بعض .. حفاظك ع الحاجات دي , حيخليك متوصل بقوة أعلى بكتيييييييييير من القوة السلبية الجارفة اللي ممكن تكون بتشدّنا كلنا لتحت .. و ده اقتصاد برضه , .. و بالمناسبة , كل ما تتصدّق أكتر , حتتطمن أكتر .. و بجد أنا ناوي أكرر تجربتي في الـ #CharityChallenge بإذن الله ..
.
6. ابعد عن المحبطين قدر الإمكان ..
.
اللي تلاقيه نازل و بيغرق في طبقة اللبن الخفيف , و استسلم و بطّل يعوم , حاول تنصحه مرة أو اتنين .. و لو ماتنصحش و غيّر طريقةة تفكيره , سيبك منه , بدل ما يشدّك معاه .. دي مش أنانية , و لكنها عدوى نفسية و بتسري في المجتمع بسرعة الضوء !! .. احمي نفسك منها , و تحصّن مع العاقلين المتفائلين أصحاب الخطط البديلة الناجحة .. خلي سوء الأوضاع يحمّسك و ما يحبطكش .. الحزن و الهم و البكاء لن يفيد بأي شىء إلا التثبيط ..
.
7. حط لنفسك فترة كافية تبدأ من بعدها الجري ..
.
أعرف أشخاص ناجحة , حطّوا لنفسهم مدة زمنية محددة , و قرروا من بعدها الانطلاق بسرعة خرافية .. الناس دي قليلة , و لكن لماا انطلقوا , ماحدش عرف يسبقهم .. قفلوا على نفسهم بالـ 6 شهور , و قرروا تنفيذ مهام محددة , محسوبة بشكل صارم , و عرفوا إيه اللي حيستثمروه من وقت و مال و جهد , عشان يقتنصوا الفرصة .. بل يصنعوها .. الناس دي عمالقة حاليا , و غير متأثرين بأي أزمات .. و الأمثلة موجودة , و حنسردها قريبا بإذن الله ..

.
#بقلمي
#مش_اقتصادي
#ولا_بافهم_في_الاقتصاد_أصلا
#ماجبناش_سيرة_باقة Learn Pharmacy At Home أهو
.
أحمد الجويلى

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s