قواعد “اختيار دورة الأجازة” الأربعون


1

قواعد “اختيار دورة الأجازة” الأربعون : ..
.
1. اختار الحضور في الدورة اللي بتتكامل مع Career ـك المنتظر بعد التخرج 💼
2. لو تعرف المحاضر من قبل كده , خير و بركة .. لو ماتعرفهوش , اطلب محاضرة مجانية مسجلة , و اتفرج عليها كلها 📺 , عشان تقرر كويس ..
3. ماتقيسش غلو أو رخص الكورس , بسعر الساعة بالجنيه 💰 , و لكن بحجم استفادتك المتوقعة بعد انتهاء الدورة .. (غلطة شائعة) ..
4. ماتجريش ورا الشهادات و الاعتماديات و الأختام 💴 .. كل ده بلح لا يفيد في الـ interview (غلطة تودي في داهية) ..
5. مش عيب ولا حرام 👽 لو حجزت في أكتر من دورة خلال الأجازة , سواء لنفس المحاضر أو لأكتر من واحد ..
6. تواصل مع منظمي الدورة اللي انت بتفكر فيها  , و اعرف كل التفاصيل بنفسك
7. تحرر من ثقافة “السير مع القطيع” 🐔 , و خلّي اختيارك على معايير سليمة , مش لمجرد إن الناس بتشكر في كورس معيّن , و رايحة تحضره , يبقى خلاص !! ..
8. لو خلاص نويت على كورس معيّن أو أكتر , بادر بالحجز 📞 , قبل ضياع الفرصة .. و اقطع على نفسك برضه بكده , خط الرجعة و التسويف و التردد بين الكورسات المعروضة ..
9. اختار من يقدم لك 🍲 (علم موثق + خبرته الشخصية + أسلوب ممتع + مساحة للتفكير) .
10. طول أو قصر حجم الدورة , أو عدد المحاضرين فيها , مش هو معيار استفادتك منها ..
11. لو ماتعرفش المحاضر , اطلب محاضرة مجانية مسجلة له  , عشان تقرر كويس .. لو تعرفه من قبل كده , خير و بركة ..
12. النت مليان بالعلم , و مجانا 🚾 .. و لكن قليل جدا اللي تلاقيه بيحقق القاعدة رقم 9 ..
13. احجز في الدورة اللي لو اتلغت , ممكن فلوسك ترجع لك بدون مماطلة أو تسويف 💲 ..
14. ماتسمعش كلام صاحبك عمياني , لما يقول لك على كورس , و في الآخر تكتشف إن له عمولة من وراه 👔 .. قرر بنفسك .. راجع القاعدة رقم 11 ..
15. تأكد إن الدورة اللي حتحضرها بنفسك 🔨 , هي اللي حتستفيد بيها أكتر من 1000 دورة , ممكن أصحابك يقولوا لك منها المختصر غير المفيد !! ..
16. اسأل عن تاريخ المحاضر – إن تيسّر – و اتأكد إنه مارس اللي بيشرحه 💪 , ولا ناقله من مراجع و كتب نظرية و خلاص .. والله بتفرق جدا !!
17. ركز في النقطة دي شوية .. في أي كورس , انت مش حتصرف فلوس بس 💴 عشان تحضر , و لكن حتضحي بـ (وقت + مجهود) 🔥 , و دول أغلى من الفلوس بكتير .. فلو لقيت كورس لمدة طويلة , بفلوس قليلة , افتكر إنك حتحط فيه (وقت + مجهود) كتير , كان ممكن تستفيد بيهم في حاجات تانية أكتر ..
18. ماتسمعش كلام صاحبك , لما يذمّ لك في كورس لأي سبب , و في الآخر تكتشف إن له عمولة من ورا كورس منافس 🐺 .. قرر بنفسك , و رااااجع أم القاعدة رقم 11 ..
19. ماتسمعش كلام صاحبك الأنتوخ أو الفاقد 🐻 , اللي حيقول لك إن كل ده مالهوش لازمة , و حتتعلمه بالخبرة لما تنزل تشتغل .. ده التعريف المختصر لـ (صاحب السوء) ..
20. ماتسمعش كلام صاحبك اليائس فاقد الأمل 🐮 , اللي يقول لك إن مفيش فايدة من العلم ده كله , و في الآخر الناس حيقولوا علينا بقالين و بياعين برضه .. ده (صاحب سوء) أخطر ..
21. أقول لك ؟؟!! .. ما تسمعش كلام صاحبك خالص 🐰 .. قرر بنفسك 8| .. 11 هه 😉 ..
22. ماتسمعش كلام الست الوالدة 👸 , لما تقول لك “ما هو كل ده زمانك أخدته في الكلية” .. أو لما تصعب عليها و تقول لك في حنّية “يا عيني يا ابني .. هو همّ الدراسة وراك وراك ؟؟” ..
23. ماتسمعش كلام السيد الوالد 👲, لما يقول لك “مفيش فلوس” .. انزل اشتغل في أي حتة , و اكسب من عرق جبينك .. انت بقيت راجل ملو هدومك خلاص ..
24. أقول لك برضه ؟؟!! .. ماتسمعش كلام حد خالص .. (أنا حاسس إني قاعد في سبوع !! =D ) .. 👶
25. بلاش تستنصح و تقول إنك حتبقى تاخد الـ record أو الـ draft للكورس من صاحبك , الحاجات دي آخرها يتبص عليها في 3 دقايق 👀 , و تتركن في درج المكتب , أو فولدر “هام جدا” ع الـ desktop , و ابقى قابلني لو رجعت له تاني !! .. الـ Bookmarks تشهد 😉 ..
26. اختار الدورة , اللي ممكن تطلع منها بأقصى استفادة , حتى على مستوى العلاقات المفيدة في الشغل .. ممكن تلاقي ناس تجيب لك فرص عمل 💡 زي الدهب ..
27. مش عشان محاضر بقى له في المهنة 7 سنين , يبقى لازم يكون أفضل من اللي لسه بادئ فيها , و يعتبر “ابن امبارح” 👨.. ماتحكمش بالشكل ده .. عليك و ع القاعدة رقم 11 ..
28. لو شفت محاضرة مجانية , و لقيت طريقة التقديم مملة أو غير جذابة , ماتشكّش في نفسك 👊, ولا تفتكر إن عشان المحاضر ده مشهور , تبقى انت اللي غبي (والعياذ بالله) .. لما مدرسي Steve Jobsاشتكوا لابوه من اداء ابنه السيء في المدرسة، ابوه دافع عنه وقالهم:
“If you can’t make him interested, it’s your fault”.
29. مفيش كورس مناسب للجميع .. و لكن على حسب احتياجاتك و طموحاتك , ممكن تدرس الكورس اللي يكمّل احتياجاتك دي في وقت مناسب .. و تحقق من خلاله طموحاتك أسرع .. 
30. قيّم بدرجة من 10 (بعد البحث الجيد) كل دورة من حيث 5 معايير (المحاضر / المحتوى / القاعة / الشهادة / السعر) .. و اجمع كل الدرجات 📝 , و على أساسها حدد ..
31. أخلاق المحاضر و أسلوبه لا يقلّوا في الأهمية عن قوته العلمية و خبرته المهنية ..
32. ماتختارش الحجز في دورة , عشان فيها Coffee Break  أو حتى Lunch Break 🍞 !
33. اختار اللي يحترمك و يحترم مهنته , مش يحتقرك و يعقدك من أم الشغلانة !! ..
34. اختار اللي يديك كلام محدد , ممسوك باليد , مش كلام عايم و شحنة حماس و خلاص !!
35. اختار اللي مايتكسفش إنه يقول إنه “مايعرفش” , أو إنه غلط امبارح في معلومة ..
36. اختار اللي عارف كويس إنه جاي يناقش معاك العلم , بدون تلقين أو إملاء !! ..
37. اختار اللي مايضحكش عليك بفكرة إنه رخيص , بدل ما تقع في نفس المصيدة زي كل سنة !! ..
38. اختار اللي يراعي ربنا فيك , و يديك المعلومة , أو يدلّك عليها , بما يرضي الله
39. اختار اللي ماعندهوش حاجة يخبّيها , و بيرحب بيك في أي وقت ..
40. اختار اللي تقعد معاه , تلاقي نفسك بتبتسم أو بتضحك ..
.
#اتعلم_صح_باستمتاع
#المجد_للمبادرين
#أحبكم_في_الله
#شير_x_الخير
.
أحمد الجويلى

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s