إزّاي تبّطل سجاير | بدون أدوية | فى 27 يوم فقط ؟؟


عدد كبير من الأمراض اللى بتقابلنا داخل الصيدلية , بيكون الحل السحرى للتغلب عليها هو ‫#‏التوقف_عن_التدخين‬ , و بنقابل مرضى كتير يسمعوا النصيحة , و ما يعرفوش يطبقوها !! .. و يقولوا فى حسرة “يا ريتنى أعرف أبطّل يا ابنى !!” , فى المقال ده بنقدم لك الحل اللى تقوله لهم إن شاء الله .. من غير ما يبدأوا يشربوا نعناع يغيروا بيه طعم السيجارة , فتكون النتيجة بعد فترة ..
.
.
.
إنهم يبطلوا يشربوا نعناع😀 ..

cigarettes

>>>

عشان تبطّل سجاير , لازم تعرف فى البداية , إن النيكوتين (اللى موجود فى السجاير) بيتم إفرازه بشكل طبيعى من المخ , عند غير المدخنين .. و لكن عند المدخنين , بيبدأ المخ يعتمد على النيكوتين اللى موجود فى السيجارة .. و ده السر اللى بيخلّى المدخّن ما يقدرش يبطّل التدخين مرة واحدة .. , عشان مخه بيرفض يرجع لطبيعته فى إفراز النيكوتين بكميات محسوبة و دقيقة , عشان يساعده على النشاط خلال يومه ..

و اللى بيبطّل سجاير بشكل مفاجئ , بيفضل فى أغلب الأحيان مشتاق لطعم السيجارة و مذاقها , بشكل بيخلّى أغلب المتوقفين عن التدخين بشكل مفاجئ , يرجعوا له تانى , بشراهة أكتر من الأول !! ..

و عشان كده , برنامج الـ 27 يوم , بيعتمد على إنك تعرف انت بتشرب سجاير قد إيه كل يوم .. و تبدأ تقلل كل يوم سيجارة واحدة عن اليوم اللى قبله , بشكل يخليك (لو كنت حاليا بتشرب علبة واحدة فى اليوم) , تدخّن سيجارة واحدة , بعد 20 يوم من النهاردة ..

يعنى النهاردة انت بتشرب 20 سيجارة .. بكرة حتشرب 19 سيجارة بس (متهيأ لى سهلة .. مش كده ؟؟) .. و بعده حتشرب 18 سيجارة .. , و هكذا .. مفيش أسهل من كده ..

بعد 20 يوم من النهاردة , حتكون ماشى على أهم سيجارة فى يومك حاليا .. يعنى اللى بتشربها أول ما تقوم من النوم , أو اللى بتشربها مع أول كوباية شاى .. حتفضل ماشى عليها أسبوع واحد بس يا زعيم .. انت كده خلاص على فكرة , مش محتاج لها , إلا بشكل نفسى بس .. لمجرد إنك متعود من قبل كده على إن السيجارة بين صوابعك .. و حتلاحظ إنك حتزهد فيها – إن شاء الله – خلال الأسبوع ده , لدرجة إنك ممكن تفتكر إنك لسه ما شربتهاش قبل ما اليوم يخلص بشوية !! ..

بعد أسبوع – و انت ماشى على سيجارة واحدة – حتيجى قدّام حبايبك أو عيلتك , أو معارفك اللى بتحبهم , و تمسك قدامهم السيجارة , و تقول لهم بكل سهولة : السيجارة دى اتحكمت فى حياتى , طول الفترة اللى فاتت .. السجاير دى أنا مش حارجع لها تانى .. و لو رجعت لها , أبقى ……….. (و اختار لنفسك وصف مناسب يخلّيك متضايق لو أهلك قالوه لك و انت ماسك السيجارة تانى لا قدر الله) .. و ارمى السيجارة بعدها قدامهم , إلى غير رجعة إن شاء الله .. و دوسها برجلك لآخر مرة ..

و اللى حصل ده , حيخلق عندك تحدى جواك , فى إنك ما ترجعش للسجاير تانى مهما حصل .. بإذن الله ..

البرنامج ده عشان يتم على خير , لازم له شوية شروط ..

أولا : اعرف كل يوم حتشرب قد إيه .. بالظبط .. تنزل بعدد السجاير اللى انت عارفه من البيت , و ما ترجعش إلا و همّا خالصين .. يعنى ما تشربش أكتر منه ولا أقل منه .. عشان المخ يتعوّد على إن نسبة النيكوتين اللى بتدخل له يوميا , بتقلّ بالتدريج , فيبدأ يفوق , و يحسّ بإنه لازم يقوم يشتغل شوية بقى ..

ثانيا : لا تعزم و لا تتعزم (على سجاير طبعا) .. عشان ما تتلخبطش .. و ما تجيش على آخر اليوم , تقول لنفسك , هو انت عزمت على كام واحد ؟ .. و اتعزمت من كام واحد ؟ .. فتتلخبط و تسيب الموضوع على بعضه !! ..

أمّال لو حد عزم عليك , تقول له إيييييييه ؟؟ .. مش حينفع تقول له إنك بطّلت سجاير .. و ده عشان هو كان لسه شايف السيجارة فى إيدك من شوية .. و عشان كده , الأفضل إنك تقول له : أنا ماشى على برنامج الـ 27 يوم , عشان أوقّف بيه التدخين .. و تبدأ تشرح له الطريقة , ينوبك ثواب ..

ثالثا : ابدأ مع واحد صاحبك بيشرب سجاير برضه .. صاحبك الأنتيخ يعنى .. زميلك فى الشغل أو فى الدراسة .. المهم ما تبدأش لوحدك .. , عشان تقووا بعض .. و لو واحد فيكم “خسّع” , التانى يفكّره بالتحدى .. لو واحد جه يقع , التانى يشدّه , و يمسك فيه كويّس !! ..

رابعا : حدد كل يوم بالظبط حتشرب قد إيه , لحد ما تبطّل ! .. و لو السما انطبقت على الأرض , ما تشربش أكتر أو أقل من اللى حددته لنفسك .. لكن لو فى يوم كان المفروض تشرب مثلا 12 سيجارة , فاتنرفزت أو اتضايقت , فشربت 15 سيجارة .. ده مش معناه فشل البرنامج .. لكن معناه إن اليوم اللى بعده , المفروض تشرب 14 سيجارة (مش 11 بس) .. عشان نفضل نقلل كل يوم سيجارة واحدة ..

أما لو كنت دلوقتى بتشرب علبتين مثلا .. فالموضوع سهل برضه .. بدل ما حتقلل كل يوم سيجارة , حتقلل سيجارتين .. و برضه بعد 20 يوم , حتلاقى نفسك ماشى على سيجارة واحدة أو اتنين فى اليوم .. تمشى عليهم لوحدهم أسبوع .. و بعد كده توقف بسهولة ..

المفاتيح السحرية لنجاح البرنامج ده , هو الالتزام و الصبر و التدرّج .. و ده أهون بكتير من إننا نلجأ لأدوية غالية بمئات و آلافات .. أو إننا نصرف أكتر من كده على مضاعفات و آثار جانبية تظهر بسبب السجاير , من أول العقم لحد الأورام السرطانية فى الرئة و الكبد مثلا ! ..

خلّيك فاكر دايما إن جسمك أمانة معاك , .. ربنا عطاهولك كوسيلة , عشان تعبده بيه .. كونك تدمّره باستخدام سجاير أو مخدرات أو كحوليات .. فانت كده كإنك بتقول لربنا : الأمانة اللى معايا أنا مش مقدرها , أو مش مهتم بيها ..

افتكر كمان قريبك أو صاحبك , اللى مات فى المستشفى بسبب السجاير .. أو اللى فلّس و دخل السجن , نتيجة إنه كان بيشرب فى اليوم علبتين و تلاتة سجاير , و لو كان حوّش تمنهم , كان زمانه بقى مليونير !! .. افتكر لون شفايف عمّك أو خالك اللى بيشرب سجاير من 20 أو 30 سنة .. بقت غامقة و لونها مش طبيعى .. ولّا سنانه , اللى بقى لونها بنّى , من كتر السجاير !! .. أتوقع إنك مش عاوز تبقى زيه فى يوم من الايام !! ..

البرنامج ده تم تطبيقه مع عدد كبير جدا من المدخنين , من عام 2002 , و لحد دلوقتى .. و نسبة نجاحه أكتر من 80% .. و ناس كتير بتدعى لنا بفضل الله , لمجرد إنها عرفت تبطّل سجاير من خلال التزامها بيه ..

ملحوظة / لو لسه مش ناوى تبطّل , أو ما عندكش العزيمة لكده .. اتفرج ع الفيديو ده

انت كمان تقدر تبطّل سجاير من النهاردة .. مالكش حجة يا بطل .. لو كنت انت المقصود .. أو لو كان اللى بيدخن فى البيت هو الوالد أو الأخ , أو غيرهم من المعارف .. انسخ الكلام ده و اطبعه له .. أو اعمل له شير دلوقتى , و اعمل له منشن فيه .. أو ابعت له رابط المقال فى رسالة ع الخاص .. المهم إن الكلام ده ما يقفش عندك ! ..

الكلام ده طلع من قلبى .. أتمنى إنه يوصل لقلوبكم .. و أتمنى إنه يتحول لحملة قوية , نساعد بيها أكبر عدد ممكن من اخواتنا و قرايبنا اللى بيدخنوا .. يا ترى مين حيساعدنا ؟؟؟

مع تحياتى ..

د. أحمد الجويلى

5 responses to “إزّاي تبّطل سجاير | بدون أدوية | فى 27 يوم فقط ؟؟

  1. لا لازم تكون لوحدك علشان بتقع انت واللى معاك فى نفس الوقت وترجعوا تشربوا تانى عادى او اكتر
    لازم يكون التحدى مع نفسك هتقدر تغلب نفسك ولا هى اللى هتغلبك وتبقى ……… (زى مانت عايز تشتم بقا )
    ولازم تعرف ان الله لا يغير ما بقوم حتى يغيروا من انفسهم
    وان النفس اماره بالسوء
    فلازم تبقى اقوى من نفسك
    وتعرف ان السجاير بتضيع اهم 3 اشياء فى دنياك واخرتك
    عمرك وصحتك ومالك
    او 3اسئله بتتسألهم اول مايقفلوا باب القبر عليك
    وكل الكلام عن تجربه
    انا كنت بشرب سجاير بردو لمده 5سنين بعدل متوسط علبه كل يوم
    وانا دلوقتى بطلت بنسبه 99%
    اى بشرب سجاره كل يومين تلاته

  2. انا مش عارف انا بشرب قد ايه بظبط وبطلتها فى رمضان 9 ايام ورجعت تانى بس هحول ابداء بعلب تمام كلامى ولا فى تعليق متشكر لحضرتك وهدعيلك جدا ومعنديش صديق يكون معايا علشان اغلب الوقت لوحدى

  3. المشكله ف السجاير مش النكتين المشكله انها تعود يعني ف الشغل بتشرب و ف البيت وف الشارع وع القهوه في اي حته مش بحس بصداع او قريفه انا بحس ان ف حاجه نقصاني

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s